Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat
Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni nr. 11, 12. november 2001-imeersumi § 1, imm. 2 kiisalu Meeqqat tapersersorneqarnissaannut Inatsisartut inatsisaanni nr. 20, 26. juni 2017-imeersumi § 8, imm. 6, § 11, imm. 5 aamma § 37, imm. 7 malillugit aalajangersarneqarput:
Kapitali 1
Kommunalbestyrelsip ingerlatsineranik pingaarnertut nakkutilliineq
§ 1. Naalakkersuisut qitiusumik nakkutilliinermik ingerlatsivia (Nakkutilliinermik ingerlatsivik) kommunalbestyrelsip ingerlatsineranik aamma inunnik isumaginninnermut inatsisinik aqutsineranik, matumani aamma meeqqat tapersersorneqarnissaannut Inatsisartut inatsisaannik kiisalu meeqqanut isumaginninnermilu suliassaqarfiup iluanni pisortat ingerlatsineranni suliat suliarineqartarnerat pillugu inatsimmi aamma pisortat ingerlatsinerat pillugu inatsimmi malittarisassanik pingaarnertut nakkutilliisuussaaq.
Imm. 2. Nakkutilliinermi kommunit aqutsinerat aamma kommunit iluanni paaqqinniffiit pineqarput.
§ 2. Pingaarnertut nakkutilliinermi § 1 malillugu uku pineqassapput:
1) § 3 malillugu inatsisit,
2) § 4 malillugu aningaasaqarneq, aamma
3) § 3 malillugu isumaginninnermi suliassat suliarineqarnerisa pitsaassusiat.
Imm. 2. Pingaarnertut nakkutilliinerup imarissavai:
1) suliassanik assigiinngiiaartunik misissuineq,
2) inunnik ilisimaarinnittunik oqaloqateqarnerit, aamma
3) ingerlatsiviup aaqqissuussaaneranik misissuineq.
§ 3. Inatsisinik isumaginninnermilu suliassanik nakkutilliinermi, § 2, imm. 1, nr. 1 aamma 3 malillugit naliliiffigineqassapput ingerlatsiviup:
1) maleruagassanik allassimasunik periaasiulersimasunillu malinninnera,
2) nassuiaasarnera missiliuisarneralu,
3) suliamut paasissutissiinera, suliamik suliarinninnera naammagittaalliuutinillu suliaqarnera,
4) piginnaasatigut tutsuiginassutsikkullu ajornartorsiutinik suliarineqarnera, aamma
5) imminut nakkutilliivigisarnera aamma aqutsinikkut nakkutilliinera.
§ 4. Aningaasaqarnermik nakkutilliineq § 2, imm. 1, nr. 2 malillugu nalilerneqassaaq, kommunip isumaginninnermi suliassaqarfimmi aningaasaqarnermik ingerlatsinera isumannaatsuunersoq, inatsisinillu tunngavilersorneqarnersoq.
§ 5. Nakkutilliinermik ingerlatsivik § 1 malillugu kommunini ataasiakkaani minnerpaamik ukiumut ataasiarluni pingaarnertut nakkutilliinermik ingerlatsisassaaq.
Imm. 2. Nakkutilliinermik ingerlatsiviup nakkutilliinerminut atatillugu ukiut sisamakkaarlugit kommuninut qinigaaffiup iluani illoqarfiit tamarmiusut nakkutilliiartorfigisimassavai.
Imm. 3. Nakkutilliinermik ingerlatsiviup nakkutilliinerminut atatillugu imm. 2-mi piffissap pineqartup iluani nammineq naliliinini malillugu nunaqarfiit assigiinngitsut nakkutilliiartorfigisimassavai.
§ 6. Pingaarnertut nakkutilliineq § 1 malillugu sapaatit akunneri 2 sioqqullugit kommunalbestyrelsimut kalerriutigineqassaaq.
Nakkutilliinermit nalunaarusiaq
§ 7. Nakkutilliinermik ingerlatsivik § 1 malillugu pingaarnertut nakkutilliinerit tamaasa kingorna nalunaarusiamik suliaqartassaaq.
Imm. 2. Nakkutilliinermit nalunaarusiaq minnerpaamik §§ 3-mi aamma 4-mi pissutsit tulleriiaarneqarsimasut misissuiffigineqarnerannik aamma isummerfigineqarnerannik imaqassaaq.
§ 8. § 7 malillugu nakkutilliinermit nalunaarusiaq inaarutaasumik suliarineqannginnerani kommunalbestyrelsimullu nassiutinnginnerani nakkutilliinermit nalunaarusiaq minnerpaamik ulluni 14-ini kommunalbestyrelsimut tusarniaassutigineqassaaq.
Imm. 2. Nakkutilliinermit nalunaarusiaq kingusinnerpaamik ullormi nakkutilliiffiusimasumit qaammatit 3-t qaangiutinnginneranni naammassillugu suliarineqareersimassaaq.
Imm. 3. Nakkutilliinermit nalunaarusiaq Naalakkersuisut nittartagaanni tamanut saqqummiunneqassaaq.
Imm. 4. Nakkutilliinermit inaarutaasumik nalunaarusiaq kommunalbestyrelsimut nassiunneqareernerata kingorna qaammatit 2-t ingerlareerpata, kommunalbestyrelse Nakkutilliinermik ingerlatsivimmut allakkatigut nassuiaammik nassiussissaaq, tassanilu kommunalbestyrelsip nakkutilliinermit nalunaarusiami pissutsit assuarineqartut qanoq iliuuseqarfigalugit aaqqiiviginiarnerai allassimassapput.
Kapitali 2
Kommunini meeqqanik nalinginnaasumik inummut sammititamik nakkutilliineq
§ 9. Kommunalbestyrelse meeqqat kommunimi atugaannik ingerlaavartumik nakkutilliinissaminut pisussaaffeqarpoq. Meeraq imaluunniit meeqqat eqimattat 18-it inorlugit ukiullit immikkut ikiorserneqarnissaminnik pisariaqartitsisinnaasut, kommunalbestyrelsimit ilisimaneqalernissaat anguniarlugu, kommunalbestyrelse sapinngisamik siusissukkut nakkutiginnittassaaq.
