§ 1

Aningaasanik peqquserluutinik malunnarunnaarsaasarneq pinerliiniarnernillu aningaasalersuisarneq pinaveersimatinniarlugit iliuuserisassat pillugit Inatsisartut inatsisaat nr. 5, 19. maj 2010-meersumi imaattumik allannguisoqarpoq:

1. § 1, imm. 2, atorunnaarsinneqarpoq.

2. § 2 atorunnaarsinneqarpoq:

3. § 3, imm. 1, imatut oqaasertaqassaaq: 
“  Inatsimmi uani uku imatut paasineqassapput:
1)  Ulluinnarni aqutsisut: Inuit, inunnut immikkoortunut ulluinnarni aqutsinerannut akisussaasut, tassunga ilanngullugit ingerlatsineq, kaaviiaartitsineq aamma inernerit allat.
2)  Ingerlatseqatigiiffiit: Inatsisilerinermi inuttut immikkoortutut isigineqartut.
3)  Suliffeqarfiit: Ingerlatseqatigiiffiit inatsiseqartitsinerlu tunngavigalugu aaqqissuussinerit allat ingerlatseqatigiiffiit pissuseqataat.
4)  Nakkutigineqartumik niuerfik: Niuerfik aningaasaqarnikkut aqqutaasinnaasunik niuerfiit pillugit aalajangersakkami direktiv 2004/39/EF-imi artikel 4-mi (14-imi) nassuiarneqarsimasutut ittoq. Niuerfik Europami Naalagaaffiit Peqatigiit iluanniippat imaluunniit nunami naalagaaffiit peqatigiit taakku aningaasaqarnermut tunngasut pillugit isumaqatigiissuteqarfigisimasaanniippat niuerfik taanna aningaasaqarnikkut aqqutaasinnaasunik niuerfiit pillugit aalajangersakkami direktiv 2004/39/EF-imi artikel 47-mi taaneqarsimasunut ilaassaaq. Niuerfik nunami Europami Naalagaaffiit Peqatigiit avataanniittumi aningaasaqarnermut tunngasut pillugit isumaqatigiissuteqarfigisimanngisaanniippat niuerfik taanna World Federation of Exchangesimut (WFE-mut) ilaasortaassaaq.
5)  Suliffeqarfinnut kiffartuussinernik neqerooruteqartartut: Kinaluunniit inuussutissarsiutigalugu makkuninnga ingerlataqartoq:
a)  Ingerlatseqatigiiffinnik pilersitsisut.
b)  Inuup allap suliffeqarfimmi siulersuisunut ilaasortatut imaluunniit soqutigisaqaqatigiiffimmi peqataasutut imaluunniit ingerlatseqatigiiffinni allani tamatuma pissuseqataanik inissisimaffinni sulinissaanik sulissutiginnittoq isumaginnittorluunniit.
c)  Angerlarsimaffittut najugaqarfimmik najugaqarfimmilluunniit allamik angerlarsimaffittut najugaqarfiup pissuseqataanik attaveqarfigineqartussatut kiffartuussinernullu tassunga atatinneqartunik tunniussiffissatut naatsorsuutigineqartumik suliffeqarfimmut atugassiisoq.
d)  Aningaasaateqarfimmik inatsiseqartitsinikkulluunniit aaqqissuussinermik tassunga assingusumik ingerlatsisutut aqutsisutulluunniit suliaqartoq allalluunniit taamatut inissisimanissaanik isumaginnittoq.
e)  Pingajuusutut inissisimasoq sinnerlugu piginneqataassuteqartutut inissisimasoq allalluunniit taamatut inissisimanissaanik isumaginnittoq, suliffeqarfiup taassuma piginneqataassutai il.il. nakkutigineqartumik niuerfimmi nioqqutigineqanngippata.
6)  Inuit naalakkersuinikkut ulorianartorsiortutut inissisimasut: Inuit pisortani qaffasinnerusumik atorfeqartut atorfeqarsimasulluunniit, inuit taakkua qanigisatut ilaqutaat inuilluunniit taakkununnga qanimut suleqataasutut ilisimaneqartut.
7)  Aningaasanik peqquserluutinik malunnarunnaarsaasarnermut allattoqarfik: Aningaasanut pinerluutinut allattoqarfik Kalaallit Nunaannut attuumassuteqartoq Danmarkimi Hvidvasksekretariatetimi inissisimavoq.”

