Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi §§ 2 a, 6, 6 a, 12 b, § 21 b aamma § 29 imm. 2 aamma 3 naapertorlugit aalajangersarneqarput:

Atuuffia

  § 1.  Qaammatisiutit malillugit ullut 14-it kingulliit Covid-19-imik tunillaassortoqarsimaguni tuniluunnerullu suminngaanneernera ilisimaneqanngikkuni illoqarfinni nunaqarfinnilu pineqartuni nalunaarut atuuppoq, tak. § 11.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4. Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutsinngilaq.
  Imm. 6.  Nalunaarut kommunit sunngiffimmi neqeroorutaannut atuutinngilaq, annermik meeqqanut inuusuttunullu 18-init inorlugit ukiulinnut sammitinneqartunut. 
  Imm. 7.   Nalunaarut nammineq angerlarsimaffinni aaqqissuussinernut il.il. atuutinngilaq.
  Imm. 8.  Nunatsinni Nakorsaaneqarfik nalunaarummit immikkut akuersissuteqarsinnaavoq.

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.
  Imm. 4.  Inunnut Peqqinnissaqarfimmi sulisunut Nunatta Nakorsaaneqarfia imm. 1 naapertorlugu aalajangiisassaaq.
  Stk. 5.  Inunnut imm. 2-4-mi taaneqanngitsuni sulisunut, Nunatta Nakorsaaneqarfia imm. 1 naapertorlugu aalajangiisassaaq. Tamatuma saniatigut Nunatta Nakorsaaneqarfia qinnuteqarnikkut inunnut inuiaqatigiinnut pingaarutilimmik suliaqanngitsunut immikkut akuersissuteqarsinnaavoq.

Ininut kikkunnilluunniit iserfigineqarsinnaasunut piumasaqaatit

  § 3.  Inuit Covid-19-imut tamakkiisumik akiuussuserneqarsimanermut uppernarsaammik takutitsisinnaanngikkunik imm. 2-mi taaneqartuni inineeqqusaanatillu taakkununngalu attuumassutilinni isersimaqqusaanngillat.
  Imm. 2.  Init taakkununngalu attuumassuteqartut kikkunnilluunniit iserfigineqarsinnaasut aamma nalinginnaasumik inunnit sivikitsuinnaanngitsumik isersimaffigineqarsinnaasut imm. 1-imut ilaatinneqarput, soorlu makku:
1)  Neriniartarfiit, kaffisorniartarfiit, imerniartarfiit, diskotek-ertarfiit assigisaallu.
2)  Pisortat kulturikkut suliffeqarfiutaat - tassunga ilanngullugit ilaatigut kulturikkut illorsuit, filmeriartarfiit, katersugaasiviit inersuillu saqqummersitsiviit.
3)  Innuttaasut Illui assigisaallu.
4)  Atuakkanik atorniartarfiit.
5)  Illup iluani timersortarfiit tassaasinnaasut timersortarfinni init timersornermilu inersuit, naluttarfiit timigissartarfiillu.
6)  Nujalerisut, tagiartuisartut, pinnersartittarfiit assigisaallu.
  Imm. 3.  Inuit tullinnguuttut imm. 1-imi piumasaqaammit ilaatinneqanngillat:
Init atugassanik niuertarfinnut atorneqartut.
2)  Allakkeriviit.
3)  Mittarfiit.
4)  Pisortatut oqartussani pilersuiffiusunilu init sullissiviit, saaffiginnittarfiit pilersuiviit il.il.
5)  Pisortat angallassissutaannut tunngatillugit utaqqisarfiit.
  Imm. 4.  tullinnguupput uku imm. 1-imi piumasaqaatinut ilaatinneqanngitsut:
1)  Aqqaneq marluk ataallugit ukiullit.
2)  Sulisut inini pineqartuni suliallit.

  § 4.  Inuit inatsisitigullu pisussaatitaasut pisinnaatitaasullu, tassunga ilanngullugit pisortani oqartussat suliffeqarfiillu, ininik § 3, imm. 2-mi pineqartunik pigisallit akiuussuserneqarsimanermut uppernarsaammik qinnuiginnissinnaapput.
  Imm. 2  Imm. 1 naapertorlugu uppernarsaat takutinneqarsinnaanngikkuni, anisitsisoqarsinnaavoq.