Imm. 2. Kommunalbestyrelse imm. 1 malillugu nakkutilliineq naammassiniarlugu kommunip nunaqarfiinut tamarmiusunut ukiut tamaasa nakkutilliiartorluni tikeraartassaaq.
Kapitali 3
Meeqqanik angerlarsimaffiup avataanut inissinneqarsimasunik inummut sammititamik nakkutilliineq
§ 10. Kommunalbestyrelse inissiisoq meeqqap inissinneqarsimasup inissinneqarfiani ukiumut marloriarluni inummut sammititamik nakkutilliisassaaq.
Imm. 2. Meeraq kommunimut allamut inissinneqarsimappat, kommunalbestyrelse inissiisuusoq kommunimilu inissiiffiusumi kommunalbestyrelse isumaqatigiissusiorsinnaapput, kommunalbestyrelse inissiisoq sinnerlugu taanna nakkutilliinermik ingerlatsisassaaq.
Imm. 3. Imm. 2 malillugu nakkutilliinermik ingerlatsinissaq pillugu isumaqatigiissusiortoqarsimappat, kommunalbestyrelsimit inissiisumit suli akisussaaffigineqarpoq, nalunaarummi uani aalajangersakkat malillugit nakkutilliineq ingerlanneqassasoq.
§ 11. § 10 malillugu inummut sammititamik ingerlaavartumik nakkutilliinikkut qulakkeerneqassapput, meeqqamut tunngatillugu iliuusissanut pilersaarutip inissiiviusumi malinneqarnissaa aamma meeqqap pisariaqartitai eqqarsaatigalugit ikiorsiinerup naammattuunissaa siunertamullu naapertuuttuunissaa, taakkununnga ilanngullugit:
1) meeqqap inissinneqarfigisamini sumiginnarneqannginnissaa imaluunniit innarlerneqannginnissaa,
2) meeraq taassumalu angajoqqaavi pisinnaatitaaffimminnik ilisimatinneqarnissaat, aamma
3) naammagittaalliuutaasinnaasut, meeqqap akuuffigisaasa inerneri meeqqamut, angajoqqaatut oqartussaasunut kiisalu meeqqap sullissisuanut tunniunneqarnissaat.
Imm. 2. Meeqqat tapersersorneqarnissaannut Inatsisartut inatsisaanni § 30, imm. 2, nr. 2 malillugu meeraq ulloq unnuarlu paaqqinniffimmut inissinneqarsimappat, nakkutilliinerup aamma qulakkiissavai:
1) iliuusissanut pilersaarummi siunertarineqartoq anguniagaasorlu ulloq unnuarlu paaqqinniffiup katsorsaanissamik pilersaarutaani naammassineqassasut,
2) meeqqap inissinneqarsimasup pisariaqartitai ulloq unnuarlu paaqqinniffiup perorsaariaasiatigut ikorfartorneqassasut,
3) ulloq unnuarlu paaqqinniffik killiffimmik nalunaarusiornermigut aamma katsorsaanissamik pilersaarumminik nutarterisarnermigut ingerlaavartumik nalunaaruteqartassasoq, aamma
4) pissaanermik atuisimanerit malitseqartinneqartassasut pissaanermillu atuisimaneq pillugu nalunaarutit tunngavigalugit meeraq ulloq unnuarlu paaqqinniffimmi eqqortumik ikorfartorneqarnersoq naliliiffigineqartassasoq.
§ 12. § 10 malillugu inummut sammititamik nakkutilliinermut atatillugu meeraq kommunalbestyrelsimit oqaloqatigineqartassaaq.
Imm. 2. Meeqqamik oqaloqateqarneq inunnit inissiivimmeersunit najuuffigineqanngitsumik ajornanngippat ingerlanneqassaaq, apeqqutaatinnagu meeraq ilaqutariinni paarsisartuni imaluunniit ulloq unnuarlu paaqqinniffimmi inissinneqarsimanersoq.
Imm. 3. Meeraq oqaloqateqarnermini allanit ikiorserneqarnissaminik pisinnaatitaaffeqarpoq. Kommunalbestyrelsip meeraq tamanna pillugu paasitissavaa. Meeraq pisinnaatitaaffeqarpoq nammineq aalajangiisinnaatitaanini malillugu uku ilagisinnaallugit:
1) meeqqat illersuisuat isumaginninnermi suliatigut ilisimasalik, imaluunniit
2) inuk alla oqaloqateqarnermi ilagisinnaavaa.
Imm. 4. Imm. 3, nr. 2 malillugu meeraq oqaloqateqarnissamut inummik ilaqarniarpat, meeqqallu mianerineqarnissaanut tamanna naapertuutinngitsoq nalilerneqarpat, inuk pineqartoq kommunalbestyrelsimit oqarfigineqarsinnaavoq oqaloqateqarnissamut peqataasinnaanngitsoq. Kommunalbestyrelse aalajangiippat inuk pineqartoq oqaloqateqarnissamut peqataasinnaanngitsoq, oqaloqatigiinnissaq aallartitsinnagu meeqqat illersuisuat isumaginninnermik ilisimasalik kommunalbestyrelsimit aggersarneqassaaq. Aalajangiineq meeraq pillugu iliuusissanut pilersaarummi allaganngorlugu kommunalbestyrelsimit tunngavilersorneqassaaq.
Imm. 5. Meeqqap pisinnaaneqassusaa annikilleriarsimappat, oqaloqatigineqarnerminilu ikiorneqarnissamik pisariaqartitsippat, tamanna kommunalbestyrelsimit immikkut eqqarsaatigineqassaaq meeqqap isumaata tusarneqarnissaa qulakkeerniarlugu aamma tassunga atatillugu periutsinik aamma ikiorsiissutsinik immikkut ittunik atuisinnaavoq.