4. § 3 kingorna § 3 a ilanngunneqassaaq: 
”  § 3 a.  Piginnittuiit imatut paasineqassaaq: Inuk imaluunniit inuit sullitanik piginnittuusut imaluunniit inummik taanna sinnerlugu iliuuseqartumik aningaasanik nuussisumik nakkutiginnittuusut, tamatumunnga uku ilanngullugit:
1)  Ingerlatseqatigiiffiit aamma inatsisit naapertorlugit ingerlatsivinnut: 
a)  Inuk imaluunniit inuit inatsisit naapertorlugit ingerlatsisut, ingerlatseqatigiiffimmik toqqaannartumik toqqaannanngitsumilluunniit piginnittuusut nakkutiginnittuusulluunniit, naammattumik piginneqataassuteqartut imaluunniit taasisinnaatitaanermik amerlanerussuteqartut, imaluunniit allatigut nakkutiginnittuusut, suliffeqarfimmik piginnittuusut minillugit taakku piginneqataassutaat nakkutigineqartumik niuerfimmi niuerutigineqartillugit imaluunniit niuerfinni allani assingusuni, ilisimatitsinissamik pisussaaffiligaasunik EU-mi eqqartuussivik malillugu imaluunniit nunat akornanni malittarisat naapertuuttut malillugit.
b)  Ulluinnarni aqutsineq, periarfissat tamarmik imaarutereersut suli inummik nr. 1, litra a malillugu kinaassusiisoqanngippat, imaluunniit qularitigineqarpat kinaassusigaq imaluunniit kinaassusikkat ilumut piginnittuiunersoq imaluunniit piginnittuiunersut.
2)  Aningaasaateqarfinnut aamma inatsisit tunngavigalugit aaqqissuussanut assingusunut:
a)  Pilersitsisoq imaluunniit pilersitsisut. 
b)  Aqutsisoq imaluunniit aqutsisut. 
c)  Illersuisoq imaluunniit illersuisut. 
d)  Immikkut iluaquserneqartut, imaluunniit inuit ataasiakkaat inatsisit tunngavigalugit aaqqissuussami imaluunniit oqartussaaffimmi suli kinaassusersineqanngitsut, inatsisit tunngavigalugit aaqqissuussami imaluunniit oqartussaaffimmi iluaquteqartut, inuit eqimattat soqutigisaat malillugu pilersinneqarsimasoq imaluunniit ingerlanneqartoq.  
e)  Inuk kinaluunniit, aningaasaateqarfimmik nakkutiginnittuusut toqqaannartumik toqqaannanngitsumilluunniit piginnittuusut, imaluunniit allatigut nakkutiginnittuusut.
3)  Siulersuisut aamma aningaasaateqarfimmi inuk imaluunniit inuit naapertuuttumik assingusumilluunniit atorfeqartut, soorlu nr. 2, litra b-e-mi taaneqartut, aningaasaateqarfiup immikkuullarinneranut naapertuuttumik allannguutit pisariaqartut ilanngullugit.”

5. § 4-mi imm. 3-tut ilanngunneqassaaq: 
”  Imm. 3.  Imm. 1 naapertorlugu, aningaasanik pissarsiniarnermi iliuuserineqartut, imaluunniit aningaasat malunnarunnaarsakkat, nunami allami imaluunniit naalagaaffeqatigiit iluani sumiiffimmi allami pisimagaluarpalluunniit malunnarunnaarsaasoqarsimassaaq.”

