Aningaasanoorutit ilaannit iluanaarutinit agguaassisarneq pillugu Inatsisartut inatsisaanni nr. 10, 22. november 2011-meersumi § 8, imm. 1-4 naapertorlugu, aalajangersarneqarpoq:

Kapitali 1

Tamanut iluaqutaasussamik siunertat

  § 1.  Tamanut iluaqutaasussamik siunertaq imatut paasineqassaaq tassaasoq, ingerlatsineq qinnuteqartunut amerlasuunut, peqataasussanut innuttaasunullu nalinginnaasumik iluaqutaasussaq.

  § 2.  Tamanut iluaqutaasussamik siunertat inatsisitigut aalajangersakkat ima paasineqassapput tassaasut, timersornerit tamanit peqataaffigineqarsinnaasut, innarluutillit utoqqaallu timersorneri ilanngullugit, piukkunnaatillit pikkorinnerillu timersorneri aamma meeqqat inuusuttullu peqatigiiffii, tak. §§ 4-6.

  § 3.  Tamanut iluaqutaasussamik siunertat allat imatut paasineqassapput tassaasut, siunertat kulturimut tunngasut, siunertat inunnik qaammarsaanermut tunngasut, siunertat nappaatinik akiuiniarnermut pinaveersaartitsinermullu tunngasut, siunertat inooqatigiinnermut tunngasut, siunertat silami sammisaqartitsinermut tunngasut aamma siunertat tamanut iluaqutaasussamik ilisimatusarnermut tunngasut.

Kapitali 2

Tamanut iluaqutaasussamik siunertanut inatsisitigut aalajangersakkanut tapiissutit

  § 4.  Timersorneq tamanit peqataaffigineqarsinnaasoq paasineqassaaq tassaasoq timersornerup ilaa, timersortartut pikkorinnerit naammassisartagaannit unammisarnerannillu allaanerusunik imaqartoq.

  § 5.  Piukkunnaatillit pikkorissullu timersornerat paasineqassaaq tassaasoq timersornerup ilaa, peqatigiiffinni iligiit toqqakkat, nunami timersortartut pikkorinnerpaat, nunanut allanut unammisartut nunallu tamat akornanni unamminernut peqataasartut ingerlassaat.

  § 6.  Meeqqat inuusuttullu peqatigiiffii paasineqassapput tassaasut, peqatigiiffiit ilaasortat akiliuteqartartut minnerpaamik affaasa 30-t inorlugit ukioqarlutik ilaasortaaffigisaat.

  § 7.  Tamanut iluaqutaasussamik siunertanut inatsisitigut aalajangersakkanut tapiissutit, aningaasanoorutit ilaannit iluanaarutinit agguaassisarneq pillugu Inatsisartut Inatsisaanni tamanna pillugu aalajangersakkat naapertorlugit tunniunneqartassapput.
  Imm. 2.  Tamanut iluaqutaasussamik siunertanut inatsisitigut aalajangersakkanut tapiissutit killilimmik annertussuseqartumik paasissutissiinermik aamma allaffissornermik siunertanut atorneqarsinnaapput.

Kapitali 3

Siunertanut tamanut iluaqutaasussanut allanut tapiissutit

Tapeeriaatsit

  § 8.  Tapiissutit suliniutinut tapiissutitut aamma ingerlatsinermut tapiissutitut tunniunneqarsinnaapput.
  Imm. 2.  Kultureqarnermut Naalakkersuisoq tapiissutisinissamut piumasaqaatinik ilanngussaqarsinnaavoq.

Suliniutinut tapiissutit

  § 9.  Suliniutinut tapiissutit paasineqassapput tassaasut, ingerlassamut piffissami killilimmi ingerlanneqartussamut aamma aalajangersimasumik anguniagalimmut naggataatigulluunniit angusaqarfiusussamut tapiissutit.
  Imm. 2.  Tapiissutit annertussusiat tassaavoq missingersuutip tapiiffigineqarsinnaasup 75 %-ia angullugu. Taamaattorli annerpaamik 200.000 koruunit akuersissutigineqarsinnaapput.
  Imm. 3.  Suliniuteqarfinnut naalakkersuinikkut salliutinneqartunut imm. 2-mi, naggatit aappaanni taaneqartumit qaffasinnerusunik tapiisoqarsinnaavoq. Suliniuteqarfiit suut qaqugukkulluunniit naalakkersuinikkut salliutinneqarnersut nittartagaq www.naalakkersuisut.gl aqqutigalugu Kultureqarnermut Naalakkersuisup tamanut saqqummiutissavai.

