Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20 12. november 2001-imeersumi, Inatsisartut inatsisaanni nr. 1, 1. april 2020-meersutigut allanngortinneqartumi, §§ 2 a, 12 a, 21 a aamma 21 b aamma § 29 imm. 2 aamma imm. 3 naapertorlugit aalajangersarneqarpoq:

Atuuffia

  § 1.  Nalunaarut Kalaallit Nunaannut angalasunut atuutissaaq.

Atuuffiata killilerneqarnera

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.
  Imm. 4.  Inunnut Peqqinnissaqarfimmi sulisunut Nunatta Nakorsaaneqarfia imm. 1 naapertorlugu aalajangiisassaaq.
  Imm. 5.  Inunnut imm. 2-4-mi taaneqanngitsuni sulisunut, Nunatta Nakorsaaneqarfia imm. 1 malillugu aalajangiisassaaq
  Imm. 6.  Nunatta Nakorsaaneqarfiata nalunaarummi matumani aalajangersakkat ilaat tamaasaluunniit peqqinnissaqarfimmi katsorsarneqartunut imaluunniit, pissutsit allat peqqinnissakkut sulianut immikkut illuinnartut atuutsillugit, inunnut ataasiakkaanut atuutsinneqassanngitsut aalajangersinnaavaa.
  Imm. 7.  Nalunaarut eqqartuussisut pissaanermik atortitsinerannut atuutinngilaq.

Nunatsinnut angalasut

  § 3.  Angalaniartut 12-nik sinnerlugilluunniit ukiullit piumasaqaatini tulliuttuni ataaseq aatsaat naammassippassuk timmisartumi imaluunniit umiarsuarmut Kalaallit Nunaannukartussamut tikissinnaatitaapput, tak. Imm. 4:
1)  Inuit Kalaallit Nunaanni najugaqartut imm. 2 naapertorlugu najugaqassutsimut uppernarsaasiissapput. 
2)   Inuit Kalaallit Nunaanni najugaqanngitsut Covid-19-imut tamakkiisumik akiuussusertissimassapput tamatumunngalu uppernarsaasiissallutik. Akiuussutissat Europami nakorsaatinik nakkutilliisuniit, European Medicines Agency-mit (EMA-mit), akuerineqartut kisimi akuerineqarput.
  Imm. 2.  Najugaqartut tassaapput inuit aalajangersimasumik nunatsinni najugaqartut, aalajangersimasumik najugaqalernissaq siunertaralugu maanga nuuttut kiisalu inuit maani nunami piffissami sivisuumi suliartortut.
  Imm. 3.  Imm. 1-imi piumasaqaat apeqqutaatinnagu, imm. 5 naapertorlugu umiarsuarnut immikkut akuersissuteqanngitsunut inerteqqutaanngilaq:
1)  Teknikkimut tunngatillugu talittoqassappat, inuttanik ilaasunilluunniit nunamut niusoqassanngilaq, imaluunniit illoqarfimmiit/nunaqarfimmiit inunnik umiarsuarmut ikisoqassanngilaq aamma
2)   umiarsuarmi ajornartoornermi, motorip ajutoornerani, ikuallattoornermi assingusumilluunniit pinasuartumik pisoqarnerni tulakkasuarneq.
  Imm. 4.  Aalisariartaatiniittut sulinerminnut atatillugu tikinniartut imm. 1-imi piumasaqaammi ilaatinneqanngillat. 
  Imm. 5.  Nunatta Nakorsaaneqarfia imm. 1-mit aamma 2-mit immikkut akuersissuteqarsinnaavoq. 
  Imm. 6.  Imm. 1-ip maleruarneqarnissaata qulakkeernissaa angallassissummik piginnittup akisussaaffigaa.

  § 4.  Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup kingorna ullut 14-it qaangiunneranni tamanna uppernarsarsinnaappagu. 
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

Inuit pillugit paasissutissanik suliarinninnerit

  § 5.  Nalunaarut una naapertorlugu akiuussusertittoqarsimaneranik misissuinissaq aamma inunnut tunngasut paasissutissat peqqissusaanullu tunngatillugu paasissutissat ujartorneqarnissaat pisariaqarsinnaapput.

Pineqaatissiissutit

  § 6.  § 3, imm.1-mik aamma 6-mik unioqqutitsisoq Pinerluttulerinermik Inatsit naapertorlugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisitigut pisussaatitaasut pisinnaatitaasullu) pinerluttulerinermik inatsimmi kapitali 5-imi malittarisassat naapertorlugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsinermut atorunnaarsitsinermullu aalajangersakkat

  § 7.  Nalunaarut ulloq 2. marts 2022 atortuulersinneqarpoq.
  Imm. 2.  Nalunaarut malillugu killilersuinerit, inerteqquteqarnerit, peqqusinerit il.il. 2. juunip 2022 ilanngullugu atuutissapput.

Namminersorlutik Oqartussat, ulloq 25. februaarip 2022

Kirsten Fencker
Peqqinnissamut Naalakkersuisoq

/ Nike Berthelsen