Kapitali 1

Qinersisinnaatitaaneq qinigaasinnaatitaanerlu

 

Qinersisinnaatitaaneq

 

  § 1.  Kinaluunniit qallunaatut innuttaassuseqartoq, 18-inik ukioqalereersimasoq qinersinissarlu sioqqullugu sivikinnerpaamik qaammatini arfinilinni Kalaallit Nunaanni aalajangersimasumik najugaqarsimasoq eqqartuussivikkoortumik Kalaallit Nunaanni atuuttussatut aalajangikkamik nammineersinnaajunnaarsitaasimanngikkuni Inatsisartunut qinersisinnaatitaavoq.

 

  § 2.  Inuit tulliuttut Kalaallit Nunaata avataani najugaqarallartut Inatsisartunut qinersisinnaatitaapput § 1-imi piumasarineqartut, aalajangersimasumik najugaqarnissamik piumasaqaat eqqaassanngikkaanni, naammassisimagunikkit:
1)  Inuit minnerpaamik qaammatini 6-ini sivisussusilimmik ilinniarnerminni, ilinniarnissaq siunertaralugu Kalaallit Nunaata avataaniittut.
2)  Inuit nakorsap innersuussinera malillugu peqqissutsimut tunngasunik pissuteqarlutik Kalaallit Nunaata avataaniittut.
3)  Inuit Kalaallit Nunaanni qinigaallutik folketingimut ilaasortatut atuuffimminnik isumaginninnerminnut atatillugu Danmarkimiittut.
4)  Inuit Namminersorlutik Oqartussanut sinniisuullutik nunani allaniittut.
5)  Inuit Kalaallit Nunaata avataaniittut aammalu Kalaallit Nunaannut attuumassuteqarnikkut inunnut nr. 1-4-mi taaneqartunut sanilliunneqarsinnaalluinnartut.
  Imm. 2.  Inuup inummik imm. 1-imut ilaatinneqartumik ataatsimut najugaqateqarluni inooqateqartup, aammalu § 1-imi piumasaqaatinik naammassinnittup, qinersisinnaatitaanermut piumasaqaatit aamma naammassisimassavai, inooqatigiit pineqartut marluk taakku:
1)  imminnut katissimappata, imaluunniit
2)  imminnut katissinnaanissaminnut piumaqaatit naammassisimappatigit Kalaallit Nunaanniillu aallannginnermi ataatsimut najugaqalersimappata.
  Imm. 3.  Inuilli imm. 1-imi 2-milu taaneqartut aatsaat qinersisinnaatitaapput nuunnissartik sioqqullugu ikinnerpaamik ukiuni marlunni Kalaallit Nunaanni najugaqartutut Inunnut Nalunaarsuutit Eqiteruffianni nalunaarsorneqarsimagunik.
  Imm. 4.  Inuit imm. 1 aamma 2 naapertorlugit Kalaallit Nunaata avataani najugaqarallartut najugaqarallarnermullu tunngaviusup naammassinerata kingorna qaammatit arfinillit suli qaangiutinngitsut Kalaallit Nunaannut uterlutik nuuttut qinersisinnaatitaanertik pigiinnassavaat.

 

  § 3.  Kinaluunniit qinersisinnaasut allattorsimaffiannut ilanngunneqarsimatinnani qinersisinnaatitaanngilaq.

 

Qinigaasinnaatitaaneq

 

  § 4.  Inatsisartunut qinigaasinnaatitaavoq kinaluunniit § 1, aamma tak. § 2, naapertorlugu tassunga qinersisinnaatitaasoq, pineqartoq inaarutaasumik eqqartuussinikkut akiliisitsissutissamilluunniit akuersinikkut pinerluttulerinermi inatsisit tunngavigalugit Inatsisartut Naalakkersuisullu pillugit Inatsisartut inatsisaanni § 3, imm. 2 naapertorlugu nalinginnaasumik isigineqarnermi inatsisartunut ilaasortaanissamut naleqqukkunnaarsitsisumik pineqaatissinneqarsimanngippat.
  Imm. 2.  Kikkut tamarmik qinigaasinnaassuseq apeqquserneqaraluarpalluunniit qinigassanngortissinnaapput.

 

Kapitali 2

Qinersivik Inatsisartunullu ilaasortat amerlassusii

 

  § 5.  Inatsisartut 31-inik ilaasortaqarput.
  Imm. 2.  Kalaallit Nunaat qinersivik ataasiuvoq.
  Imm. 3.  Qinersivik Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaanni § 2 naapertorlugu kommuninut taasiartorfissanullu agguataarneqarsimavoq.
  Imm. 4.  Sumiiffiit kommunit aggornerisa avataanniittut Kommuneqarfik Sermersuumi taasiartorfissatut atatinneqassapput.

 

  § 6.  Inatsisartunut ilaasortat ukiunut sisamanut qinigaasarput, ilaasortallu tamarmik ataatsikkut tunuartarlutik.
  Imm. 2.  Qinigaaffik ullormit qinersiffimmit naatsorsuunneqassaaq.
  Imm. 3.  Ilaasortaq piffissap qinersiviusup ingerlanerani Inatsisartuni ilaasortaajunnaarpat, nammineersinnaajunnaarsitaatinneqarpat imaluunniit toqukkut qimaguppat, ilaasortap pineqartup inaani sinniisussaq isissaaq. Inatsisartut qinigassanngortittoq qinigaasinnaanngitsutut isumaqarfigippassuk, aamma taamaattoqassaaq.
  Imm. 4.  Sinniisussaq pinerluttulerinermut inatsisitigut pineqaatissinneqarsimaneq pissutigalugu qinigaasinnaatitaannginnersoq, Inatsisartut aalajangissavaat, takuuk § 4, imm. 1.
  Imm. 5.  Partiit avataanni qinigassanngortittoq, imm. 3-imi taaneqartut ilaannik pissuteqartumik kattusseqatigiinni ilaanngippat, qinigaanera atorunnaassaaq.

 

Kapitali 3

Qinersinermut ataatsimiititaliaq, qinersinermik siulersuisut

taasisitsinermillu aqutsisut kiisalu qinersinissamut piareersaatit

 

Qinersinermut ataatsimiititaliaq

 

  § 7.  Naalakkersuisut Qinersinermut ataatsimiititaliamik pilersitsissapput, Inatsisartut inatsisaat manna aamma kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaat malillugu suliassanik Qinersinermut ataatsimiititaliamut suliassanngortinneqarsimasunik isumaginnittussamik. Naalakkersuisut Qinersinermut ataatsimiititaliamut allattoqarfeqartitsissapput.
  Imm. 2.  Qinersinermut ataatsimiititaliap ilaasortarai Naalakkersuisut Siulittaasuata Naalakkersuisoqarfiani naalakkersuisoqarfimmi pisortaaneq, siulittaasuusoq, Naalakkersuisuni inatsisilerinermi pisortaq, ilaasortaq ataaseq kommunit peqatigiillutik toqqagaat, biskoppi kiisalu Ilisimatusarfimmi rektori taakkuluunniit sinniisussaat. Amerlaqatigiinnik taasisoqartillugu siulittaasup taasinera aalajangiisuussaaq.
  Imm. 3.  Ilaasortaq peqataasinnaanngikkaangat imaluunniit ilaasortaq qinigassanngortippat sinniisussaq Qinersinermut ataatsimiititaliamut ilaasortanngussaaq.
  Imm. 4.  Qinersinermut ataatsimiititaliap aalajangiineri inaarutaasuupput aamma allaffissornikkut oqartussamut allamut suliakkiunneqarsinnaanatik.

 

  § 8.  Qinersineq Qinersinermut ataatsimiititaliamit siulersorneqassaaq.
  Imm. 2.  Qinersinermut ataatsimiititaliaq qinersinermit allattaavimmik, qinersinermut tunngatillugu pingaaruteqarnerusut allattorsimaffiannik allattaaveqartassaaq, tassanilu ilanngullugit qinigassanngortittut partiillu nalunaarutigineqartut aammalu qinersinerup naatsorsorneqarnera paasissutissiissutigineqartassapput.
  Imm. 3.  Qinersinermut ataatsimiititaliap piaarnerpaamik qinersinermik siulersuisunut nalunaarutigissavaa ullormi sumi qinersisoqassanersoq aammalu qinigassanngortitanik nalunaarutit qaqugu tunniunneqareersimassanersut.
  Imm. 4.  Qinersinermut ataatsimiititaliaq pisuni immikkut ittuni piginnaatitaavoq Inatsisartut inatsisaanni matumani aalajangersakkat sanioqqussinnaanissaannut, taakku pissutsit, tassungalu ilanngullugu silap pissusia, malillugit pisariaqartutut isigineqarpata, tamatumanilu qinersinerup isertuussassaanerata qinersinerullu ingerlanneqarnerata nakkutigisaanerata tamatigut isumannaarneqarsimanissaat suli qularnaarneqarsimappata. Qinersinermut ataatsimiititaliap qinersinermit allattaavimmi immersukkamini saneqqutsisimanerit nassuiaateqarfigissavai.

 

Qinersinermik siulersuisut

 

  § 9.  Qinersineq kommunini tamani qinersinermik siulersuisunit piareersarneqarlunilu aqunneqassaaq. Qinersinermik siulersuisut qinersinerup piareersarneqarnera kommunimi allattoqarfimmut isumagisassanngortissinnaavaat.
  Imm. 2.  Qinersinermik siulersuisunut ilaasortaassapput borgmesteri, siulittaasuusoq kiisalu kommunalbestyrelsimut ilaasortat marluk qanoq amerlatigisunik ilaasortaatitaqarneq tunngavigalugu kommunalbestyrelsimit qinikkat. Kommunalbestyrelsimi ilaasortaaqatigiit pineqartumik toqqaasimasut sinniisussamik toqqaassapput. 
  Imm. 3.  Qinersinermik siulersuisunut ilaasortaq qinigassanngortippat ilaasortaq pineqartoq qinersinermik siulersuisunut ilaasortatut tunuassaaq sinniisussatullu toqqagaq qinersinermik siulersuisunut ilaasortanngorluni. Kommunalbestyrelsimi ilaasortaaqatigiit pineqartumik toqqaasimasut akunnerminni sinniisussamik nutaamik toqqaassapput.
  Imm. 4.  Borgmesteri qinersinermik siulersuisunit tunuarpat qinersinermik siulersuisut  ilaasortamik akornannit siulittaasussaminnik nutaamik toqqaassapput. Siulittaasup nutaap sinniisussaa qinersinermik siulersuisunut ilaasortanngussaaq, kommunalbestyrelsimilu ilaasortaaqatigiit pineqartumik toqqaasimasut akunnerminni sinniisussamik nutaamik toqqaassallutik.
  Imm. 5.  Qinersinermik siulersuisunut ilaasortatut toqqarneqartut atuuffimmut akuersinissaminnut pisussaaffeqarput.

