Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 7, imm. 1 naapertorlugu Tunillaassortunik Nappaalanersuaqarneranut Ataatsimiititaliarsuarmit aalajangersarneqarput:

Tunillaassortunik Nappaalanersuaqarneranut Ataatsimiititaliarsuup peqqussutaa nr. 2, 3. juni 2021-meersoq tullinnguuttunik ilaneqarpoq.

Tullinnguuttut atuupput:

A: Sulisut sulisunut najugaqarfimmi najugallit:

1. Sulisut sulisunut najugaqarfimmi najugallit namminersorluinnarlutik sulinissaat aammalu sulisunut allanut qaqugukkulluunniit 2 meterit ataallugit qanillinnginnissaat piumasaqaatigalugit, piffimmi immikkoortitaaffiusumi suliassatik isumagisinnaavaat. Sulisunut najugaqarfiup avataaneersut isersimaffigisaanni aamma isersimaqqusaanngillat. Igaffiup illutaa sanaartorfiullu allaffeqarfia sulisunit sulisunut najugaqarfimmi najugaqartunit atorneqaqqusaanngillat, taakkua sulisunut najugaqarfiup avataani najugalinnut suliffiummata.

2. Immikkoortitaanermut peqqussutip atuukkunnaarnissaata tungaanut peqqussut sulisunut najugaqarfimmi najugalinnut atuutissaaq aamma nunatta nakorsaaneranit erseqqissumik akuersissuteqarani piffik assersuutigalugu napparsimavimmi katsorsarneqarnissamut misissortinnissamulluunniit atatillugu sulisunit qimanneqaqqusaanngilaq. Tamannali assersuutigalugu ajoquserujussuarnermi pinasuartariaqartumik nakorsamit ikiorneqarnissamik pisariaqartitsinermi atuutinngilaq.

B: Sulisut sulisunut najugaqarfiup avataani najugallit:

3. Sulisut sulisunut najugaqarfiup avataani najugaqartut ”qanimut attaveqaateqarunik”, piffiup mattusimaffiusup avataaniikkaangamik immikkoortitaagallartutut pissusilersorlutik piffimmi mattusimaneqartumi sulisinnaapput. Taamaattumik kisimiillutik najugaqassapput imaluunniit "qanimut attaveqaatiminnik" allanik najugaqateqarlutik. Sulisut Nunatta Nakorsaaneqarfiata nittartagaani https://nun.gl-imi "qanillisaqarsimasutut" aneqqusaajunnaarallarnermut piumasaqaatit malissavaat.

4. Sulisut najugaqarfiup avataani najugallit "qanimut attaveqaateqarlutik" inuuniarunik, immikkoortitaagallarnissamut peqqussutip atuunnerani, sapaatip akunneranut ataasiarlutik misissorteqqittarnissaat piumasaqaataavoq. Nunatta Nakorsaaneqarfiata misissortinnissamut ulloq nalunaarutigineqartoq sioqqullugu kikkut "qanimut attaveqateqarfigineqarsimanersut" pillugit allattorsimaffik pigissavaa, taakkulu taamaalillutik misissortittussaassallutik.

5. Sulisut sulisunut najugaqarfiup avataani najugallit namminersorluinnarlutik sulissapput sulisunullu najugaqarfimmi najugalinnut qaqugukkulluunniit 2 meterit ataallugit qanillissanatik. Sulisunut najugaqarfimmi najugallit isersimaffigisaanni aamma isersimaqqusaanngillat.

C: Sulisut nunatsinnut tikittut:

6. Nunatsinnut tikinnermit immikkoortitaagallarneq sulisunut najugaqarfimmi najugallit allat qaninngisaanni najugaqarfinni allani pissaaq. Inuit immikkoortinneqarallartut sulisunut allanut, qanittumi nunatsinnut tikeqqammersimanngitsunut immikkoortinneqarallartunulluunniit allanut 2 meterit ataallugit qanillinnginnissaat anguniarlugu immikkut anisarfeqassapput.

7. Nunatsinnut tikittut immikkoortinneqarallartut, nunatsinnut tikinnermi kingorna namminersorluinnarlutik sulinissaat aammalu sulisunut allanut, qanittumi nunatsinnut tikinngitsunut immikkoortinneqarallartunulluunniit qaqugukkulluunniit 2 meterit ataallugit qanillinnginnissaat piumasaqaatigalugit, piffimmi immikkoortitaaffiusumi suliassatik isumagisinnaavaat.

8. Inuit nunarsuarmi piffinnit Covid-19-imik immikkut ittunik (soorlu Deltamik) nappaateqarfiusunit tikittut, tikinnermi kingorna taamaallaat ulluni 14-ini siullerni piffimmut immikkoortitaaffiusumut Nunatta Nakorsaaneranit immikkut akuersissuteqarlutik isersinnaapput.

D: Sulisut nunatsinnit aallartut

9. Inuit sulisunut najugaqarfimmi najugaqarsimasut imaluunniit suliffeqarfimmi sulisimasut nunatsinnit aallannginnerminni misissortissapput. Misissortereernerup kingorna aallarnissartik sioqqullugu piffimmut immikkoortitaaffiusumut uteqqusaanngillat aallarnissamilu tungaanut aneqqusaajunnaarallaqqassallutik. Misissortinneq kingulleq piffissami aallarfiusussami akunnerit 48-t sinnerlugit pisoqaassuseqassanngilaq.

E. Pissutsit ataatsimut isigalugit

10. Peqqussummi takuneqarsinnaasutut sanaartorfimmut pisarialinnik pajuttoqarsinnaavoq. Taamatuttaaq iliuutsit pinaveersaartitsissutaasut, Tunillaassortunik Nappaalanersuaqarneranut Ataatsimiititaliarsuup peqqussutaanut atassutillit nakkutigalugit inuit allat, eqqaavilerisut anartarfilerisullu suliassanillu allanik kinguartinneqarsinnaanngitsunik suliallit isersinnaapput.

11. Sulisunut najugaqarfimmi init ataatsimoorfiusinnaasut matoqqagallassapput. Perusuersartarfiit inunnut sulisunut najugaqarfiup avataani najugalinnut atugassiat eqqiluitsuunissaannut immikkut piumasaqaateqassaaq.

12. Inuit nunatsinnut tikeqqammerlutik imaluunniit tunillatsissimasumut qanillisimallutik immikkoortinneqarallartut Nakorsaaneqarfiup angerlarsimaannaqqusaanermut malittarisassai malissavaat.

13. Inuit COVID-19-imik tunillatsissimanertik pissutigalugu mattusimasut, Nakorsaaneqarfiup angerlarsimalluni mattusimanermut najuqqutassiai malissavaat sulisunullu najugaqarfiup ilaani immikkoortumi najugaqassallutik.

Najoqqutassat uku ullormi 8. juni 2021-mi atuutilissapput Tunillaassortunillu Nappaalanersuaqarneranut Ataatsimiititaliarsuup peqqussutaata nr. 2, 3. junimeersup, sivitsuisoqassappallu sivitsuutit ilanngullugit atuukkunnaarnissaasa aammalu sulisunut najugaqarfimmi tunillaassuuttoqarunnaarnissaata tungaannut matoqqatitsinerullu atuukkunnaarsinneqarnissaata tungaanut atuutissallutik.

Tunillaassortunik Nappaalanersuaqarneranut Ataatsimiititaliarsuaq, ulloq 7. juni 2021

Bjørn Tegner Bay
Tunillaassortunik Nappaalanersuaqarneranut Ataatsimiititaliarsuarmi siulittaasoq