Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 6 a, 12 a, 12 b, 12 c, 21 a aamma 21 b aamma § 29 imm. 2 aamma 3 malillugit aalajangersarneqarpoq:

Atuuffia

  § 1.  Nalunaarut Kalaallit Nunaata avataaniit angalasunut nunattalu iluani angalasunut atuutissaaq.

Atuuffiata killilerneqarnera

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.
  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.
  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.
  Imm. 4.  Inunnut Peqqinnissaqarfimmi sulisunut Nunatta Nakorsaaneqarfia imm. 1 naapertorlugu aalajangiisassaaq.
  Imm. 5. Inunnut imm. 2-4-mi taaneqanngitsuni sulisunut, Nunatta Nakorsaaneqarfia imm. 1 naapertorlugu aalajangiisassaaq. Tamatuma saniatigut Nunatta Nakorsaaneqarfia qinnuteqarnikkut inunnut inuiaqatigiinnut pingaarutilimmik suliaqanngitsunut § 12-imit immikkut akuersissuteqarsinnaavoq.
  Imm. 6.  Nunatta Nakorsaaneqarfiata nalunaarummi matumani aalajangersakkat ilaat tamaasaluunniit peqqinnissaqarfimmi katsorsarneqartunut imaluunniit, pissutsit allat peqqinnissakkut sulianut immikkut illuinnartut atuutsillugit, inunnut ataasiakkaanut atuutsinneqassanngitsut aalajangersinnaavaa.
  Imm. 7. Nalunaarut eqqartuussisut pissaanermik atortitsinerannut atuutinngilaq.

Timmisartumi Kalaallit Nunaannukartussami ilaasunut piumasaqaatit

  § 3.  Angalasut marlunnik sinnerlugilluunniit ukiullit piumasaqaatini tulliuttuni ataaseq naammassippassuk aatsaat timmisartumi Kalaallit Nunaannukartussami ilaaqqusaapput:
1)  Inuit Kalaallit Nunaanni najugaqartut imm. 2 naapertorlugu najugaqassutsimut aammalu  Covid-19-imik nappaateqannginnermut uppernarsaassapput. 
2)  Inuit Kalaallit Nunaanni najugaqanngitsut 18-inillu sinnerlugilluunniit ukiullit uppernarsarsinnaallugu tamakkiisumik Covid-19-imut akiuussuserneqarsimassapput aammalu Covid-19-imik nappaateqannginnermut uppernarsaassallutik. Akiuussutissat Europami nakorsaatinik nakkutilliisuniit, European Medicines Agency-mit (EMA-mit), akuerineqartut kisimi akuerineqarput.
3)  Inuit Kalaallit Nunaanni najugaqanngitsut marlunnik 17-inillu akornanni ukiullit Covid-19-imik nappaateqannginnermut uppernarsaassapput. 
  Imm. 2.  Najugaqartut tassaapput inuit aalajangersimasumik nunatsinni najugaqartut, aalajangersimasumik najugaqalernissaq siunertaralugu maanga nuuttut kiisalu inuit maanni nunami piffissami sivisuumi suliartortut.  
  Imm. 3.  Nunatsinnut angalasut inummut tunillatsissimasumut qanimut attaveqarsimanermi kingorna tunillatsinnissamut aarlerinartorsiorsimasutut najukkami oqartussanit ilisimatinneqartut Kalaallit Nunaannut aallannginnerminni timmisartumut ikitinnatik sapaatip akunnera ataaseq sioqqullugu Covid-19-imik nappaateqannginnermik uppernarsaatinik marlunnik tulleriinnik takutitsissapput. Misissortinneq siulleq tunillatsissimasumut attaveqarnerup kingorna ullut sisamat qaangiunneranni pissaaq. Misissortinnerup aappaa misissortinnerup siulliup kingorna ullut marluk qaangiunneranni pissaaq.
  Imm. 4.  Covid-19-imut misissortinneq PCR-imik misissuinerussaaq, matumani misissortittup aqqa, piffissaq misissortiffiusoq misissuisorlu uppernarsaammi erseqqissumik allassimassallutik. Covid-19-imut misissortinneq napparsimmavimmi peqqissaavimmiluunniit assigisaanilu Nunat Avannarliit ilaanni suliarineqarsimassaaq Kalaallillu Nunaannut aallarnermi ullut marluk (akunnerit 48-t) sinnerlugit pisoqaassuseqassanani.
  Imm. 5.  Covid-19-imut misissortinnermi piumasarineqartut Nunatta Nakorsaaneqarfianiit aalajangersarneqartut naammassineqarsimassapput.
  Imm. 6.  Nunatta Nakorsaaneqarfia imm. 1-4-imut tunngasuni immikkut akuersissuteqarsinnaatitaavoq.
  Imm. 7.  Imm. 1-ip maleruarneqarnissaata qulakkeernissaa angallassissummik piginnittup akisussaaffigaa.