  § 5.  Inuit inatsisitigullu pisussaatitaasut pisinnaatitaasullu, ininik sumiiffinnillu § 3, imm. 2-mi ilaatinneqartunik pigisallit piumasaqaatinik makkuninnga naammassinnissimassapput:
1) Taamaallaat § 3 naapertorlugu pisiniat, isersimasut assigisaalluunniit iseqqusaapput. Naalakkersuisut nakkutilliineq ingerlassanersoq siunnersuut saqqummiutissavaat.
2)  Inuit ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat isersimaqqusaapput.
3)  Inini qatserisartoqarfinni oqartussaasunit akuersissutitaqartinneqanngitsuni, natermi 4 m2-iusumi amerlanerpaamik inuk ataasiinnaaqqusaavoq. Nateq 4 m2-imik mikineruppat oqaaseqatigiit siulliit apeqqutaatinnagit inuup ataatsip isersimanissaa akuerineqarpoq. Nateq qanoq pequteqartiginera apeqqutaatinnagu iikkamiit iikkamut naatsorsorneqassaaq.
  Imm. 2.  Piumasaqaatit imm. 1, nr 2-3-miittut naapertorlugit niuertarfinnik ingerlataqartuni atorneqartunut aamma atuupput.

  § 6.  Inuussutissarsiummik ingerlatalik politiit naliliinerat malillugu § 5-imik unioqqutitsisimappat, inuussutissarsiummillu ingerlatalik § 5-imik malinninnissaa ilimagineqanngippat, inuussutissarsiummik ingerlatalik inip piffissami aalajangersimasumi tamanut matoqqatinnissaanik politiinit peqquneqarsinnaavoq.

  § 7.  Inuk tamakkiisumik akiuussuserneqarnerata kingunitsianngua tamakkiisumillu akiuussuserneqarsimanermik uppernarsaasinnaappat inuk Covid-19-imut tamakkiisumik akiuussuserneqarsimasutut isigineqassaaq.
  Imm. 2.  Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

  § 8. Covid-19-imut uppernarsaatitut akuerisaq PCR - imaluunnit antigentest atorlugu tunillatsissimannginnermut uppernarsaatitut paasineqassaaq, tamanna peqqinnissaqarfimmiit imaluunniit peqqinnissaqarfik sinnerlugu imaluunniit inuit inatsisitigullu pisussaatitaasut pisinnaatitaasullu Nunatta Nakorsaaneqarfianit akuersissummik tigusaqarnikumit misissorneqarsimassaaq, annerpaamillu 48 tiiminik pisoqaassuseqassalluni.

Qanermut imaluunniit kiinnamut assiaquteqarnissamut piumasaqaat

  § 9.  Inuit aqqaneq-marlunnik sinnerlugillu ukiullit qanermut imaluunniit kiinnamut assiaquteqassapput:
1)  inini kikkunnit tamanit iserfigineqarsinnaasuni isersimagunik.
2)  pisiniarfinni kiffartuussinermillu ingerlatsivinni sulisut pisisartunik attaveqarnerminni, imaluunniit
3)  assartuutini kikkunnit tamanit ilaaffigineqarsinnaasuni, tassunga ilanngullugit bussini taxanilu ilaagunik.
  Imm. 2.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
  Imm. 3.  Pisiniarfinni kiffartuussivinnilu sulisut qanermut kiinnamulluunniit assiaqutit atunngikkaluarlugit pisiniat sulisullu akornanni plastikimik assiaqutit atorsinnaavaat.
  Imm. 4.   Imm. 1-imi allassimasut apeqqutaatinnagit qanermut kiinnamulluunniit assiaqutit tamakkiisumik ilaannakortumilluunniit peeqqaneqarallarsinnaapput, tamanna peqqutissaqarluarpat, tassunga ilanngullugu ima pisoqarnerani:
1)  Piffissami sivikitsumi nerinermi imernermilu.
2)  Nakorsaatitornermi.
3)  Qarngit aalaneratigut atuaasartumik oqaloqateqarnermi.
4)  Qanermut kiinnamulluunniit assiaqutit anersaartorniarnermut ajoqutaappata ipianngulersitsippataluunniit.
5)  Politiit kinaassutsimik uppernarsaaneranni.
6)  Timersornikkut sammisassaqartoqartillugu soorlu timersortarfinni init, inersuit, naluttarfiit timigissartarfiillu.