Imm. 6. Meeqqamik oqaloqateqarnissaq immikkut pissuteqarluni pinngitsoortinneqarsinnaavoq, matumani meeqqap inerissimassusaa pissutaappat imaluunniit meeqqap mianerineqarnissaa pissutigalugu oqaloqateqarnissaq naapertuutinngippat. Oqaloqateqarnissap pinngitsoortinneqarnera meeraq pillugu iliuusissanut pilersaarummi allaganngorlugu tunngavilersorneqassaaq.
§ 13. § 10 malillugu kommunalbestyrelse inummut sammititamik nakkutilliinerminut atatillugu piffimmi inissiiffiusumi pissutsinik ernumanartunik maluginiagaqarpat, oqartussaqarfimmut ingerlatsinerup tunngasutigut nakkutilliinissamik suliaqarnissaminut akisussaatitaasumut kiisalu kommunalbestyrelsinut inissiisuusimasunut kommunalbestyrelse nalunaaruteqassaaq, meeraq imaluunniit meeqqat piffimmi inissiiffiusumiittut pissutsinik ernumanartunik sunnerneqarsinnaappata.
§ 14. Kommunalbestyrelsip meeraq ingerlaannartumik peersissavaa, meeqqap atugarissaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit:
1) meeqqamik amigartumik isumassuineq isumaginninnerluunniit,
2) timikkut tarnikkulluunniit persuttaaneq, paarsinerlunneq imaluunniit kinguaassiuutitigut atornerluineq,
3) meeqqami imaluunniit meeqqap qanigisaani atornerluinermik ajornartorsiutit, pinerluttutut pissuseqarneq imaluunniit allatigut inuuniarnikkut annertuunik ajornartorsiuteqarneq, imaluunniit
4) meeqqap allatigut pissusilersornerani naleqqussarniarneraniluunniit ajornartorsiutit.
Kapitali 4
Ilaqutariinnik paarsisartunik ingerlatsinerup tungaatigut nakkutilliineq
§ 15. Kommunalbestyrelsip ilaqutariinnut paarsisartunut akuersissummik tunniussaqartup ilaqutariit paarsisartut ukiumut ataasiarluni aamma pisariaqartitsineq malillugu ingerlatsinerup tungaatigut nakkutilliiffigisassavai. Nakkutilliinikkut qulakkeerneqassaaq ilaqutariit paarsisartut paarsisuunissamut aamma ilaqutariinnut paarsisartunut akuersissutini tunniunneqartuni piumasaqaatinik suli naammassinnissinnaanersut.
Imm. 2. Ilaqutariinnut paarsisartunut akuersissut piumasaqaatitaqartumik tunniunneqarsimappat piumasaqaatit eqqortinneqarnersut kommunalbestyrelsip nakkutilliinermini misissussavaa.
Imm. 3. Kommunalbestyrelsip ingerlatsinerup tungaatigut nakkutilliinermini ilaqutariinni paarsisartuni pissutsit misissorlugillu ilaqutariit paarsisartut oqaloqatigissavai.
Imm. 4. Kommunalbestyrelsip ingerlatsinerup tungaatigut nakkutilliinermini:
1) ilaqutariit paarsisartut nalunaaqqaarluni nakkutilliiartorfigisassavai,
2) ilaqutariit paarsisartut paasissutissanik piniarfigisassavai, aamma
3) meeqqat ilaqutariinni paarsisartuni inissinneqarsimasut paasissutissanik piniarfigisassavai.
Imm. 5. Kommunalbestyrelsip imm. 4, nr. 1 malillugu nalunaaqqaarluni nakkutilliiartortarnermi saniatigut ilaqutariit paarsisartut nalunaarfigeqqaarnagit aamma nakkutilliiartorfigisinnaavai.
§ 16. § 15 malillugu ingerlatsinerup tungaatigut nakkutilliineq ilaqutariinnik paarsisartunik paarsinermilu suliassamik qanoq ingerlatsisarnermik assigiiaartumik, aaqqissuussaasumik tunngavilersorluakkamillu nalilersuinissamut tunngavissiisumik ingerlanneqassaaq.
Imm. 2. Nakkutilliineq inunnit suliap ataqatigiinnissaanik paasinnissinnaasunit taamalu ilaqutariit paarsisartut unammillernartoqartitaannik ingerlariaqqinnissamullu periarfissaannik nalunaaruteqarsinnaasunit ingerlanneqassaaq.
Imm. 3. Kommunalbestyrelsip nakkutilliinermut atatillugu qulakkiissavaa, siusinnerusukkut nakkutilliinermit nalunaarusiaasimasuni oqaaseqaatit, kaammattuutigisimasat peqqussutillu aaqqissuussaasumik malitseqartinneqartarnissaat.
§ 17. Ilaqutariit paarsisartut kommunalbestyrelsimit § 15 malillugu nakkutilliisuusumit qinnuigineqarunik paasissutissat kommunalbestyrelsip ingerlatsinerup tungaatigut nakkutilliinermini pisariaqartitai tunniutissavaat.
Imm. 2. Ilaqutariit paarsisartut paasissutissanik kommunalbestyrelsimut tunniussisinnaapput ingerlatitseqqinneq pillugu angajoqqaatut oqartussaassuseqartut akuersiteqqaanngikkaluarlugit pisinnaavoq, ingerlatitseqqinneq nakkutilliinissamut pisariaqartuusorineqarpat.
§ 18. § 15 malillugu kommunalbestyrelse ingerlatsinerup tungaatigut nakkutilliinerminut atatillugu ilaqutariit paarsisartuni pissutsinik ernumanartunik maluginiagaqarpat, kommunalbestyrelsimut inissiisuusimasumut kommunalbestyrelse nalunaaruteqassaaq, meeraq pissutsinik ernumanartunik sunnerneqarsinnaappat.