 

Taasisitsinermi aqutsisoq

 

  § 10.  Qinersinermik siulersuisut kommunimi taasiartorfissanut ataasiakkaanut tamanut inummik qinersisinnaatitaasunik taasiartorfissani pineqartuni taasisitsinermik aqutsisussamik, pisariaqarpallu taasisitsinermik aqutsisumut ikiuuttussanik toqqaassapput. Taasisitsinermi aqutsisoq qinersinissamut qinigassanngorteqqusaanngilaq.
  Imm. 2.  Taasisitsinermik aqutsisussatut toqqarneqartut qinersisartullu ikiuuttussatut toqqarneqartut atuuffimmut akuersinissaminnut pisussaaffeqarput.
  Imm. 3.  Kommunalbestyrelse taasisitsinermik aqutsisumut qinersisartunullu ikiuuttussatut toqqarneqartunut ullormusiaqartitsissaaq. Kommunit aqunneqarnerat pillugu Inatsisartut inatsisaanni malittarisassat malillugit ullormusiaqartitsisoqartassaaq. Ullormusiaqartitsisoqassanngitsoq kommunalbestyrelsip aalajangersinnaavaa.

 

Qinersinissamut piareersarneq

 

  § 11.  Qinersinermik siulersuisut § 8, imm. 3 naapertorlugu Qinersinermut ataatsimiititaliamit nalunaarut naapertorlugu piffissaq taasiffissaq piaarnerpaamik nalunaarutigisassavaat. Tamatumunnga peqatigitillugu taasiartorfissat ataasiakkaat inuillu taasiartorfissani ataasiakkaani taasisitsinermik aqutsisussatut toqqarneqarsimasut aqqi tamanut nalunaarutigineqassapput. Tamatuma saniatigut qinigassanngortitanik nalunaaruteqarnissamut piffissarititaq tamanut nalunaarutigineqassaaq.
  Imm. 2.  Qinersinermik siulersuisut taasisitsinermillu aqutsisut qinersinermit allattaaveqassapput, tassanilu § 51 naapertorlugu qinersinermut tunngatillugu pingaaruteqarnerit allattorneqassallutik.
  Imm. 3.  Naalakkersuisut Qinersinermut ataatsimiititaliamit akuerineqarlutik qinersinermik siulersuisut taasisitsinermillu aqutsisut qinersinermit allattaaviisa imarisassaat qanorlu iluseqarnissaat pillugit kiisalu pappiarat taasiviit atorsinnaannginnerannut aalajangiinissamut piumasaqaatit pillugit malittarisassanik sukumiinerusunik aalajangersaasinnaapput.
  Imm. 4.  Taasisitsinermik aqutsisut taasivissap ammannginnerani init taasiviusussat Inatsisartut inatsisaanni matumani aalajangersarneqarsimasut piumasaqaatit naapertorlugit aaqqissuuneqarsimanissaat, taamatullu aamma qinersisinnaasut allattorsimaffiata, sillimmatitut pappiarat taasivissat taasivissallu pigineqarnissaat qularnaassavaa. Qinersiviup ammarneqarnerani pappiarat taasivissat pigineqanngippata, sillimmatitut pappiarat taasivissat atorneqassapput.
  Imm. 5.  Imm. 1 naapertorlugu tamanut nalunaaruteqarneq tamanut ammasumik allagarsiinikkut qinersinermillu siulersuisut aalajangiinerat malillugit aamma pisinnaavoq. Qinersinermik siulersuisut aalajangersinnaavaat tamanut nalunaarutiginninneq kommunip nittartagaatigut pisinnaasoq.

 

Kapitali 4

Partiit qinigassanngortittullu qinersinermi peqataasinnaatitaasut

 

Partiit peqataasinnaatitaasut

 

  § 12.  Inatsisartunut qinersinissaq suaarutigineqarpat, Inatsisartunut Siulittaasup partiit sorliit Inatsisartunut qinersinermut qinigassanngortitsinissamut imm. 2 malillugu piumasaqaatit naammassisimaneraat, Qinersinermut ataatsimiititaliaq nalunaarfigissavaa.
  Imm. 2.  Inatsisartunut qinersinermi qinigassanngortitsisinnaatitaapput partiit, Inatsisartunut kingullermik qinersinermi Inatsisartuni sinniisuutitaqalersut. 
  Imm. 3.  Inatsisartunut qinersinermi aammattaaq peqataasinnaatitaapput partiit qinersineq kingusinnerpaamik sapaatit akunnerinik tallimanik sioqqullugu qinersisartunik ikinnerpaamik Inatsisartunut qinersinermi kingullermi taasinerit atorsinnaatitaasut tamavimmik 1/31-iisa nalinginit amerlassuseqartunit Qinersinermut ataatsimiititaliamut nalunaarutigineqartut.
  Imm. 4.  Partiimik nalunaarutiginninneq Qinersinermut siulersuisunut pissaaq qinersisartunillu partiimik nalunaarutiginnittut uppernarsaatitut allagaannik ilaqartinneqassalluni.
  Imm. 5.  Uppernarsaatitut allakkami ilanngullugit nalunaarutigineqartassapput qinersisartup aqqi tamarmiusut, inuuia inunnillu nalunaarsuisarfik malillugu najugaa kiisalu qinersisartumit namminermit atsiugaallutillu ulluligaasimassallutik.
  Imm. 6.  Uppernarsaatitut allakkani taamatuttaaq ilanngullugu allassimasassaaq qinersisartup Inatsisartunut qinersisinnaanermut piumasarineqartunik naammassinnissimaneranik kommunip pineqartup uppernarsaataa.
  Imm. 7.  Uppernarsaatitut allakkat nalunaarutiginninneq ukioq ataaseq sinnerlugu allanneqarsimasut naatsorsuutigineqarsinnaanngillat. Tamanna aamma atuuppoq qinersisartunit qaammatit aqqaneq-marluk iluanni partiinik ataatsimit amerlanerusunik nalunaarutiginninnernut peqataasunit uppernarsaatitut allakkanut.
  Imm. 8.  Qinersinermut ataatsimiititaliap partiimik akuerinninnera Inatsisartunut qinersisoqareernissaata tungaanut atuutissaaq. Atuunnerali sivikinnerpaamik ukiumi ataatsimi atuutissaaq.
  Imm. 9.  Naalakkersuisut Qinersinermut ataatsimiititaliamit akuerineqarlutik uppernarsaatitut allakkat ilusilersorneqarnerat pillugu aalajangersakkanik sukumiinerusunik aalajangersaasinnaapput.
  Imm. 10.  Naalakkersuisut partiinik nalunaarutiginninnermi suleriaasissaq pillugu, ilaatigut qarasaasiatigut nalunaarutiginninneq, uppernarsaatitut allakkat katersorneqarneranni suleriaasissaq aamma kommunit uppernarsaasiinerini suleriaasissaq pillugit aalajangersakkanik sukumiinerusunik aalajangersaasinnaavoq.

 

Qinigassanngortissinnaatitaasut

 

  § 13.  Qinersinermut qinigassanngortissinnaatitaapput § 14 naapertorlugu partii sinnerlugu qinigassanngortittut, § 15 naapertorlugulu partiit avataasigut qinigassanngortittut.

 

  § 14.  Partii sinnerlugu qinigassanngortittut nalunaarutigineqarnerat Qinersinermik ataatsimiititaliap partiinut nalunaarsuiffissatut allaffissiaatigut pissaaq. Nalunaarut Qinersinermik siulersuisunut tunniunneqareersimasassaaq kingusinnerpaamik qinersinissaq sapaatit akunnerinik pingasunik sioqqullugu nal. 12:00.
  Imm. 2.  Partiip ataatsip qinerneqartussat amerlanerpaamik marloriaataat qinigassanngortissinnaavai.
  Imm. 3.  Partiitut qinigassanngortinnermut nalunaarsuiffik qinigassanngortittut aqqi, inuuii najugaallu pillugit paasissutissanik imaqassaaq. Qinigassanngortittut qinersinissamut qinigassanngortinnertik, taamatullu pinerluttulerinermi inatsisit tunngavigalugit pineqaatissinneqarsimasinnaaneri pillugit paasissutissanik pissarsiniaasoqarsinnaasoq namminneq atsiorlutik uppernarsarsimasassavaat. Nalunaarummi namminermi imaluunniit taassuma assilineqarnerani atsiortoqarsinnaavoq.
  Imm. 4.  Qinigassanngortittup atini tamaasa pappiarami taasivissami allanneqannginnissaat kissaatigiguniuk, ateq qanoq allanneqassanersoq kissaatiginerlugu nalunaarutigineqassaaq. Qinigassanngortittup naggataa aqqaluunniit taaguutaanngitsoq kiisalu minnerpaamik ateq siulequt naqinnerluunniit aallaqqaataasoq ataaseq tamatigut allassimasassapput. Taaguut aamma ateq siulequt taarserlugu ilassutitulluunniit allanneqarsinnaavoq. Qinigassanngortittut atiinik aammalu taaguutaannik assigiittoqartillugu atip allassimasussap allanngortinneqarnissaa Qinersinermut ataatsimiititaliap aalajangersinnaavaa.
  Imm. 5.  Aqqit taaguutit akornanni aternik assigiittoqartillugu imaluunniit taaguut kissaatigineqartoq qinigassanngortittup kinaaneranik nalorngisitsisinnaappat atermik taaguummik atuisoqarnissaa Qinersinermut ataatsimiititaliap itigartissinnaavaa.
  Imm. 6.  Partiitut qinigassanngortinnermut nalunaarsuiffik partiimi oqartussaasunit, partiip malittarisassai malillugit Inatsisartunut qinersinermut qinigassanngortitsinissamut akuerineqarsimasunit, atsiorneqarsimassaaq. Partiit qinigassanngortittunik qinigassanngortitsinermik akuersissutaat partiinut nalunaarsuiffiit assilinerisa, atsiornernik uniffik siullermi taaneqartunik ilaqartillugit, nassiunneqarnerisigut pisinnaapput.
  Imm. 7.  Partiitut qinigassangortinnermut nalunaarsuiffiit qanoq isikkoqarnissaat aamma partiitut qinigassanngortitsinermut nalunaarsuiffiit nassiunneqarneranni periaasissaq, qarasaasiatigut nalunaarutiginnissinnaaneq ilanngullugu, pillugu aalajangersakkanik sukumiinerusunik Naalakkersuisut aalajangersaasinnaapput.
  Imm. 8.  Naalakkersuisut partiimik tunuliaquteqarlutik qinigassanngortittunik nalunaarutiginninnermi suleriaasissaq pillugu, ilaatigut qarasaasiatigut nalunaarutiginninneq, aalajangersakkanik sukumiinerusunik aalajangersaasinnaavoq.