Timmisartut nunatsinnukartut paasissutissiisussaatitaanerat

  § 4.  Angalasut Immersugassamik Sumut-mik immersuisimasut kisimik timmisartumut Kalaallit Nunaannukartussamut ilaaqqusaapput. Angalasoq Immersugassamik Sumut-mik immersuisimanermut nassiussisimanermullu uppernarsaammik timmisartumi sulisumut timmisartumut ikinnginnermini takutitsissaaq. Oqaaseqatigiinni siullermi aappaanilu taaneqartup maleruarnissaa angallatip piginnittuata akisussaaffigaa.

Umiarsuarnut umiarsuarnilu ilaasunut Kalaallit Nunaannut tikittunut malittarisassat immikkut ittut

  § 5.   Nunatsinnukartigatik ulluni kingullerni 14-ini nunani allani, Danmarkimi Savalimmiuniluunniit umiarsualivinni tulaqqasimappata, allatulluunniit iliornikkut sumiiffinnit taakkunannga ilaasunik ikiffigineqarsimappata, taava inuit nalunaarummi matumani §§ 8, 10 aamma 12 malillugit umiarsuarlutik Kalaallit Nunaanni umiarsualivimmut tulakkaangamik nunatsinnut tikittutut nalunaarummi matumani isigineqartarput. Inuit umiarsuarmut ilaasut umiarsuup Kalaallit Nunaanni tulaqqanerani nunameersunik 2 meterit ataallugit qanitsigalutik attaveqateqassagunik § 8 naapertorlugu qanermut imaluunniit kiinnamut assiaquteqarnissaat piumasaqaataavoq.  
  Imm. 2.  Umiarsuit nunatsinnukartigatik ulluni 14-ini kingullerni nunani allani, Danmarkimi, Savalimmiuniluunniit tulaqqasimanngippata allatulluunniit iliornikkut sumiiffinnit taakkunanit ilaasunik ikiffigineqarsimanngippata, taava inuit umiarsuarni ilaasut Covid-19-imik tunillanneqarsimanngitsutut naatsorsuutigineqassapput, inulli nappaammut ersiuteqarpat tamanna naatsorsuutigineqassanngilaq. Umiarsuaq ilaasullu nunat tamalaat akornanni angalaartut pillugit aalajangersakkanut ilaatinneqarput.

  § 6. Umiarsuit ilaasartaatit, taakkununnga ilanngullugit umiarsuit takornarianik angallassissutit, Danmarkimi Savalimmiuniluunniit tulaqqasimappata allatulluunniit iliornikkut ilaasunik ikiffigineqarsimappata nunatsinnukartigatik ulluni kingullerni 14-ini nunat allat umiarsualiviini tulaqqasimappata Nunatsinnut tulassinnaanngillat. Inerteqqut nunap immikkoortuanut tamarmut atuuppoq, matumanilu imartamut, taamaattoq nunat tamalaat akornanni pisussaaffiit ataqqillugit. Oqaaseqatigiinni siullermi aappaanilu taaneqartup maleruarnissaa angallatip piginnittuata akisussaaffigaa.
  Imm. 2.  Imm. 1-imi aalajangersakkanik malinninnginnissaq pillugu Nunatta Nakorsaaneqarfia aalajangersaasinnaavoq.
  Imm. 3.  Imm. 1-imi inerteqqut apeqqutaatinnagu, imm. 2 naapertorlugu umiarsuarnut immikkut akuersissuteqanngitsunut inerteqqutaanngilaq:
1)  Teknikimut tunngatillugu tulanneq, matumani inuttanik ilaasunilluunniit nunamut niusoqarnani, imaluunniit inunnik avataaneersunik umiarsuarmut ikisoqarnani, kiisalu
2)   umiarsuarmi ajornartoornermi, motorip ajutoornerani, ikuallattoornermi assingusumilluunniit pinasuartumik pisoqarnerni tulakkasuarneq.
  Imm. 4. Imm. 1 umiarsuarnut aalajangersimasumik aqquteqarlutik Nunatta umiarsualiviinut tulattartunut taakkunanngalu avalattartunut atuutinngilaq.

