§ 1

Imigassaq pillugu Inatsisartut Inatsisaanni nr. 35, 23. november 2017-imeersumi uku allanngortinneqassapput:

1. Inatsimmi tamarmi ”03.00” ima allanngortinneqassaaq: ”04.00”.

2. § 20, imm. 4, imatut oqaasertalerneqassaaq:

”  Imm. 4. Nal. 23.00-ip kingornatigut meeqqat aamma inuusuttut 18-it inorlugit ukiullit sassaalliuteqartarfinnut imigassanik aalakoornartortalinnik sassaalliuteqartunut iseqqusaassanngillat angajoqqaaminnit, angajoqqaatut akisussaasumik imaluunniit inummik allamik inersimasutut oqartussaassusilimmit inersimasuunngitsumut immikkut akisussaasumit ingiaqateqanngikkunik. Akuersissummik pigisaqartup aamma taassuma sulisuisa pisussaaffigaat nakkutigissallugu inuusuttup 18-it inorlugit ukiullip pissusissamisoortumik ingiaqateqarnissaa.”

3. § 25, imm. 1, imatut oqaasertalerneqassaaq:

”  Imigassanik aalakoornartortalinnik nioqquteqartoqarsinnaavoq ataasinngornermiit arfininngornermut nal. 10.00-imit 20.00-imut.”

4. § 26,imm. 1-imi nr. 3-p kingorna nutaatut ilanngunneqassaaq nr. 4:

”4)  Unnuakkut ullut freerfiusussat nallilerneranni nal. 12.00-imit 04.00-imut. Freerfiusussat ima paasineqassapput ullut nalliuttut, tak. § 2, imm. 7.”

5. § 26-ip kingornatigut immikkoortumut qulequtaq imatut oqaasertalerneqassaaq:

”Imigassanik aalakoornartortalinnik akeqanngitsumik agguaaneq”

6. § 27-imi, imm. 1 – 2 aamma imm. 4 – 5, atorunnaarsinneqarput.

Imm. 3 tamatuma kingornatigut tassaalerpoq imm. 1.

7. § 27-p kingornaniittoq immikkoortup qulequtaa peerpoq.

8. § 28 atorunnaarsinneqarpoq.

9. § 32-mi imm. 1-ip kingornatigut imm. 2 nutaaq ilanngunneqassaaq:

”  Imm. 2. Politiit piginnittunut aamma aqutsisunut paasissutissat ingerlateqqissinnaavaat inunnut imm. 1 naapertorlugu sassaalliuteqarfimmi pineqartumi isersimanissamut inerteqquteqarfigineqartunut tunngasut.”

Imm. 2 taamaalilluni tassaalerpoq imm. 6.

10. § 32-imi imm. 2-p kingornatigut imm 3-5-itut ilanngunneqassapput:

”  Imm. 3.  Paasissutissat politiinit imm. 2 tunngavigalugu ingerlateqqinneqartut taamaallaat piginnittunit, aqutsisunit aamma matulerisunit suliarineqarsinnaapput, taamaattorli tak. imm. 4, suliarinninnerlu taamaallaat pisinnaavoq imm. 1 naapertorlugu inerteqqutigineqartup atuutsinneqarnissaata pisariaqarnera tunngavigalugu.

  Imm. 4.  Piginnittut, aqutsisut aamma matulerisut nipangiussisussaatitaapput paasissutissanut imm. 2-mi taaneqartunut tunngatillugu. Tamanna taamatuttaaq atuuppoq inunnut imm. 5 naapertorlugu aalajangersakkat aalajangersarneqarsimasut kingunerisaannik paasissutissanik pineqartunik suliarinnittussanngortitaasut. Pinerluttulerinermi inatsit §§ 50 – 54.

  Imm. 5.  Taamatuttaaq Naalakkersuisut maleruaqqusanik aalajangersaasinnaapput paasissutissat imm. 3-mi taaneqartut suliarineqarnissaannut tunngatillugu, tamatumunnga ilanngullugit paasissutissat pineqartut inunnit allanit, imm. 3-mi taaneqartut saniatigut, suliarineqarsinnaanerannut tunngatillugu.”

11. § 43-mi, imm. 1, peerneqarpoq ”§ 27, imm. 1 aamma 3, § 28, imm. 1,”.

§ 2

Inatsisartut inatsisaat ullup saqqummiunneqarfimmi aqaguani atortuulissaaq.

Namminersorlutik Oqartussat, ulloq 12. juni 2019