 

  § 15.  Partiit avataatigut qinigassanngortittut nalunaarutigineqarnerat Qinersinermik ataatsimiititaliap qinigassanngortittunik nalunaarsuiffissatut allaffissiaatigut pissaaq. Nalunaarutiginninneq Qinersinermi siulersuisunut tunniunneqareersimassalluni kingusinnerpaamik qinersinissaq sapaatit akunnerinik pingasunik sioqqullugu nal. 12:00.
  Imm. 2.  Qinigassanngortittunik nalunaarsuiffik qinigassanngortittut aqqi, inuuii najugaallu pillugit paasissutissanik imaqassaaq kiisalu kattusseqatigiittoqartarpat tamanna nalunaarneqassalluni. Qinigassanngortittut qinersinissamut qinigassanngortinnertik, taamatullu aamma pinerluttulerinermi inatsisit tunngavigalugit pineqaatissinneqarsimasinnaaneri pillugit paasissutissanik pissarsiniaasoqarsinnaasoq namminneq atsiorlutik uppernarsarsimasassavaat. Nalunaarummi namminermi imaluunniit taassuma assilineqarnerani atsiortoqarsinnaavoq.
  Imm. 3.  Qinigassanngortittup aqqi tamaasa pappiarami taasivissami allanneqannginnissaat kissaatigiguniuk, ateq qanoq allanneqassanersoq kissaatiginerlugu nalunaarutigissavaa. Qinigassanngortittup naggataa aqqaluunniit taaguutaanngitsoq kiisalu minnerpaamik ateq siulequt naqinnerluunniit aallaqqaataasoq ataaseq tamatigut allassimasassapput. Taaguut aamma ateq siulequt taarserlugu ilassutitulluunniit allanneqarsinnaavoq. Qinigassanngortittut atiinik aammalu taaguutaannik assigiittoqartillugu atip allassimasussap allanngortinneqarnissaa Qinersinermut ataatsimiititaliap aalajangersinnaavaa.
  Imm. 4.  Aqqit taaguutit akornanni aternik assigiittoqartillugu imaluunniit taaguut kissaatigineqartoq qinigassanngortittup kinaaneranik nalornisitsisinnaappat atermik taaguummik atuisoqarnissaa Qinersinermut ataatsimiititaliap itigartissinnaavaa.
  Imm. 5.  Qinigassangortittunik nalunaarsuiffiit qanoq isikkoqarnissaat aamma qinigassanngortittunik nalunaarutiginninnerit nassiunneqarneranni periaasissaq, qarasaasiatigut nalunaarutiginninneq ilanngullugu, pillugu aalajangersakkanik sukumiinerusunik Naalakkersuisut aalajangersaasinnaapput.

 

  § 16.  Partiit avataatigut qinigassanngortittut marluk amerlanerusulluunniit kattusseqatigiinnikkut tapersersoqatigiinniarlutik isumaqatigiissinnaapput. Qinigassanngortitap qinigassanngortitaq alla ataaseq amerlanerusulluunniit kattusseqatigisimappagit nalunaarummi tamanna taaneqarsimassaaq. Qinigassanngortitat kattusseqateqarnissartik atsiorlutik akuersissutigisimassavaat. Akuersissutit nalunaarummi namminermi taassumaluunniit assilinerini nalunaarutigineqarsinnaapput.

 

  § 17.  Partiit avataatigut qinigassanngortittut nalunaarutigineqarneri qinersisartunit, qinigassanngortittussamik inassutiginnittunit, ikinnerpaamik 40-nit atsiorneqarsimassapput. Atsiornerit nalunaarummi namminermiissinnaapput taassumalluunniit assilineraniissinnaallutik.
  Imm. 2.  Nalunaarummi allassimassapput qinigassanngortitsisut tamarmik immikkut aqqi, inuuii najugaallu.
  Imm. 3.  Qinigassanngortitsisut ilaat ataaseq nalunaarut pillugu qinigassanngortitsisut tamaasa sinnerlugit saaffiginnissuteqarfigineqarsinnaasutut taaneqarsimassaaq. Qinigassanngortitsisut aqqi qinersisartumit kimilluunniit piumasarineqarpata qinersinermik siulersuisunit qinigassanngortittut nalunaarutigineqarnerannik tigusisimasunit nalunaarutigineqassapput.
  Imm. 4.  Naalakkersuisut partiimik tunuliaquteqarnatik qinigassanngortittunik nalunaarutiginninnermi suleriaasissaq pillugu, ilaatigut qarasaasiatigut nalunaarutiginninneq, aalajangersakkanik sukumiinerusunik aalajangersaasinnaavoq.

 

  § 18.  Kinaluunniit partiinut ataatsimit amerlanerusunut qinigassanngortissinnaanngilaq imaluunniit partiimut qinigassanngortiitigaluni partiit avataasigut qinigassanngortissinnaanani.
  Imm. 2.  Qinigassanngortitaq ataaseq kattusseqatigiinni arlalinni peqataasinnaanngilaq. Partii sinnerlugu qinigassanngortitat qinigassanngortitanik allanik kattusseqateqarsinnaanngillat.
  Imm. 3.  Kinaluunniit qinigassanngortittunut arlalinnut qinigassanngortitsisuusinnaanngilaq.

 

  § 19.  Qinigassanngortittup qinigassanngortinnermik nalunaarut tunniunneqareersimasoq qinersinermik siulersuisunut qinersinissaq kingusinnerpaamik sapaatit akunnerinik pingasunik nal. 12:00 sioqqullugu saaffiginninnermigut tunuartissinnaavaa.
  Imm. 2.  Qinersisartup § 17, imm. 1 naapertorlugu qinigassanngortittumik qinigassanngortitseqataasimasup qinigassanngortitseqataassutini utertissinnaanngilaa qinigassanngortitsinermik nalunaarut qinersinermik siulersuisunut tunniunneqareersimappat.

 

  § 20.  Qinersinermik siulersuisut § 14, imm. 1 aamma § 15, imm. 1 naapertorlugit qinigassanngortitanik nalunaaruteqarnissamut piffissaliussaq naaniariarpat pilertornerpaamik partiit allassimaffiannut nalunaarutit aamma qinigassanngortitanik nalunaarutit tigusimasatik allakkatigut Qinersinermut ataatsimiititaliamut nalunaarutigissavaat kiisalu qinersinermik siulersuisut isumaat malillugu nalunaarutit §§ 14-imiit 18-imut piumasaasunik naammassinninnersut paasissutissiissutigalugu. Qinigassanngortitanik nalunaarutini tamatuma saniatigut Qinersinermik siulersuisut qinigassanngortittussatut akuerineqartut amerlassusaat allassavaat.
  Imm. 2.  Qinersinermut ataatsimiititaliap qinersinermik siulersuisunit nalunaarut tigoreeruniuk Qinersinermut ataatsimiititaliap aalajangissavaa nalunaarutit tiguneqarsimasut atorsinnaasutut akuerineqarsinnaanersut. Qinigassanngortitap nalunaarutigineqarnerani kukkuneqarsimappat Qinersinermut ataatsimiititaliap pineqartoq kukkunerup iluarsineqarnissaanut ulluinnarnik marlunnik piffissalissavaa.
  Imm. 3.  Qinersinermut ataatsimiititaliap qinigassanngortittut akuerisat aqqi piaarnerpaamik tamanut nalunaarutigissavai. Qinigassanngortittoq partii sinnerlugu qinigassanngortippat imaluunniit qinigassanngortittut arlallit kattusseqatigiissimappata, nalunaarummi tamanna taaneqassaaq. Qinersinermut ataatsimiititaliaq qinigassanngortittut pillugit qinersinermik siulersuisunut nalunaaruteqassaaq, taakkulu taasisitsinermik aqutsisunut pilertornerpaamik ilisimatitsissapput.
  Imm. 4.  Qinersinermik siulersuisut aalajangiinerat malillugu qinigassanngortittut aqqi tamanut saqqummiunneqassapput.

 

  § 21.  Qinigassanngortitanik nalunaaruteqarnissamut piffissaliussap naanerani qinigassanngortitat Inatsisartunut ilaasortassatut qinerneqartussaniit ikinnerusut nalunaarutigineqarsimappata Qinersinermut ataatsimiititaliap qinersisartut kajumissaassavai piffissaq erseqqinnerusumik taasaq naatinnagu qinigassanngortitanik amerlanerusunik nalunaarutiginneqqullugit.

 

Kapitali 5

Qinersisinnaatitaasut allattorsimaffiat

 

  § 22.  Qinersinermik siulersuisut inuit kingusinnerpaamik ullormi qinersivissami §§ 1 aamma 2 naapertorlugit qinersisinnaatitaasutut piumasaqaatinik naammassinnittut, aammalu Inunnut Nalunaarsuutit Eqiteruffianni kommunimi pineqartumi najugaqarlutik nalunaarsimasut allattorsimaffiannik suliaqassaaq, taamaattorli § 24 takuuk.
  Imm. 2.  Qinersisinnaasut allattorsimaffianni ilaatinneqassapput inuit qinersinissaq sioqqullugu kingusinnerpaamik sapaatit akunnerit arfinillit kommunimut nuussimasut aammalu kingusinnerpaamik ulloq taanna nuunnerminnik Inunnut Nalunaarsuutit Eqiteruffiannut nalunaaruteqarsimasut.
  Imm. 3.  Qinersisartut qinersinissaq sioqqullugu kingusinnerpaamik sapaatit akunnerit arfinillit kommunip iluani nuussimasut aammalu kingusinnerpaamik ulloq taanna nuunnerminnik Inunnut Nalunaarsuutit Eqiteruffiannut nalunaaruteqarsimasut najugarilikkaminni allassimallutik qinersisinnaasut allattorsimaffiannut ilanngunneqassapput.
  Imm. 4.  Qinersisartut qinersinissaq sioqqullugu kingusinnerpaamik sap. akunnerisa arfinillit iluanni kommunimut allamut nuussimasut imaluunniit kommunip iluani allamut nuussimasut imaluunniit nuunnissaminnik kingusinnerpaamik ulloq taanna nalunaaruteqarsimasut ulloq taanna tikillugu najugarisimasaminni najugalittut qinersisinnaasut allattorsimaffianni nalunaarsorneqarsimaannassapput.
  Imm. 5.  Qinersisartut Kalaallit Nunaata avataani najugaqarallartut § 2-milu piumasaqaatinik naammassinnittut § 24 naapertorlugu ulloq qinersivissaq kingusinnerpaamik sapaatit akunnerinik pingasunik sioqqullugu tamanna pillugu aalajangiisoqarsimappat qinersisinnaasut allattorsimaffiannut ilanngunneqassapput.

