Nalinginnaasumik aalajangersakkat

  § 1.  Naalakkersuisut ikiaroornartut, tassunga ilanngullugit ikiaroornartut assigiinngitsut nunani tamalaani aalajangersakkat naapertorlugit imaluunniit Nunatsinni Nakorsaaneqarfiup naliliinera malillugu ikiaroornermik sunniuteqartartunik akoqarneri imaluunniit ikiaroornartumik akoqartutut ilimagineqarneri pissutigalugit immikkut ulorianarluinnartut pillugit malittarisassanik imatut aalajangersaasinnaapput:
1)  Naalakkersuisut immikkut illuinnartumik tamatumunnga akuersinngippata ikiaroornartunik maani nunamiittoqassanngitsoq. Akuersissummut piumasaqaatinik Naalakkersuisut aalajangersaasinnaapput. Akuersissut tunniunneqarsimasoq kingusinnerusukkut atorunnaarsinneqarsinnaavoq.
2)  nakorsaatitut ilisimatusarnermulluunniit atatillugu taamaallaat atorneqassasut.

  § 2.  Nunatta Nakorsaataasivia ikiaroornartunik § 1, nr. 2 naapertorlugu eqqussinissamut annissinissamullu, tuniniaanissamut, pisinissamut, sananissamut piareersaanissamullu akuerisaavoq.
  Imm. 2.  Nunatta Nakorsaataasivia, napparsimavinni nakorsaataasiviit kiisalu inuit suliffeqarfiillu matumunnga Naalakkersuisunit immikkut akuerineqarsimasut ikiaroornartunik § 1, nr. 2 naapertorlugu tunniussinissamut, tigusinissamut paarisaqarnissamullu akuerisaapput. Pineqartut siuliani taaneqartutut iliuuseqarnerannut tunngatillugu killilersuutinik nalinginnaasunik aammalu pineqartunut tamanut immikkut killilersuutinik Naalakkersuisut aalajangersaasinnaapput, soorluttaaq Naalakkersuisut ikiaroornartunut tunngatillugu pisinnaatitaaffinnik killiliisinnaasut atorunnaarsitsisinnaasulluunniit.
  Imm. 3.  Nunatta Nakorsaataasiavianit napparsimavinnilu nakorsaataasivinnit ikiaroornartunik pisineq tigusinerlu kiisalu paarisaqarneq, malittarisassat atuuttut naapertorlugit nakorsaatissanut allagartaq allagartarluunniit inniminniissut naapertorlugu inunnut pissarsisunut inerteqqutaanngillat.
  Imm. 4.  Imm. 1-3 pinnagit ikiaroornartunik § 1-imi taaneqartunik eqqussineq annissinerlu, tuniniaaneq, pisineq, tunniussineq, tigusineq, sananeq, piareersaaneq paarisaqarnerlu aamma inerteqqutaapput.

Akuersissutit

  § 3.  Nunatta Nakorsaaneqarfia  § 1, nr. 1, aamma § 2, imm. 2 naapertorlugu oqartussatut isumaginnissaaq.  
  Imm. 2.  Naalakkersuisut Nunatta Nakorsaaneqarfiata akuersissutinut tunngasunik sulineranut akiliutinik inunnit suliffeqarfinniilluunniit tamakkiisumik ilaannakortumilluunniit akileeqqusinermut akiliinermullu malittarisassanik aalajangersaasinnaapput. Akitsuutit sulianut aalajangersimasunut Nunatta Nakorsaaneqarfiata suliarisaanut imaluunniit Nunatta Nakorsaaneqarfiata nalinginnaasumik suliarisartagaanut, tassunga ilanngullugit nakkutilliineranut ukiumoortumik akitsuutaatinneqassapput.

Nakkutilliineq

  § 4.  Naalakkersuisut nakkutilliineq pillugu malittarisassanik, § 1-ip kiisalu § 2, imm. 1 oqaaseqatigiit aappaat malillugit maleruarneqarnerannik qulakkeerinnittunik, tassunga ilanngullugit eqqartuussiviit akuersiteqqaarnagit malittarisassat taaneqartut malinneqarnissaannik nakkutilliineq siunertaralugu nakkutilliinermik oqartussat ininut sumiiffinnulluunniit allanut isersinnaanerat pillugu malittarisassanik aalajangersaasinnaapput.
  Imm. 2.  Oqartussat nakkutilliisut taamatuttaaq eqqartuussiviit akuersiteqqaarnagit uninngasuutinut, atuakkanut, niuernermi pappialaatinut paasissutissanullu allanut, nakkutilliinerup naammassinissaanut pisariaqartunut tunngasunik piumasaqarsinnaapput.