Ingerlatsinermut tapiissutit

  § 10.  Ingerlatsinermut tapiissutit paasineqassapput tassaasut, sammisarisamik ingerlatsinermut ingerlaavartumik aningaasartuutit matussusernissaannut tapiissutit, tamatumunnga ilanngullugit atorfeqartitanut, sulisorisanut, ininut allaffissornermullu aningaasartuutit.
  Imm. 2.  90.000 koruunit angullugit tapiisoqarsinnaavoq.
  Imm. 3.  Suliniuteqarfinnut naalakkersuinikkut salliutinneqartunut qaffasinnerusunik tapiissuteqartoqarsinnaavoq imm. 2-mi eqqaaneqartunut sanilliullugu, taamaattoq qaffasinnerpaamik ukiumut 500.000 kr.-inik. Kultureqarnermut Naalakkersuisup nittartakkami www.naalakkersuisut.gl tamanut saqqummiuttassavaa piffissami pineqartumi suut salliutinneqarnersut.

Tapiiffigineqarsinnaanermut piumasaqaatit

  § 11.  Inunnut nunami maani najugaqartunut imaluunniit peqatigiiffinnut, kattuffinnut, suliffeqarfinnut, oqartussaasunut il.il. Kalaallit Nunaanni angerlarsimaffeqartunut taamaallaat tapiissuteqartoqarsinnaavoq.
  Imm. 2.  Kattuffinnut peqatigiiffinnullu qulit ataallugit akiliisartunik ilaasortalinnut tapiisoqarsinnaanngilaq.
  Imm. 3.  Ingerlatsinermut tapit taamaallaat tunniunneqarsinnaapput nuna tamakkerlugu peqatigiiffinnut kattuffinnullu.

  § 12.  Tapiissutinik qinnuteqaatip imarissavai, ingerlatassap tapiiffigeqqullugu qinnutigisap allaaserinera, tamatumunnga ilanngullugit suliniutinut tapiissutit imaluunniit ingerlatsinermut tapiissutit pineqarnersut.
  Imm. 2.  Qinnuteqaammut isertitassanut aningaasartuutissanullu missingersuut aamma ingerlanniakkap aningaasalersornissaanut pilersaarut ilanngunneqassapput.
  Imm. 3.  Suliniutinut tapiissutinik qinnuteqaammut aammattaaq makkununnga uppernarsaatit ilanngunneqassapput:
1)  suliniutip allaaserinera naapertorlugu inunnit suliniutip piviusunngortinnissaanut pingaaruteqartunit peqataaniarluni akuersissutit aamma
2)  suliniutip allaaserinera naapertorlugu init atortullu atorneqartussat atorneqarsinnaanerannut uppernarsaatit.
  Imm. 4.  Peqatigiiffiit kattuffiillu malittarisassat akuerisat aamma ilaasortanut akileraasunut uppernarsaat ilanngutissavaat.

  § 13.  Kultureqarnermut Naalakkersuisoq siunertanut tamanut iluaqutaasussamik ilisimatusarnermut tunngasunut tapiissutinik qinnuteqaatit pillugit erseqqinnerusunik aalajangersaasinnaavoq, aamma qinnuteqaatinut taamaattunut tunngatillugu qinnuteqaatit kingusinnerpaamik tunniunneqarfissaat pillugu erseqqinnerusumik Naalakkersuisoq immikkut aalajangersaasinnaavoq.

  § 14.  Suliniutinut tapiissutit, suliniutinut qinnuteqarnermiit ukiut tallimat iluanni naammassineqartussanut tunniunneqarsinnaapput.

  § 15.  Ingerlatsinermut tapiissutit annerpaamik ukiut ataasiakkaarlugit akuersissutigineqarsinnaapput.
  Imm. 2.  Tapiissutit ukiut tamaasa qinnutigeqqinneqarsinnaapput.