§ 19. Kommunalbestyrelsip meeraq erngerluni peersissavaa, meeqqap atugarissaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit:
1) meeqqamik amigartumik isumassuineq isumaginninnerluunniit,
2) timikkut tarnikkulluunniit persuttaaneq, paarsinerlunneq imaluunniit kinguaassiuutitigut atornerluineq,
3) meeqqami imaluunniit meeqqap qanigisaani atornerluinermik ajornartorsiutit, pinerluttutut pissuseqarneq imaluunniit allatigut inuuniarnikkut annertuunik ajornartorsiuteqarneq, imaluunniit
4) meeqqap allatigut pissusilersornerani naleqqussarniarneraniluunniit ajornartorsiutit.
Imm. 2. Kommunalbestyrelsip imm. 1 malillugu meeqqamik paarsisunit peersitsinerminut atatillugu nammineerluni isummerfigissavaa inoqutigiinni meeqqat allat arlaatigut iliuuseqarfigineqassanersut, tassa meeqqat pineqartut ingerlaannartumik peersinneqassanersut imaluunniit ilaqutariinni paarsisartuni najugaqartinneqaannassanersut.
Imm. 3. Kommunalbestyrelsip ingerlatsinerup tungaatigut nakkutilliisuusup aamma utaqqiisaa kommunalbestyrelse inissiisuusoq sinnerlugu meeqqamik peersitsisup kommunalbestyrelse inissiisuusimasoq ingerlaannaq nalunaarfigissavaa. Matuma kingorna kommunalbestyrelse inissiisuusimasoq imm. 1 malillugu inaarutaasumik aalajangiissaaq.
§ 20. § 15 malillugu kommunalbestyrelsip pasitsaappagu ilaqutariit paarsisartut inoqutigiinniluunniit allat aanngajaarniutinik inerteqqutaasunik atuisuusut kommunalbestyrelse tuaviornerpaamik ingerlatsinerup tungaatigut nakkutilliiartussaaq.
§ 21. § 15 malillugu ingerlatsinerup tungaatigut nakkutilliinermut atatillugu kommunalbestyrelse aanngajaarniutinik inerteqqutaasunik atuisoqarneranik pasitsaassaqaruni inoqutigiinni ataaseq arlallilluunniit aanngajaarniutinik atuisuunersut paasiniarlugu misissorneqarnissaannik qinnuigisinnaavai.
Imm. 2. Imm. 1 malillugu aanngaajaarniutinik atuisuunermik misissuisoqartinnagu, inuk aanngaajaarniutinik atuisuunermut misissuiffigineqartussaq kommunalbestyrelsimit allaganngorlugu akuersisinneqassaaq. Akuersissuteqarneq pinngitsaaliissutaassanngilaq erseqqissuussallunilu.
Imm. 3. Imm. 2 malillugu inuup inoqutigiinniittup aanngajaarniutinik atuisuunermik misissorneqarnissani akuersaarumanngippagu, § 23 malillugu kommunalbestyrelse nakkutilliinermik sakkortunerusumik ingerlatsisinnaavoq, imaluunniit Ilaqutariit paarsisartut pillugit Namminersorlutik Oqartussat nalunaarutaanni § 9 malillugu ilaqutariinnut paarsisartunut akuersissut atorunnaarsillugu.
Imm. 4. § 15 malillugu ingerlatsinerup tungaatigut nakkutilliinermut atatillugu imaluunniit allatigut pasitsaassisoqarpat, ilaqutariit paarsisartut ilaat imaluunniit inoqutigiinni alla aanngaajaarniutinik inerteqqusaasunik atuisuusoq, kommunalbestyrelse ilaqutaannik paarsisartunik ingerlatsinerup tungaatigut nakkutilliisuusoq § 15 malillugu ingerlaannaq kommunalbestyrelsimut inissiisuusimasumut nalunaaruteqassaaq. Matuma kingorna § 10 malillugu kommunalbestyrelse inissiisuusimasoq pissutissaqanngitsumik kinguarsaanani inummut sammititamik nakkutilliinermik ingerlatsinissaminut pisussaaffeqarpoq.
§ 22. Kommunalbestyrelse ilaqutariit peqqissussaannik naliliinerminut atatillugu, Ilaqutariit paarsisartut pillugit Namminersorlutik Oqartussat nalunaarutaat § 5, imm. 2, nr. 10 malillugu, inoqutigiinni inuk ataaseq imaluunniit amerlanerusut qinnuigisinnaavai peqqissutsimut uppernarsaammik tunniusseqqullugit. Peqqissutsimut uppernarsaat qaammatit 3 sinnerlugit pisoqaassuseqassanngilaq.
Annertusisamik nakkutilliineq
§ 23. Kommunalbestyrelse annertusisamik nakkutilliisoqarnissaanik aalajangiisinnaavoq kommunalbestyrelsimit nalilerneqarpat, immikkut nassuiakkamik annertusisamik nakkutilliisoqarnissaa pisariaqartinneqartoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli nakkutilliineq ataaseq sivisunerpaamik qaammatinik 3-mik sivisussuseqartassaaq.
Imm. 2. Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.
Imm. 3. Annertusisamik nakkutilliinissamut tunngaviusinnaapput:
1) nakkutilliinermit nalunaarusiaq ataaseq inerniliippat ilaqutariit paarsisartut ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq,
2) ilaqutariit paarsisartut pillugit naammagittaalliutigineqarpata,
3) kommunalbestyrelse nalinginnaasumik immikkulluunniit ittumik ilaqutariinni paarsisartuni pissutsinik ernumanarsinnaasunik meeqqamut paaqqutarineqartumut tunngatillugu imaluunniit meeqqamut pineqartumut eqquisunik maluginiagaqarpat, imaluunniit
4) ilaqutariinni paarsisartuni pissutsit piviusut paaqqutaqarnissamut akuersissut imaluunniit ilaqutariittut paaqqutaqarnissamut akuersissut malillugit ilaqutariittut paarsisuusinnaanermut piumasaqaatinik naammassinninnissamut qulartitsisut.