6. § 6 imatut oqaasertaqassaaq:
”  § 6.  Inatsimmi suliffeqarfiit inuillu ilanngunneqartut nuussinerit tunuliaqutaat siunertaallu misissussavaat
1)  pisariusumik katitigaappata, 
2)  nalinginnaanngitsumik annertuppata, 
3)  nalinginnaanngitsumik iluseqarpata, imaluunniit 
4)  erseqqissumik aningaasaqarnikkut inatsisitigulluunniit siunertaqanngippata. 
  Imm. 2.  Inatsimmi suliffeqarfiit inuillu ilanngunneqartut naleqquttumik pisariaqartillugu sullitartik nakkutiginerulissavaat nuussinerit imaluunniit ingerlatat pasinarnersut naliliiffiginiarlugit.
  Imm. 3.  Misissuinerit inerneri allattorneqassapput toqqorneqarlutillu, § 19 takuuk.
  Imm. 4.  Inuk nalunaarsorneqarsimasoq, imm. 1-3. naapertorlugit suliarineqaruni imaluunniit suliassanngortinneqarsimaguni paasissutissanut namminermut tunngasunut takunnissinnaatitaanngilaq.”

7. § 7, imm. 1, imatut oqaasertaqassaaq:
”  § 7.  Inatsimmi suliffeqarfiit inuillu ilanngunneqartut ingerlatiinnaq Hvidvasksekretariati kalerrissavaa suliffeqarfiup imaluunniit inuup nalunngippagu, pasitsaassimappagu imaluunniit pissutissaqaruni ilimagissallugu, nuussineq, aningaasat imaluunniit suliaq malunnarunnaarsaasarnermut tunngassuteqartoq imaluunniit pinerliiniarnernik aningaasalersuinermut tunngassuteqartoq. Tamanna aamma sullitaq nuussiniarluni misiliisimappat, imaluunniit nuussiniarneq ingerlatsiniarnerluunniit siunertaralugu sullinneqarnissamik kissaateqartoqarsimappat atuuppoq.
  Imm. 2.  Pasitsaassineq aningaasanik malunnarunnaarsaasarnermut tunngassuteqarpat, aningaasanillu suli nuussisoqarnani, taava nuussinissaq unitsinneqassaaq imm. 1 naapertorlugu kalerriussisoqareernissaata tungaanut.
  Imm. 3.  Pasitsaassineq pinerliiniarnernik aningaasalersuinermut tunngasuuppat kontomit inummilluunniit pineqartumit aningaasanik taamaallaat nuussisoqarsinnaavoq Hvidvasksekretariatip isumaqatigiissuteqarfigineqarnerata kingornatigut. Hvidvasksekretariati  nalunaarutiginninnermik tigusereernermigut piaarnerpaamik ullorlu aningaaseriviup ammaffia tulliuttoq naatinnagu aalajangiissaaq arsaarinnittoqassanersoq.
  Imm. 4.  Suliffeqarfiit inuillu inatsimmi pineqartunut ilaatinneqartut paasissutissanik suliami pisariaqartunik tunniussissasut politiit Kalaallit Nunaanni eqqartuussisarneq pillugu inatsimmi malittarisassat tunngavigalugit piumasaqaatigisinnaavaat.
  Imm. 5. Hvidvasksekretariatimut kalerriussinerit pillugit malittarisassat erseqqinnerusut akileraaruseriffiup aalajangersarsinnaavai, tassunga ilanngullugu kalerriinerit elektroniskiusumik nassiunneqassanersut.”

