Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20 12. november 2001-imeersumi, Nappaatit tunillaassortut akiorniarlugit iliuutsit pillugit Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 6 a, 12 a, 12 b, 12 c, 21 a aamma 21 b aamma § 29 imm. 2 malillugit aalajangersarneqarpoq:

Atuuffia

  § 1.  Nalunaarut Kalaallit Nunaannukartunut nunatsinnilu angalasunut atuutissaaq.

Atuuffiata killilerneqarnera

  § 2.  Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutsinneqassanngitsut aalajangerneqarsinnaavoq.

  Imm. 2.  Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.

  Imm. 3.  Inunnut Issittumi Sakkutooqarfimmi tassanilu immikkoortortaqarfinni sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.

  Imm. 4.  Inunnut Peqqinnissaqarfimmi sulisunut Nunatsinni Nakorsaaneqarfik imm. 1 naapertorlugu aalajangiisassaaq.

  Imm. 5. Inunnut imm. 2-4-mi taaneqanngitsuni sulisunut,

Nunatsinni Nakorsaaneqarfik imm. 1 naapertorlugu aalajangiisassaaq. Tamatuma saniatigut Nunatta Nakorsaaneqarfia qinnuteqarnikkut inunnut inuiaqatigiinnut pingaarutilimmik suliaqanngitsunut § 10-mit immikkut akuersissuteqarsinnaavoq.

  Imm. 6.  Nunatsinni Nakorsaaneqarfiup nalunaarummi matumani aalajangersakkat ilaat tamaasaluunniit peqqinnissaqarfimmi katsorsarneqartunut atuutinneqassanngitsut aalajangersinnaavaa.

Timmisartumi Kalaallit Nunaannukartussami ilaasunut piumasaqaatit

  § 3.  Angalasut Covid-19-imik nappaateqannginnerminnik uppernarsaammik takutitsisut kisimik timmisartumut Kalaallit Nunaannukartussamut ilaaqqusaapput. Oqaaseqatigiinni siullermi taaneqartup naammassinninnissaa angallatip piginnittuata akisussaaffigaa.

  Imm. 2 Covid-19-imut misiligut napparsimmavimmi peqqissaavimmiluunniit assigisaanilu Nunat Avannarliit ilaanni suliarineqarsimassaaq Kalaallillu Nunaannut aallarnermi ullut tallimat (akunnerit 120-t) sinnerlugit pisoqaanerussanngilaq.

  Imm. 3.  Covid-19-imut misissortinnermut piumasarineqartut Nunatsinni Nakorsaaneqarfimmit aalajangersarneqartut naammassineqarsimassapput.

  Imm. 4. Nunatsinni Nakorsaaneqarfik imm. 1-imik 2-millu immikkut akuersissuteqarsinnaavoq.

Timmisartut Nunatsinnukartut paasissutissiisussaatitaanerat

  § 4.  Angalasut Immersugassamik Sumut-mik immersuisimasut kisimik timmisartumut Kalaallit Nunaannukartussamut ilaaqqusaapput. Angalasoq immersugassamik Sumut-mik immersuisimanermut nassiussisimanermullu uppernarsaammik timmisartumi sulisumut timmisartumut ikinnginnermini takutitsissaaq. Oqaaseqatigiinni siullermi aappaanilu taaneqartup naammassinninnissaa angallatip piginnittuata akisussaaffigaa.

Umiarsuarni il.il. Kalaallit Nunaannukartussani ilaasinnaanermut piumasaqaatit

  § 5.  Umiarsuit ilaasartaatit, matumanilu ilaallutik umiarsuit takornarianik angallassissutit, Nunatsinnukartigatik ulluni kingullerni 14-ini nunat allat umiarsualiviini tulaqqasimappata Nunatsinni tulassinnaanngillat, matumani Danmarkimi Savalimmiuniluunniit tulaqqasimappata allatulluunniit iliornikkut ilaasunik ikiffigineqarsimappata. Inerteqqut nunap immikkoortuanut tamarmut atuuppoq, matumanilu imartamut, taamaattoq nunat tamalaat akornanni pisussaaffiit ataqqillugit. Oqaaseqatigiinni siullermi aappaanilu taaneqartup naammassinninnissaa angallatip piginnittuata akisussaaffigaa.

  Imm 2. Umiarsuit ilaasartaatit, matumanilu takornarianik angallassissutit, Nunatsinnukartigatik ulluni kingullerni 14-ini nunat allat umiarsualiviini tulassimanngitsut §§ 3-mi aamma 10-mi ilaatinneqanngillat, kisianni nunat tamalaat akornanni angalaartut pillugit aalajangersakkanut ilaatinneqarlutik.

