Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 12 b, 21 B aamma § 29, imm. 2 aamma imm. 3 malitsigisaannik aalajangersarneqarpoq:

Atuuffia

  § 1. Nalunaarut Kalaallit Nunaat tamakkerlugu atuuppoq.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4. Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutinngilaq.  
  Imm. 6.  Nunatsinni Nakorsaaneqarfik nalunaarummit immikkut akuersissuteqarsinnaavoq.

Init ilaannut taakkununnga attuumassutilinnut nunaminertanut, kikkunnilluunniit iserfigineqarsinnaasunut tunngatillugit piumasaqaatit

  § 2.  Inuit imm. 2-mi taaneqartuni inineeqqusaanatillu taakkununngalu attuumassutilinni nunaminertaneeqqusaanngillat, eqqaassanngikkaanni:
1)  Covid-19-imut tamakkiisumik kapitissimasut, imaluuniit
2)  annerpaamik akunnernik 48-nik pisoqaassusilik COVID-19-imik tunillatsissimannginnermut uppernarsaammik takutitsineq.   
  Imm. 2.  Init taakkununngalu attuumassuteqartut nunaminertat kikkunnilluunniit iserfigineqarsinnaasut aamma nalinginnaasumik inunnit sivikitsuinnaanngitsumik isersimaffigineqarsinnaasut imm. 1-imut ilaatinneqarput, assersuutigalugu:
1)  Sutorniartarfiit, cafiit, imerniartarfiit, diskotekit assigisaallu aamma tamakkununnga attuumassuteqartut silami nunaminertat.
2)  Pisortat kulturikkut suliffeqarfiutaat - tassunga ilanngullugit ilaatigut Kulturikkut Illorsuit, filmeriartarfiit, katersugaasiviit inersuillu saqqummersitsiviit.
3) Innuttaasut Illui assigisaallu
4) Atuakkanik atorniartarfiit.
5) Illut iluini silamilu timersortarfiit - tassunga ilanngullugit ilaatigut init timersortarfiit aamma Illorsuit Timersortarfiit, naluttarfiit, timigissartarfiit isikkamillu arsaattarfiit. 
6)  Nujalerisut, tagiartuisartut, pinnersartarfiit assigisaallu.   
  Imm. 3.  Init tamakkununngalu attuumassuteqartut nunaminertat tullinnguuttut makku imm. 1-imi piumasaqaatinut ilaatinneqanngillat:
1)  Init tamakkununngalu attuumassuteqartut nunaminertat niuertarfittut atorneqartut.
2)  Allakkeriviit.
3) Mittarfiit
4) Pisortatut oqartussani pilersuiffiusunilu init sullissiviit, saaffiginnittarfiit il.il. 
5) Pisortat angallassissutaannut tunngatillugit utaqqisarfiit.
  Imm. 4.  Inuit tullinnguuttut makku imm. 1-imi piumasaqaatinit ilaatinneqanngillat:
1)  Sulisut inini pineqartuni imaluunniit tamakkununnga attuumassuteqartuni nunaminertani suliallit.
2)  Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innersuunneqanngitsut. 
3)  Inuit 17-inik ukiullit ukiukinnerusulluunniit.

  § 3. Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup ingerlarngata naammassisimaneranik uppernarsaasinnaappat.

Inuit pillugit paasissutissanik suliarinninnerit

  § 4.  Nalunaarut taanna naapertorlugu inuit pillugit paasissutissanik suliarinnittoqarsinnaavoq, inuit akiuussutissamik kapineqarsimaneranni killiffiup misissorneqarnissaa pisariaqartinneqarpat.

Iliuuseqarnerit

  § 5.  § 2-mik unioqqutitsisoq Pinerluttulerinermik Inatsit naapertorlugu pineqaatissinneqarsinnaavoq. 
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq aamma atuunneranut piffissaliussaq

  § 6. Nalunaarut ulloq 11. august 2021-mi atuutilissaaq. 
  Imm. 2. Nalunaarut malillugu killilersuinerit, inerteqquteqarnerit, peqqusinerit il.il. 24. august 2021 ilanngullugu atuutissapput.

Namminersorlutik Oqartussat, ulloq 9. august 2021

Kirsten Fencker
Peqqinnissamut Naalakkersuisoq

/ Aka Olesen