Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaat nr. 26, 28. november 2016-imeersumi Inatsisartut inatsisaanni nr. 24, 28. november 2018-imeersumi allanngortinneqartumi § 46a, imm. 1, nr. 1 aamma 2 naapertorlugit aalajangersarneqarput:

Kapitali 1
Aaqqissuussaanera aamma inatsisitigut inissisimaneq

 § 1.  Kommunit aamma Namminersorlutik Oqartussat, aningaasaqarnermut aamma sulisoqarnermut allaffissornermut tunngasut pillugit Namminersorlutik Oqartussanut aamma kommuninut ataatsimoorussamik IT atorlugu periaatsimik pissarsinissamut, ingerlatsinissamut, allanngutsaaliuinissamut aamma ineriartortitsinissamik qulakkeerinninnissamut, immikkoortortamik pilersitsissapput.

 § 2.  Immikkoortortaq Namminersorlutik Oqartussat ataanni ingerlatsiviuvoq.

  Imm. 2.  Aningaasaqarnermut Naalakkersuisoq immikkoortortap siulersuisuinit, takuuk § 3, inassuteqaat tunngavigalugu immikkoortortap atissaa pillugu aalajangiissaaq.

Kapitali 2
Aqutsisut aamma siulersuisut

 § 3. Immikkoortortaq pisortani ataatsimoorussap aaqqissuussaanerani siulersuisut aqutsisuupput, pingaarnertigut aqutsineq isumagisarissallugu aammalu immikkoortortami suliaqarfinni suliassaqarfiit, aningaasaqarneq aamma ingerlatsivimmi aqutsineq pillugit apeqqutini pingaaruteqartuni tamani aalajangiisassallutik.

 § 4. Siulersuisut 7-inik ilaasortaqarput suliaqarfinni periaatsini, immikkoortortami taperserneqartussani, ilisimasaqartunik paasisimasaqartunillu. Naalakkersuisut siulersuisuni ilaasortanik marlunnik, tassungalu ilanngullugu siulersuisut siulittaasussaannik toqqaassapput. Kommunit tamarmik immikkut siulersuisuni ilaasortamik ataatsimik toqqaassapput.
  Imm. 2.  Siulersuisuni ilaasortat ukiunut marlunnut toqqarneqassapput aammalu toqqarneqaqqissinnaallutik.
  Imm. 3.  Siulersuisuni ilaasortat aningaasarsiaqartinneqanngillat imaluunniit suliassamik isumaginninnerminnut allatut akissarsiaqartinneqassanatik.

 § 5.  Siulersuisut nammineerlutik suleriaasissartik aalajangersassavaat.

Qullersaqarfik aamma sulisut

 § 6.  Immikkoortortaq pisortani ataatsimoorussap aaqqissuussaanerani ulluinnarni aqutsineq pisortamit isumagineqarpoq. Pisortaq siulersuisunit atorfinitsinneqassaaq soraarsinneqassallunilu, taamaattoq takuuk § 16, imm. 2. Atorfeqarfigineqartoq tassaavoq immikkoortortaq.
  Imm. 2.  Pisortaq Namminersorlutik Oqartussat qitiusumi allaffeqarfiata ataani sulisoqarnermut allaffissornikkut aqutsinermut aningaasarsianut isumaqatigiissutit killissaliussallu atuuttut tunngavigalugit atorfinitsinneqassaaq soraarsinneqassallunilu.
Imm. 3.  Qullersaqarfiup akisussaaffii suliassaalu pillugit aalajangersakkat erseqqinnerusut siulersuisunit aalajangersarneqassapput.

  § 7.  Pisortaq immikkoortortami sulisunik atorfinitsitsisassaaq soraarsitsisassallunilu, taamaattoq takuuk § 16, imm. 2.
  Imm. 2.  Sulisut Namminersorlutik Oqartussat qitiusumi allaffeqarfiata ataani sulisoqarnermut allaffissornikkut aqutsinermut aningaasarsianut isumaqatigiissutit killissaliussallu atuuttut tunngavigalugit atorfinitsinneqassapput soraarsinneqassallutillu.

  § 8.  Tjenestemandinik atorfinitsitsinermi soraarsitsinermilu siulersuisut imaluunniit pisortaq tamanna pillugu Naalakkersuisunut inassuteqassapput.

Kapitali 3
Suliassat aamma aningaasalersorneqarnera

 § 9.  Immikkoortortaq pisortat periaasiannik ataatsimoorussamik Enterprise Resource Planning (ERP), aningaasarsialeriffimmik aamma angalanermi akiligassanut periaatsimik pissarsissaaq, ingerlatsissaaq, aserfallatsaaliuissaaq aammalu ineriartortitsinermik qulakkeerinnissalluni. Siulersuisunit inassuteqaateqarneq malillugu aammalu kommunit tusarniarneqareerneranni, IT atorlugu periaatsit allat suut aningaasaqarnikkut sulisoqarnikkullu allaffissornermut tunngasut pillugit IT atorlugu periaatsitut ataatsimoorussatut isigineqassanersut, Naalakkersuisut aalajangersinnaavaat.
  Imm. 2.  Namminersorlutik Oqartussat aamma kommunit IT atorlugu periaaseq, IT atorlugu periaatsitut ataatsimoorussatut isigineqartoq, atussavaat.

