Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 12 a aamma 12 b, aamma § 29, imm. 2 malillugit aalajangersarneqarpoq:

Atuuffiata killilerneqarnera

  § 1.  Nalunaarummi §§ 2-4 katersuunnernut naalakkersuinikkut allatulluunniit isummersornissamik siunertalinnut atuutinngillat. 
  Imm. 2.  Nalunaarummi § 5 napparsimavinnut, nakorsiartarfinnut kiisalu nakorsiartarfinnut namminersortunut niuertarfinnilu peqqissaanermik naalagaaffimmit akuerisaallutik ingerlatani ingerlatsisunut atorfeqartitsiffiusunullu atuutinngilaq.
  Imm. 3.  Nalunaarut ulluunerani neqeroorutinut namminersortunut pisortaniillu pigineqartunut, atuarfinnut, ilinniarfeqarfinnut il.il. atuutinngilaq, nappaatit tunillaassortut akiorniarlugit iliuutsit pillugit Inatsisartut peqqussutaanni § 22 takuuk.

Aaqqissuussinernik il.il., peqataaniarnermi kommuninit allanit angalaqqaarluni peqataaffigineqarsinnaasunik inerteqquteqarneq

  § 2.  Illup iluani silamilu aaqqissuussanik, nalliuttorsiornernik, sammisaqartitsinernik assigisaannilluunniit ingerlataqarnerit, nalinginnaasumik aaqqissuussanut, nalliuttorsiornernut, sammisaqartitsinernut assigisaannulluunniit peqataaniarnermi kommuninit allanit angalaqqaarluni peqataaffigineqarsinnaasut taamatulluunniit naatsorsuuteqarfigineqartut inerteqqutaapput, taamaattorli imm. 2 aamma 3 takukkit.
  Imm. 2.  Aaqqissuussani, nalliuttorsiornerni, sammisaqartitsinerni assigisaanniluunniit peqataanissamut nalunaarnissamik piumasaqaatilinni inuit kommuninit aamma nunanit allaneersut aaqqissuussamut, nalliuttorsiornermut, sammisaqartitsinermut assigisaannulluunniit peqataasussatut nalunaarsorsinnaannginnissaat aaqqissuussisup qulakkiissavaa. Oqaaseqatigiit siulliit eqqortinneqarpata, aaqqissuussineq, nalliuttorsiorneq, sammisaqartitsineq assigisaalluunniit ingerlanneqarsinnaapput, taamaattorli §§ 3 aamma 4takukkit.
  Imm. 3.  Pikkorissartitsinerit, isumasioqatigiinnerit assigisaallu imm. 2-mi ilaapput.
  Imm. 4.  Namminerisamik aaqqissuussinerit, soorlu kuisitsinerit, inuuissiornerit, apersortinnerit, soraarummeertoqarneranut atatillugu nalliuttorsiortitsinerit, katinnerit ilisinerillu imm. 1-imi ilaanngillat. Namminerisamilli aaqqissuussinerit § 3, imm. 1-imi aamma § 4, imm. 1-imi ilaapput.

Illup iluani aaqqissuussinerit il.il., kommuninit allaneersuunngitsunik peqataasullit

  § 3.  Illup iluani aaqqissuussinerit, nalliuttorsiornerit, sammisaqartitsinerit assigisaallu § 2-mi ilaanngitsut amerlanerpaamik 100-nik peqataasoqaqqusaapput, § 5-imillu maleruaassallutik. 
  Imm. 2.  Aaqqissuussisoq aaqqissuussamut, nalliuttorsiornermut, sammisaqartitsinermut assigisaannulluunniit inuit peqataanissaannut toqqaannartumik kajumissaarissanngilaq.

Silami aaqqissuussinerit il.il., kommuninit allaneersuunngitsunik peqataasullit

  § 4.  Silami aaqqissuussinerit, nalliuttorsiornerit, sammisaqartitsinerit assigisaallu § 2-mi ilaanngitsut amerlanerpaamik 250-inik peqataasoqaqqusaapput. 
  Imm. 2.  Aaqqissuussisoq aaqqissuussamut, nalliuttorsiornermut, sammisaqartitsinermut assigisaannulluunniit inuit peqataanissaannut toqqaannartumik kajumissaarissanngilaq.