8. § 11 imatut oqaasertaqassaaq:
”  § 11. Suliffeqarfiit inuillu inatsimmi pineqartunut ilaatinneqartut sullitatik imm. 2-8 naapertorlugit ilisimasaqarfigissavaat, taamatuttaaq piumasaqaatigisassallugu sullitatik kinaassutsimut uppernarsaammik takutitsisassasut, taakku niuernermut tunngatillugu attaveqarfigineqaleraangata, taamatuttaaq kontomik toqqorsivimmilluunniit ammaasoqartillugu.
  Imm. 2.  Sullitaq inuuppat kinaassutsimut uppernarsaammi ateq, najugaqarfik, inuttut normu, imaluunniit pineqartoq inuttut normoqanngippat taakkununnga assingusumik uppernarsaat ilaassapput.
  Imm. 3.  Sullitaq suliffeqarfiuppat kinaassutsimut uppernarsaammi ateq, najugaqarfik, CVR-nr. imaluunniit suliffeqarfik CVR-normoqanngippat taakkununnga assingusumik uppernarsaatit ilaassapput. 
  Imm. 4.  Inatsimmi suliffeqarfiit aamma inuit ilaasut suliffeqarfiit inuilluunniit kina imaluunniit kikkut piginnittuiunersut qularnaassammassuk kinaassusermik uppernarsaatit nakkutigineqarnissaanik naleqquttumik aaqqissuussissapput. Taamaalilluni suliffeqarfiup imaluunniit inuup qularutissaanngitsumik nalussanngilaa kina imaluunniit kikkut piginnittuiunersut. Sullitaq suliffeqarfiuppat, taava suliffeqarfiup piginnittuinik nakkutiginninnermillu ilusaa qularnaarniarlugu naleqquttumik aaqqissuussisoqassaaq. 
  Imm. 5. Inatsimmi suliffeqarfiit inuillu ilanngunneqartut sullitap kinaassusermik uppernarsaatai nakkutiginiarlugit paasissutissat aamma sakkussat najoqqutaq tutsuiginartumit aamma attuumassuteqanngitsumit piniarneqassapput.
  Imm. 6.  Sullitat tamarmik niuernikkut attaveqaataat suuneri aamma tassunga tunngatillugu suut siunertarinerai paasiniarneqartassapput.  
  Imm. 7.  Pissutsit sullitanut tunngasut ingerlaavartumik nakkutigineqassapput. Aningaasanik nuussinerit pissutsinut sullitamut tunngasunut ilaatillugit ingerlanneqartut nakkutigineqassapput, aningaasanik nuussinerit suliffeqarfiup inuulluunniit sullitap sullitallu niueqatigiinnikkut inissisimanera aarlerinarsinnaaneralu pillugit ilisimasaat naapertorlugit ingerlanneqartarnissaat qulakkeerniarlugu, taamatuttaaq pisariaqassappat aningaasat suminngaanneernerat. Sullitaq pillugu uppernarsaatit/allagaatit, paasissutissat paasissutissallu allat ingerlaavartumik nutarterneqartassapput.
  Imm. 8.  Sullitap kinaassusia pillugu paasissutissat siusinnerusukkut pissarsiarineqarsimasut eqqortuunersut naammannersulluunniit nalornissutigineqarpat kinaassutsimut uppernarsaatip nutaap imm. 2-mit 4-mut oqaatigineqartutut takuteqqunissaa piumasaqaatigineqassaaq.
  Imm. 9.  Suliffeqarfiit inuillu inatsimmi pineqartunut ilaatinneqartut aalajangersinnaapput aarlerinarsinnaasunik naliliineq aallaavigalugu imm. 1-7-imi kinaassutsimik uppernarsaatitsisarneq il.il. ingerlanniarlugit, sullitat niueqatigiinnikkulluunniit attaveqarfiit, tunisassiap aningaasanilluunniit nuussinerit ataasiakkaat ulorianaateqarsinnaanerat apeqqutaatillugu. Taamaattorli misissuinerup annertussusiata aningaasanik peqquserluutinik malunnarunnaarsaasarnernut pinerliiniarnernillu aningaasalersuisoqarsinnaaneranut aarlerinaateqarsinnaaneranut naapertuuttuunera suliffeqarfiup inuulluunniit pineqartup inatsimmik malinninneranik oqartussaasutut nakkutilliisumut uppernarsarsinnaassavaa.
  Imm. 10.  Pissutsit sullitanut tunngasut inatsisip matuma atortuulersinneqarnera sioqqullugu pilersinneqarsimasut kiisalu paasissutissanik imm. 1-7-imi taaneqartunik peqarfiunngitsut eqqarsaatigalugit piffissami naleqquttumi imm. 1-7 tunngavigalugit kinaassuseq uppernarsaasinneqartassaaq, paasissutissallu katersorneqassallutik aamma aarlerinartoqarsinnaaneranik naliliineq tunngavigalugu.”

