Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20 12. november 2001-imeersumi, Inatsisartut inatsisaanni nr. 1, 1. april 2020-meersutigut allanngortinneqartumi, §§ 2 a, 12 a, 21 a aamma 21 b aamma § 29 imm. 2 aamma imm. 3 naapertorlugit aalajangersarneqarpoq:

Atuuffia

  § 1.  Nalunaarut Kalaallit Nunaata avataaniit angalasunut nunattalu iluani angalasunut atuutissaaq.

Atuuffiata killilerneqarnera

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.
  Imm. 4.  Inunnut Peqqinnissaqarfimmi sulisunut Nunatta Nakorsaaneqarfia imm. 1 naapertorlugu aalajangiisassaaq.
  Imm. 5.  Inunnut imm. 2-4-mi taaneqanngitsuni sulisunut, Nunatta Nakorsaaneqarfia imm. 1 malillugu aalajangiisassaaq 
  Imm. 6.  Nunatta Nakorsaaneqarfiata nalunaarummi matumani aalajangersakkat ilaat tamaasaluunniit peqqinnissaqarfimmi katsorsarneqartunut imaluunniit, pissutsit allat peqqinnissakkut sulianut immikkut illuinnartut atuutsillugit, inunnut ataasiakkaanut atuutsinneqassanngitsut aalajangersinnaavaa.
  Imm. 7.  Nalunaarut eqqartuussisut pissaanermik atortitsinerannut atuutinngilaq.

Timmisartumi Kalaallit Nunaannukartussami ilaasunut piumasaqaatit

  § 3.  Angalasut 12-nik sinnerlugilluunniit ukiullit piumasaqaatini tulliuttuni ataaseq naammassippassuk aatsaat timmisartumi Kalaallit Nunaannukartussami ilaasinnaatitaapput:
1)  Inuit Kalaallit Nunaanni najugaqartut imm. 2 naapertorlugu najugaqassutsimut uppernarsaasiissapput. 
2)  Inuit Kalaallit Nunaanni najugaqanngitsut Covid-19-imut tamakkiisumik akiuussusertissimassapput tamatumunngalu uppernarsaasiissallutik. Akiuussutissat Europami nakorsaatinik nakkutilliisuniit, European Medicines Agency-mit (EMA-mit), akuerineqartut kisimi akuerineqarput.
  Imm. 2.  Najugaqartut tassaapput inuit aalajangersimasumik nunatsinni najugaqartut, aalajangersimasumik najugaqalernissaq siunertaralugu maanga nuuttut kiisalu inuit maani nunami piffissami sivisuumi suliartortut.  
  Imm. 3.  Nunatta Nakorsaaneqarfia imm. 1-2-mit immikkut akuersissuteqarsinnaavoq.
  Imm. 4.  Imm. 1-ip maleruarneqarnissaata qulakkeernissaa angallassissummik piginnittup akisussaaffigaa.

  § 4.  Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup kingorna ullut 14-it qaangiunneranni tamanna uppernarsarsinnaappagu. 
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

Umiarsuit ilaasartaatit umiarsuarnilu ilaasut Kalaallit Nunaannut tikittunut malittarisassat immikkut ittut atuuffii

  § 5.  Umiarsuit ilaasartaatit, taakkununnga ilanngullugit umiarsuit takornarianik angallassissutit, Danmarkimi Savalimmiuniluunniit tulaqqasimappata arlaatigulluunniit ilaasunik ikiffigineqarsimappata nunatsinnukartigatik ulluni kingullerni 14-ini nunat allat umiarsualiviini tulaqqasimappata Nunatsinnut tulassinnaanngillat. Inerteqqut nunap immikkoortuanut tamarmut atuuppoq, matumanilu imartamut, taamaattoq nunat tamalaat akornanni pisussaaffiit ataqqillugit. Oqaaseqatigiinni siullermi aappaanilu taaneqartup naammassinninnissaa angallatip piginnittuata akisussaaffigaa.
  Imm. 2.  Nunatsinni Nakorsaaneqarfik imm. 1-imik immikkut akuersissuteqarsinnaavoq.
  Imm. 3.  Imm. 1-imi inerteqqut apeqqutaatinnagu, imm. 2 naapertorlugu umiarsuarnut immikkut akuersissuteqanngitsunut inerteqqutaanngilaq:
1)  Tulannermi teknikkitaa, matumani inuttat, ilaasut nunamut niunatik avataaneersunilluunniit ikisoqanngitsoq aamma
2)  umiarsuarmi ajornartoornermi, motorip ajutoornerani, ikuallattoornermi assingusumilluunniit pinasuartumik pisoqarnerni tulakkasuarneq.
  Imm. 4.  Imm. 1 umiarsuarnut aalajangersimasumik aqquteqarlutik Nunatta umiarsualiviinut tulattartunut taakkunanngalu avalattartunut atuutinngilaq.

Inuit pillugit paasissutissanik suliarinninnerit

  § 6.  Nalunaarut una naapertorlugu akiuussusertittoqarsimaneranik misissuinissaq aamma inunnut tunngasut paasissutissat peqqissusaanullu tunngatillugu paasissutissat ujartorneqarnissaat pisariaqarsinnaapput.

Pineqaatissiissutit

  § 7.  § 3, imm. 1 aamma 4 aamma § 5, imm. 1-imik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisitigut pisussaatitaasut pisinnaatitaasullu) pinerluttulerinermik inatsimmi kapitali 5-imi malittarisassat naapertorlugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsinermut atorunnaarsitsinermullu aalajangersakkat

  § 8.  Nalunaarut 10. februar 2022-mi atuutilissaaq.
  Imm. 2.  Nalunaarut malillugu killilersuinerit, inerteqquteqarnerit, peqqusinerit il.il. 1. marsip 2022 ilanngullugu atuutissapput.

Inatsimmi allami allannguinerit

  § 9.  Kalaallit Nunaannut nunatsinnilu angalanermi piumasaqaatit pillugit Namminersorlutik Oqartussat nalunaarutaanni nr. 9, 25. januar 2022-meersumi makku allanngortinneqarput: 
1. § 14-imi, imm. 2 “14. februar 2022” allanngortinneqassaaq uunga: "9. februar 2022".

  § 10.  Illoqarfinni nunaqarfinnilu aalajangersimasuni killilersuigallarnerit pillugit Namminersorlutik Oqartussat nalunaarutaanni nr. 12, 3. februar 2022-meersumi tullinnguuttut allanngortinneqarput:
1. § 7-imi, imm. 2-mi “14. februar 2022” "9. februar 2022"-mut allanngortinneqassaaq.

Namminersorlutik Oqartussat, ulloq 9. februar 2022

Kirsten Fencker sinnerlugu Pele Broberg
Peqqinnissamut Naalakkersuisoq

/ Nike Berthelsen