§ 1

Uumasunik illersuineq pillugu Inatsisartut inatsisaanni nr. 25, 18. december 2003-imeersumi ukua allanngortinneqarput:

1. Kapitali 1-imi kapitalip qulequtaa imatut oqaasertalerneqarpoq:

”Uumasunik illersuineq pillugu aalajangersakkat nalinginnaasut”

2. Kapitali 2-mut qulequtaritinneqartoq peerpoq.

Kapitalit 3-10 matuma kingorna kapitali 2-9-nngorput.

3. § 1 imatut oqaasertalerneqarpoq:

“  § 1.  Uumasut illersorneqarsinnaasumik pineqartassapput anniartinneqarnissaannut, naalliutsinneqarnissaannut, ersiortinneqarnissaannut, kingunipiloqartitsisumik ajoqutissarsinissaannut annertuumillu ajoqutissarsinissaannut pitsaanerpaamik illersorneqassapput.”

4. § 3-p kingorna ilanngunneqarpoq:

”  § 3 a.  Uumasunik kinguaassiuutitigut atoqatiginninneq imaluunniit kinguaassiuutinut tunngasunik iliuuseqarneq inerteqqutaavoq, taamaattorli imm. 2 takuuk.

  Imm. 2.  Uumasut katsorsarneranni nakorsaatitortitsineq imaluunniit uumassusilerinermi teknikkimik pissuteqartumik suliarineqartut, iliuuserineqartut inerteqqummut ilaanngillat, matumani kinguaassiortitsineq, amerliartortitsineq uumasunik misileraaneq imaluunniit allanik akuerisaasumik tunngaveqartut ilanngullugit.”

5. § 22 imatut oqaasertalerneqarpoq:

“  § 22.  Inatsisip matuma taannalu naapertorlugu najoqqutassaliunneqartut eqquutsinneqarnissaat Naalakkersuisut nakkutigissavaat.

  Imm. 2.  Uumasut nakorsaat imaluunniit qimmeqarnermut nakkutilliisoq uumasup illersorneqarsinnaanngitsumik pineqarneranik paasisaqartoq piaartumik uumasuuteqarnermut oqartussaasunut nalunaaruteqassaaq. Taamaattorli inassuteqaat erngerluni iluarsineqarpat tamanna atuutinngilaq.

  Imm. 3.  Uumasut nakorsaata imaluunniit qimmeqarnermut nakkutilliisup uumasoq ajoqusersimasoq napparsimasorluunniit takusaruniuk uumasoq ajorunnaarsinneqarsinnaanngippat, uumasullu uumatiinnarnissaa pisariaqanngitsumik anniarnermik kinguneqassappat, uumasuuteqartoq akisussaasoq inassavaa uumasoq piaartumik toqutseqqullugu. Uumasoq toqunneqanngippat uumasut nakorsaata imaluunniit qimmeqarnermut nakkutilliisup uumasuuteqarnermut oqartussanut pisoq 24 tiimit iluanni nalunaarutigissavaa.

  Imm. 4.  Uumasuuteqartup akisussaasup imm. 3 malillugu inassuteqaat malikkumanngippagu § 23-milu periuseq malinneqarpat uumasumut pisariaqanngitsumik anniarnermik kinguneqassappat uumasut nakorsaata imaluunniit qimmeqarnermut nakkutilliisup uumasoq erngiinnaartumik toqussinnaavaat. Uumasoq toqunneqarpat uumasuuteqarnermut oqartussanut ulluinnaat tallimat iluanni nalunaarutigineqassaaq.”

6. § 23 imatut oqaasertalerneqarpoq:

“ § 23.  Uumasoq illersorneqarsinnaanngitsumik pineqarpat uumasuuteqarnermut oqartussaniit uumasuuteqartoq akisussaasoq iliuuseqaqqullugu peqquneqarsinnaavoq.

  Imm. 2.  Imm. 1 imaluunniit 4 malillugu peqqussut malinneqanngippat uumasuuteqarnermut oqartussat uumasup paarineqarnera isumagisinnaavaat, tassungalu ilanngullugu uumasoq allamut inississinnaallugu.

  Imm. 3.  Uumasup tunineqarnissaa imaluunniit toqunneqarnissaa pissutsit tamatumunnga pissutissaqartitsippata uumasuuteqarnermut oqartussat erngiinnaartumik kingusinnerusukkulluunniit aalajangersinnaavaat, tassunga ilanngullugit uumasup qanoq issusaa, uumasoq piginnittuminit siunissami paarineqaqqissinnaanersoq, imaluunniit uumasup allamut nuunnerani aningaasartuutit. 

  Imm. 4.  Uumasoq napparsimappat peqqissarneqarsinnaanngitsumilluunniit ajoqusersimappat uumasup uumatiinnarneqarnissaa pisariaqanngitsumik naalliunneranik kinguneqassappat toqunneqarnissaa uumasuuteqarnermut oqartussat peqqusissutigisinnaavaat.

  Imm. 5.  Uumasoq § 6, nr. 4 naapertorlugu aalajangersakkanut akerliusumik uumasuutigineqartup pisariaqarpat toqunneqarnissaa uumasuuteqarnermut oqartussaat peqqussutigisinnaavaat.

  Imm. 6.  Peqqussutit imm. 1-imiit 5-imut tunngasut allaganngorlugu nalunaarutigineqassapput. Uumasumut akisussaasuusoq oqaaseqarnissaminut periarfissaqartitaassaaq. Oqaaseqaat uumasuuteqarnermut akisussaasut qaammatisiutit malillugit ullut 14-it iluanni tigussavaat.