Qanermut imaluunnit kiinnamut assiaquteqarnissamut piumasaqaat

  § 7.  Angalasut aqqaneq-marlunnik sinnerlugillu ukiullit kiisalu timmisartuni saqisut qanermut imaluunniit kiinnamut assiaquteqassapput. Piumasaqaatip maleruarnissaa angallatip piginnittuata akisussaaffigaa.
  Imm. 2.  Imm. 1-imi piumasaqaat inunnut angallassissummi ineeqqaniittunut assigisaaniittunulluunniit aammalu ilaasunut illoqatigisamik saniatigut ilaasunik allanik attaveqarsimanngitsunut atuutsinngilaq.
  Imm. 3.  Inuit tamarmik aqqaneq-marlunnik sinnerlugillu ukiullit mittarfinniittut, aallariartortarfinniittut/tikittarfinniittut assigisaanniittullu qanermut imaluunniit kiinnamut assiaquteqassapput. Piumasaqaatip maleruarnissaa inuup akisussaaffigaa.
  Imm. 4.  Taamatuttaaq timmisartoqarfinni, aallariartortarfinni/tikittarfinni assigisaannilu angalasunik attaveqarlutik sulisut qanermut kiinnamulluunniit assiaquteqassapput. Ajornanngippat taakkununnga taarsiullugu sulisut angalasullu akornanni, plastikimik igalaaminermilluunniit assiaqusiisoqarsinnaavoq. Piumasaqaatip maleruarnissaa sulisitsisup akisussaaffigaa.
 Imm. 5.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
 Imm. 6.  Qanorluunniit immikkoortuni 1-imi 3-miluunniit allaqqasoqaraluarpat, peqqutissaqarluarpat qanermut kiinnamulluunniit assiaqutit ilaannakortumik tamakkiisumilluunniit peeqqaneqarallarsinnaapput, assersuutigalugu:
1)  Piffissami sivikitsumi nerinermi imaluunniit imernermi, tamanna angallammi, mittarfiup illorsuartaanni assigisaannilu inerteqqutaanngippat.
2)  Nakorsaatitornermi.
3)  Qarngit aalaneratigut atuaasartumik oqaloqateqarnermi.
4)  Qanermut kiinnamulluunniit assiaqutit anersaartorniarnermut ajoqutaappata ipianngulersitsippataluunniit.
5)  Politiit kinaassutsimik uppernarsaaneranni.