  Imm. 3. Imm. 1 aamma 2 angallatinut nuannaariartaatinut aamma atuupput. Nunatta Nakorsaaneqarfia tassannga immikkut akuersissuteqarsinnaavoq.

  Imm. 4. Imm. 1 aamma 2 umiarsuarnut aalajangersimasumik aqquteqarlutik Nunatta umiarsualiviinut tulattartunut taakkunanngalu avalattartunut atuutinngilaq.

Qanermut assiaquteqarnissamut piumasaqaat il.il.

  § 6. Angalasut aqqaneq-marlunnik sinnerlugillu ukioqartut kiisalu saqisut timmisartuni qanermut imaluunniit kiinnamut assiaquteqassapput. Piumasaqaatip naammassinninnissaa angallatip piginnittuata akisussaaffigaa.
  Imm. 2. Inuit tamarmik aqqaneq-marlunnik sinnerlugillu ukioqartut mittarfinniittut, mittarfiup illorsuartaanniittut assigisaannilu qanermut imaluunniit kiinnamut assiaquteqassapput. Piumasaqaatip naammassinninnissaa inuup akisussaaffigaa.
  Imm. 3. Mittarfinni, mittarfiup illorsuartaanni assigisaannilu sulisut ilaasunik attaveqartartut aamma qanermut imaluunniit kiinnamut assiaquteqassapput. Periarfissaappat sulisut angalasullu akornanni plastik-inik imaluunniit igalaaminernik assiaqusersortoqarsinnaavoq. Piumasaqaatip naammassinninnissaa sulisitsisup akisussaaffigaa.
  Imm. 4. Qanermut imaluunniit kiinnamut assiaquteqarnissamut piumasaqaat ilisimassutsimik killilimmik piginnaasaqartunut, timikkut tarnikkulluunniit sanngiittunut, allamilluunniit peqquteqarlutik qanermut kiinnamulluunniit assiaquteqarsinnaanngitsunut atuutinngilaq.
  Imm. 5. Qanorluunniit immikkoortuni 1-imi 2-miluunniit allaqqasoqaraluarpat, peqqutissaqarluarpat qanermut kiinnamulluunniit assiaqutit ilaannakortumik tamakkiisumilluunniit peerneqarsinnaapput, assersuutigalugu:
1) Piffissami sivikitsumi nerinermi imaluunniit imernermi, tamanna angallammi, mittarfiup illorsuartaanni assigisaannilu inerteqqutaanngikkuni.
2) Nakorsaatitornermi.
3) Qarngit aalaneratigut paasinnittartoq oqaloqatiginerani.
4) Qanermut kiinnamulluunniit assiaqutit anersaartorniarnermut ajoqutaagunik ipianngulersitsippataluunniit.
5) Politiit kinaassutsimik uppernarsaaneranni.

  § 7.  § 6-imi qanermut assiaqutitut taaneqartut tassaapput qanermut qinngamullu assiaqutit ataasiartakkat imaluunniit annoraaminermit sanaat allunaasamillu tasisartumilluunniit siutinut ikkuttartoq imaluunniit niaqqup tunuatungaani qilertartoq kiinnamullu attuumasoq.
  Imm. 2. § 6-imi kiinnamut assiaqutitut taaneqartut tassaapput isinut, qanermut qinngamullu assiaqutit plastikimit sanaat kiinnamut attuumanngitsut.

Kalaallit Nunaannut tikereernermi malitassat

  § 8. Inuit Kalaallit Nunaannut tikittut Covid-19-imik tunillanneqarsimannginnertik uppernarsaqqaarnagu aaqqissuussanut, nalliuttorsiornernut, sammisaqartitsinernut assigisaanulluunniit peqataaqqusaanngillat. Matumani illup iluani, silami, pisortat inuillu katerittarnerat, aaqqissuussinerit pisussallu il.il. pineqarput.

  Imm. 2. Pisortat suliffeqarfiutaanni assigisaannilu isersimanermut, inuussutissarsiortut inigisaanni tamanut ammasuni isersimanermut aamma pisortat namminersortullu utoqqarnik paaqqinnittarfiinut napparsimmavinnulluunniit isersimanermut inerteqqut aamma atuutinneqassaaq. Taamaattoq misissortinnissamut, ulluinnarni nioqqutissanik pisiniarnerit allatullu pisariaqavissumik pisiniarnissat allanit isumagineqarsinnaanngitsut isumaginissaat akuerineqarput.

  Imm. 3.  Peqataasut taamaallaat inoqutigiiuppata imm. 1 inissiamut atuutissanngilaq.

  Imm. 4.  Imm. 1 aamma 2 katersuunnernut politikikkut allatulluunniit isummersornissamik siunertalinnut atuutinngillat.

