Piniarneq aallaaniarnerlu pillugit Inatsisartut inatsisaat nr. 12, 29. oktober 2019, § 8, imm. 3 aamma § 17, imm. 2, aamma Arfernik angisuunik illersuineq piniarnerlu pillugit Namminersorlutik Oqartussat nalunaarutaat nr. 9, 6. deccember 2018-imeersumi § 33 naapertorlugit, aalajangersarneqarpoq:

Atuuffik

  § 1.  Ileqqoreqqusaq Nuup Kangerluanut atuuppoq aamma sumiiffimmut Nuup eqqaaniittumut  Kangerup, Kitsissut, Angisunnguup aamma Aqissersiorfiup akornanniittumut, ilanngussaq 1-imi nalunaarsorsimasutut. 

Qipoqqarnik piniarsinnaanermut pissaasinnaanermullu aalajangersakkat

  § 2.  § 1-imi sumiiffinni taaneqartuni qipoqqarnik pissaaniarneq aamma piniarneq inerteqqutaavoq.

Pineqaatissiissutit

  § 3.  Ileqqoreqqusami matumani § 2-mik unioqqutitsineq akiligassinneqarnermik aamma arsaarinninnermik pineqaatissiissutigineqarsinnaavoq. Pineqaatissiissutigineqartut akiliisitsissutit aamma arsaarinnissutigineqartut Nunatta Karsianut nakkartinneqassapput.

Atortuulersinneqarnera

  § 4.  Kommunemi ileqqoreqqusaq una ullormi 18. juni 2021-mi atuutilerpoq.

Kommuneqarfik Sermersuumi kommunalbestyrelsep ullormi 2. martsi 2021-mi taamatut akuersissutigivaa

Charlotte Ludvigsen
Borgmesteri

Nuup Kangerluani Kommuneqarfik Sermersuumiittumi qipoqqaat piniarneqarsinnaanerannut aamma pissanneqarsinnaanerannut inerteqqut pillugu ileqqoreqqusaq atortuulersinneqarpoq.

Namminersorlutik Oqartussat, ulloq 16. juni 2021

Aqqaluaq B. Egede
Aalisarnermut Piniarnermullu Naalakkersuisoq