  § 16.  Makkununnga tapiissuteqartoqarsinnaanngilaq:
1)  Tamanut iluaqutaasussamik siunertanut inatsisitigut aalajangersakkanut, tak. § 2.
2)  Sulinngiffeqarluni angalanernut, paasisassarsiorluni angalanernut, ilisimasassarsiornernut ilinniarnernullu.
3)  Angalanernut pikkorissarnernullu sulisitsisumit akilerneqartussatut ilimagineqartunut.
4)  Sakkuutinik/nipilersuutinik, hardwarenik aamma softwarenik, atortussanik sakkussanillu pisinernut.
5)  Eqqugassanut.
6)  Nutaanik sanaartukkanut nutarterinernullu.
7)  Niuernermut atasumik nioqqutissianut, atuakkanik naqiterineq eqqaassanngikkaanni, taamaattoq tak. nr. 15.
8)  Ingerlatanut, qinnuteqartup nalinginnaasumik missingersuutaasa iluanni akilerneqarsinnaasutut naatsorsuutigineqartunut.
9)  Ingerlatanut, inatsit alla naapertorlugu qinnuteqartumut isumagisassaatitaareersunut.
10)  Ingerlatanut, qinnuteqarnissamut killigititap nallernerani aallartinneqareersimasunut.
11)  Amigartoorutinik matussusiinermut.
12)  Nittartakkanik pilersitsinermut ingerlatsinermullu.
13)  Aaqqissuussinernut imaluunniit aaqqissuussinerit ilaannut, ingerlatsinerup ilaatut immiaaqqanik, viinninik imaluunniit imigassamik sassaalliinertalinnut, imaluunniit ingerlatamut atatillugu imigassanik tuniniaaffiusunut.
14)  Katersuiniarnernut.
15)  Qinnuteqartup nammineq naqiterivianit saqqummersitanut.
16)  Saqqummersitseqqinnernut, atuakkat cd-llu ilanngullugit.

  § 17.  Tapiissutit akuersissutigineqartut, siunertanut ingerlatsinernullu tapiiffigeqqullugit qinnutigineqartunit allaanernut atorneqarsinnaanngillat.

Qinnuteqarnermi periutsit

  § 18.  Tapiiffigineqarnissamik qinnuteqaat aningaasartuutissanut isertitassanullu missingersuutinik aamma aningaasalersuinissamik pilersaarummik ilaqartinneqartoq kultureqarnermut Naalakkersuisup elektroniskimik immersugassiaa atorlugu ilusilersorneqassaaq, tamatumalu kingorna elektroniskimik Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiunneqarluni.
  Imm. 2.  Suliniutinut tapiissutinik aamma ingerlatsinermut tapiissutinik qinnuteqaatit tamarmik immikkut suliarineqarlutik nassiunneqassapput.

  § 19.  Suliniutinut tapiissutit ukiumut sisamariarluni qinnutigineqarsinnaapput.
  Imm. 2.  Ullut kingusinnerpaamik qinnuteqarfissat aalajangiunneqarput tassaasut 15. februar, 15. april, 15. september aamma 15. november.

  § 20.  Ingerlatsinermut tapiissutit ukiumut ataasiarluni qinnutigineqarsinnaapput.
  Imm. 2.  Ulloq kingusinnerpaamik qinnuteqarfissaq aalajangiunneqarpoq tassaasoq 1. december, taamaattoq tak. § 29, imm. 2.

Naatsorsuutit kukkunersiuinerlu

  § 21.  Suliniutinut tapiissutinik tigusaqartup, suliniutip naammassineraniit kingusinnerpaamik qaammatit pingasut qaangiunneranni tapiissutit atornerannut naatsorsuutit atsiukkat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiutissavai.
  Imm. 2.  Minnerpaamik 150.000 koruunit tapiissutigineqarsimappata, naatsorsuutit kukkunersiuisumit naalagaaffimmit akuerisaasumit imaluunniit kukkunersiuisutut nalunaarsukkamit kukkunersiorneqarsimassapput.

  § 22.  Kukkunersiuineq ingerlanneqassaaq kukkunersiuinermi ileqqut pitsaasut naapertorlugit.
  Imm. 2.  Kukkunersiuinermi ilaatigut makku misissoqqinneqassapput:
1)  Suliniutip naatsorsuutai eqqortuunersut pingaarutilinnillu kukkuneqaratillu amigaateqannginnersut.
2)  Tapiissuteqarnermut piumasaqaataasut naammassineqarsimanersut.
3)  Tapiissutit siunertarineqartumut atorneqarsimanersut.
4)  Tapiissutinik tigusaqartoq aningaasaqarnermut tunngatillugu pisussaaffinnik mianerinnissimanersoq.
5)  Paasissutissat, tapiissutinik tigusaqartup suliniummut tunngatillugu Naalakkersuisunut nalunaarutigisimasai uppernarsaatissaqarnersut.
  Imm. 3.  Ilinniartitaanermut, Kultureqarnermut, ilisimatusarnermut Ilageeqarnermullu Naalakkersuisoqarfiup taamungaannaq tigooqqaalluni misiliinikkut naatsorsuutit misissussavai.