  § 9.  Inuit § 8-mi pineqartut Kalaallit Nunaannut tikereernerup kingorna ullut tallimassaanni kingusinnerusukkulluunniit Covid-19-imik napparsimanermut misissortissinnaapput.

  Imm. 2. Misissuinermi nappaammik nassaartoqanngippat misissorneqartoq Covid-19-imik tunillanneqarsimanngitsutut naatsorsuutigineqassaaq, taamaammallu § 8-mi inerteqquteqarnermut ilaanani.

  Imm. 3. Misissuinermi nappaammik nassaartoqarpat peqqinnissaqarfiup malittarisassai malinneqassapput.  Imm. 4.  Inuk Covid-19-imik nappaateqarnermut misissortinngippat § 8-mi inerteqqussut Kalaallit Nunaannut tikinnermiit ulluni 14-ini atuutissaaq. Inuk Kalaallit Nunaannut tikinnerminit ullut 14-it sinnerlugit Covid-19-imik nappaateqarnermut ersiuteqarsimanngikkuni Covid-19-imik tunillanneqarsimanngitsutut naatsorsuutigineqassaaq.

Tikiffissat ilaannut angalanermi mianerisassat

  § 10. Nunatsinnut tikittut ataani illoqarfiit, nunaqarfiit imaluunniit ukioq naallugu najugaqarfiit allanneqarsimasut avataannut angalaqqusaanngillat Covid-19-imik tunillatsissimannginnermut uppernarsaaqqaartigatik:

1) I Avannaata Kommunia:

a) Ilulissat.

2)  Kommune Qeqertalimmi:

a) Aasiaat.

b) Qasigiannguit.

c)  Qeqertarsuaq.

3)  Qeqqata Kommuniani:

a) Kangerlussuaq.

b)  Maniitsoq.

c) Sisimiut.

4) Kommuneqarfik Sermersuumi:

a) Nuuk.

b) Paamiut.

5) Kommune Kujallermi:

a) Narsaq.

b) Narsarsuaq.

c) Qaqortoq.

  Imm. 2. Angalasut immikkoortoq 1-imi ilaasut Kalaallit Nunaannut tikereernerup kingorna ullut tallimassaani kingusinnerusukkulluunniit Covid-19-imik napparsimanermut misissortinneqarsinnaapput. Misissortinneranni tunillatsissimanngitsut paasineqarpat inuit Covid-19-imik tunillatsissimanngitsutut naatsorsuutigineqassapput angalaqqilersinnaallutillu.

  Imm. 3. Misissuinermi nappaammik nassaartoqarpat peqqinnissaqarfiup malittarisassai malinneqassapput.

  Imm. 4. Angalasoq Covid-19-imut nappaateqarnermut misissortinngikkuni angalaqqissanngilaq, pineqartoq ulluni 14-ini illoqarfinni nunaqarfinnilu immikkoortoq 1-imi taaneqartuni uninngareerluni Covid-19-imillu tunillatsissimanermik ersiuteqanngikkuni angalaqqilersinnaavoq.

Pineqaatissiissuteqartarneq

  § 11.  § 3, imm. 1, § 4, § 5, imm. 1-3, § 6, imm. 1-3, § 8, imm. 1-2, § 10, imm. 1, 2 aamma 4-mik unioqqutitsisoq pinerluttulerinermik inatsit malillugu pineqaatissinneqarsinnaavoq.

  Imm. 2.  Ingerlatseqatigiiffiit il.il. (inatsisilerinermi inuttut immikkoortutut isigineqartut) Pinerluttulerinermik Inatsimmi kapitali 5-imi malittarisassat malillugit Pinerluttulerinermut Inatsiseqartitsinikkut akisussaatinneqarlutik pineqaatissinneqarsinnaapput.

  Imm. 3.  Pillaammik akiliutit Nunatta Karsianut akiliutigineqartassapput.

Atuutilersinneqarnera

  § 12.  Nalunaarut 30. september 2020 atortuulersinneqassaaq.

  Imm. 2.  Peqatigalugu Nunatta avataaniit Nunatsinnut angalanermi piumasaqaatit pillugit Namminersorlutik Oqartussat nalunaarutaat nr. 30 10 juli 2020-meersoq (Immikkoortoq 2) atorunnaarsinneqassaaq.

Imm. 3.  Nalunaarut malillugu killilersuinerit, inerteqquteqartitsinerit, peqqusinerit il.il. 31. januar 2021 tikillugu atuutissapput.

Ikaarsaarnissamut aalajangersakkat

  § 13. 7. oktober 2020-p tungaanut ulloq ilanngullugu meeqqat aqqaneq-marluk ataallugit ukiullit §-ini 3-mi ilaatinneqanngillat.

Namminersorlutik Oqartussat, ulloq 29. september 2020

Anna Wangenheim

/

Tine Pars