 

  § 23.  Inuit sumiiffinni Kalaallit Nunaata kommuninut aggorneqarnerata avataanniittut ullormilu qinersivissami qinersisinnaatitaasut, kommunimi aalajangersimasumik najugartik attatiinnarsimanngikkunikku Kommuneqarfik Sermersuumi qinersisinnaasut allattorsimaffianni immikkoortumi immikkut ittumik ilanngunneqassapput.
  Imm. 2.  Inuit qinersisartut allattorsimaffiannut ilanngunneqareernerminni Kalaallit Nunaanni aalajangersimasumik najugaqarnerminnik unitsitsisut qinersinermik siulersuisunit qinersisinnaasut allattorsimaffiannit peerneqassapput, taamaattoq takukkit § 24, imm. 1-3.
  Imm. 3.  Qinersisinnaasut allattorsimaffiisa suliarineqartarnerat pillugu aalajangersakkanik sukumiinerusunik Naalakkersuisut aalajangersaasinnaapput, ilanngullugit qinersisinnaasut allattorsimaffii digitalinngorlugit.

 

  § 24.  Qinersisartut § 2-mi pineqartut qinersisinnaasut allattorsimaffiannut ilanngunneqassapput imaluunniit kingullermik qitiusumik inuit nalunaarsorsimaffianni, Det Centrale Personregisterimi, nalunaarfigisimasaminni qinersisartut allattorsimaffiannut ilaatinneqaannassallutik. Qinersisinnaasut allattorsimaffiannut ilanngunneqarnissamik qinnuteqaat kommunimi tassani qinersinermik siulersuisunut imaluunniit kommunit aggorneqarnerisa avataaniikkaanni Kommuneqarfik Sermersuumut tunniunneqassaaq.
  Imm. 2.  Imm. 1 malillugu qinersisinnaasut allattorsimaffiannut ilanngunneqarnermik aalajangiineq ullormit aalajangiinerup ulluanit naatsorsorlugu ukiuni marlunni atuutissaaq.
  Imm. 3.  Qinersisartoq imm. 1 malillugu qinersisinnaasut nalunaarsorsimaffiannut ilanngunneqarsimasoq piffissaliussap imm. 2-mi taaneqartutut naannginnerani qinersisinnaasut allattorsimaffiannut nutaamik ilanngunneqarnissaminik qinnuteqarpat aalajangiisoqarnissaata tungaanut piffissaq sivitsorneqassaaq.
  Imm. 4.  Imm. 1 naapertorlugu Qinersinermik siulersuisut aalajangiineri sapaatit akunnerinik marlunnik piffissaliussap iluani Qinersinermut ataatsimiititaliamut suliassanngortinneqarsinnaapput.
  Imm. 5.  Qinnuteqaatip tunniunneqarnissaa suliarineqarnissaalu pillugit aalajangersakkanik erseqqinnerusunik Naalakkersuisut aalajangersaasinnaapput, ilanngullugu digitalimik qinnuteqaatit.

 

  § 25.  Qinersisinnaasut allattorsimaffiat kommuninit tamanit immikkut suliarineqassaaq. Qinersisinnaasut allattorsimaffiat taasiartorfissanut tamanut immikkut immikkoortulerlugu suliarineqassaaq.
  Imm. 2.  Qinersisinnaasut allattorsimaffiat qinersisartut aqqinik qinersisartullu inuuiinik kiisalu qinersisartut aqqinik krydsiliiffissamik imaqassaaq.

 

  § 26.  Qinersisinnaasut allattorsimaffiat kingusinnerpaamik ulloq qinersivissaq sapaatit akunnerinik pingasunik sioqqullugu kommunimi sumiiffimmi tamanit tikinneqarsinnaasumi minnerpaamik ulluinnarni marlunni saqqumitinneqassaaq.
  Imm. 2.  Qinersisinnaasut allattorsimaffiat saqqummiunneqartoq, kommunip iluani taasiartorfissanik tamaginnik imaqassaaq. Tamatuma saniatigut kommunimi taasiartorfissani tamani qinersisinnaasut allattorsimaffiat taasiartorfissamut pineqartumut atuuttoq saqqumitinneqassaaq.
  Imm. 3.  Sumiiffiit kommunit aggornerisa avataanniittut eqqarsaatigalugit qinersisinnaasut allattorsimaffiata sumiiffimmut tunngasortaa kingusinnerpaamik ulloq qinersiviusussaq sapaatit akunnerinik pingasunik sioqqullugu minnerpaamik ulluinnarni marlunni saqqumitinneqassaaq.
  Imm. 4. Qinersinermik siulersuisut aalajangersinnaavaat qinersisinnaasut allattorsimaffiat taamaallaat kommunip nittartagaatigut tamanut saqqummiunneqassasoq. Qinersisinnaasut allattorsimaffiat inuit normuinik imaqaqqusaanngilaq.

 

  § 27.  Kinaluunniit isumaqartoq nammineq pissutissaqanngitsumik allattorsimaffimmut ilanngunneqarsimanani ilanngunneqarsimalluniluunniit kingusinnerpaamik ulloq qinersivissaq sapaatit akunnerinik marlunnik sioqqullugu qinersinermik siulersuisunut naammagittaalliuuteqarsinnaavoq. Naammagittaalliuut allakkatiguussaaq tunngavilersuummillu naatsumik ilaqartinneqarluni.
  Imm. 2.  Qinersinermik siulersuisut naammagittaalliuutit tiguneqartut sapinngisamik piaarnerpaamik suliarissavaat.
  Imm. 3.  Kikkunnut tamanut qinersisussat allattorsimaffiannit peerneqartunut imaluunniit namminneq ilanngunneqarsimannginnerminnik naammagittaalliuumminni ilalerneqanngitsunut qinersinermik siulersuisut allakkatigut nalunaaruteqassapput.
  Imm. 4.  Qinersinermut siulersut aalajangiinera tamanna pillugu nalunaaruteqartoqarnerata kingorna ulluinnaat marluk qaangiutinnginneranni Qinersinermut ataatsimiititaliamut maalaaruteqarsinnaavoq. Maalaarut allakkatiguussaaq tunngavilersuummillu naatsumik ilaqartinneqarluni.
  Imm. 5.  Qinersinermut ataatsimiititaliap maalaarut tiguneqartoq sapinngisamik piaarnerpaamik suliarissavaa.
  Imm. 6.  Qinersisinnaasut allattorsimaffianni allannguutit allat taamaallaat pisinnaapput qinersinermik siulersuisunit akuerineqarsimagunik.

 

Kapitali 6

Qarasaasiakkut allakkatigut taasineq

 

  § 28.  Allakkatigut taasineq digitalimik pisinnaasoq pillugu aalajangersakkanik erseqqinnerusunik Naalakkersuisut aalajangersaasinnaapput. Digitalimik allakkatigut taasinissamut periarfissaq taamaallaat taasisinnaanissamut imaluunniit sioqqutsilluni taasisinnaanissamut annertusititsinerussaaq.

 

  § 29.  Digitalimik allakkatigut taasinerup aaqqissuunneqarnera, ingerlanneqarnera immaqalu taasineq pillugit aalajangersakkanik erseqqinnerusunik Naalakkersuisut aalajangersaasinnaapput.
  Imm. 2.  Paasissutissat nalunaarsukkat, digitalimik allakkatigut taasinerit uninngasuutigineranni saqqummertut, piiarnissaat, pissarsiarinissaat atorneqarnissaallu pillugu aalajangersakkanik erseqqinnerusunik Naalakkersuisut aalajangersaasinnaapput.

 

  § 30.  Digitalimik allakkatigut taasinermut atugassanik digitalimik periaatsinik Naalakkersuisut pilersitsissapput aammalu ingerlanneqarneranut akisussaasuussallutik. Digitalimik aaqqiissutissaq Qinersinermut ataatsimiititaliamit akuerineqarsimassaaq.

 

  § 31.  Digitalimik periaatsimi taaguut ”Inatsisartunut qinersineq” aamma ”Valg til Inatsisartut” allassimassapput.
  Imm. 2.  Digitalimik periaatsimi qinigassanngortittut aqqi allassimassapput. § 14, imm. 4 aamma 5 kiisalu § 15, imm. 3 aamma 4 taamaaqataanik atuutissapput.

 

  § 32.  Digitalimik allakkatigut taasisinnaanngilaq:
1)  qinersisartoq ulloq qinersivissaq tikitsinnagu toqukkut qimagussimasoq,
2)  digitalimik allakkatigut taasinissamut periaasissaq maleruaqquneqartoq malinneqarsimanngippat,
3)  qinersisartoq sioqqutsisumik taasisimappat, imaluunniit
4)  qinersisartoq ullormi qinersivissami taasisimappat.

 

Kapitali 7

Sioqqutsisumik taasinernik kisitsinerit aamma digitalimik allakkatigut taasinerit qitiusumut inissinneqarnerat

 

  § 33.  Digitalimik allakkatigut taasisinnaanermut periarfissap atuutsinneqalerneranut atatillugu, takuuk § 28, imm. 1, sioqqutsisumik taasinernik kisitsinerit aamma digitalimik allakkatigut taasinerit qitiusumut inissinneqarnissaat pillugu aalajangersakkanik erseqqinnerusunik Naalakkersuisut aalajangersaasinnaapput.
  Imm. 2.  Sioqqutsisumik taasinernik kisitsinerit aamma digitalimik allakkatigut taasinerit qitiusumut inissinneqarnerannut atatillugu, sioqqutsisumik taasinernik kisitsinerni aamma digitalimik allakkatigut taasinerni periaasissat pillugit aalajangersakkanik erseqqinnerusunik Naalakkersuisut aalajangersaasinnaapput. Ilanngullugu sioqqutsisumik taasinerit sumut nassiunneqassanersut aammalu qinersinermut siulersuisunut ataasiakkaanut kisitsinerit inerneri pillugit ilisimatitsissuteqarnermi periaasissat pillugit aalajangersakkanik erseqqinnerusunik Naalakkersuisut aalajangersaasinnaapput.
  Imm. 3.  Sioqqutsisumik taasinernik kisitsinerit qitiusumut inissinneqarneranni §§ 46-48 aamma § 49, imm. 2, §§ 50-52 aamma § 58 taamaaqataanik atuutissapput, taamaattoq karsit taasiviit atorneqassanatik.

 

Kapitali 8

Sioqqutsisumik taasinikkut taasineq

 

  § 34.  Qinersisartoq kinaluunniit Kalaallit Nunaanni kommunini tamani innuttaasut nalunaarsorsimaffianni sioqqutsisumik taasisinnaavoq.