  § 8.  Kalaallit Nunaannut angalasut aqqaneq-marlunnik sinnerlugillu ukiullit nunatsinnut tikinnerminnit qanermut kiinnamulluunniit assiaquteqartassapput:
1)  timmisartoqarfimmiit, umiarsualivimmiit assigisaannilu pingaarnertut najugarisaminnut angalanerminni, 
2)  2 meterit ataallugit inunnut allanut qanitsigalutik pingaarnertut najugarisaminnit Covid-19-imut misissuivimmukarnerminni, aammalu 
3)  pingaarnertut najugarisami avataaniikkunik inunnullu allanut attaveqarfiusuni 2 meterit ataallugit qanitsigissagunik. 
  Imm. 2.   Qanermut kiinnamulluunniit assiaquteqarnissamut piumasaqaat inuup Covid-19-imik tunillatsissimanngitsutut naatsorsuutigineqalernissaata tungaanut atuutissaaq, § 11, imm. 4 imaluunniit 6 takukkit. Piumasaqaat taana § 13 naapertorlugu nunatsinnut angalasunut tamakkiisumik akiuussuserneqarsimasunut atuutinngilaq. 
  Imm. 3.  Qanermut imaluunniit kiinnamut assiaquteqarnissamut piumasaqaat ilisimassutsimik annikillisimasunut, timikkut tarnikkulluunniit sanngiitsunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
 Imm. 4.  Qanorluunniit immikkoortuni 1-imi 2-miluunniit allaqqasoqaraluarpat, peqqutissaqarluarpat qanermut kiinnamulluunniit assiaqutit ilaannakortumik tamakkiisumilluunniit peeqqaneqarallarsinnaapput, tamatumunnga ataani allaqqasut ilanngullugit:
1)  Piffissami sivikitsumi nerinermi imaluunniit imernermi, tamanna angallammi, sumiiffimmi assigisaannilu inerteqqutaanngikkuni.
2)  Nakorsaatitornermi.
3)  Qarngit aalaneratigut atuaasartumik oqaloqateqarnermi.
4)  Qanermut kiinnamulluunniit assiaqutit anersaartorniarnermut ajoqutaappata ipianngulersitsippataluunniit.
5)  Politiit kinaassutsimik uppernarsaaneranni.

  § 9.  Qanermut assiaqutitut taaneqartut tassaapput qanermut qinngamullu assiaqutit ataasiartakkat imaluunniit annoraaminermit sanaat allunaasamillu tasisartumilluunniit siutinut ikkuttartut imaluunniit niaqqup tunuatungaani qilertartoq kiinnamullu attuumasoq. 
  Imm. 2. Kiinnamut assiaqutitut tassaapput isinut, qanermut qinngamullu assiaqutit plastikimik sanaat kiinnamut attuumanngitsut.

Kalaallit Nunaannut tikereernermi malitassat

  § 10.  Angalasut timmisartukkut Kalaallit Nunaannut tikittut Covid-19-imik tunillanneqarsimannginnertik uppernarsaqqaarnagu aaqqissuussanut, nalliuttorsiornernut, sammisaqartitsinernut assigisaanulluunniit peqataaqqusaanngillat. Matumani illup iluani, silami, pisortat inuillu katerittarnerat, aaqqissuussinerit pisussallu il.il. ilaatinneqarput.
  Imm. 2.  Tamakkiisumik akiuussuserneqarsimasut akiuussutissamik kapitissimanerminnut uppernarsaasinnaasut Covid-19-imillu napparsimanermut ersiuteqanngitsut napparsimanngitsutut isigineqassapput. 
  Imm. 3.  Imm. 1-imi inerteqqut pisortat suliffeqarfiutaanni assigisaanilu isersimanermut, inuussutissarsiortut inigisaanni tamanut ammasuni isersimanermut aamma pisortat namminersortullu utoqqarnik paaqqinnittarfiinut napparsimavinnulluunniit isersimanermut inerteqqut aamma atuutsinneqassaaq. Taamaattorli qanermut kiinnamulluunniit assiaqutit atorlugit Covid-19-imut misissortinnissaq, ulluinnarni nioqqutissanik pisiniarnissaq allallu pisariaqavissut allanit isumagineqarsinnaanngitsut isumaginissaat akuerineqarput.
  Imm. 4.  Peqataasut taamaallaat inoqutigiiuppata imm. 1 inissiamut atuutissanngilaq.
  Imm. 5.  Immikkoortut 1 aamma 3 katersuunnernut politikikkut allatulluunniit isummersornissamik siunertalinnut atuutinngillat.