Ininut kikkunnilluunniit iserfigineqarsinnaasunut piumasaqaatit

  § 5.  Inuussutissarsiummik ingerlatallit aamma suliffeqarfiit pisortanit pigineqartut ininik kikkunnit tamanit iserfigineqarsinnaasunik pigisallit piumasaqaatinik makkuninnga naammassinnissimassapput:
1)  Inuit inimut qatserisartoqarfinni oqartussaasunit akuerineqarsimasumut isersinnaatitaasut amerlanerpaaffissaasa affaannaat isersimaqqusaapput. Inini qatserisartoqarfinni oqartussaasunit akuersissutitaqartinneqanngitsuni, natermi 4 m2-iusumi amerlanerpaamik inuk ataasiinnaaqqusaavoq. Nateq 4 m2-imit mikineruppat oqaaseqatigiit aappaat apeqqutaatinnagit inuup ataasiinnaanissaa akuerineqarsinnaavoq. Nateq oqaaseqatigiit aappaanni pineqartoq qanoq pequteqartiginera apeqqutaatinnagu iikkamiit iikkamut naatsorsorneqassaaq.
2)  Ajornanngippat init imatut pequsersorsimassapput suliffeqarfiillu imatut ingerlanneqassallutik tuniluunnissaq minnerpaaffianiitinneqassalluni, tassunga ilanngullugu pisisartut pulaartullu imminnut qanillinnginnissaat periarfissaqartillugu.
3)  Inimi ininiluunniit tamanit iserfigineqarsinnaasuni eqqiliusaarnissaq ileqqorissaarnissarlu pillugit Nunatta Nakorsaaneqarfianiit paasissutissanik nivinngaasoqassaaq. 
4)  Sulisut tamarmik Nakorsaaneqarfiup eqqiluisaaqqissaarnissamik ileqqorissaarnissamillu innersuussutaanik malinninnissaat qulakkeerneqassaaq. 
5)  Pisisartunut pulaartunullu ajornanngippat imermik qaqorsaammillu imaluunniit assammut spritimik peqassaaq.
6)  Nerisassanik poortorneqarsimanngitsunik tuniniaanermi sulisut aaqqateqassapput.

  § 6.  Inuussutissarsiummik ingerlatalik politiit naliliinerat malillugu § 5-imik unioqqutitsisimappat, inuussutissarsiummillu ingerlatalik § 5-imik malinninnissaa ilimagineqanngippat, inuussutissarsiummik ingerlatalik inip piffissami aalajangersimasumi tamanut matoqqatinnissaanik politiinit peqquneqarsinnaavoq.

Assartuutinut piumasaqaatit

  § 7.  Assartuutit issiaffiusinnaasut sinnerlugit ilaasoqaqqusaanngillat. Oqaaseqatigiinnik siullernik eqqortitsinissaq assartuummik piginnittup akisussaaffigaa.

Pineqaatissiissuteqartarneq

  § 8.  Aaqqissuussisut §§ 2-4-nik unioqqutitsisut pinerluttulerinermik inatsit malillugu pineqaatissinneqarsinnaapput. 
  Imm. 2.  §§ 5-imik aamma 7-imik unioqqutitsisoq imaluunniit § 6 malillugu peqqussummik unioqqutitsisoq pinerluttulerinermik inatsit malillugu pineqaatissinneqarsinnaavoq.
  Imm. 3.  Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.
  Imm. 4.  Akiliisitsinerit nunatta karsianut tussapput.

Atuutilersitsineq, atorunnaarsitsineq piffissarlu atuuffissaa

  § 9. Nalunaarut 5. januar 2021 atuutilissaaq.
  Imm. 2.  Nalunaarut malillugu killilersuinerit, inerteqquteqartitsinerit, peqqusinerit il.il. 30. apriili 2021 ilanngullugu atuutissapput.
  Imm. 3.  Inuit ulloq 20. Juni 2020 sioqqullugu § 2, imm. 2-mi allattorsimasut malillugit aaqqissuussanut, nalliuttorsiornernut, sammisaqartitsinernut assigisaanulluunniit peqataaniarlutik nalunaarsorsimasut taakkungunnga peqataasinnaapput.
  Imm. 4.  Peqatigisaanik atorunnaarsinneqassapput:
1)  Katerisimaartarnernut, ininut kikkunnit tamanit iserfigineqarsinnaasunut assartuutinullu killilersuigallarnerit pillugit Namminersorlutik Oqartussat nalunaarutaat nr. 21, 19. juni 2020-meersoq.
2)  Katerisimaartarnernut, ininut kikkunnit tamanit iserfigineqarsinnaasunut assartuutinullu killilersuigallarnerit pillugit Namminersorlutik Oqartussat nalunaarutaat nr. 28, 31. juli 2020-meersoq.

Namminersorlutik Oqartussat, ulloq 4. januar 2021

Anna Wangenheim

/

Martin Pedersen