Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, ilaatigut aalisarneq pillugu Inatsisartut inatsisaatigut nr. 6, 20. maj 1998-imeersukkut, aalisarneq pillugu Inatsisartut inatsisaatigut nr. 5, 21. maj 2002-imeersukkut, Inatsisartut inatsisaatigut nr. 5, 4. juni 2012-imeersukkut, Inatsisartut inatsisaatigut nr. 12, 3. december 2012-imeersukkut kingullermillu Inatsisartut inatsisaatigut nr. 18, 3. juni 2015-imeersukkut allanngortinneqartumi, § 10a, § 26, imm. 1 aamma § 33, imm. 2 naapertorlugit aalajangersarneqarput:

Atuuffia

  § 1.  Nalunaarut imartami Kalaallit Nunaata aalisarnikkut oqartussaaffigisaani avataanilu kalaallit angallataannut aalisarsinnaanermut akuersissuteqartunut atuuppoq.
Imm. 2. Nalunaarut aamma nunat allamiut angallataannut kalaallisut aalisarsinnaanermut akuersissuteqarlutik aalisartunut atuuppoq.

Nassuiaatit

  § 2.  "Aalisagaq ilivitsuutillugu" paasineqassaaq aalisakkap uumanermini oqimaassusiatut.

  § 3.  "Pisat ilaasa nalunaarutigineqarnerini naatsorsueriaaseq" paasineqassaaq kisitsisitut, imaluunniit tunisassiap inereerlugu suliarineqareersup annertussusiatut, poortuutai ilanngunnagit oqimaassusiata aalisakkat pisarineqarsimasut ilivitsuullutik oqimaassusiisa naatsorsorneqarnissaanut amerlisaatitut.

Pisat ilaasa nalunaarutigineqarnerini naatsorsueriaatsit

  § 4.  Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA) pisanik nalunaaruteqarnermi ilanngussaq 1-imi pisat ilaasa nalunaarutigineqarnerini naatsorsueriaatsit taaneqartut atorneqassapput.

  § 5.  Ilanngussaq imm. 1-imi eqqaaneqarsimanngitsunik tunisassiortoqarpat KANUAANA-mut saaffiginnittoqassaaq, taassumalu tunisassiamut tassunga tunngatillugu pisat ilaasa nalunaarutigineqarnerini naatsorsueriaaseq aalajangersassavaa.

  § 6.  Kalaallit angallataasa imartami Kalaallit Nunaata aalisarnikkut oqartussaaffigisaata avataani aalisarneranni ilanngussaq 1-imi pisat ilaasa nalunaarutigineqarnerini naatsorsueriaatsit atorneqassapput, nunami namminermi imaluunniit nunat tamalaat akornanni oqartussaasunit pisat ilaasa nalunaarutigineqarnerini naatsorsueriaatsinik allanik immikkut aalajangersaasoqarsimanngippat.

Pineqaatissiissutit

  § 7.  §§ 4 - 6-imi aalajangersakkanik unioqqutitsinerit Kalaallit Nunaanni pinerluttulerinermut inatsimmi malittarisassat malillugit akiliisitsinermik arsaarinninnermillu pineqaatissiissutigineqarsinnaapput. 
  Imm. 2.  Pinerluttulerinermut inatsimmi malittarisassat malillugit inatsisilerinermut tunngatillugu inuttut naatsorsuussaasut taamatuttaaq imm. 1-imut ilaapput. 
  Imm. 3.  Imm. 1 aamma 2 malillugit suliat Kalaallit Nunaanni Eqqartuussivimmut suliaqartussatut siullertut suliakkiutigineqassapput.
  Imm. 4.  Imm. 1-3 malillugit akiliisitsinerit aalajangersarneqartut Nunap Karsianut pisassanngortinneqassapput.

Atuutilerfia

  § 8.  Nalunaarut ulloq 1. januar 2021-imi atuutilissaaq.
  Imm. 2. Tamatumunnga peqatigitillugu, Pisat ilaasa nalunaarutigineqarnerini naatsorsueriaatsit pillugit Namminersorlutik Oqartussat nalunaarutaat nr. 5, 22. marts 2012-imeersoq atorunnaarsinneqarpoq.

Namminersorlutik Oqartussat, ulloq 18. december 2020

Jens Immanuelsen

/

Jørgen Isak Olsen