Nappaatit tunillaassortut akiorniarlugit iliuutsit pillugit Inatsisartut peqqussutaat nr. 20, 12. november 2001-imeersumi, Inatsisartut inatsisaanni nr. 1, 1. april 2020-mi allanngortinneqartumi §§ 6 a, 12 a, 12 b aamma § 29, imm. 2 aamma 3 naapertorlugu, aalajangerneqarpoq:

Atuuffia

  § 1.  Nalunaarut Kalaallit Nunaannut tamarmut atuuppoq.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq. 
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4.  Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutsinngilaq.  
  Imm. 6.  Nunatsinni Nakorsaaneqarfik nalunaarummit immikkut akuersissuteqarsinnaavoq.

Sassaalliisarfinnut il.il. immikkut matusarfiit

  § 2.  Sumiiffiit inimi nerisassanik, imigassanik imaluunniit tupamik tunisisarfimmi pinissamut pingaarnertut siunertaqarfiusut, imaluunniit imerniartarfimmik, diskotekimik assigisaanilluunniit ingerlatsiffiusut nal. 22.00-imit nal. 5.00-imut tamanut matoqqatinneqassapput.
  Imm. 2.  Init allat, matuma ataani hotelit paarlii, nerisassanik, imigassanik imaluunniit tupamik sassaalliiffiusut, nerinissamut imaluunniit imernissamut sassaalliineq piffissami nal. 22.00-imit nal. 5.00-imut matoqqassaaq.
  Imm. 3.  Imm. 1-imik aamma 2-mik malinninnissamut qulakkeerinninnissamut pisussaatitaaffik inimik atuisumiippoq.

Pineqaatissiissutit

  § 3.  § 2 naapertorlugu pinerluttulerinermik inatsit naapertorlugu unioqqutitsinermi kinguneqartitsisoqarsinnaavoq.
  Imm. 2.  Ingerlatseqatigiiffiit il.il. (inatsisitigut pisussaatitaasut pisinnaatitaasullu) pinerluttulerinermik inatsimmi kapitali 5-imi malittarisassat naapertorlugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput

Atuutilersitsineq aamma atuunneranut piffissaliussaq

  § 4.  Nalunaarut ulloq 11. januar 2022 atuutilerpoq.
  Imm. 2.  Nalunaarut naapertorlugu killilersuutit, inerteqqutit, peqqussutit il.il. ulloq 25. januar 2022 ilanngullugu atuutissapput.

Namminersorlutik Oqartussat, ulloq 10. januar 2022

Kirsten Fencker sinnerlugu Mimi Karlsen
Peqqinnissamut Naalakkersuisoq

/ Aka Olesen