Imm. 4. Annertusisamik nakkutilliisoqarnissaanik taamaallaat aalajangiisoqarsinnaavoq pissutsit annertusisamik nakkutilliinissamik eqqarsaateqarnermut tunngaviusut pillugit ilaqutariit paarsisartut oqaloqatigineqareernerisigut. Pissutsilli immikkut ittut pisariaqartilerpassuk annertusisamik nakkutilliisoqarnissaa ingerlaannartumik aalajangerneqarsinnaavoq.
Imm. 5. Annertusisamik nakkutilliisoqarnissaanik taamaallaat aalajangiisoqarsinnaavoq ilaqutariit paarsisartut pissutsinik aalajangiinermut tunngaviusunik aaqqiisinnaanerat aaqqeerusunnerallu ilimanaateqarsorineqarpat. Ilaqutariit paarsisartut pissutsinik ernumanartunik aaqqiisinnaanerat aaqqeerusunnerallu naatsorsuutigineqanngippat ilaqutariinnut paarsisartunut akuersissutip atorunnaarsinneqarnissaa kommunalbestyrelsip aalajangissavaa, § 9 malillugu, Ilaqutariit paarsisartut pillugit Namminersorlutik Oqartussat nalunaarutaanni.
Imm. 6. Kommunalbestyrelse annertusisamik nakkutilliisoqarnissaanik aalajangiisimappat kommunalbestyrelsit inissiisuusut kommunalbestyrelsimit ilisimatinneqassapput.
Nakkutilliinermit nalunaarusiaq
§ 24. Kommunalbestyrelse §§ 15 aamma 23 malillugit ingerlatsinerup tungaatigut nakkutilliinerit tamaasa nakkutilliinermit nalunaarusiamik suliaqartassaaq.
Imm. 2. Nakkutilliinermit nalunaarusiami tulliuttut ilisimasaat isumaallu kommunalbestyrelsimit ilanngunneqartassapput:
1) ilaqutariit paarsisartut, tassunga ilanngullugit nammineq meeqqat angerlarsimaffimmi najugaqartut inuillu allat inoqutigiinnut ilaasut, aamma
2) meeraq paaqqutarineqartoq meeqqamullu paaqqutarineqartumut angajoqqaatut oqartussaasut.
Imm. 3. Nakkutilliinermit nalunaarusiami paasissutissat tulliuttut minnerpaamik saqqummiunneqassapput:
1) Ulloq nakkutilliiffiusoq.
2) Kina nakkutilliinermik ingerlatsisimava.
3) Nakkutilliiartornissaq nalunaarutigeqqaarneqarsimanersoq imaluunniit nalunaarutigeqqarneqarsimannginnersoq.
4) Nakkutilliinermut tunngaviusoq.
5) Kommunalbestyrelse nakkutilliiartortoqannginnerani paasissutissanik sunik piniarsimanersoq.
6) Kommunalbestyrelse nakkutilliinerminut atatillugu kikkunnik oqaloqateqarsimanersoq.
7) Ilaqutariit meeqqanik qassinik paaqqutaqarnersut kiisalu meeqqat qassinik ukioqarnersut meeqqallu tapersersorneqarnissamik pisariaqartitaat.
8) Nakkutilliinermi maluginiarneqartut suuneri.
9) Aanngajaarniutinik atuisuunermik misissuisoqarsimappat taakku inerneri, tak. § 21
10) Ilaqutariit paarsisartut ilaqutariittut paarsisartutut akuersissummi piumasaqaatinik malinninnerannik naliliineq.
11) Nakkutilliisoqarnerata, matumani aamma annertusisamik nakkutilliisoqarnissaanik aalajangiinerup, ilaqutariinnut paarisartunut akuersissummik atorunnaarsitsinissamik aalajangiinerup aamma paasissutissanik kommunalbestyrelsimut kommunalbestyrelsinulluunniit meeqqap ilaqutariinnut paarsisartunut inissinneqarnissaanik aalajangiisimasunut ingerlatitseqqissimanerup malitsigisaannik qisuariaataasimasut.
Imm. 4. Nakkutilliinermit nalunaarusiaq ilaqutariinnut paarsisartunut tusarniaassutigineqassaaq, tassani tusarniaanermut akissummik tunniussinissamut ullut 14-it piffissaritinneqarlutik. Naammassillugu nakkutilliinermut nalunaarusiap assilineqarnera ilaqutariinnut paarisartunut nassiunneqassaaq.
§ 25. Kommunalbestyrelsip § 24 malillugu nakkutilliinermit nalunaarusiamut ilanngullugit allassinnaavai:
1) paasisimasat ilisimatitsissutillu, aamma
2) pissutsit iluarsineqartariaqartut iliuuseqarfigineqartariaqartullu pillugit inassutigisat.
Imm. 2. Imm. 1 malillugu oqaaseqaatit imaluunniit inassutigisat ilaqutariit paarsisartut oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit inassuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.
Kapitali 5
Meeqqanut ulloq unnuarlu paaqqinniffinnik ingerlatsinerup tungaatigut nakkutilliineq
§ 26. Nakkutilliinermik ingerlatsivik Meeqqat tapersersorneqarnissaannut Inatsisartut inatsisaanni § 34, imm. 1 malillugu meeqqanut ulloq unnuarlu paaqqinniffinni, matumani aamma meeqqanut ulloq unnuarlu paaqqinniffiit immikkoortortaanni isumannaallisakkani ingerlatsineq nakkutigissavaa. Ulloq unnuarlu paaqqinniffiup pitsaassusissamik attassiinnarnissaa akuersissummilu piumasaqaatinik naammassinnittuujuarnissaa nakkutilliinerup qulakkiissavaa, kiisalu ulloq unnuarlu paaqqinniffiup Naalakkersuisullu akornanni ingerlatsinissamut tunngatillugu isumaqatigiissutaasa naammassineqarnissaa qulakkiissallugu.
Imm. 2. Nakkutilliinermik ingerlatsivik ingerlatsinerup tungaatigut nakkutilliinermut atatillugu ulloq unnuarlu paaqqinniffimmi pissutsit misissorlugillu ulloq unnuarlu paaqqinniffimmi sulisunik oqaloqateqartassaaq.