  Imm. 7.  Uumasup pisariaqanngitsumik naalliunnissaa pinngitsoortinniarlugu imaluunniit akisussaasoq naapinneqarsinnaanngippat imm. 6 sanioqqunneqarsinnaavoq. Imm. 6 malillugu allakkatigut nalunaarut tamatuma kingorna periarfissaq siulleq atorlugu ingerlanneqassaaq.”

7. § 24 imatut oqaasertalerneqarpoq:

“ § 24.  § 23, imm. 4-mi periaatsip malinneqarnera uumasup pisariaqanngitsumik naalliunnissaanik kinguneqassappat uumasuuteqarnermut oqartussat uumasoq ingerlaannaq toqussinnaavaat.

  Imm. 2.  Uumasuuteqarnermut oqartussat toqutsisinnaanngikkunik allap toqutsinissaanik oqartussaasut piginnaatitsisinnaapput.”

8. § 25 imatut oqaasertalerneqarpoq:

“ § 25.  Uumasup pisariaqanngitsumik naalliunnissamut illersorneqarnissaa siunertaralugu toqutsineq piginnittumut taarsiinertaqanngitsumik piginnittullu akiligassaanik pissaaq.

  Imm. 2.  Uumasumik allamut nuussineq kiisalu § 23, imm. 3 malillugu tunisineq piginnittumut taarsiinertaqanngitsumik pissaaq. Uumasup nuunneqarneranut atatillugu aningaasartuutit piginnittumut akiligassanngussanersut nalileereernikkut uumasuuteqarnermut oqartussat aalajangersinnaavaat.

  Imm. 3.  § 23, imm. 1-5 malillugit peqqussuteqarfigineqarsimasup aalajangiinerup pineqartumut nalunaarutigineqarnerata kingorna qaammatisiutit malillugit ullut 14-it iluanni eqqartuussivinnut suliassanngortissinnaavaa. Eqqartuussivinnut suliassanngortitsineq kinguartitsissutaasinnaanngilaq, kisiannili § 23 imm. 5 tassani pineqanngilaq.”

9. § 26 imatut oqaasertalerneqarpoq:

“ § 26.  Uumasuuteqarnermut oqartussat, pisariaqartutut nalilerneqarpat, kinaassutsimut uppernarsaat takutillugu eqqartuussiviillu aalajangiisinnagit inatsimmi aalajangersakkat taannalu malillugu malittarisassiat eqqortinneqarnissaat qulakkeerniarlugu uumasuutinut qaqugukkulluunniit ornigussinnaavoq.”

10. § 27 imatut oqaasertalerneqarpoq:

” § 27.   § 1, § 3, § 3a, imm.1, §§ 4, 5 aamma 7, § 8, imm. 1, § 9, § 11, imm. 1, § 13, imm. 1, §§ 14, 15, 17, 18 aamma 20, aamma § 22. imm. 2 aamma. 3-mik unioqqutitsineq Kalaallit Nunaanni Pinerluttulerineq pillugu Inatsimmi malittarisassat malillugit akiliisitsinikkut pineqaatissiinernik kinguneqarsinnaavoq.

  Imm. 2.  §§ 6, 10, aamma 12, § 13, imm. 2, §§ 16, 19, aamma 21-mi malittarisassianik unioqqutitsineq Kalaallit Nunaanni Pinerluttulerineq pillugu Inatsimmi malitarisassat malillugit akiliisitsinikkut pineqaatissiinernik aalajangersaasoqarsinnaavoq.

  Imm. 3.   Inatsimmi imaluunniit malittarisassiani taanna malillugu aalajangersarneqartuni akiliisitsinissamik piginnaatitsisoqarpat, inatsisit malillugit inuttut isigineqartoq Kalaallit Nunaanni Pinerluttulerinerineq pillugu Inatsimmi malittarisassat malillugit akiliisinneqarsinnaavoq.

  Imm. 4.  § 1, § 3, § 3 a, imm. 1, §§ 4, 5 aamma 7, § 8, imm. 1, § 9, § 11, imm. 1, § 13, imm. 1, §§ 14, 15, 17, 18 aamma 20, aamma § 22. imm. 2 aamma imm. 3-mik sakkortuumik uteqqiattumilluunniit unioqqutitsineq Kalaallit Nunaanni Pinerluttulerineq pillugu Inatsimmi malittarisassat malillugit sunilluunniit atajuartumik piffissamiluunniit killilimmi sivikinnerpaamik ukiumi ataatsimi uumasuuteqaqqusaannginnermik pineqaatissiinermik kinguneqarsinnaavoq kiisalu Kalaallit Nunaanni Pinerluttulerineq pillugu Inatsimmi malittarisassat malillugit pineqaatissiisoqarsinnaalluni.

  Imm. 5.  Akiliisitsinerit imm. 1-4 naapertorlugit aalajangerneqartut Nunatta Karsianut tutsinneqartassapput.”

11. Inatsimmi tamani danskisuuani "Landsstyret" imatut "Naalakkersuisut" aamma ”Landsstyrets” imatut “Naalakkersuisuts” allanngortinneqarput.

§ 2

Inatsisartut inatsisaat ulloq 1. juli 2019 atuutilersinneqarpoq.

Namminersorlutik Oqartussat, ulloq 12. juni 2019

Kim Kielsen