  § 10. Immikkoortortaq ukiumoortumik aningaasaliissutit aningaasanut inatsimmi immikkoortinneqartut iluanni suliaqarnerminik ingerlatsissaaq.

  Imm. 2.  Ukiumut aningaasaliiffiusumut pisussamut missingersuutit, ukiumoortumik ataatsimoortumik tapiissutinut isumaqatigiissuteqarnerup peqatigisaanik, isumaqatigiissutigineqassapput. Kommunit akiligassaat, takuuk § 11, imm. 1, aningaasaliissutinut imm. 1-imi taaneqartunut aningaasanut inatsimmi immikkoortortamut immikkoortinneqartunut, nuunneqassapput.

  § 11.  Immikkoortortap IT atorlugu periaatsinik ataatsimoorussanik pissarsineranut, ingerlatsineranut, aserfallatsaaliuineranut aamma ineriartortitsineranut aningaasartuutai kommuninut 50 procentimik aammalu Namminersorlutik Oqartussanut 50 procentimik agguarneqassapput.

  Imm. 2.  Kommunit akiligassaat innuttaasut amerlassusaat 1. januar ukiup aningaasaqarfiusup siornani naatsorsorneqartut malillugu agguarneqassapput.

Kapitali 4
Missingersuutit, naatsorsuutit aamma kukkunersiuineq

  § 12.  Immikkoortortap ukioq naatsorsuusiorfia tassaavoq ukioq aningaasaliiffiusoq.

  § 13.  Immikkoortortaq, ukiup aningaasaliiffiusup tullianut aamma ukiunut missingersuusiorfiusunut pingasunut ingerlatsinermut sanaartornermullu missingersuutinut siunnersuummik, ukiut tamaasa Naalakkersuisunut aamma kommuninut tunniussisassaaq.
  Imm. 2. Ingerlatsinermut sanaartornermullu missingersuutinut siunnersuut, pissarsinermut, ineriartortitsinermut, aserfallatsaaliuinermut ingerlatsinermullu suliassat nassuiarneqarnerannik kiisalu sunniuteqarluarnerulersitsinermi iluanaarutaasussatut missingersuinernik imaqassaaq.
  Imm. 3.  Naalakkersuisut ingerlatsinermut sanaartornermullu missingersuutinut siunnersuutip tunniunneqarnissaanut piffissamut killissaliussamik aalajangersaasinnaapput.

  § 14.  Immikkoortortaq, Namminersorlutik Oqartussat qitiusumi allaffeqarfiata ataani suliffiup iluani allaffissornermik aqutsinermut, naatsorsuutini allattuinermut aamma aningaasaqarnerup aqunneqarneranut maleruagassani malittarisassanilu sukkulluunniit atuuttuni, pineqartunut ilaavoq.
  Imm. 2.  Suliffiup iluani allaffissornermik aqutsineq, naatsorsuutini allattuineq aamma aningaasaqarnermik aqutsineq, immikkoortortaq sinnerlugu Naalakkersuisut isumagisaraat. Tamatumunnga aningaasartuutissat Naalakkersuisunit aalajangersarneqassapput aammalu § 11, imm. 1-imut aamma 2-mut naapertuuttumik agguarneqassallutik.

  § 15.  Immikkoortortaq, ukiup naatsorsuusiorfiusup siuliani suliaqarnini pillugu Naalakkersuisunut aamma kommuninut allaganngorlugu nassuiaammik ukiut tamaasa suliaqartassaaq. Nassuiaat nunap karsiata naatsorsuutaasa kukkunersiorneqarneranni ilaatinneqarsinnaanngorlugu, ilusilerlugu tunniunneqassaaq.

Kapitali 5
Atuutilernera aamma ikaarsaarnermut aalajangersakkat

 § 16. Nalunaarut ulloq 1. august 2019 atuutilerpoq.

  Imm. 2.  Nalunaarutip atuutilernerani sulisut, ilanngullugit ulluinnarni aqutsisut, Enterprise Resource Planning systemimi suliassanik suliaqarnissamut atorfinitsinneqarsimasut, atorfimmut nalunaarutip atuutilernissaata tungaanut atorfigisimasaminnut naapertuuttumut maannamut pisartutut aningaasarsianut atorfininnermullu atugassarititaasut assingi atuutsillugit, immikkoortortamut nuutinneqassapput.

Namminersorlutik Oqartussat, ulloq 24. juli  2019

Vittus Qujaukitsoq

/

Nikolai S. Christensen