Imm. 3. Nakkutilliinermik ingerlatsivik nakkutilliinermik suliassamik isumaginninnermini ulloq unnuarlu paaqqinniffimmut nalunaaqqaarluni nakkutilliiartortassaaq, paasissutissanillu ulloq unnuarlu paaqqinniffimmit pissarsisassalluni.
Imm. 4. Nakkutilliinermik ingerlatsivik imm. 3 malillugu nalunaaqqaarluni nakkutilliiartornerup saniatigut aamma nalunaaqqaarani ulloq unnuarlu paaqqinniffimmut nakkutilliiartorsinnaavoq.
§ 27. § 26 malillugu ingerlatsinerup tungaatigut nakkutilliineq assigiimmik, aaqqissuussaasumik aamma uppernarsaaserluakkamik ulloq unnuarlu paaqqinniffiup tunniussassaanik inissatigullu atugassarititaanik, kiisalu ulloq unnuarlu paaqqinniffiup suliassamik isumaginnittarneranik nalilersuinissamut tunngavissiisumik ingerlanneqassaaq.
Imm. 2. Nakkutilliineq ingerlanneqassaaq inunnit suliap, aaqqissussaanerup aningaasaqarnerullu ataqatigiinnissaannik paasinnissinnaasunit taamalu ulloq unnuarlu paaqqinniffiup unammillernartoqartitaanik ingerlariaqqinnissamullu periarfissaanik nalunaaruteqarsinnaasunit.
Imm. 3. Nakkutilliinermut atatillugu Nakkutilliinermik ingerlatsiviup ulloq unnuarlu paaqqinniffimmi aqutsisut, sulisut meeqqallu inissinneqarsimasut oqaloqatigalugit peqataatittassavai. Nakkutilliinermut atatillugu meeqqanut angajoqqaatut oqartussaassuseqartut aamma ulloq unnuarlu paaqqinniffiup suleqatigisai oqaloqatigalugit peqataatinneqassapput.
Imm. 4. Nakkutilliinermut atatillugu siusinnerusukkut nakkutilliinermit nalunaarusiaasimasuni oqaaseqaatit, inassutigisimasat peqqussutillu aaqqissuussaasumik malitseqartinneqartarnissaat Nakkutilliinermik ingerlatsivimmit qulakkeerneqassaaq.
§ 28. § 26 malillugu ingerlatsinerup tungaatigut nakkutilliinerup makku imarissavai:
1) Meeqqat ilinniarnissamut sulinissamullu periarfissaat.
2) Meeqqat nammineersinnaalernissaminnut aamma ilaquttaminnut attaveqaatiminnullu atassuteqarnissaannut periarfissaat.
3) Ulloq unnuarlu paaqqinniffiup sullinniagai, matumani ulloq unnuarlu paaqqinniffiup sullinniakkaminut neqeroorutigisaata imarisai kiisalu meeqqat inuunerminnut sunniuteqaqataanerat.
4) Ulloq unnuarlu paaqqinniffiup periaasii angusaalu, matumani perorsaanikkut, tarnip pissusaanik ilisimatusarnikkut imaluunniit ilaqutariinnik katsorsaanikkut suleriaatsit.
5) Ulloq unnuarlu paaqqinniffimmi aaqqissuussaaneq aqutsisullu.
6) Ulloq unnuarlu paaqqinniffimmi sulisoqarnikkut piginnaasat.
7) Ulloq unnuarlu paaqqinniffimmi aningaasaqarneq, matumani naatsorsuuteqarnersoq kukkunersiuisumit akuerineqarsimasumik kukkunersiorneqarsimasumik.
8) Ulloq unnuarlu paaqqinniffimmi inissatigut atugassarititat, matumani sullinniakkat pisariaqartitaannut aamma ulloq unnuarlu paaqqinniffiup periaasaanut naapertuunnersut.
Imm. 2. Sammineqartut tamarmik arlalitsigut naapertuuttunik tunngavilersorlugit itisilerneqassapput, ulloq unnuarlu paaqqinniffiup tamakkiisumik siumullu isigisumik aaqqissugaanik takutitsisumik.
§ 29. Nakkutilliinermik ingerlatsiviup misissussavaa ulloq unnuarlu paaqqinniffik ileqqoreqqusanik malinninnersoq.
§ 30. § 26 malillugu ulloq unnuarlu paaqqinniffimmi Nakkutilliinermik ingerlatsivik nakkutilliinermik ingerlatsinerup tungaatigut nakkutilliinermini Nakkutilliinermik ingerlatsivik paasissutissanik pisariaqartitaminik qinnuiginnikkuni, ulloq unnuarlu paaqqinniffiup tunniutissavai.
Imm. 2. Ulloq unnuarlu paaqqinniffimmit paasissutissat Nakkutilliinermik ingerlatsivimmut tunniussaapput, ingerlatitseqqinneq angajoqqaatut oqartussaassuseqartoq akuersisinngikkaluarlugu pisinnaavoq, ingerlatitseqqinneq nakkutilliinissamut pisariaqartuusorineqarpat.
§ 31. Nakkutilliinermik ingerlatsivik ulloq unnuarlu paaqqinniffimmi pissutsinik ernumanartunik maluginiagaqarpat, Nakkutilliinermik ingerlatsivik Isumaginninnermut Aqutsisoqarfimmut aamma kommunalbestyrelsinut inissiisuusimasunut nalunaarfiginnittassaaq, meeraq imaluunniit meeqqat pissutsinik ernumanartunik sunnerneqarsinnaappata.
§ 32. Nakkutilliinermik ingerlatsivik kommunalbestyrelsimut inissiisuusimasumut ingerlaannaq nalunaaruteqassaaq, meeqqap atugarissaarneranut, peqqissusaanut imaluunniit ineriartorneranut annertuumik innarliisinnaasumik pasitsaassisoqarsimappat uku pissutigalugit:
1) meeqqamik amigartumik isumassuineq isumaginninnerluunniit,
2) timikkut tarnikkulluunniit persuttagaasarnera, paarinerlunneqarnera imaluunniit kinguaassiuutitigut atornerlunneqarsimanera, imaluunniit
3) meeqqap atornerluinermik ajornartorsiutaanik, pinerluttarneranik imaluunniit allatigut pissusilersornikkut naleqqussarniarnikkulluunniit ajornartorsiutaanik naammaginanngitsumik katsorsaaneq.
