Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20 12. november 2001 -imeersumi, Nappaatit tunillaassortut akiorniarlugit iliuutsit pillugit

Inatsisartut inatsisaatigut nr. 1, 1. april 2020-meersutigut allanngortinneqartumi, §§ 6, 6 a, 12 a, 12 b, 12 c, 21 a aamma 21 b aamma § 29 imm. 2 malillugit aalajangersarneqarpoq:

Nunami oqartussaaffigisami atuuffii

  § 1. Nalunaarut Kalaallit Nunaata nunataani atuuppoq.

Atuuffia

  § 2.  Inuit danskisut innuttaassusillit aamma inuit Islandimiutut innuttaassusillit §§-ni 5, 6 aamma 8-mi ilaatinneqanngillat, taamaattoq imm. 2 aamma 3 takukkit.

  Imm. 2. Imm. 1-imut ilannguttoqarniarpat inuup Savalimmiuniit Islandimiilluunniit toqqaannartumik tikinnissaa aamma Kalaallit Nunaannut aallarnissaq sioqqullugu Savalimmiuni Islandimiluunniit ulluni 14-ini najugaqartarsimanissaa piumasaqaataavoq. Tamanna aamma Savalimmiuniit Islandikkut Kalaallit Nunaannut angalasimasunut imaluunniit Islandimit Savalimmiukkut Kalaallit Nunaannut angalasimasunut atuuppoq.

  Imm. 3. Danskisut Islandimiutullu innuttaassusillit Kalaallit Nunaanniit toqqaannartumik Islandilianngikkunik Savalimmiunukartut nunani taakkunaniiginnassagunik kingusinnerusukkullu toqqaannartumik Kalaallit Nunaaliartut imm. 1-imut aamma ilaatinneqarput. Taamatuttaaq Kalaallit Nunaanniit Islandimut Savalimmiunullu angalasimasunut imaluunniit Kalaallit Nunaannit Savalimmiunut Islandimullu angalasimasunut tamanna atuuppoq.

  § 3. Nalunaarummi matumani aalajangersakkat ilaat tamarmilluunniit inunnut inuiaqatigiinnut pingaarutilimmik sulialinnut atuutinneqassanngitsut aalajangerneqarsinnaavoq.

  Imm. 2. Inunnut Kalaallit Nunaanni Politiini sulisunut Kalaallit Nunaanni Politimesteri imm. 1 naapertorlugu aalajangiisassaaq.

  Imm. 3. Inunnut Issittumi Sakkutooqarfimmi sulisunut Issittumi Sakkutooqarfimmi pisortaasoq imm. 1 naapertorlugu aalajangiisassaaq.

  Imm. 4. Inunnut Peqqinnissaqarfimmi sulisunut Nunatsinni Nakorsaaneqarfik imm. 1 naapertorlugu aalajangiisassaaq.

  Imm. 5. Inunnut immikkoortuni 2-4-mi taaneqanngitsuni sulisunut Nunatsinni Nakorsaaneqarfik imm. 1 naapertorlugu aalajangiisassaaq. Tamatuma saniatigut Nunatta Nakorsaaneqarfia qinnuteqareernikkut inunnut inuiaqatigiinni pinartumik suliaqanngitsunut § 8-mit immikkut akuersissuteqarsinnaavoq.

  Imm. 6. Nunatsinni Nakorsaaneqarfiup nalunaarummi matumani aalajangersakkat ilaat tamaasaluunniit peqqinnissaqarfimmi katsorsarneqartunut atuutinneqassanngitsut aalaj angersinnaavaa.

  Imm. 7. Angalasut laboratoriami nakorsaanermit akuerineqartut ilaanni Covid 19-imut akiuussutissanik kapineqarsimallutik uppernarsarsinnaappassuk §§ 6, 8 aamma 9-mit mininneqarnissaannik Nakorsaaneq aalajangiisinnaavoq. Angalasut aallarnissaq sivikinnerpaamik ullunik tallimanik sioqqutsillutik uppernarsaatissanik nakorsaanermut nassiussissapput. Immikkut akuersissuteqarnissaq akuersissutigineqarpat qinnuteqartoq aallartinnani allakkatigut uppernarsaammik nakorsaanermit tunineqassaaq.

  Imm. 8. Meeqqat 12-t inorlugit ukiullit §§-ni 6 aamma 9-mi ilaatinneqanngillat. Meeqqat 12-t inorlugit ukiullit ingiaqatitillusooq § 8-mi aalajangersakkat malissavaat.

Sapaatip akunneranut Air Greenland aqqutigalugu avataanniit tikissinnaatitaasut amerlanerpaaffiat

  § 4. Coronamut allattoqarfik Kalaallit Nunaannut Air Greenlandimut ilaallutik sapaatip akunneranut amerlanerpaat tikissinnaasut pillugit Air Greenlandimut nalunaaruteqassaaq.

Timmisartortitseqatigiit allat assigisaallu nunatsinnut angalatitsisarnerannut piumasaqaatit

  § 5. Timmisartortitseqatigiit allat assigisaallu, Air Greenlandiunngitsoq, Kalaallit Nunaanni millutik timmisartukkut angallassiniartut Corona pillugu allatseqarfimmit Kalaallit Nunaannut angallassinissamut qinnuteqassapput.

Timmisartumi Kalaallit Nunaanni mittussami ilaasunut piumasaqaatit

  § 6. Angalasut Covid-19-imik nappaateqannginnerminnik uppernarsaatimik takutitsisut kisimik timmisartumut Kalaallit Nunaannut mittussamut ilaaqqusaapput. Oqaaseqatigiit siulliit eqqortinnissaannut timmisartortitseqatigiiffik akisussaavoq.