Pineqaatissiissutit pillugit aalajangersakkat

  § 5.  § 2, im. 4-mik unioqqutitsineq Pinerluttulerinermi inatsimmi malittarisassat malillugit pineqaatissiissutigineqarsinnaavoq inatsisitigullu allatut malitseqartinneqarsinnaalluni.
  Imm. 2.  Inatsisartut inatsisaat manna naapertorlugu najoqqutassanut atuutilersinneqartunut Pinerluttulerinermi inatsimmi malittarisassat malillugit pineqaatissiissutinik inatsisitigullu malitseqartitsissutissanik allanik aalajangersaasoqarsinnaavoq.
  Imm. 3.  Inatsisartut inatsisaat imaluunniit Inatsisartut inatsisaat naapertorlugu najoqqutassat atuutilersinneqartut akiliisitsissummik aalajangersaanissamut tunngavissiisimappata, akiliisitsissut pinerluttulerinermi inatsimmi malittarisassat naapertorlugit inatsisitigut pisinnaatitaasumut pisussaatitaasumullu akileqquneqarsinnaavoq.
  Imm. 4.  Pineqaatissiissutissamik uuttortaanermi ikiaroornartut pineqartut ajoqusiisinnaanerat isiginiarneqassaaq. Tamatuma saniatigut uku annertuumik sakkortusaataasussatut isigineqassapput:
1)  Ikiaroornartunik immikkut ulorianartunik ajoqusiisinnaasunilluunniit arlaleriarluni tuniniaasoqartarsimanera, imaluunniit
2)  Ilinniarfeqarfinni, neriniartarfinni, tassunga ilanngullugit qitigiartarfinni imaluunniit tusarnaartitsinerni aamma festivalini ikiaroornartunik § 1-imi pineqartunik tuniniaasoqarsimanera imaluunniit kingusinnerusukkut tuniniaanissaq siunertaralugu akeqanngitsumik tunniussisoqarsimanera. Tamannattaaq aaqqissuussinerni allani meeraanerusut imaluunniit inuusuttuunerusut peqataaffiginerusartagaanni atuuppoq.
  Imm. 5.  Akiliisitsinerit arsaarinninnerillu imm. 1-3 malillugit aalajangersarneqartut Nunatta Karsianut tutsinneqassapput.

  § 6.  Inuk eqqunngitsunik paatsoorneqarsinnaasunillu paasissutissiinikkut peqquserlulluniluunniit nipangiussinermigut Inatsisartut inatsisaat imaluunniit taanna naapertorlugu najoqqutassat atuutilersinneqartut naapertorlugit akuersissummik pissarsisoq pissarsiniartorluunniit, imaluunniit akuersissummut piumasaqaatit akerlianik iliortoq
pinerluttulerinermi inatsimmi malittarisassat naapertorlugit pineqaatissinneqassaaq.
  Imm. 2.  Aamma inuk ikiaroornartunik § 1-imi pineqartunik nakorsaatissanut allagartaq allagartarluunniit inniminniissut imaluunniit ikiaroornartunik nakorsap nakorsaatissiissutaa pillugit saaffiginninnermini aterminik, najukkaminik atorfimminilluunniit eqqunngitsumik paasissutissiisoq pineqaatissinneqassaaq.

Atuutilersitsinermut atorunnaarsitsinermullu aalajangersakkat

  § 7.  Inatsisartut inatsisaat 1. januar 2023-mi atuutilissaaq.
  Imm. 2.  Tamatuma kingorna ikiaroornartut pillugit inatsit nr. 169, 24. maj 1955-imeersoq (lov nr. 169 af 24. maj 1955 om euforiserende stoffer) Kalaallit Nunaannut atuukkunnaassaaq.

Namminersorlutik Oqartussat, ulloq 25. november 2022

Múte Bourup Egede
Naalakkersuisut Siulittaasuat