Imm. 2. Nakkutilliinermik ingerlatsiviup nakkutilliinermini allatigulluunniit paasiguniuk meeqqap inissitap imm. 1-imi pissutsit pineqartut naammagittaalliuutigisimagai imaluunniit nalunaarutigisimagai Nakkutilliinermik ingerlatsiviup misissussavaa naammagittaalliuut imaluunniit nalunaarut malitseqartinneqarsimanersoq.
Peqqusineq
§ 33. Nakkutilliinermik ingerlatsivik ulloq unnuarlu paaqqinniffimmut peqqussuteqarsinnaavoq. Peqqusinerup eqquutsinneqarnissaanut piffissaliussaq Nakkutilliinermik ingerlatsiviup aalajangersarsinnaavaa.
Imm. 2. Peqqussuteqarnissamik taamaallaat aalajangiisoqarsinnaavoq pissutsit peqqussuteqarnissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut. Pissutsilli immikkut ittut pisariaqartilerpassuk peqqussuteqarnissaq ingerlaannartumik aalajangerneqarsinnaavoq.
Imm. 3. Peqqussuteqarnissamik taamaallaat aalajangiisoqarsinnaavoq ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanerat aaqqeerusunnerallu ilimanaateqarsorineqarpat.
Imm. 4. Imm. 1 malillugu peqqussummik eqquutsitsinissaq akuersissummik peqaannarnissamut piumasaqaatinngortinneqarsinnaavoq.
Imm. 5. Ulloq unnuarlu paaqqinniffik imm. 1 malillugu peqqussummik eqquutsitsisinnaanngippat ulloq unnuarlu paaqqinniffimmut akuersissutip atorunnaarsinneqarnissaa naalakkersuisoqarfiup isumaginninnermut akisussaasuusup ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat malillugu aalajangersinnaavaa.
Imm. 6. Nakkutilliinermik ingerlatsivik peqqusippat, imm. 4 malillugu piumasaqaatinngortinneqarsimasumik Nakkutilliinermik ingerlatsivik kommunalbestyrelsit inissiisuusut tamatumannga ilisimatinneqassapput.
Annertusisamik nakkutilliineq
§ 34. Nakkutilliinermik ingerlatsivik annertusisamik nakkutilliisoqarnissaanik aalajangiisinnaavoq, Nakkutilliinermik ingerlatsivimmit nalilerneqarpat, immikkut nassuiakkamik annertusisamik nakkutilliinissaq pisariaqartinneqartoq. Sivisussusissaa pissutsit ataasiakkaat aalajangersimasut suuneri tunngavigalugit aalajangersarneqartassaaq, taamaattorli nakkutilliineq ataaseq sivisunerpaamik qaammatinik 3-mik sivisussuseqartassaaq.
Imm. 2. Annertusisamik nakkutilliineq nalunaaqqaarluni nalunaaqqaaranilu ingerlanneqarsinnaavoq.
Imm. 3. Annertusisamik nakkutilliinissamut tunngaviusinnaapput:
1) nakkutilliinermit nalunaarusiaq ataaseq inerniliippat ulloq unnuarlu paaqqinniffiit ataasiakkaat ajornartorsiutaat immikkut ittut nalinginnaasulluunniit misissoqqinneqarnissaat pisariaqartoq,
2) ulloq unnuarlu paaqqinniffiup naammagittaalliutigineqarsimanera,
3) ulloq unnuarlu paaqqinniffimmi Nakkutilliinermik ingerlatsivimmit maluginiakkat nalinginnaasut imaluunniit immikkut ittut, imaluunniit
4) ataatsimut naliliineq malillugu ulloq unnuarlu paaqqinniffik pisariaqartinneqartumik pitsaassuseerussimasoq.
Imm. 4. Annertusisamik nakkutilliisoqarnissaanik taamaallaat aalajangiisoqarsinnaavoq pissutsit annertusisamik nakkutilliinissamik eqqarsaateqarnermut tunngaviusut pillugit ulloq unnuarlu paaqqinniffimmi sulisut oqaloqatigineqareernerisigut. Pissutsilli immikkut ittut pisariaqartilerpassuk annertusisamik nakkutilliisoqarnissaa ingerlaannartumik aalajangerneqarsinnaavoq.
Imm. 5. Annertusisamik nakkutilliisoqarnissaanik taamaallaat aalajangiisoqarsinnaavoq ulloq unnuarlu paaqqinniffiup pissutsinik aalajangiinermut tunngaviusunik aaqqiisinnaanera aaqqeerusunneralu ilimanaateqarsorineqarpat. Ulloq unnuarlu paaqqinniffiup pissutsinik ernumanartunik aaqqiisinnaanera imaluunniit aaqqeerusunnera ilimagineqanngippat, ulloq unnuarlu paaqqinniffimmut akuersissutip atorunnaarsinneqarnissaa naalakkersuisoqarfiup isumaginninnermut akisussaasuusup Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat malillugu aalajangersinnaavaa.
Imm. 6. Nakkutilliinermik ingerlatsivik annertusisamik nakkutilliisoqarnissaanik aalajangiippat, kommunalbestyrelsit inissiisuusut Nakkutilliinermik ingerlatsivimmit ilisimatinneqassapput.
Nakkutilliinermit nalunaarusiaq
§ 35. Nakkutilliinermik ingerlatsivik §§ 26 aamma 34 malillugit ulloq unnuarlu paaqqinniffimmi ingerlatsinerup tungaatigut nakkutilliinernit tamanit nalunaarusiortassaaq.