  Imm. 2. Covid-19-imut misissugassamik napparsimmavimmi peqqissaavimmiluunniit allaniluunniit Nunatsinni Nakorsaaneqarfiup akuerisaani tigusisoqassaaq.

  Imm. 3. Covid-19-imut misissortinnermi piumasarineqartut Nunatsinni

Nakorsaaneqarfimmit aalajangersarneqartut naammassineqarsimassapput.

  Imm. 4. Imm. 1 -imi aalajangersakkanik malinninnginnissaq pillugu Nunatsinni Nakorsaaneqarfik aalajangersaasinnaavoq.

Avataaniit angalasut nalunaartussaatitaanerat

  § 7. Angalasut Immersugassaq Sumut-mik immersuisimasut kisimik timmisartumut

Kalaallit Nunaannut mittussamut ilaaqqusaapput. Angalasoq timmisartumi sulisumut Immersugassaq Sumut-mik immersuisimanermut nassiussisimanermullu uppernarsaammik takutitsissaaq. Oqaaseqatigiinni siullermi aappaannilu taaneqartut eqqortinnissaannut timmisartortitseqatigiiffik akisussaavoq.

Kalaallit Nunaannut tikereernermi malitassat

  § 8. Inuit timmisartukkut Kalaallit Nunaannut tikittut Covid-19-imik tunillanneqarsimannginnertik uppernarsaqqaarnagu aaqqissuussanut, nalliuttorsiornernut, sammisaqartitsinernut assigisaanulluunniit peqataaqqusaanngillat. Matumani illup iluani, silami, pisortat inuillu katerittarnerat, aaqqissuussinerit pisussallu il.il. ilaatinneqarput.

  Imm. 2. Pisortat suliffeqarfiutaani assigisaanilu isersimanermut, inuussutissarsiortut inigisaanni tamanut ammasuni isersimanermut aamma pisortat namminersortullu utoqqarnik paaqqinnittarfiinut napparsimavinnulluunniit isersimanermut inerteqqussut aamma atuutinneqassaaq. Taamaattoq ulluinnarni nioqqutissanik pisiniarnerit allatullu pisariaqavissumik pisiniarnissat allanit isumagineqarsinnaanngitsut isumaginissaat akuerineqarput.

  Imm. 3. Peqataasut taamaallaat inoqutigiiuppata imm. 1 inissiamut atuutissanngilaq.

  Imm. 4. Immikkoortut 1 aamma 2 katersuunnernut politikikkut allatulluunniit isummersornissamik siunertalinnut atuutinngillat.

  § 9. Inuit § 6-imi pineqartut Kalaallit Nunaannut tikereernerup kingorna ullut tallimassaani kingusinnerusukkulluunniit Covid- 19-imik napparsimanermut misissortinneqarsinnaapput.

  Imm. 2. Misissuinermi nappaammik nassaartoqanngippat misissorneqartoq Covid-19-imik tunillatsinneqarsimanngitsutut naatsorsuutigineqassaaq, taamaammallu § 8-mi inerteqquteqarnermut ilaanani.

  Imm. 3. Misissuinermi nappaammik nassaartoqarpat inuk pineqartoq tamanna pillugu malittarisassat nalinginnaasut malillugit katsorsarneqalissaaq, takuuk Nappaatit tunillaassortut akiorniarlugit iliuutsit pillugit Inatsisartut peqqussutaat.

  Imm. 4. Inuk Covid-19-imik nappaateqarnermut misissortinngippat § 8-mi inerteqqussut Kalaallit Nunaannut tikinnermiit ulluni 14-ini atuutissaaq. Inuk Kalaallit Nunaannut tikinnerminit ullut 14-it sinnerlugit Covid- 19-imik nappaateqarnermut ersiuteqarsimanngikkuni Covid-19-imik tunillatsinneqarsimanngitsutut naatsorsuutigineqassaaq.

  Imm. 5. Inuk Kalaallit Nunaannut tikinnerminit ullut 14-it kingorna Covid-19-imik nappaateqarnermut ersiuteqaruni tamanna pillugu malittarisassat nalinginnaasut malillugit katsorsarneqalissaaq, takuuk Nappaatit tunillaassortut akiorniarlugit iliuutsit pillugit Inatsisartut peqqussutaat.

Pineqaatissiissuteqartarnerit

  § 10. §§ 4 aamma 5, § 6 imm. l aamma §§ 7 aamma 8-mik unioqqutitsisoq pinerluttulerinermik inatsit malillugu pineqaatissinneqarsinnaavoq.

  Imm. 2. Ingerlatseqatigiiffiit il.il. (inatsisilerinermi inuttut immikkoortutut isigineqartut) pinerluttulerinermik inatsimmi kapitali 5-imi malittarisassat malillugit pinerluttulerineq pillugu inatsiseqartitsinikkut akisussaatinneqarlutik pineqaatissinneqarsinnaapput.

Atuutilerfia

  § 11. Nalunaarut ullormi 17. juni 2020, nal. 16:00 atuutilissaaq. Peqatigitillugu Nunatta avataanniit timmisartukkut Kalaallit Nunaannut angalanermi piumasaqaatit pillugit Namminersorlutik Oqartussat nalunaarutaat nr. 18, 15. Juni 2020-imeersoq (Immikkoortoq 1) atorunnaarsinneqassaaq.

  Imm. 2. Nalunaarut malillugu killilersuinerit, inerteqquteqartitsinerit, peqqusinerit il.il. 6. juli 2020 tikillugu atuutissapput.

Namminersorlutik Oqartussat, ulloq 17. juni 2020

Anna Wangenheim

/

Tine Pars