  § 11.  Nunatsinnut angalasut Kalaallit Nunaannut tikereernerup kingorna ullut tallimassaanni kingusinnerusukkulluunniit Covid-19-imut misissortissinnaapput, taamaattorli imm. 2 aamma 3 takukkit.
  Imm. 2.  Nunatsinnut angalasut Covid-19-imut akiuussutissamik tamakkiisumik kapitissimasut, § 13 takuuk, Kalaallit Nunaannut tikinnermi kingorna misissortissanngillat. Taamaakkaluartoq angalasoq aperineqaruni akiuussutissamik kapitissimanini uppernarsassavaa. Angalasup akiuussutissamik kapitissimanini uppernarsarsinnaanngikkuniuk, angalasup inunnut akiuussutissamik kapitissimanngitsunut malittarisassat maleruassavai.
  Imm. 3.  Meeqqat marluk inorlugit ukiullit misissorneqartassanngillat. 
  Imm. 4.  Imm. 1-imi misissortinneq pineqartoq nappaateqannginnermik uppernarsaappat inuk pineqartoq Covid-19-imik tunillanneqarsimanngitsutut isigineqassaaq.
  Imm. 5.  Misissuinermi nappaammik nassaartoqarpat Nunatta Nakorsaaneqarfiata Peqqinnissaqarfiullu innersuussutaat malinneqassapput.
  Imm. 6.  Inuk imm. 1 naapertorlugu Covid-19-imut misissortinngikkuni imaluunniit imm. 2 naapertorlugu akiuussutissamik tamakkiisumik kapitissimanngikkuni § 10-mi inerteqqut Kalaallit Nunaannut tikinnermiit ulluni 14-ini atuutissaaq. Inuk Kalaallit Nunaannut tikinnerminit ullut 14-it sinnerlugit Covid-19-imik nappaateqarnermut ersiuteqarsimanngikkuni Covid-19-imik tunillanneqarsimanngitsutut naatsorsuutigineqassaaq.

Tikiffissat ilaannut angalanermi mianerisassat

  § 12. Kalaallit Nunaannukarlutik angalasut Covid-19-imik tunillatsissimannginnermut uppernarsaaqqaartigatik illoqarfinnut, nunaqarfinnut imaluunniit ukioq naallugu najugaqarfinnut allanut ataani allassimasunut angalaqqusaanngillat:
1) Avannaata Kommuniani:
a) Ilulissat.
2)  Kommune Qeqertalimmi:
a) Aasiaat.
b) Qasigiannguit.
c) Qeqertarsuaq.
3) Qeqqata Kommuniani:
a) Kangerlussuaq.
b) Maniitsoq.
c) Sisimiut.
4) Kommuneqarfik Sermersuumi:
a) Nuuk.
b) Paamiut.
c)  Tasiilaq 
d)  Ittoqqortoormiit.
e)  Nerlerit Inaat
5) Kommune Kujallermi:
a) Narsaq.
b) Narsarsuaq.
c) Qaqortoq.
  Imm. 2.  Nunatsinnut angalasut imm. 1-imi pineqartut Kalaallit Nunaannut tikereernerup kingorna ullut tallimassaanni kingusinnerusukkulluunniit Covid-19-imut misissortissinnaapput, taamaattorli imm. 3 aamma 4 takukkit. 
  Imm. 3.  Angalasut  imm. 1-imi pineqartut aamma Covid-19-imut akiuussutissamik tamakkiisumik kapitissimasut, § 13, imm. 2 takuuk, Kalaallit Nunaannut tikinnermi kingorna misissortissanngillat. Taamaattorli nunatsinnut angalasoq illoqarfimmut, nunaqarfimmut piffinnulluunniit ukioq naallugu najugaqarfiusunut allanut, imm. 1-imi taaneqanngitsunut angalaqqinnerminni aperineqarnermikkut akiuussutissamik kapitissimanerminnut uppernarsaassapput. Nunatsinnut angalasup akiuussutissamik kapitissimanini uppernarsarsinnaanngikkuniuk, nunatsinnut angalasup inunnut akiuussutissamik kapitissimanngitsunut malittarisassat maleruassavai, imm. 7 takuuk.
  Imm. 4.  Meeqqat marluk inorlugit ukiullit misissorneqassanngillat. 
  Imm. 5.  Imm. 2 imaluunniit 4 naapertorlugu misissortinneq nappaateqannginnermik takutitsippat inuk Covid-19-imik tunillatsissimanngitsutut isigineqassaaq tamatumalu kingorna angalaqqissinnaassalluni.
  Imm. 6.  Misissuinermi nappaammik nassaartoqarpat Nunatta Nakorsaaneqarfiata Peqqinnissaqarfiullu innersuussutaat malinneqassapput. 
  Imm. 7.  Nunatsinnut angalasoq imm. 2 imaluunniit 4 naapertorlugu Covid-19-imut misissortinngikkuni imaluunniit imm. 3 naapertorlugu akiuussutissamik tamakkiisumik kapitissimanngikkuni angalaqqissanngilaq, pineqartoq illoqarfinni nunaqarfinnilu imm. 1-imi taaneqartuni ulluni 14-ini uninngareerluni Covid-19-imillu tunillatsissimanermik ersiuteqanngikkuni angalaqqilersinnaavoq.
  Imm. 8.  Nunatta Nakorsaaneqarfia imm. 1-imit immikkut akuersissuteqarsinnaavoq.