  § 23.  Suliniutinut tapiissutinut 150.000 koruunit ataallugit annertussusilinnut tunngatillugu kukkunersiuisoqassanngilaq. Naatsorsuutit tapiissutinik tigusisup atsiorsimasai naammapput. Tapiissutinik tigusisup atsiornermigut uppernarsassavaa, naatsorsuutit eqqortuusut, tapiissutinik tigusisoq aningaasaqarnermut tunngatillugu pisussaaffinnik mianerinnissimasoq aamma tapiissutit siunertamut atorneqarsimasut.
  Imm. 2.  Suliniutinut 150.000 koruunit ataallugit tapiissutinik tigusaqartoq, tapiissuteqartumit allamit imaluunniit tapiissuteqartartunit allanit tapiissutisisimaguni, tamanna pillugu uppernarsaammik Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiussissaaq.

  § 24.  Ingerlatsinermut tapiissutinik tigusaqartup, ukiumut naatsorsuutit inerneri aamma kukkunersiuisup nalunaarutaa atsiugaq Ilinniartitaanermut, Kultureqarnermut, ilisimatusarnermut Ilageeqarnermullu Naalakkersuisoqarfimmut nassiutissavai, kingusinnerpaamik tapiissutit tunniunneqarneranniit ukiup tulliani 1. juni.
  Imm. 2.  Ukiumut naatsorsuutit kukkunersiuisumit naalagaaffimmit akuerisaasumit imaluunniit kukkunersiuisutut nalunaarsukkamit kukkunersiorneqarsimassapput. Kukkunersiuinermi § 22, imm. 2-mi, nr.1-5-imi piumasaqaatit allanneqartut kukkunersiuisup misileqqissavai.

  § 25.  Suliniummut tapiissutinik tigusaqartup Sullissivik.gl-imi nalilersuinermi immersugassaq immersussavaa.
  Imm. 2.  Nalilersuinermi immersugaq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut nassiunneqassaaq, kingusinnerpaamik ingerlassap tapiiffigineqartup naammassineraniit qaammatit 2 qaangiunneranni.

  § 26.  Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup tapiissutinik tigusisoq qaqugukkulluunniit qinnuigisinnaavaat paasissutissanik ingerlassamut tapiiffigineqartumut attuumassuteqartunik nassiusseqqullugu.

  § 27.  Suliniutinut aamma ingerlatsinermut tapiissutitut akuersissutigineqartut tamakkiisumik ilaannakortumilluunniit utertillugit akileqquneqarsinnaapput, imaattoqarpat:
1)  Tapiiffigineqartup tapiiffigineqarnissamut piumasaqaataasut naammassisinnaajunnaarpagit.
2)  Tapiiffigineqartup tapiissutitut akuersissutigineqartunut piumasaqaataajunnartut naammassinngippagit.
3)  Qinnuteqartoq eqqunngitsunik paasissutissiisimappat.
4)  Tapiiffigineqartup paasissutissat naapertuuttut, naatsorsuutit aamma nalilersuinermi immersugassaq ilanngullugit, nassiukkumanngippagit.
5)  Ingerlassaq tapiiffigineqartoq sinneqartooruteqarfiuppat.

  § 28.  Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfiup kikkut tapiissutinik tigusaqarsimanersut, tapiissutitut akuersissutigineqartut annertussusaat tapiissutillu sumut akuersissutigineqarnerat www.naalakkersuitsut.gl aqqutigalugu tamanut saqqummiutissavaa.

Kapitali 4

Atortuulersinneqarfia aamma ikaarsaariarnermi aalajangersakkat

  § 29.  Nalunaarut atuutilerpoq 15. maj 2020.
  Imm. 2.  Ingerlatsinermut tapiissutissanut qinnuteqaatit 2020-mut naalakkersuinikkut salliutinneqartumi suliassaqarfimmi § 10, imm. 3 naapertorlugu, tunniunneqarsimassapput kingusinnerpaamik ulloq 1. juli 2020.

Namminersorlutik Oqartussat, 11. maj 2020

Ane Lone Bagger

/

Karsten Peter Jensen