Imm. 2. Nakkutilliinermit nalunaarusiami paasissutissat tulliuttut minnerpaamik saqqummiunneqassapput:
1) Ulloq nakkutilliiffiusoq.
2) Kina nakkutilliinermik ingerlatsisimava.
3) Nakkutilliiartorneq nalunaarutigeqqaarneqarsimanersoq imaluunniit nalunaarutigeqqarneqarsimannginnersoq.
4) Nalinginnaasumik imaluunniit annertusisamik nakkutilliineq pineqarnersoq.
5) Nakkutilliinermik ingerlatsiviup nakkutilliiartortoqannginnerani paasissutissanik sunik piniarsimanersoq.
6) Nakkutilliinermik ingerlatsivik nakkutilliinerminut atatillugu kikkunnik oqaloqateqarsimanersoq.
7) Meeqqat qassit inissat eqqarsaatigalugit ulloq unnuarlu paaqqinniffimmi inissinneqarnissamut allatsissimanersut kiisalu meeqqat qassinik ukioqarnersut meeqqallu tapersersorneqarnissamik pisariaqartitaat
8) Ukiumi kingullermi pissaanermik atuinerit qassiusimanersut.
9) Nakkutilliinermi maluginiarneqartut suuneri.
10) Ulloq unnuarlu paaqqinniffiup meeqqanik paaqqinniffimmiittuutigineqartutut nalunaarneqarsimasunik katsorsaanissamik isumassuinissamillu suliassaminik isumaginninnissamut piumasaqaatinik malinninneranik naliliineq.
11) Ulloq unnuarlu paaqqinniffimmut akuersissummi piumasaqaatit ulloq unnuarlu paaqqinniffimmit suli malinneqarnersut pillugu naliliineq.
12) Nakkutilliisoqarsimanerata kingunerisaanik akuersissummik atorunnaarsitsinissamik peqqusinerup aamma paasissutissanik kommunalbestyrelsimut kommunalbestyrelsinulluunniit inissiisimasunut ingerlatitseqqissimanerup malitsigisaannik qisuariaataasimasut, matumani annertusisamik nakkutilliisoqarnissaanik aalajangiineq.
§ 36. § 35 malillugu inaarutaasumik nakkutilliinermit nalunaarusiap suliarineqariarluni ulloq unnuarlu paaqqinniffimmut nassiunneqannginnerani nakkutilliinermit nalunaarusiaq minnerpaamik ulluni 14-ini ulloq unnuarlu paaqqinniffimmut kiisalu oqartussaqarfimmut ulloq unnuarlu paaqqinniffimmik ingerlatsisumut tusarniaassutigineqassaaq.
Imm. 2 Nakkutilliinermit nalunaarusiaq naammassillugu kingusinnerpaamik ullormi nakkutilliiffiusimasumit qaammatit 3-t qaangiunneranni suliarineqareersimassaaq.
Imm. 3. Nakkutilliinermit nalunaarusiaq Isumaginninnermut Aqutsisoqarfimmut kiisalu kommunalbestyrelsinut meeqqanik ulloq unnuarlu paaqqinniffimmut inissiisimasunut ilisimatitsissutitut nassiunneqassaaq.
Imm. 4. Nakkutilliinermit nalunaarusiaq Naalakkersuisut aamma ulloq unnuarlu paaqqinniffiup nittartagaanni avammut saqqummiunneqassaaq.
§ 37. Nakkutilliinermik ingerlatsiviup § 35 malillugu nakkutilliinermit nalunaarusiami allassinnaavaa:
1) paasisimasat ilisimatitsissutillu, imaluunniit
2) pissutsit iluarsineqartariaqartut qisuariarfigineqartariaqartullu pillugit inassutigisat.
Imm. 2. Imm. 1 malillugu oqaaseqaatit imaluunniit inassutigisat ulloq unnuarlu paaqqinniffiup oqaloqatigineqareerneratigut suliarineqartassapput, aamma pissutsit oqaaseqaateqarnermut imaluunniit inassuteqarnermut tunngaviusut qanoq pitsaanerulersinnaanerannut imaluunniit aaqqiiffigineqarsinnaanerannut ilitsersuummik imaqassallutik.
§ 38. § 35 malillugu Nakkutilliinermik ingerlatsivik nakkutilliinermut nalunaarusiami ulloq unnuarlu paaqqinniffimmut inassutiginnissinnaavoq imaluunniit peqqusisinnaavoq pissutsit inassuteqarnermut imaluunniit peqqussuteqarnermut tunngaviusut qanoq aaqqiivigissallugit naatsorsuutigisat allaganngorlugit pilersaarummik suliaqarfigissagai, matumani piffissamik killiliussisassaaq.
Kapitali 6
Naammagittaalliuteqarneq
§ 39. Kommunalbestyrelsip nalunaarut manna malillugu aalajangiineri Isumaginnittoqarfiup aqunneqarnera aaqqissugaaneralu pillugit Inatsisartut peqqussutaanni aalajangersakkat tunngavigalugit Isumaginninnermi Naammagittaalliuuteqartarfimmut naammagittaalliuutigineqarsinnaapput.
Imm. 2. Nalunaarut manna tunngavigalugu Nakkutilliinermik ingerlatsiviup aalajangiineri aqutsinermi oqartussaasunut allanut naammagittaalliuutigineqarsinnaanngillat.
Imm. 3. Nalunaarut manna malillugu aalajangiinernut meeqqat suliat imminnut tunngassuteqartut pillugit naammagittaalliuuteqarnissaminnut pisinnaatitaapput.
Kapitali 7
Atuutilerfia
§ 40. Nalunaarut ulloq 1. maj 2019 atuutilerpoq.
Imm. 2. Ilutigitillugu Isumaginninnermut tunngasunik nakkutilliineq pillugu Namminersornerullutik Oqartussat nalunaarutaat nr. 6, 16. februar 2006-imeersoq atorunnaarsinneqarpoq.
Namminersorlutik Oqartussat, ulloq 3. april 2019
Martha Abelsen
/
Julie Præst Wilche