  § 10.  Qanermut assiaqutitut taaneqartut tassaapput qanermut qinngamullu assiaqutit ataasiartakkat imaluunniit annoraaminermit sanaat allunaasamillu tasisartumilluunniit siutinut ikkuttartut imaluunniit niaqqup tunuatungaani qilertartoq kiinnamullu attuumasoq.
  Imm. 2.  Kiinnamut assiaqutitut tassaapput isinut, qinngamut qanermullu imaluunniit qinngamut qanermullu assiaqutit plastikimik sanaat kiinnamut attuumanngitsut.

Illoqarfiit nunaqarfiillu tuniluuffiusut tuniluunnerullu suminngaanneernera ilisimaneqanngikkaangat pisortatigoortumik nalunaarutiginninnerit

  § 11.  Qaammatisiutit malillugit ullut 14-it kingulliit illoqarfiit nunaqarfiillu Covid-19-imik tunillaassorfiusutut paasineqarpata tunillaassuunnerullu suminngaanneernera ilisimaneqanngippat, Nakorsaaneqarfimmiit pisortatigoortumik corona.nun.gl-ikkut nalunaarutigineqassapput, tak. §1, imm. 1.
  Imm. 2.  Imm. 1 malillugu pisortatigoortumik saqqummiussereernerup kingorna §§ 3-6 aamma 9 naapertorlugit piffissaliilluni piumasaqaatinut malinnittussaaneq atuutilissaaq.  Pisortatigoortumik saqqummiussereernerup kingorna piffissaliineq minnerpaamik 12 tiimiussaaq.

Pingaartumik inunnut Covid-19-imik siusinnerusukkut tunillatsinnikunut

  § 12.  Siusinnerusukkut Covid-19-imik tunillatsinnikuusimasunut PCR-ilu atorlugu misissortinnikkut Covid-19-imik tunillatsissimanerminnik uppernarsaasinnaasunut, piffissami uppernarsaatip atorneqarnerani minnerpaamik ullunik 14-inik annerpaamillu sapaatit akunnerinik aqqaneq-marlunnik pisoqaassusilimmik uppernarsaasinnaasunut tamakkiisumik akiuussuserneqarsimasunut malittarisassat atuuttut assingi atuutsinneqarput.
  Imm. 2.  Uppernarsaat suna uppernarsaatitut akuerisatut atorneqassanersoq Nunatta Nakorsaaneqarfiata aalajangissavaa.

Inuit pillugit paasissutissanik suliarinninnerit

  § 13.  Nalunaarut una naapertorlugu akiuussusertittoqarsimaneranik misissuinissaq aamma inunnut tunngasut paasissutissat peqqissusaanullu tunngatillugu paasissutissat ujartorneqarnissaat pisariaqarsinnaapput.

Pineqaatissiissutit

  § 14. § 3, imm. 1, §§5-6 aamma §9, imm. 1 naapertorlugu pinerluttulerinermik inatsit naapertorlugu unioqqutitsinermi kinguneqartitsisoqarsinnaavoq.
  Imm. 2.  Ingerlatseqatigiiffiit il.il. (inatsisitigut pisussaatitaasut pisinnaatitaasullu) pinerluttulerinermik inatsimmi kapitali 5-imi malittarisassat naapertorlugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq aamma atuunneranut piffissaliussaq

  § 15.  Nalunaarut atuutilerpoq ulloq 5. januar 2022.
  Imm. 2.  Nalunaarut naapertorlugu killilersuutit, inerteqqutit, peqqusinerit il.il. 5. april 2022 tikillugu atuutissapput.

Inatsimmi allami allannguutit

§ 16. Nuna tamakkerlugu killilersuinerit pillugit Namminersorlutik Oqartussat nalunaarutaanni uku allanngortinneqarput: 
1) § 15, imm. 2-mi ”6. marts 2022”-mit ”4. januar 2022”-mut allanngortinneqarpoq.

Namminersorlutik Oqartussat, ulloq 4. januar 2022

Kirsten Fencker
Peqqinnissamut Naalakkersuisoq

/ Aka Olesen