Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, Inatsisartut inatsisaatigut nr. 1, 1. april 2020-meersutigut allanngortinneqartumi, § 22 naapertorlugu aalajangersarneqarpoq:

Atuuffii

  § 1.  Tunillaassortumik nappaalasoqalernerani atuarfiit paaqqinnittarfiillu atugaat pillugit malittarisassat nalunaarummi uani aalajangersarneqarput.
1)  nappaatinik ulorianartutut nalinginnaasumik isigineqartunik aamma nappaatinik tuniluuttunik allanik, nappaatit tunillaassortut akiorniarlugit iliuutsit pillugit Inatsisartut peqqussutaanni allattorsimaffik A-mi aamma allattorsimaffik B-mi ilaatinneqartunik siaruartoqarnissaata pinngitsoortinnissaa aamma
2)  nappaatinik tuniluuttunik allanik siaruaattoqarnissaata killilerneqarnissaa

  § 2.  Nalunaarut manna ukununnga atuutissaaq:
1)  Ulluunerani paaqqinnittarfiit, angerlarsimaffimmi paaqqinniffiit aamma sammisaqartitsinissamik neqeroorutit allat, meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisaat naapertorlugu. 
2)  Meeqqat atuarfii. 
3)  Atuarfiit namminersortut.
4)  Efterskolit. 
5)  Folkehøjskolit.
6)  Ilinniarnertuunngorniarfiit ilinniarfiillu allat ilinniaqqinnissamut piareersaataasunik neqerooruteqartartut.
7)  Qitiusumik ilinniarfiit, inuussutissarsiutinut ilinniarfiit ilinniarfiillu allat inuussutissarsiornermi ilinniakkanik neqerooruteqartartut.
8)  Ilisimatusarfik allallu qaffasinnerusunik ilinniarnernik neqerooruteqartartut.
9)  Atuareernerup kingorna ornittakkat, sunngiffimmi sammisassaqartitsiviit aamma atuareersunut paaqqinniffiit.
10) Atuartut angerlarsimaffiat, ilinniartut ineqarfii aamma atuarfiit nerisassaqarfigiitigalugu ineqarfiusut

Nappaatinik tuniluuttoqartillugu nalinginnaasumik ileqqorisassatut malittarisassat

  § 3.  Meeqqat, inuusuttut sulisullu tuniluuttumik nappaateqartut atuarfinni paaqqinnittarfinnilu tuniluuffiusinnaasuni iseqqusaanngillat.
  Imm. 2.  Paaqqinnittarfimmiinnermi imaluunniit atuarfimmiinnermi meeraq nappaammik tuniluuttumik takussutissaqalerpat, angerlartinneqarnissaa isumaginiarlugu angerlarsimaffik nalunaarfigineqassaaq, pisariaqarpallu meeqqap angerlartinneqarnissaata tungaanut meeqqanut allanut qanillattortinneqarnaveersaassaaq.
  Imm. 3.  Meeqqat, inuusuttut imaluunniit sulisut akornanni imaluunniit taakku illoqataasa akornanni § 1-imi nappaatinik pineqartunik tunillatsittoqarsimappat imaluunniit tunillatsittoqarsimasoq ilimagineqarpat, pineqartut atuarfimmut imaluunniit paaqqinnittarfimmut qaqugukkut isersinnaanersut nalornissutigineqarpat Nunatta Nakorsaaneqarfia aalajangiissaaq.

  § 4.  Naalakkersuisut atuarfinnik aamma paaqqinnittarfinnik tamakkiisumik imaluunniit ilaannakortumik matusinissaq aalajangersinnaavaat. Matoqqasitsinerup nalaani Naalakkersuisut tunillaasinnaanermut aarlerinassutsimut aaqqiissutaasussatut peqqussutaat sulissutigineqassapput. Ammaaqqinneq Naalakkersuisut akuersinerisigut taamaallaat pisinnaavoq.
   Imm. 2.  Pisuni imm. 1-imi taaneqartuni kommunalbestyrelse meeqqanut inuusuttunullu pisariaqavissumik paarsisoqarnissaanut aaqqissuussat attatinneqarnissaannut pisussaaffilerneqarpoq. Tamanna pillugu Naalakkersuisut malittarisassanik aalajangersaasinnaapput. 
  Imm. 3.  Naalakkersuisut nappaatinik tuniluuttoqarnerani paaqqinnittarfinni § 2-mi allaaserineqartuni meeqqanik nutaanik tigusisoqarsinnaanngitsoq aalajangersinnaavaat.

Nalunaaruteqarnissaq ilisimatitsinissarlu

  § 5.  Nappaatinik § 1, nr. 1-imi pineqartunik tunillaassuuttoqarnerani pasitsaassaqartoqarneraniluunniit nalunaaruteqarnissamik ilisimatitsinissarlu pillugit uani §§ 6 - 8-mi aalajangersakkatut allassimasut atuupput.

  § 6.  Meeqqat, inuusuttut imaluunniit sulisut akornanni taamatut napparsimasoqalerpat, tamanna Nunatta Nakorsaaneqarfianut nalunaarutigineqassaaq.  Nappaatinik nappaatit tunillaassortut akiorniarlugit iliuutsit pillugit Inatsisartut peqqussutaanni allattorsimaffik A-mi ilaasunik, inoqutigiinni napparsimasoqarpat, aamma tamanna ilisimatitsissutigineqassaaq.

  § 7.  § 6 naapertorlugu nappaatit nalunaarutigineqartut pillugit Nunatta Nakorsaaneqarfiata atuarfinni imaluunniit paaqqinnittarfinni aqutsisoq aamma kommunalbestyrelse sapinngisamik piaarnerpaamik ilisimatissavai.
  Imm. 2.  Nunatta Nakorsaaneqarfia inuit kikkut paasissutissinneqarnissaannik kiisalu paasissutissiinerup qanoq imaqarnissaanik aalajangiissaaq.

  § 8. Atuarfiup imaluunniit paaqqinnittarfiup pisortaata § 7, imm. 2-mi paasissutissiineq pineqartoq meeqqat aamma sulisut angerlarsimaffiinut ingerlateqqissavaa.
  Imm. 2.  Paaqqinnittarfinni atasuni paaqqinnittarfimmi napparsimasoqarfiusumi pisortaq paaqqinnittarfinnut atasunut pisortanut allanuttaaq ilisimatitsissaaq.

Ilitsersuut

  § 9.  Nunatta Nakorsaaneqarfia nalunaarummut matumunnga atatillugu meeqqat aamma inuusuttut atuarfiini aamma ulluunerani paaqqinnittarfinni nappaatit tuniluuttut pinaveersaartinnissai pillugit maleruagassat pillugit ilitsersuissaaq.

Atuutilerfia

  § 10.  Nalunaarut saqqummiussinerup aqaguani atortuulissaaq. Peqatigitillugu Tunillaassortumik nappaalasoqalernerani atuarfiit paaqqinnittarfiillu atugaat pillugit Namminersorlutik Oqartussat nalunaarutaat nr. 4, 17. marts 2020-meersoq atorunnaarsinneqassaaq.

Namminersorlutik Oqartussat, ulloq 14. april 2020

Martha Abelsen

/

Tine Pars