Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 12 a aamma § 29, imm. 2 aamma imm. 3 malillugit aalajangersarneqarpoq:

Atuuffia

  § 1.  Nalunaarut una illoqarfinni Upernavimmi aamma Aasianni kiisalu Avannaata Kommuniata nunaqarfiini ukunani atuutissaaq:
1)  Tasiusaq.
2)  Upernavik Kujalleq.
3)  Nutaarmiut.
4)  Nuussuaq.
5)  Innaarsuit.
6)  Naajaat.
7)  Aappilattoq.
8)  Kangersuatsiaq.
9)  Kullorsuaq.
  Imm. 2.  Nalunaarut Kalaallit Nunaanni Peqqinnissaqarfimmut imaluunniit nakorsiartarfinnut kiisalu nakorsiartarfinnut namminersortunut niuertarfinnilu peqqissaannermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut katersuunnernut, politikikkut allatulluunniit isummersornissamik sunniiniarnissamik siunertalinnut atuutinngilaq.
  Imm. 4.  Nalunaarut eqqartuussivinnut atuutinngilaq.
  Imm. 5.  Nalunaarut namminersortunut pisortaniillu ulluunerani neqeroorutinut, atuarfinnut, ilinniarfeqarfinnut il.il. nappaatit tunillaassortut akiorniarlugit iliuutsit pillugit Inatsisartut peqqussutaanni § 22 naapertorlugu atuutsinngilaq.
  Imm. 6.  Nalunaarut angerlarsimaffinni aaqqissuussanut il.il. atuutinngilaq.
  Imm. 7.  Nunatsinni Nakorsaaneqarfik nalunaarummit immikkut akuersissuteqarsinnaavoq.

Tamanut angallassissutini ilaanermut piumasaqaatit

  § 2.  Inuit inunnut angallassissutini imm. 2-mi taaneqartuni ilaaniarunik:
1) Covid-19-imut akiuussutissamik tamakkiisumik kapitereersimassapput, taamaattorli imm. 3 takuuk, imaluunniit
2) covid-19-imut misissortinnermi tunillatsissimannginnermut uppernarsaasinnaassapput, taannalu annerpaamik 48 tiimit sinnerlugit pisoqaassuseqassanngilaq
  Imm. 2.  Tamanut angallassissutit tamarmik imm. 1-imi ilaapput, tassunga ilanngullugit assersuutigalugu:
1)  Silaannakkut angallassissutit nunaqarfinnit § 1, imm. 1-imi taaneqartunit aallartut imaluunniit tikittut.
2)  Bussit.
3)  Umiarsuit inunnik angallassisartut, aalajangersimasumillu angalasartut.
  Imm. 3.  Inuit tullinnguuttut imm. 1-imi piumasaqaammit ilaatinneqanngillat:
1)  Inuit najukkaminnut tikinniarlutik umiarsuarmik imaluunniit silaannakkut angallassissutimik angalasut.
2)  Inuit Covid-19-imut akiuussuserneqarnissaminnut peqqissaavimmut qaninnerpaamut umiarsuarmik imaluunniit silaannakkut angallassissutimik angalasut.
3)  Inuit nakorsartinnissaminnut peqqissaavimmut umiarsuarmik imaluunniit silaannakkut angallassissutimik angalasut.
4)  Inuit inuiaqatigiinni suliassaqartitaasut tamanullu angallassissutinik angalasariaqalersut.
5)  Inuit Covid-19-imut akiuussutissamik kapitinnissamut Nunatta Nakorsaaneqarfianit nalinginnaasumik innersuunneqanngitsut.
6)  Inuit 17-inik ukiullit ukiukinnerusulluunniit.
7)  Sulisut tamanut angallassissummi pineqartumi sulisut.

  § 3.  Inuk Covid-19-imut tamakkiisumik akiuussuserneqarsimasutut isigineqassaaq inuup taassuma akiuussuserneqarsimanerup naammassisimaneranik uppernarsaasinnaappat. 
  Imm. 2.  Nunatta Nakorsaaneqarfia akiuussuserneqarsimanermut uppernarsaatit sorliit akuerisaanersut aalajangissavaa.

Iliuuseqarnerit

  § 4.  § 2-mik unioqqutitsisoq pinerluttulerinermik inatsit malillugu pineqaatissinneqarsinnaavoq. 
  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilersitsineq aamma atuunneranut piffissaliussaq

  § 5.  Nalunaarut una ulloq 28. juli 2021-mi, nal. 17:00 atuutilissaaq.
  Imm. 2.  Nalunaarut malillugu killilersuinerit, inerteqqutit, peqqussutit il.il. 30. juli 2021 tikillugu atuutissapput.

Namminersorlutik Oqartussat, ulloq 28. juli 2021

Kirsten Fencker
Peqqinnissamut Naalakkersuisoq

/ Aka Olesen