9. § 12, imm. 2-mi, ”§ 11, imm. 1-4” imatut allanngortinneqassaaq: ”§11, imm. 1-6”.

10. § 13, imm. 1-imi, ”§ 11, imm. 1-4” imatut allanngortinneqassaaq: ”§11, imm. 1-6”.

11. § 20 sioqqullugu qulequtaq peerneqassaaq.

12. Kapitali 4 kingorna ikkunneqassaaq:

”Kapitali 4 a
Killeqarfiit akimorlugit suliffeqarfiit il.il.

  § 20 a.  Naalakkersuisut, Financial Action Task Forcep  piumasaqaatai siunnersuutaalu naammassinissaat siunertaralugu maleruagassanik iliuuseqarfiginninnernillu nunanut allanut nunallu ilaanut atuuttunik sukumiinerusunik aalajangersaasinnaapput.”

13. § 29 imatut oqaasertaqassaaq:
“  § 29.  Akileraaruseriffiup inatsit manna malittarisassalluunniit inatsit tunngavigalugu aalajangersarneqarsimasut tunngavigalugit aalajangiineri aalajangiinermi pineqartumit Akileraaruseriffiup Naalakkersuisoqarfianut aalajangiinerup pineqartumut nalunaarutigineqarneranit sapaatit akunneri sisamat qaangiutsinnagit suliassanngortinneqarsinnaapput.”

14. § 30, imm. 1, imatut oqaasertaqassaaq:
”§ 2, § 6, imm. 1-3, § 7, imm. 1, imm. 2 aamma imm. 3, oqaaseqatigiinnik siullernik, § 10, § 11, imm. 1-8, § 12, imm. 1, 1. aamma oqaaseqatigiit pingajuannik, imm. 2 aamma imm. 3, oqaaseqatigiit aappaannik, § 13 aamma § 14, imm. 1, oqaaseqatigiinnik siullernik aamma imm. 2, § 15, imm. 1, imm. 2, oqaaseqatigiinnik siullernik, aamma imm. 3-6, § 19, imm. 1, oqaaseqatigiinnik siullernik, imm. 2 aamma imm. 3, oqaaseqatigiinnik siullernik, § 20, § 21, imm. 1-4, § 23, imm. 1, § 26, oqaaseqatigiit aappaannik, aamma § 27, imm. 2 aamma 5, piaaraluni mianersuaalliorujussuarluniluunniit unioqqutitsinerit pillaammik akiliisitsinikkut pineqaatissiissutigineqassapput. § 28, imm. 2-mik piaaraluni mianersuaalliorujussuarluniluunniit unioqqutitsineq pillaammik akiliisitsinikkut pineqaatissiissutigineqassaaq, pinerluttulerineq pillugu inatsimmi malittarisassat tunngavigalugit sakkortunerusumik pineqaatissiisoqassanngippat.”

15. § 30, imm. 2-mi, imatut oqaasertaqassaaq: 
"  Imm. 2.  § 2-mik, § 7, imm. 1-imi oqaaseqatigiit aappaannik, imm. 2-mi aamma imm. 3-mi oqaaseqatigiinnik siullernik, § 11, imm. 1-8-mik, § 13-imik, § 14-imik, § 19, imm. 1-imi oqaaseqatigiinnik siullernik, imm. 2-mik aamma imm. 3-mi oqaaseqatigiinnik siullernik immikkut sakkortuumik unioqqutitsinerit Pinerluttulerineq pillugu inatsimmi kapitali 31 malillugu pineqaatissiinermik kinguneqarsinnaapput.”

§ 2

Inatsit 1. januar 2023-mi atuutilerpoq.

Namminersorlutik Oqartussat, 25. novembari 2022

Múte Bourup Egede
Naalakkersuisut Siulittaasuat