  § 13.  Nunatsinnut angalasut § 10-mi aamma § 12, imm. 1-imi ilaasut tamakkiisumik akiuussuserneqarsimanerminnik uppernarsaateqarsinnaagunik Covid-19-imik tunillatsissimannginnerminnik uppernarsaasinnaapput.
  Imm. 2.  Inuk Covid-19-imut tamakkiisumik akiuussuserneqarsimasutut isigineqassaaq inuup akiuussuserneqarsimanerup ingerlarngata naammassisimaneranik uppernarsaasinnaappat. Nunatta Nakorsaaneqarfiata akiuussuserneqarsimanermut uppernarsaatit sorliit akuerisaanersut aalajangissavai.

Pingaartumik inunnut Covid-19-imik siusinnerusukkut tunillatsinnikunut

§ 14.  Nunatsinnut angalasut siusinnerusukkut Covid-19-imik tunillatsinnikuusimasut tikinnerminnilu PCR atorlugu misissortereernermikkut Covid-19-imik tunillatsissimanerminnillu minnerpaamik ulluni 14-ini annerpaamik sapaatit akunnerini 12-inik pisoqaassusilinnik uppernarsaasinnaasut, inatsisitigut naammassillutik akiuussuserneqareersimasutut isigineqassapput.
  Imm. 2.  Inunnut siusinnerusukkut Covid-19-imik tunillatsinnikuusimasunut tikinnerminnilu PCR atorlugu misissortereernermikkut Covid-19-imik tunillatsissimanerminnillu minnerpaamik ulluni 14-ini annerpaamik sapaatit akunnerini 12-inik pisoqaassusilinnik uppernarsaasinnaasunut, Covid-19-imik nappaateqannginnermut uppernarsaanermik piumasaqaat atuutinngilaq.
  Imm. 3.  Uppernarsaat suna uppernarsaatitut akuerisatut atorneqassanersoq Nunatta Nakorsaaneqarfiata aalajangersinnaavaa.

Inuit pillugit paasissutissanik suliarinninnerit

  § 15.  Nalunaarut una naapertorlugu inuup akiuussuserneqarsimaneranut inissisimaffia uppernarsarniarlugu inuit pillugit paasissutissanik suliarinnittoqarsinnaavoq.

Iliuuseqarnerit

  § 16.  § 3, imm. 1, § 4, § 6, imm. 1, § 7, imm. 1, 3 aamma 4, § 8, imm. 1 aamma 2, § 10, imm. 1 aamma 3 aamma § 12, imm. 1 aamma 7-imik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsinermut atorunnaarsitsinermullu aalajangersakkat

  § 17.  Nalunaarut ulloq 10. august 2021-mi atuutilissaaq. 
  Imm. 2.  Peqatigisaanik Kalaallit Nunaannut nunatsinnilu angalanermi piumasaqaatit pillugit Namminersorlutik Oqartussat nalunaarutaat nr. 29 16. april 2021-meersoq atorunnaarsinneqarpoq.
  Imm. 3.   Nalunaarut malillugu killilersuinerit, inerteqquteqarnerit, peqqusinerit il.il. 24. august 2021 ilanngullugu atuutissapput.

Namminersorlutik Oqartussat, ulloq 9. august 2021

Kirsten Fencker
Peqqinnissamut Naalakkersuisoq

/ Aka Olesen