§ 1

Eqqumiitsuliornermik ingerlatsineq pillugu Inatsisartut inatsisaat nr. 11, 6. juni 2016-imeersumi tullinnguuttut makku allanngortinneqarput:

1. § 14-imi imm. 2-tut ikkunneqassaaq:
”  Imm. 2.  § 16 a naapertorlugu aningaasaateqarfimmik pilersitsisoqarpat aningaasaateqarfik tapiissutinik, kingornussanik tunissutinillu Nunatta Karsianiunngitsoq pissarsisinnaassaaq.”

2. § 16 kingorna ivertinneqassaaq:
”  § 16 a.  Naalakkersuisut eqqumiitsuliornermik tamakkuninngalu siammarterinermik ingerlatsisunut tapiissutissaannik tamakkiisumik tamakkiisuunngitsumilluunniit aningaasaateqarfimmik isumaginnittussamik pilersitsisinnaapput. 
  Imm. 2.  Naalakkersuisut siunertat, suliassat, inissitsiterineq atuunnerlu pillugit malittarisassanik sukumiinerusunik aalajangersaasinnaapput, tassunga ilanngullugit akissarsianut, aningaasaliinernut allatseqarnikkullu siunnersuisoqatigiinnik, ataatsimiititalianik assigisaannillu sullissinerit tamakkiisumik tamakkiisuunngitsumilluunniit Naalakkersuisut eqqumiitsulianik ingerlatsisunut tapiissutaannik tamakkuninnga siammarterisunut tunngatillugu suliassanik isumaginnissinnaasunik.
  Imm. 3.  Aningaasaateqarfiup Naalaakkersuisut eqqumiitsuliornermik ingerlatsisunut tamakkuninngalu siammarterisunut tapiissutaannik tamakkiisumik tamakkiisuunngitsumillu isumaginnittup suliassai pillugit Naalakkersuisut malittarisassanik aalajangersaasinnaapput, aamma suliassanik allanik suliassanik isumagisanut attuumassuteqartunik isumaginnittussamut, tassunga ilanngullugit eqqumiitsuliornermik ingerlatsinerit pillugit apeqqutini siunnersuisarnerit.”

3. § 17 imatut oqaasertalerneqarpoq: 
”  § 17.  Pisortat ingerlatsineranni suliassat suliarineqartarnerat pillugu Inatsisartut inatsisaanni aamma pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni § 16-imi aalajangersakkat siunnersuisartoqatigiinnut, ataatsimiititalianut assigisaannullu aamma § 16 a-mi aningaasaateqarfimmut taaneqartumut atuutissapput, taakku Inatsisartut inatsisaat manna malittarisassallu taanna malillugu atuutsinneqalersut naapertorlugit aalajangiisinnaatitaalersinneqarpata.”

4. § 20, imm. 2 imatut oqaasertalerneqassaaq:
”  Imm. 2.  Siunnersuisartoqatigiit, ataatsimiititaliat assigisaasalu Naalakkersuisut eqqumiitsuliornermik ingerlatsinermut tamatumalu saqqummiunneranut tapiissutaannik allaffissornikkut aqutsinermi suliassanik tamakkiisumik ilaannakortumilluunniit isumaginnittut, tak. § 16, aamma aningaasaateqarfimmit Naalakkersuisut eqqumiitsuliornermik ingerlatsinermut tamatumalu saqqummiunneranut tapiissutaannik allaffissornikkut aqutsinermi suliassanik tamakkiisumik ilaannakortumilluunniit isumaginnittut, tak. § 16 a, aalajangiineri allaffissornikkut oqartussaasumut allamut maalaarutigineqarsinnaanngillat. Aalajangiinerit inatsisitigut killiliussanut tunngatillugit maalaarutit Naalakkersuisunut saqqummiunneqarsinnaapput, aalajangiinerup ullulerneqarneraniit kingusinnerpaamik sapaatit-akunnerisa sisamat qaangiunnerani.”

5. § 22 kingorna ivertinneqassaaq:
”  § 22 a.  Naalakkersuisut eqqumiitsuliornermik ingerlatsisunut tamakkuninngalu siammarterisunut tapiissutaanni tapiissutinik aqutsineq tamakkiisumik tamakkiisuunngitsumillu siunnersuisoqatigiinnut, ataatsimiititalianut assigisaannulluunniit imaluunniit aningaasaateqarfimmik, § 16, imm. 1 aamma § 16 a, imm. 1 takukkit, Naalakkersuisut aqutsinermik nakkutilliisuusinnaapput.
  Imm. 2.  Naalakkersuisut imm. 1-imi siunnersuisoqatigiit, ataatsimiititaliat assigisaallu aamma imm. 1-imi aningaasaateqarfik pillugu paasissutissat, nakkutilliinermi pisariaqartinneqartutut isigineqartut tunniunneqarnissaat piumasarisinnaavaat.”

§ 2

Inatsisartut inatsisaat ulloq 1. januar 2020-mi atuutilerpoq.

Namminersorlutik Oqartussat, ulloq 28. november 2019

Kim Kielsen