Inatsisartut Naalakkersuisullu pillugit Inatsisartut inatsisaat nr. 26, 18. november 2010-meersumi § 23, imm. 1 naapertorlugu, makkua aalajangersarneqarput:

Ataatsimoortunik isumaqatigiissuteqartarnerit tamakkuninngalu nassuiaanerit

  § 1. Aningaasaqarnermut Sulisoqarnermullu Aqutsisoqarfik sulisartut kattuffii isumaqatigiinninniarsinnaatitaasut peqatigalugit ataatsimoorussamik isumaqatigiissutinik isumaqatigiissuteqassapput aammalu akissarsiassatigut isumaqatigiissutit, isumaqatigiissutit, malittarisassat, kaajallaasitat il.il. sulisoqarnermut tunngatillugu immikkoortortaqarfimmi atulersinneqarsimasut pillugit nassuiaassapput.

Aningaasaqarnermut Sulisoqarnermullu Aqutsisoqarfimmi piginnaasat

  § 2. Aningaasaqarnermut Sulisoqarnermullu Aqutsisoqarfimmi, inassuteqareerneratigut aamma immikkoortortaqarfinni pineqartuni aqutsisut siunersiorlugit, tullinnguuttut makku pillugit imatut aalajangiisoqarpoq:

1) akissarsianik aalajangersaanerit, tassunga ilanngullugit akissarsiassat assigiinngissutaat tapillu,

2) akissarsiat inissisimanerat,

3) inunnik ataasiakkaanik atorfinitsitsinissamik isumaqatigiissusiornerit aamma

4) tjenestemandit soraarnerussutisiaat

  Imm. 2. Aningaasaqarnermut Sulisoqarnermullu Aqutsisoqarfimmi atorfinitsitsinernut isumaqatigiissutit suliarineqartarput.

Aqutsisut piginnaasaat

  § 3. Immikkoortortaqarfinni ataasiakkaani aqutsisut § 4 naapertorlugu aalajangiisoqareersimatillugu aamma Aningaasaqarnermut Sulisoqarnermullu Aqutsisoqarfimmit siunnersuisoqareerneratigut imatut aalajangiisarput:

1) atorfinitsitsinerit

2) soraarsitsinerit,

3) naalanngisaanerit pillugit pineqaatissiinerit aamma

4) nussuinerit.

Pinngitsaaliissummik siunnersuisarnerit

  § 4. Aqutsisut § 3, imm. 2-4-t naapertorlugit aalajangiinnginneranni immikkoortortaqarfinni ataasiakkaani aqutsisut Aningaasaqarnermut Sulisoqarnermullu Aqutsisoqarfimmik siunnersueqqaartassapput.

  Imm. 2. Aningaasaqarnermut Sulisoqarnermullu Aqutsisoqarfimmi siunnersuisoqartarpoq aamma suliassani § 3-mut ilaatinneqartunut allakkiassatut, illua´tungerisanik tusarniaassutissatut il.il. missingiutinik suliaqartoqartarpoq.

  Imm. 3. Immikkoortortaqarfimmi aqutsisut § 3 naapertorlugu aalajangeereeraangatta aalajangernerup assilineqarnera aalajangernermiit kingusinnerpaamik ullut marluk qaangiuppata Aningaasaqarnermut Sulisoqarnermullu Aqutsisoqarfimmut nassiunneqartassaaq.

  Imm. 4. Suliassani ataasiakkaani ilaanneeriarluni § 2 aamma 3 naapertorlugit suliakkiisarnerit pisinnaatitaanerillu pillugit Aningaasaqarnermut Sulisoqarnermullu Aqutsisoqarfimmiut immikkoortortaqarfinnik ataasiakkaanik isumaqatigiissuteqartarsinnaapput.

Naalakkersuisoqarfimmi pisortamut nalunaarutit

  § 5. Immikkoortortaqarfimmi aqutsisoq imatut iliorpat Aningaasaqarnermut Sulisoqarnermullu Aqutsisoqarfimmit Naalakkersuisoqarfimmi pineqartumi pisortamut nalunaaruteqartoqartassaaq:

1) Aningaasaqarnermut Sulisoqarnermullu Aqutsisoqarfik peqataatinnagu § 2, imm. 1, nr. 1-3-t malillugit aalajangiisoqarpat,

2) Aningaasaqarnermut Sulisoqarnermullu Aqutsisoqarfimmiut siunersioqqaarnagit § 3, nr. 2-4-nut ilaatinneqartut pillugit aalajangiisoqarpat imaluunniit

3) Aningaasaqarnermut Sulisoqarnermullu Aqutsisoqarfimmit siunnersuinerit sumiginnarneqarsimappata aamma immikkoortortaqarfinni ataasiakkaani sulisut oqaloqatigereerlugit aalajangerneq kukkuneqarujussuarsimasoq amigaateqartorluunniit Aningaasaqarnermut Sulisoqarnermullu Aqutsisoqarfimmit nalilerneqarpat.

  Imm. 2. Aalajangiineq pineqartoq Naalakkersuisoqarfimmi pisortamit aalajangiineruppat Aningaasaqarnermut Sulisoqarnermullu Aqutsisoqarfimmit Naalakkersuisut Siulittaasuata Naalakkersuisoqarfiani aamma Aningaasaqarnermut Naalakkersuisoqarfimmi pisortanut nalunaaruteqartoqartoqassaaq.

Isumaqatigiissutinik aaqqiiniarnerit

  § 6. Aningaasaqarnermut Sulisoqarnermullu Aqutsisoqarfiup immikkoortortallu pineqartup akornanni § 2, imm. 1-3 naapertorlugit aalajangiiniarnermi isumaqatigiinngitsoqartillugu suliaq Aningaasaqarnermut Sulisoqarnermullu Aqutsisoqarfimmit imaluunniit immikkoortortaqarfimmit Naalakkersuisut Siulittaasuata Naalakkersuisoqarfiani aamma Aningaasaqarnermut Naalakkersuisoqarfimmi pisortanut saqqummiunneqarsinnaavoq.

Immikkoortortaqarfinnut ilisimatitsissutit

  § 7. Naalakkersuisoqarfiit kaajallaasitaq manna pillugu aamma Kalaallit Nunaanni Namminersorlutik Oqartussanut tamanut atuunnera pillugu aqutsisoqarfinnut immikkoortortaqarfinnullu allanut ilisimatitsinissamik akisussaaffeqarput.

Atuutilerfia atorunnaarsitsinerlu

  § 8.  Kaajallaasitaq manna 8. april 2020-mi atuutilissaaq.

  Imm. 2. Tamanna ilutigalugu Namminersorlutik Oqartussat sulisoqarnermut allaffeqarfiani akisussaaffiit piginnaasallu pillugit kaajallaasitaq aamma Aningaasaqarnermut Sulisoqarnermullu Aqutsisoqarfimmi sulisut pillugit siunnersuisartuutitat atorunnaarsinneqarput.

Naalakkersuisut Siulittaasuata Naalakkersuisoqarfia, ulloq 7. april 2020

Kim Kielsen (atsior.)

/

Hans-Peder Barlach Christensen (atsior.)