 

  § 35.  Qinersisartut napparsimmavimmi imaluunniit peqqissartarfinni paaqqinnittarfinniluunniit allani uninngasut, napparsimavimmi uninngaffigisaminniluunniit sioqqutsisumik taasisinnaapput.
  Imm. 2.  Qinersisartut pinerluuteqarsimasunik isumaginnittoqarfiup inissiisarfiani inissinneqarsimasut inissinneqarfigisaminni sioqqutsisumik taasisinnaapput.
  Imm. 3.  Qinersisartut sumiiffinni avinngarusimasuni immikkut taasiartorfiunngitsuniittut inummut qinersisinnaatitaasumut qinersinermik siulersuisunit susassaqartunit toqqarneqarsimasumut sioqqutsisumik taasisinnaapput.
  Imm. 4.  Qinersisartut kommunit aggornerisa avataanni mittarfinniittut, silasiorfinniittut il.il. inummut Qinersinermut ataatsimiititaliamit piginnaatinneqartumut sioqqutsisumik taasisinnaapput.
  Imm. 5.  Qinersisartut naalagaaffiup ilaani allaniittut innuttaasunut sullissisarfimmi imaluunniit susassaqartumi Qinersinermut ataatsimiititaliamit piginnaatinneqarsimasumi sioqqutsisumik taasisinnaapput.
  Imm. 6.  Qinersisartut naalagaaffiup avataaniittut Kalaallit Nunaata sinniisoqarfianut imaluunniit qallunaat aallartitaqarfiini sinniisoqarfiiniluunniit sioqqutsisumik taasisinnaapput.
  Imm. 7.  Qinersisartut umiarsuarni Kalaallit Nunaanni angerlarsimaffeqartuniittut umiarsuup naalagaanut inummulluunniit taassuma toqqagaanut sioqqutsisumik taasisinnaapput. Qinersisartut sioqqutsisumik taasinissamik kissaateqartut, tamatumunnga periarfissaqarnissaat, umiarsuup naalagaata qulakkiissavaa.
  Imm. 8.  Sioqqutsisumik taasineq siusinnerpaamik qinersinerup ingerlanneqarnissaa sapaatit akunnerinik arfinilinnik sioqqullugu pisinnaavoq.
  Imm. 9.  Imm. 1-7 naapertorlugit sioqqutsisumik taasisarneq pillugu aalajangersakkanik sukumiinerusunik Naalakkersuisut aalajangersaasinnaapput.

 

  § 36.  Qinersisartut napparsimanertik angallarlunnertilluunniit pissutigalugu taasivissamukarsinnaanngitsut angerlarsimaffimminni sioqqutsisumik taasisinnaapput, sumiiffinni § 35-mi taaneqartuni taasinissaminnut periarfissaqanngikkunik. Angerlarsimaffimmi sioqqutsisumik taasinissaq pillugu qinersinermut siulersuisunut qinnuteqartoqareersimassaaq kingusinnerpaamik ulloq taasivissaq ullunik pingasunik sioqqullugu nal. 16:00.
  Imm. 2.  Sioqqutsisumik taasinernik kisitsinerit aamma digitalimik allakkatigut taasinerit qitiusumut inissinneqarnerannut atatillugu sioqqutsisumik taasinissamut piffissamut killissaliussap allanngortinneqarnissaa pillugu aalajangersakkanik erseqqinnerusunik Naalakkersuisut aalajangersaasinnaapput.

 

  § 37.  Kalaallit Nunaanni sioqqutsisumik taasinissamut taasinermi atortussat pisariaqartut ilusilersornissaannut akuerinissaannullu Qinersinermut ataatsimiititaliaq akisussaasuuvoq.
  Imm. 2.  Kalaallit Nunaata avataani sioqqutsisumik taasinermi allakkatigut taasinermi atortussat Danmarkimi folketingimut qinersisoqarnerani atorneqartartut atorneqassapput.

 

  § 38.  Qinersisartoq taasiartorfinni § 35-imi taaneqarsimasut ilaanni taasinernik tigooqqaasussamut saaffiginninnermigut pappiaramik sioqqutsisumik taasivissamik, puussaqarlunilu allakkanik nassitsissutitaqarlunilu ungaluusartalimmik tunineqassaaq. Qinersisartup allanit isigineqarani pappiara taasivissaq erngerluni immersussavaa partiit qinigassanngortitaqartut qinigassanngortissimasulluunniit arlaata aqqa allallugu.
  Imm. 2.  Qinersisartoq taasereeruni allakkat nassitsissutit immersussavai. Qinersisartup nammineq piumassutsiminik allanillu isigineqarani pappiaramik taasivissamik immersuisimaneranik, puussaanut ikisisimaneranik taassuminngalu matusisimaneranik nalunaarummik allakkat nassitsissutit imaqassapput. Qinersisartup taasinermik tigusisussaq isigitillugu allakkat nassitsissutissat atsiussavai, allakkanilu nassitsissutini atsiornerup ullua, qinersisartup aqqi tamarmik, inuuia kommunimilu qinersisinnaasut allattorsimaffiannut ilanngunneqarfigisimasamini najugaa taaneqassapput.
  Imm. 3.  Tamatuma saniatigut taasinermik tigusisup qinersisartup atsiornerata ilumoortuuneranik aammalu qinersisartup piffissami sumiiffimmilu taasaani pisimaneranik, kiisalu allanit isigineqarani taasisimaneranik nalunaarummik imaqartussaq immersorlugulu ilanngutissavaa. Uppernarsaat taanna taasinermik tigusisumit pineqartumit namminermit ateq, atorfik najugarlu allallugit atsiorneqassaaq.
  Imm. 4.  Taasinernik tigusisoq sioqqutsisumik taasinerup, takuuk imm. 1, allanik najuuttoqartinnagu pinissaanut akisussaasuuvoq.

 

  § 39.  Puussaq pappiaramik taasivimmik allakkanillu nassitsissutinik kiisalu uppernarsaammik imalik puussamut tassunga ikisiffissiamut ikineqassaaq, taannalu matuneqassalluni kommunimullu qinersisartup qinersisartut allattorsimaffianni allanneqarfigisimasaanut nassiunneqarluni. Puussap tunuani qinersisartup aqqa kommunimilu taaneqartumi najugaa erseqqissumik allanneqassapput. Taasinermik tigusisup pisariaqanngitsumik kinguarsaanani puussaq kommunimut pineqartumut nassiutissavaa.

 

  § 40.  Kommunip puussaq nassiunneqarsimasoq ammarnagu ingerlaannaq taasiartorfimmi qinersisartup pineqartup najugaatut puussami taaneqarsimasumi taasisitsinermik aqutsisumut ingerlateqqissavaa. Puussat taasineq naammassitinnagu taasisitsinermik aqutsisumit tiguneqareersimassapput.
  Imm. 2.  Sioqqutsisumik taasinernik kisitsinerit aamma digitalimik allakkatigut taasinerit qitiusumut inissinneqarneranni sioqqutsisumik taasinerit nassiunneqarneranni periaasissaq aamma piffissamut killiliussat pillugit aalajangersakkanik erseqqinnerusunik Naalakkersuisut aalajangersaasinnaapput.

 

Kapitali 9

Pappiarat taasivissat ilusilersorneqarneri, init taasiviusussat, ullormi qinersiviusumi taasineq

 

Pappiarat taasivissat ilusilersorneqarneri

 

  § 41.  Qinersinermut ataatsimiititaliaq pappiarat taasivissat pisariaqartut pissarsiarinissaannut, ilusilerneqarnissaannut agguataarneqarnissaallu pillugit aalajangiissaaq. Pappiarat taasivissat taaguutinik ”Inatsisartunut qinersineq” aamma ”Valg til Inatsisartut” naqitsivigineqarsimassapput.
  Imm. 2.  Pappiarani taasivissani qinigassanngortittut aqqi allassimassapput. Partiit sinnerlugit qinigassanngortittut immikkoortissimallugit allanneqassapput. Immikkoortitsiffiit pappiarani taasivissani immikkoortillugit inissinneqassapput. Immikkoortitsiffinni tamani partiip taaguutaa siulliulluni allassimassaaq, taassumalu ataani qinigassanngortittut siuliaqutai kinguliaqutaaluunniit naqinnerit tulleriiaarnerisut tulleriiaarlutik allassimassallutik. Immikkoortitsiffinni tamani partiip kalaallisut taaguutaa siulliulluni allassimassaaq, tulleriiaarnerisut tulleriiaarlutik allassimassallutik.
  Imm. 3.  Kattusseqatigiit partiinut qinigassanngortittut kingornisigut allanneqassapput. Kattusseqatigiit arlaliuppata qinigassanngortitamik amerlassusii tunngavigalugit tulleriinneqassapput. Kattusseqatigiit amerlanernik qinigassanngortitallit siulliutinneqassapput. Tamatuma kingorna kattusseqatigiit amerlanerit tulliinik amerlassusilinnik qinigassanngortitallit allanneqassapput, taamatullu periuseqarluni tulleriinnilersuisoqassalluni. Kattusseqatigiit amerlaqatigiinnik qinigassanngortitaqarpata Qinersinermut ataatsimiititaliaq qanoq tulleriinneqarnissaat pillugu makitsissaaq. Kattusseqatigiit ataasiakkaat iluini qinigassanngortittut siuliaqutaat kinguliaqutaalluunniit malillugit naqinnerit tulleriiaarnerisut tulleriiaarlugit allassimassapput.
  Imm. 4.  Partiit avataasigut qinigassanngortittut allat kingornisigut allanneqassapput. Partiit avataatigut qinigassanngortittut arlaqarpata taakku siuliaqutaat kinguliaqutaalluunniit malillugit naqinnerit tulleriiaarnerisut tulleriiaarlugit allassimassapput.

 

Init taasivissat

 

  § 42.  Init taasivissat kiisalu ineeqqat taasivissat karsinillu taasivinnut nakkartitsivissat qinersiartorfissani tamani kommunalbestyrelsip aaqqissussavai.
  Imm. 2.  Ineeraq taasivik imatut aaqqissuunneqarsimassaaq qinersisartoq qanoq taasinersoq allanit takuneqarsinnaajunnaarlugu taasisoqarsinnaassalluni. Ineeraq taasivik naammattumik qaammaqquteqassaaq allannerit erseqqissumik atuarneqarsinnaanissaannut, tulluartumillu allaataasinnaasumik peqassalluni qanoq taasisoqarneranik nalornisitsisinnaanngitsumik, kiisalu allannermut toqqavissamik aalajangersimasumik peqassalluni.
  Imm. 3.  Ineeqqap taasiviup silataani taasinermut karseqassaaq, taannalu sananeqarsimassaaq pappiarat taasiviit taasinermut karsi ammaqqaartinnagu amuneqarsinnaajunnaarlugit. Karsit taasiviit parnaarneqarsinnaallutilluunniit ammarnaveerneqarsinnaassapput.
  Imm. 4.  Inimi taasiviusumi qinersinerup ingerlanneqarnerani qineqqusaartoqassanngilaq. Qinersinissamik sunniiniartoqannginnissaa taasisitsinermut aqutsisup taassumaluunniit tamatumunnga pisinnaatitaata sianigissavaa.

 

Ullormi qinersiviusumi taasineq

 

  § 43.  Qinersineq nal. 09:00 ammarneqassaaq nal. 20:00-lu naammassineqarluni, siusinnerusukkulli naammassineqarsinnaalluni qinersisinnaatitaasut tamarmik nalunaaqutaq taasaq nallertinnagu taasiartoreersimappata.

