Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 aamma Pisortani Digitalimik Allakkerineq pillugu Inatsisartut inatsisaat nr. 14, 8. juni 2017-imeersumi § 16 naapertorlugit aalajangersarneqarput:

Atuuffia

  § 1.  Kaajallaasitaq Naalakkersuisut naalakkersuisoqarfiinut taakkulu immikkoortortaanut susassaqarfiit agguataarnerinut (Susassaqarfiit agguataarneri) kaajallaasitami aalajangersarneqartunut atuutsinneqarpoq.

  § 2.  Oqartussaaffeqarfiit kaajallaasitaq naapertorlugu ingerlataqartut inunnik aamma inatsisit naapertorlugit ingerlatsivinnik Pisortani Digitalimik Allakkerinermik atuisuusunik Pisortani Digitalimik Allakkerivik atorlugu attaveqarfigisassavaat.

Atortunut akisussaasunik toqqaaneq

  § 3.  Digitalimik Sullissinermut Aqutsisoqarfik atortumut akisussaasuuvoq Pisortanilu Digitalimik Allakkerinerup ingerlanneqarnera ingerlataralugu.

Pinngitsoorani ilanngunnissaq

  § 4.  Oqartussaaffeqarfiit kaajallaasitaq naapertorlugu ingerlataqartut Pisortani Digitalimik Allakkerinermut pinngitsooratik ilanngutissapput. Atortumut akisussaasoq attavigalugu ilanngutissapput.

  § 5.  Teknikkikkut piumasaqaatit immikkoortortaasalu atortumut akisussaasup aalajangersagaasa malinneqarnissaat oqartussaaffeqarfimmit pisussaaffigineqarpoq.

  § 6.  Oqartussaaffeqarfik Pisortani Digitalimik Allakkerinermut teknikkikkut ilanngunnissaanut atortumut akisussaasumit ikiorneqassaaq.

Atuutilersitsinermut il. il. akisussaaffik

  § 7.  Oqartussaaffeqarfiit ataasiakkaat namminneq Qarasaasiaqarnermut atortumi aamma atortumut akisussaasup akornanni ilanngunneqarnissaa akisussaaffigaat.

  § 8.  Oqartussaaffeqarfiit ataasiakkaat atortumut akisussaasup noqqaassuteqarneratigut Qarasaasiaqarnermut atortut attavilertissimasat pillugit paasissutissiisassapput.

  § 9.  Innuttaasut allakkerinermi aaqqiissutip atorneqarneranut tunngatillugu atortumut akisussaasoq suliatigut ikiorsiisarnissamut akisussaassuseqartitaanngilaq.

Aningaasartuuteqarneq

  § 10.  Oqartussaaffeqarfiit ataasiakkaat Pisortani Digitalimik Allakkerinermut attavilertinnermi aningaasartuutit namminneerlutik isumagissavaat.

  § 11.  Digitalimik allakkiat oqartussaaffeqarfinnit ataasiakkaanit nassiunneqartut kiisalu ungasissumut anillatsitassatut allakkiat nassiunneqartut atortumut akisussaasumit oqartussaaffeqarfimmut akiliuteqaqqusisoqartassaaq. Akiliutip annertussusaa atortumut akisussaasumit aalajangersarneqassaaq ukiullu tamaasa nalimmassarneqartassalluni.

Isumannaallisaanikkut ajalusoortoqartillugu

  § 12.  Isumannaallisaanikkut ajalusoortoqartillugu Pisortani Digitalimik Allakkerinermit ernertumik attaveerutsitaanermik kinguneqarsinnaavoq. Taama pisoqartillugu atortumut akisussaasoq ernertumik attavigineqartassaaq.

Tamanut saqqummiunneqarnera

  § 13.  Pisortani Digitalimik Allakkerinermut ilanngunneq atortumut akisussaasumit tamanut saqqummiunneqassaaq uani www.sullissivik.gl.

Atuutilernera

  § 14.  Kaajallaasitaq atuutilissaaq ulloq 1. januar 2023.

Naalakkersuisunut Siulittaasup Naalakkersuisoqarfia, ulloq 14.12.2022

Muté Bourup Egede
Naalakkersuisunut Siulittaasoq

/ Hans-Peder Barlach Christensen