§ 1

Siusinaartumik pensionisiat pillugit Inatsisartut inatsisaanni nr. 40-mi, 9. december 2015-imeersumi, Inatsisartut inatsisaatigut nr. 19, 28. november 2016-imeersukkut, Inatsisartut inatsisaatigut nr. 40, 23. november 2017-imeersukkut aamma Inatsisartut inatsisaatigut nr. 6, 27. november 2018-imeersukkut allanngortinneqartumi tulliuttut allannguutigitinneqassapput:

1. § 7-ip kingorna kapitali 2-mi qulequtaq nutaaq ilanngunneqarpoq: 

”Kalaallit Nunaata, Danmarkip imaluunniit Savalimmiut akornanni kommuninut nuunneq”

2. Qulequttamut nutaamut tullinnguullugu ikkunneqassaaq:
”  § 7 a.  Innuttaasoq Kalaallit Nunaanni kommunimiit Danmarkimi imaluunniit Savalimmiuni kommunimut nuuppat, aamma innuttaasoq Inatsisartut inatsisaat una naapertorlugu siusinaartumik pensionisianik pisartagaqarpat, kommuni qimanneqartoq paasissutissanik attuumassuteqartunik kommunimi nuuffigisami pensionisianik suliaqarnermi atorneqartussanngorlugit kommunimut nuuffigineqartumut avitseqatiginnissaaq. 
  Imm. 2.  Suliamut paasissutissat attuumassuteqartut qallunaatuumut nutsertinneqarnerannut aningaasartuutit kommunimit qimanneqartumit akilerneqassapput.

  § 7 b.  Siusinaartumik pensionisianik pisartagaqartoq Kalaallit Nunaanni kommunimiit Danmarkimi imaluunniit Savalimmiuni kommunimut nuuppat, kommunimi nuuffigineqartumi annikinnerpaamik imaluunniit akunnattunik siusinaartumik pensionisianik pisartagaqartup siusinaartumik pensionisiani qaammatit 12-t tikillugit attatiinnassavai.
  Imm. 2.  Qaammatini annerpaamik 12-iusuni, siusinaartumik pensionisiallip nuuttup siusinaartumik pensionisiaminik attassiinnafigisinaasaani, kalaallit nunaanni kommunimit siusinaartumik pensionisiaa nalilersorneqaqqissanngilaq allanngortinneqarluniluunniit. 
  Imm. 3.  Siusinaartumik pensionisianik pisartagaqartoq qaammatit siulliit 12-it iluanni kommunimi nuuffigineqartumi siusinaartumik pensionisianik pisartagaqalernissaminik akuerineqarpat, Kalaallit Nunaanni kommunimi qimanneqartumiit siusinaartumik pensionisianik pisartagaqarunnaassaaq.  
  Imm. 4.  § 33-mi, imm. 1 naapertorlugu siusinaartumik pensionisianik pisartagalik kommunimi nuuffigineqartumi siusinaartumik pensionisianik pisartagaqalernissaminik akuerineqaruni Kalaallit Nunaanni kommunimut qimanneqartumut nalunaaruteqarnissaminut pisussaaffeqarpoq.

  § 7 c.  Danmarkimiit siusinaartumik pensionisianik pisartagallit aamma Savalimmiuniit qaffasinnerpaanik siusinaartumik pensionisianik pisartagallit sulisinnaassuseqanngitsut imaluunniit annikitsuinnarmik sulisinnaassusillit nunatsinnut nuukkaangamik Kalaallit Nunaanni kommunimi nuuffigisaminni ingerlaannartumik qaffasinnerpaanik siusinaartumik pensionisianik pisartagaqalersinneqassapput.”

3. § 37, imm. 1, oqaaseqatigiit aappaat ima allanneqassaaq:
”Tunniunneqartartunilli unitsitsineq, Kalaallit Nunaat qimallugu nuunnermi qaammatip nuuffiusup naanerani pisassaaq, tak. § 7 b, taamaattorli nunani avannarlerni nunamut allamut imaluunniit nunamut allamut EØS-imik isumaqatigiissummut atasumut piumasaqaatinik nuunnermi eqquutsitsisoqarsimappat unitsinneqassanngillat.”

§ 2

Inatsisartut inatsisaat ulloq 1. januar 2020-mi atuutilissaaq.

Namminersorlutik Oqartussat, ulloq 28. november 2019

Kim Kielsen