 

  § 44.  Taasisitsinermik aqutsisup taasinerup aallartinnerani taasineq ammarnerarlugu nalunaarutigissavaa, najuuttullu isigitillugit karsit taasivinnut nakkartitsiviit ammariarlugit imaqannginnerat takutissallugu, tamatumalu kingorna karsit parnaarneqassallutik ammarneqarsinnaajunnaarneqarlutilluuniit.
  Imm. 2.  Inimi qinersivimmi takulertornartumik inissitamik allagartaqassaaq partiit inuillu qinigassanngortittut aqqi pillugit paasissutissanik imalimmik. Partiit inuillu qinigassanngortittut pappiarami taasivissami tulleriiaarnertik malillugu allagartami allassimassapput. Qinigassanngortittut arlallit kattusseqatigiillutik qinigassanngortissimappata allagartaq tamatumunnga paasissutissanik imaqartinneqassaaq. Allagartap taassuma assinga ineeqqami taasivissami, allannissami allequttap qulaatunginnguani nivingatinneqassaaq. Allagartaq taaneqartoq Qinersinermut ataatsimiititaliamit pissarsiarineqassaaq.
  Imm. 3.  Qinersisinnaatitaaneq inimut qinersivimmut, qinersisartup inuit nalunaarsorsimaffianni najugaanut qaninnerpaatut inissisimasumut, nammineerluni ornigunnikkut atorneqassaaq.
  Imm. 4.  Inimi qinersivimmi qinersisartoq taasisitsinermik aqutsisumut taassumaluunniit tamatumunnga piginnaatitaanut saaffiginnissaaq. Taasisitsinermik aqutsisup taassumaluunniit tamatumunnga pisinnaatitaata qinersisartup atini inuuinilu pillugit paasissutissiinissaa piumasarissavaat. Qinersisartoq taamatuttaaq aperineqaruni najukkani pillugu paasissutissiissaaq. Qinersisartup kinaassusia nalornissutigineqarpat pineqartup kinaassutsiminut uppernarsaammik saqqummiussinikkut tamanna uppernarsassavaa. Nunami namminermi ID-kortimik Naalakkersuisut atuutsitsilersimappata, qinersisartup taasisitsinermik aqutsisumut taassumaluunniit tamatumunnga piginnaatitaanut saaffiginninnerani, qinersisartup nunami namminermi ID-korti imaluunniit kinaassutsimut uppernarsaat alla takutissagaa, taasisitsinermik aqutsisup taassumaluunniit tamatumunnga piginnaatitaata piumasarissagaa, pillugu aalajangersakkanik erseqqinnerusunik Naalakkersuisut aalajangersaassapput.
  Imm. 5.  Qinersisartup kinaassusaa uppernarsineqareerpat, taasisitsinermik aqutsisup taassumaluunniit tamatumunnga piginnaatitaata qinersisartoq qinersisartut allattorsimaffianni nalunaaqutsissavaa, aammalu taasivissaq atorneqanngitsoq qinersisartumut tunniunneqassalluni.
  Imm. 6.  Qinersisartut kommunimi inuit nalunaarsorsimaffianni najugaqartut kommunimi taasiartorfissami nammineq toqqakkamini taasisinnaasut pillugit maleruagassanik nalunaarummi Naalakkersuisut aalajangersaasinnaapput.
  Imm. 7.  Taasineq pissaaq ineeqqami taasivimmi tamatumunnga aaqqissuunneqarsimasumi. Meeqqat mikinerusut ineeqqamut taasivimmut nassarneqarsinnaanissaat taasisitsinermik aqutsisup akuerisinnaavaa.
  Imm. 8.  Qinersisartup pappiara taasivissaq immersussavaa partiip nalaatigut imaluunniit qinigassanngortittup Inatsisartunut qinigaatinniakkap aqqata nalaatigut krydsiliinikkut.
  Imm. 9.  Taasereeruni qinersisartup pappiara taasivik peqissavaa, kina taasimanerini allanit takuneqarsinnaajunnaarlugu. Qinersisartoq taamaalioreeruni pappiara taasivik peqitaq karsimut taasivinnut nakkartitsivimmut ikissavaa pissutissaqanngitsumillu uninnganani inimit qinersivimmit qimagutissalluni.
  Imm. 10.  Qinersisartup pappiara taasivissaq pissusissaatut nammineerluni immersorsinnaanngippagu taasisitsinermik aqutsisup taassumaluunniit tamatumunnga piginnaatitaanut qinersisartoq pineqartoq pisariaqartumik ikiussavaa. Qinersisartut angallarlunnertik allamilluunniit assigisaanik pissuteqarlutik inimut taasivimmut isersinnaanngitsut taasisitsinermik aqutsisoq isigitillugu inip taasiviup silatinnguani taasisinnaassapput. Qinersisartup tappiitsuuguni isigiarsuttuuguniluunniit taasinermini inummit najuuttumit, nammineq toqqakkaminit, taamaallaat ikiorneqarnissani piumasarisinnaavaa.
  Imm. 11.  Qinersisartup pappiara taasivissaq kukkusumik immersorneqarsimappat imaluunniit mianersuaalliornikkut atorsinnaajunnaarsimappat allamik taarsertissinnaavaa. Taarsiisoqarsinnaanngilaq pappiara taasivik karsimut taasivinnut nakkaatitsivimmut nakkartinneqareersimappat. Pappiara taasivissaq utertinneqartoq taasisitsinermik aqutsisumit immikkoortillugu toqqortarineqassaaq.
  Imm. 12.  Taasisitsinermik aqutsisoq nammineq taasissaaq taasinerup nalinginnaasumik naammassinerata kinguninnguani.

 

Kapitali 10

Qinersinerup naatsorsorneqarnera il.il.

 

Taasivissat tunniunneqanngitsut aamma taasivissat taarserneqartut

 

  § 45.  Taasineq naammassineqarpat taasisitsinermik aqutsisup taassumaluunniit tamatumunnga piginnaatitaata immikkut poortugakkuutaarlugit makku kisissavai qilersussallugillu:
1)  pappiarat taasivissat tunniunneqarsimanngitsut, aamma
2)  pappiarat taasivissat allamik taarsigassatut utertinneqartut.
  Imm. 2.  Poortukkat taakku atortussat § 46, imm. 3-mi, kiisalu § 58-imi taaneqartut peqatigalugit qinersinermik siulersuisunut nassiunneqassapput.

 

Sioqqutsisumik taasinerit

 

  § 46.  Taasinerup naammassineqariitsiarnerani taasisitsinermik aqutsisup taassumaluunniit tamatumunnga piginnaatitaata sioqqutsisumik taasinerit tiguneqartut ammassavai, aammalu sioqqutsisumik taasinerit ilanngunneqarsinnaanersut misissussallugu. Sioqqutsisumik taasinernut ilanngunneqarsinnaappat qinersisartup pineqartup aqqa qinersisinnaasut allattorsimaffianni krydsilerneqassaaq, allakkallu puussaat pappiaramik taasivimmik imalik ammarnagu karsimut taasivinnut nakkartitsivimmut nakkartinneqarluni.
  Imm. 2.  Sioqqutsisumik taasinernut ilanngunneqarsinnaanngilaq:
1)  nassiussisoq qinersisinnaasut allattorsimaffianni ilaanngippat,
2)  nassiussisoq ulloq qinersivik sioqqullugu toqusimappat,
3)  puussaq allanik imaluunniit allakkanik nassitsissutinik, uppernarsaammik allakkalluunniit puuannik ataasiinnaanngitsumik imaqarpat,
4)  puussap, uppernarsaatip, allakkat nassitsissutit allakkalluunniit puuata isikkuatigut isumaqarnarpat inatsimmut naapertuuttumik suliarineqarsimasuunngitsut,
5)  Sioqqutsisumik taasinerup ingerlanneqarnissaanut suleriaasissaq malinneqartussaq malinneqarsimanngippat,
6)  piffissaliussat § 33-mi taaneqartut iluanni sioqqutsisumik taasisoqarsimanngippat,
7)  puussat taasisitsinerup ammarneqarnerata kingorna tiguneqarpata,
8)  qinersisartoq nutaanerusumik sioqqutsisumik taasisimappat, imaluunniit
9)  qinersisartoq ullormi qinersiviusumi taasisimappat.
  Imm. 3.  Puussat, uppernarsaatit, allakkat nassitsissutit, allakkat puui pappiarallu taasivissat qinersinermik siulersuisunut nassiunneqassapput atortussat § 45, imm. 1-imi aamma § 58-imi taaneqartut ilanngullugit.

 

Kisitsineq

 

  § 47.  Taasinerup naammassineqariitsiarnerani taasisitsinermik aqutsisup taassumaluunniit tamatumunnga piginnaatitaata najuuttut isigitillugit karsit taasivinnut nakkartitsiviit ammassavai, tamatumalu kingorna taasiviusut tiguneqassallutik. Taasisitsinermik aqutsisoq taassumaluunniit tamatumunnga piginnaatitaa karsit taasiviit ammarnissaannut akisussaasuuvoq.
  Imm. 2.  Siullermik taasiviit aaqqissuunneqassapput, taasiviit partiimut ataatsimut imaluunniit partiit avataanni qinigassanngortittumut ataatsimut taasiviusut immikkut qaleriiaarlugit ataatsimoortinneqarlutik.
  Imm. 3.  Tamatuma kingorna taasinerit qassit, taasinermi partiinik aammalu partiit avataanni qinigassanngortittunik (inummik taasinerit) taasivimmi allassimasuni taasiviusimanersut kisinneqassapput.
  Imm. 4.  Tamatuma kingorna partiinut ataasiakkaanut tamaginnut immikkut, taasinerit qassit partiimut tutsinneqassanersut (partiimik taasinerit), aammalu taasinerit qassit qinigassanngortittunut ataasiakkaanut (inummik taasinerit) tutsinneqassanersut kisinneqassapput.
  Imm. 5.  Taasinernik kisitsineq tamanut ammavoq. Qinigassanngortittoq kisitsinermi peqataaqqusaanngilaq.
  Imm. 6.  Inuit qinersisinnaatitaasut taasinernik kisitsineq malinnaaffiginiarlugu takkussimasut marlunnit ikinneruppata, taasisitsinermik aqutsisup qinersisinnaatitaasut akornanni uppernarsaasussat marluk aggersassavai.

 

Partiinut taasinerit aamma inunnut taasinerit

 

  § 48.  Taasineq krydsiliivissap iluani qinersisartup partiimut krydsilersimasaanut taasineruvoq (partimik taasineq). Sioqqutsisumik taasineq qinersisartup sioqqutsisumik taasivissami partiip atia allassimappagu taasineruvoq (partimik taasineq).
  Imm. 2.  Taasineq partiit avataanni qinigassanngortittup nalaani qinersisartup taasivissami krydsilersimasaanut taasineruvoq (inummik taasineq). Sioqqutsisumik taasineq partiit avataanni qinigassanngortittup sioqqutsisumik taasivissami atia allassimasaanut taasineruvoq (inummik taasineq).
  Imm. 3.  Qinersisartoq qinigassanngortittup aqqata nalaani imaluunniit qinigassanngortittup aamma partiip qinigassanngortittup tunuliaqutarisaata aqqata nalaanni krydsiliippat, taasineq qinigassanngortittumik taasinertut isigineqassaaq (inummik taasineq). Taamaaqataannik qinersisartup qinigassanngortittup aqqa imaluunniit partiip qinigassanngortittup tunuliaqutarisaata aqqa sioqqutsisumik taasivissami allassimappagu, tamanna atuutissaaq (inummik taasineq).
  Imm. 4.  Qinersisartoq partiip aqqata nalaani imaluunniit partiimik krydsiliivissap iluani krydsiliisimappat, qularnaatsumik partiip qinigassanngortitaasa arlaat qinersisartup taaniarneraa allassimanani, taasivissaq partiimut taasiviusimasutut isigineqassaaq (partimik taasineq). Taamaaqataanik qinersisartup sioqqutsisumik taasivissami partiip aqqa imaluunniit partii taanna tunuliaqutaralugu qinigassanngortittut arlallit aqqi allassimappagit, tamanna atuutissaaq (partimik taasineq).

 

Atuunneri

 

  § 49.  Pappiara taasivik taasiartorfimmi immersorneqarsimasoq atorsinnaanngilaq:
1)  allaffigineqarsimanngikkuni,
2)  erseqqissumik takuneqarsinnaanngippat partiit arlaat sorleq, imaluunniit qinigassanngortittoq partiit avataanniittoq sorleq qinersisartup taaniarsimaneraa,
3)  pappiarap taasiviup isikkua malillugu isumaqarnarpat pappiara taasivik inatsit naapertorlugu suliarineqarsimasuunngitsoq, imaluunniit
4)  pappiaraq taasivik immikkooruserneqarsimappat.
  Imm. 2.  Sioqqutsisumik taasineq atorsinnaanngilaq:
1)  allaffigineqarsimanngikkuni,
2)  erseqqissumik takuneqarsinnaanngippat partiit arlaat sorleq imaluunniit qinigassanngortittoq partiit avataanniittoq sorleq qinersisartup taaniarsimaneraa,
3)  allakkat puussaat allamik imaqarpat imaluunniit pappiaranik taasivinnik ataatsimit amerlanerusunik imaqarpat,
4)  pappiarap taasiviup isikkua malillugu isumaqarnarpat pappiara taasivik inatsit naapertorlugu suliarineqarsimasuunngitsoq imaluunniit pissusissat naapertorlugit immersorneqarsimanngippat,
5)  pappiarami taasivimmi taamaallaat qinigassanngortinngitsup aqqa imaluunniit partiip qinigassanngortitaqanngitsup aqqa taamaallaat, imaluunniit
6)  pappiaraq taasivik immikkooruserneqarsimappat.
  Imm. 3.  Taasisitsinermik aqutsisup qinersinermit allattaavimmi nalunaassavaa pappiarat taasiviit qassit atorsinnaanngitsutut nalunaarutigineqarnersut, taasivit atorsinnaanngitsut ataasiakkaat atorsinnaannginnerinut pissutaasoq naatsumik tunngavilersuutitalerlugu.
  Imm. 4.  Pappiarat taasiviit, ilanngullugit sioqqutsisumik taasinerit, atorsinnaanerisa nalilerneqartarnerat pillugu aalajangersakkanik sukumiinerusumik Naalakkersuisut aalajangersaasinnaapput.

 

Ulloq qinersiviusumi naatsorsuineq

 

  § 50.  Taasinernik kisitsineq naammasseriiginnartoq taasinernik nutaamik kisitsisoqaqqissaaq. Aatsaat kisitsinerit tulleriit marluk assigiimmik inerneqarpata taasisitsinermik aqutsisup taasinerup inernera inaarutaasumik naatsorsussavaa. Kisitsinerit marluk tamarmik ulloq qinersivimmmi pissapput.

 

  § 51.  Qinersinermit allattaavimmi taasisitsinermik aqutsisup partiit qinigassanngortittullu nalunaarsussavai. Partiit ataasiakkaat taasinernik qasseraarsimanersut nalunaarneqassaaq, soorlu aamma partiit ataasiakkaat sinnerlugit aammalu partiit avataanni qinigassanngortittut ataasiakkaat immikkut qassinik taaneqarsimanersut nalunaarneqassalluni.
  Imm. 2.  Taasiartorfinni ataasiakkaani qinersinermit allattaavinni paasissutissat uku taamatuttaaq takuneqarsinnaassapput:
1)  Taasiviit qinigassanngortittut aqqinik allaffigineqarsimasut tiguneqartut amerlassusii.
2)  Taasinerit atorsinnaasut amerlassusii.
3)  Taasiviit allaffigineqarsimanngitsut amerlassusii.
4)  Taasinerit atorsinnaanngitsut allat amerlassusii.
5)  Sioqqutsisumik taasinerit tiguneqartut amerlassusii.
6)  Sioqqutsisumik taasinerit isiginiarneqarsimanngitsut amerlassusii.
7)  Pappiarat taasivissat taarserneqarsimasut qassiuneri.
8)  Pappiarat taasivissat atorneqanngitsut qassiuneri.
9)  Qinersisinnaatitaasut qassiunerit.

 

  § 52.  Taasiartorfimmi qinersinerup inernera taasisitsinermik aqutsisup ingerlaannarluni qinersinermik siulersuisut siulittaasuannut nalunaarutigissavaa.
  Imm. 2.  Qinersinermik siulersuisut nalunaarutit imm. 1-imi taaneqartut kommunimi taasiartorfinnit tigugunikkit ingerlaannartumik immersussavaat ajunnginnersullu misissorlugit. Tamatuma kingorna qinersinerup inernera ingerlaannaq Qinersinermut ataatsimiititaliamut nalunaarutigineqassaaq. Nalunaarut taasiartorfimmi pineqartumi qinersinerup ingerlanneqarneranut atatillugu pissutsinik immikkut ittunik qinersinerup inerneranut sunniuteqarsinnaasunik atuuttoqarsimanersoq paasissutissiissummik ilaqartinneqassaaq.
  Imm. 3.  Qinersinermut ataatsimiititaliap taasiartorfinniit qinersinermik siulersuisunut kiisalu qinersinermik siulersuisunit Qinersinermut ataatsimiititaliamut nalunaaruteqarnermi erseqqinnerusumik periaasissaq aalajangissavaat.

 

  § 53.  Qinersinermut ataatsimiititaliap inernerit qinersinermik siulersuisunit tigugunigit aammalu misissoreerlugit Qinersinermut ataatsimiititaliap qinersinerup inernera tamarmiusoq  ingerlaannaq naatsorsussavaa (qinersinerup ulluani naatsorsuinertut). Qinersinermik siulersuisunit inernerit tamakkiisut suli pigineqanngikkaluartut Qinersinermut ataatsimiititaliaq taamatut naatsorsuisinnaavoq, atortussat tiguneqarsimasut malillugit paasissutissat amigaataasut qinersinerup inerneranut sunniuteqarsinnaassanngippata.
  Imm. 2.  Naatsorsuinermi taasinerit tamarmiusut inernerisa naatsorsornerini taasinerit makkununnga agguataarlugit ataatsimut naatsorsorneqassapput:
1)  partiit ataasiakkaat taakkulu qinigassanngortitaat,
2)  kattusseqatigiit ataasiakkaat qinigassanngortitaat, kiisalu
3)  partiit avataasigut qinigassanngortittut ataasiakkaat.
  Imm. 3.  Tamatuma kingorna ilaasortaaffiit agguataarneqassapput d'Hondtip periaasia malillugu, tassa partiit ataasiakkaat, kattusseqatigiit ataasiakkaat partiillu avataasigut qinigassanngortittut ataasiakkaat taasisaasa katinneri 1-imik, 2-mik, 3-mik ilaasortaasinnaasut amerlassusaat tikillugu agguartiterneqassapput. Siulliulluni ilaasortanngortitsissaaq partii, kattusseqatigiit imaluunniit partiit avataasigut qinigassanngortittoq amerlanerpaamik taagorneqarsimasoq, tulliulluni ilaasortanngortitsissalluni partii, kattusseqatigiit imaluunniit partiit avataasigut qinigassanngortittoq, amerlanerpaamut tulliulluni taaguunneqarsimasoq, taamalu pisoqaqattaassaaq inatsisartunut qinersivimmi pineqartumi ilaasortaaffissat tamakkernissaasa tungaannut.
  Imm. 4.  Ilaasortaaffiit partiimit kattusseqatigiiffimmilluunniit ilaasortaaffigineqalersussat partiip kattusseqatigiiffiulluunniit qinigassanngortitaanut agguarneqassapput siulliulluni ilaasortaasussanngorlugu qinigassanngortitaq amerlanerpaamik taagorneqarsimasoq, tulliulluni ilaasortaasussanngorlugu qinigassanngortitaq amerlanerpaamut tulliulluni taaguunneqarsimasoq, taamalu pisoqaqattaassaaq partiip kattusseqatigiilluunniit pineqartup ilaasortaaffissaasa tamakkerlutik agguaanneqareernissaasa tungaannut.
  Imm. 5.  Partii kattusseqatigiilluunniit ilaasortanngortitsinissanut anguneqartunut naammanngitsunik qinigassanngortitsisimappata ilaasortatut inissat partiimit imaluunniit kattusseqatigiinnit taaguunneqarnerpaanut tulliusunit pineqassapput.
  Imm. 6.  Partiit, kattusseqatigiit partiilluunniit avataasigut qinigassanngortittut arlallit imm. 2 naapertorlugu amerlaqatigiimmik taaguunneqarsimappata, Qinersinermut ataatsimiititaliap makitsineratigut aalajangerneqassaaq kia arlaata ilaasortaaffik pissarsiarissaneraa. Tamanna aamma atuuppoq imm. 4 naapertorlugu partiip imaluunniit kattusseqatigiit qinigassanngortitaat arlallit assigiimmik taagorneqarsimappata.

 

Sinniisussat allattorsimaffiat

 

  § 54.  Qinersinermut ataatsimiititaliap partiinut tamanut kattusseqatigiinnullu tamanut qinigassanngortittut qinigaanngitsulli sinniisussat allattorsimaffiannut sinniisussatut Inatsisartunut ilaasortanngorsinnaanerminnut tulleriinnerat malillugu ilanngunneqarnissaat qulakkiissavaa. Qinigassanngortittoq qinigaanani amerlanerpaanit taaguunneqarsimasoq siulliussaaq. Tamatuma kingorna tulliussaaq qinigassanngortittoq qinigaanngitsuni amerlanerpaat tulliinit taaguunneqarsimasoq, taamatullu ingerlalluni tulleriinnilersuineq ingerlanneqassaaq.
  Imm. 2. Sinniisussanik nalunaarsuiffimmi qinigassanngortittut marluk amerlaqatigiinnik taaguunneqarsimappata tulleriinnerat Qinersinermut ataatsimiititaliap makitsineratigut aalajangerneqassaaq.

 

Naammagittaalliorsinnaaneq

 

  § 55.  Qinersinerup ulluani naatsorsuineq tunngavigalugu Qinersinermut ataatsimiititaliap qinersinermit allattaavimmi nalunaassavaa kikkut qinerneqartutut isigineqarnersut qinerneqartullu qinigaanerat pillugu allakkatigut nalunaarfigalugit.
  Imm. 2.  Peqatigitillugu Qinersinermut ataatsimiititaliap qinersinerup ulluani naatsorsuinerup inernera pillugu Inatsisartut ilisimatissavai.

 

  § 56.  Qinersisartup qinigassanngortittulluunniit kinaluunniit qinersinerup atuussinnaassusia naammagittaalliutigisinnaavaa. Naammagittaalliut allakkatigut qinersinermik siulersuisunut attuumassuteqartunut saqqummiunneqassaaq naatsumillu tunngavilersuutitaqassalluni, qinersinerullu ingerlanneqarneranit ullut arfineq-marluk qaangiutsinnagit tunniunneqassalluni. Qinersinermik siulersuisut naammagittaalliuut ingerlaannaq Qinersinermut ataatsimiititaliamut ingerlateqqissavaat qinersinermik siulersuisut oqaaseqaataannik ilallugu.
  Imm. 2.  Qinersinermut ataatsimiititaliap qinersineq pillugu naammagittaalliuutit tiguneqartut ingerlaannaq suliarissavai.
  Imm. 3.  Qinersinermut ataatsimiititaliap naammagittaalliuutaajunnartut pillugit aalajangiinerata kinguninngua Qinersinermut ataatsimiititaliaq qinersineq pillugu naatsorsuusiorallassaaq.
  Imm. 4.  Qinersinerup inerneranik naatsorsuigallarneq tunngavigalugu Qinersinermut ataatsimiititaliap § 8, imm. 2 naapertorlugu qinersinermit allattaavigisimasaa Qinersinermut ataatsimiititaliap Inatsisartunut ilisimatitsissutitut nassiutissavaa. Qinersinermit allattaavimmi §§ 53 aamma 54 naapertorlugit kikkut qinigaanersut kikkullu sinniisussatut qinigaanersut nalunaarsimassapput, kiisalu qinersinermut atatillugu pisut sukumiisumik allaaserineqarsimassallutik.

 

Qinerseqqinneq

 

  § 57.  Qinersinermi annertuumik kukkusoqarsimappat Qinersinermut ataatsimiititaliaq pisinnaatitaavoq qinersineq atorsinnaanngitsutut nalunaarutigissallugu aalajangerlugulu tamakkiisumik ilaannakortumilluunniit qinerseqqittoqassanersoq. Qinerseqqinneq piaarnerpaamik ingerlanneqassaaq. Qinersinermut ataatsimiititaliap aalajangiinera tunngavilersorneqassaaq.
  Imm. 2.  Qinersisinnaasut allattorsimaffii atorneqarsimasut pingaarutilinnik amigaateqarpata Qinersinermut ataatsimiititaliaq peqatigitillugu aalajangiisinnaavoq qinersisinnaasut allattorsimaffiat qinerseqqinnginnermi iluarsineqassasoq. Qinersisinnaasut allattorsimaffiat § 26, imm. 1 naapertorlugu saqqummiunneqassaaq.

 

Qinersinermik siulersuisunut nassiussineq

 

  § 58.  Kingusinnerpaamik qinersinerup aqaguani taasisitsinermik aqutsisup pappiarat taasiviit qilertakkuutaarlugit ukununnga immikkoortillugit poortussavai:
1)  pappiarat taasiviit atorsinnaasut, aamma
2)  pappiarat taasiviit allaffigineqarsimanngitsut atorsinnaanngitsullu allat.
  Imm. 2.  Tamatuma kingorna poortukkat imm. 1-imi, § 45 imm.1-mi aamma § 46, imm. 3-mi taaneqartut qinersisinnaasut allattorsimaffii atorneqarsimasut aammalu qinersinermit allattaavik taasisitsinermik aqutsisumit immersorneqarlunilu atsiorneqarsimasoq ilanngullugit qinersinermik siulersuisunut piaarnerpaamik nassiunneqassapput.

 

Qinersinerup inernera inaarutaasoq

 

  § 59.  Qinersinermik siulersuisut kommunimi taasiartorfissanit tamanit § 45 imm. 1-mi, § 46, imm. 3 aamma § 58-imi naapertorlugit qinersisinnaasut allattorsimaffii, qinersinermit allattaaviit pappiarallu taasiviit aamma atortussat taaneqartut tigoreerunikkit, qinersinermik siulersuisut atortussat qinersinermik siulersuisut qinersinermit allattaavigisimasaata assilinera ilanngullugu Qinersinermut ataatsimiititaliamut nassiutissavaat.
  Imm. 2.  Qinersinermut ataatsimiititaliap qinersinermik siulersuisunit tamanit atortussat tigoreerpagit Qinersinermut ataatsimiititaliaq qinersinerup atuussinnaassusianik inaarutaasumik aalajangiissaaq.
  Imm. 3.  Qinersinermut ataatsimiititaliap qinersinermik siulersuisunut atortussat pigineqartut tiguneqarnissaat piumasarisinnaavaa, taasiartorfinnit ataasiakkaanit atortussat amigaataagaluarpataluunniit.
  Imm. 4.  Qinersinermut ataatsimiititaliap qinersinermik inaarutaasumik naatsorsuinerani Qinersinermut ataatsimiititaliap qinersinermik naatsorsuigallarneranut sanilliullugu qinersineq pillugu paasissutissanik sukumiinerusunik pingaarutilinnik peqarpat, paasissutissat sukumiinerusut pingaarutillit taakku ingerlaannaq ilisimatitsissutitut Inatsisartunut nassiunneqassapput.
  Imm. 5.  Imm. 1 naapertorlugu atortussanik nassiussinerup qanoq pisarnissaa pillugu Naalakkersuisut sukumiinerusunik aalajangersaasinnaapput.

 

Kapitali 11

Ataatsimut aalajangersakkat

 

  § 60.  Naqitertitanut, tamanut nalunaaruteqarnernut pappiaranullu taasivissanut aningaasartuutit kiisalu sumiiffinnut kommunit aggornerisa avataanniittunut tunngasumik immikkut aningaasartuutit Nunatta karsianit akilerneqassapput. Qinersinerup ingerlanneqarneranut atatillugu aningaasartuutit allat kommunimit pineqartumit akilerneqassapput.

 

  § 61.  Kialuunniit qinersisartup kina taasimaneraa pillugu paasissutissanik tunniusseqqusinnaanngilaa.

 

  § 62.  Qinersinermik siulersuisunut ilaasortat imaluunniit allat Inatsisartut inatsisaanni matumani aalajangersakkat malillugit inini pappiarat taasiviit tigooqqarneqarfianniissinnaatitaasut:
1)  taasisitsinerup nalaani qinersisartunik siunnersuissanngillat, ilitsersuissanatik kajumissaarissanatilluunniit partiimik sorlermik qinigassanngortitamilluunniit kimik taaseqqullugit,
2)  allanik ilisimatitsissanngillat qinersisartoq una unalu najuussimanersoq imaluunniit pappiaramik taasivimmik tuneqqusimanersoq tunniussisimanersorluunniit, imaluunniit
3)  allanut nalunaarutiginnissanngillat taasivimmi qinersisartup qinigassanngortitamik partiimilluunniit sorlermik taasisimaneranik paasisimasaminnik.
  Imm. 2.  Qinersisartut aggerlutik taasinerata Inatsisartut inatsisaanni matumani peqqussutigineqartumit allaanerusumik nakkutilliineq inerteqqutaavoq.

 

Kapitali 12

Pinerluttulerinermut inatsisitigut pineqaatissiinerit

 

  § 63.  38, imm. 4-ip, § 42, imm. 4-ip, § 47, imm. 1-ip, § 61-ip aamma § 62-ip unioqqutinneqarneri Kalaallit Nunaannut pinerluttulerinermut inatsimmi maleruagassat malillugit akiliisitsinikkut pineqaatissiinermik malitseqarsinnaavoq.
  Imm. 2.  Peqqussutinik § 35, imm. 9 naapertorlugu aalajangersagaasunik unioqqutitsinermut, Kalaallit Nunaannut pinerluttulerinermut inatsimmi maleruagassat malillugit akiliisitsinikkut pineqaatissiinernik aalajangersaasoqarsinnaavoq.
  Imm. 3.  Inatsisartut inatsisaanni matumani imaluunniit peqqussutini Inatsisartut inatsisaat manna naapertorlugu aalajangersagaasuni akiliisitsinissaq aalajangersarneqarsimappat, Kalaallit Nunaannut pinerluttulerinermut inatsimmi kapitali 5-imi maleruagassat malillugit pisinnaatitaasoq pisussaatitaasorlu akileeqquneqarsinnaavoq.
  Imm. 4.  Imm. 1-3 malillugit suliassat Kalaallit Nunaanni Eqqartuussivimmut siullertut suliarinnittussamut suliakkiissutigineqassapput.
  Imm. 5.  Akiligassiinerit imm. 1-3 malillugit aalajangersarneqartut, Nunap Karsianut tutsinneqassapput.

 

Kapitali 13

Atuutilerneranut, ikaarsaarnermut aamma atorunnaarsitsinermut aalajangersakkat

 

  § 64.  Inatsisartut inatsisaat 1. decembari 2020 atuutilissaaq, Inatsisartunut qinersinermi tulliuttumi atorneqassalluni, taamaattoq takuuk imm. 2.
  Imm. 2.  Inatsisartut inatsisaanni matumani §§ 28-33 atuutilernissaannut piffissaq Naalakkersuisut aalajangersarsinnaavaat. Aalajangersakkat piffissani assigiinngitsuni atuutilernissaat Naalakkersuisut aalajangersarsinnaavaat.
  Imm. 3.  Peqatigisaanik Inatsisartut inatsisaat manna atuutilernerani Kalaallit Nunaanni Inatsisartunut qinersisarneq pillugu Inatsisartut inatsisaat nr. 9, 31. oktober 1996-imeersoq atorunnaarsinneqarpoq, taamaattoq piginnaatitaanernut maannamut Inatsisartut inatsisaat tunngavigalugu pissarsiarineqarsimasunut, Inatsisartunut qinersinissap siulliup tungaanut, Inatsisartut inatsisaanni §§ 5 aamma 6 suli atuuttussaallutik.

 

 

 

Namminersorlutik Oqartussat, ulloq 24. november 2020

 

 

 

Kim Kielsen