Atuuffissaa

 

  § 1. Pisortat Pisiortortarneranni Neqerooruteqartitsinermi Maalaaruteqartarfik pisortani

oqartussat aamma sullissiviit nioqqutissanik aamma kiffartuussissutinik pisiniarnerannut

atatillugu neqerooruteqartitsisarneq pillugu inatsisartut inatsisaanni kiisalu sanaartornermi neqerooruteqartitsisarneq pillugu inatsisartut inatsisaanni aalajangersakkanik unioqqutitsineq pillugu naammagittaalliuutinik suliaqassaaq.

  Imm. 2.  Inatsisartut inatsisaanni imaluunniit Inatsisartut inatsisaat naapertorlugu Pisortat Pisiortortarneranni Neqerooruteqartitsinermi Maalaaruteqartarfimmut naammagittaalliorsinnaaneq pillugu aalajangersakkanik aalajangersaasoqarsimappat, inatsit aammattaaq atuutissaaq.

 

Pisortat Pisiortortarneranni Neqerooruteqartitsinermi Maalaaruteqartarfiup aaqqissuussaanera

 

  § 2.  Pisortat Pisiortortarneranni Neqerooruteqartitsinermi Maalaaruteqartarfiup inuttarissavai siulittaasoq ilaasortallu sulianik ilisimasallit ikinnerpaamik marluk.

  Imm. 2.  Siulittaasoq aamma ilaasortat ukiut sisamat tikillugit atuuttussatut toqqarneqassapput.

  Imm. 3.  Ilaasortat tamarmik immikkut sinniisussaannik 1-imik amerlanerusunilluunniit ilaasortaasup pisinnaannginnerani peqataasussamik toqqaasoqassaaq.

  Imm. 4. Siulittaasoq, inatsisilerituutut soraarummeersimasoq, Kalaallit Nunaanni Eqqartuussisuunermit toqqarneqassaaq. Ilaasortat sulianik ilisimasallit Kalaallit Nunaanni pisortani suliaqartuusut inuussutissarsiornermilu attuumassutilinnit, inuit pisortat pisiortortarnerannik imaluunniit inatsisilerinermik ilisimasallit akornanni innersuussinerit naapertorlugit Naalakkersuisunit toqqarneqassapput.

  Imm. 5.  Siulittaasoq aamma ilaasortat sulianik ilisimasallit naammagittaalliuuteqartarfimmi sulinerminni arlaannaannulluunniit attuumassuteqanngitsumik atuutissapput.

  Imm. 6.  Siulittaasoq ilaasortallu sulianik ilisimasallit toqqaqqinneqarsinnaapput.

  Imm. 7.  Inatsisartunut Naalakkersuisunullu il.il. ilaasortat aningaasarsiaqartitaanerat il.il. pillugit Inatsisartut inatsisaat naapertorlugu maalaaruteqartarfiup ilaasortaasa aningaasarsiaqartinneqarnissaat pillugu Naalakkersuisut malittarisassaliussapput.

 

  § 3. Pisortat Pisiortortarneranni Neqerooruteqartitsinermi Maalaaruteqartarfik allattoqarfeqarpoq, maalaaruteqartarfiup suliaqarnerani ikiuuttussamik.

  Imm. 2. Inatsisartut inatsisaanni matumani aalajangersakkat eqqarsaatigalugit maalaaruteqartarfiup suleriaasissai siulittaasup aalajangersassavai.

 

Naammagittaalliuuteqarsinnaatitaasut

 

  § 4. Pisortat Pisiortortarneranni Neqerooruteqartitsinermi Maalaaruteqartarfimmut naammagittaalliuuteqarsinnaasut tassaapput:

1)  Kinaluunniit inatsisit tunngavigalugit annertuumik tamatumunnga soqutiginnittoq.

2) Kattuffiit aamma pisortani oqartussat Naalakkersuisunit naammagittaalliorsinnaatinneqartut.

Imm. 2. Maalaaruteqartarfiup inuk alla suliamut annertuumik pingaaruteqartoq naammagittaalliuuteqarfigineqartoq naammagittaalliortorluunniit sinnerlugit suliamut peqataatinneqarnissaa akuerisinnaavaa.

 

Naammagittaalliuummik tunniussineq

 

  § 5.  Naammagittaalliuut suliamut tunngatillugu ilanngussartalik suliakkiuteqartup naammagittaalliuutaata inerniliiffigineqarnerata aalajangiiffigineqarnerataluunniit kingorna kingusinnerpaamik sapaatit akunneri sisamat qaangiutsinnagit allaganngorlugu Pisortat Pisiortortarneranni Neqerooruteqartitsinermi Maalaaruteqartarfimmut tunniunneqassaaq.

  Imm. 2.  Kingusinnerpaamik naammagittaalliuutip maalaaruteqartarfimmut tunniunneqarneranut peqatigitillugu naammagittaalliuuteqartup suliakkiissutini pillugu naammagittaalliuuteqarfigineqartumut allaganngorlugu nalunaarutigissavaa. Naammagittaalliuut naammagittaalliuuteqartup naammagittaalliuuteqarfigineqartumut nalunaarutaata assilineranik ilaqartinneqassaaq. 

  Imm. 3.  Naammagittaalliuutigineqartoq suliassap suliarineqarnissaanut tunngavissiinngippat maalaaruteqartarfiup naammagittaalliuut aalajangiinermigut itigartissinnaavaa, tamanna naammagittaalliuuteqartumut naammagittaalliuuteqarfigineqartumullu nalunaarutigineqassalluni.

  Imm. 4.  Pisortat oqartussaaffigisaanni suliffeqarfiinilu nioqqutissanik kiffartuussinernillu

pisinermut tunngatillugu neqerooruteqartitsisarneq pillugu inatsisartut inatsisaat naapertorlugu naammagittaalliuummik tunniussinermi naammagittaalliuuteqartoq naammagittaalliuuteqarnermut akitsuummik kr. 10.000-inik akiliuteqassaaq.

  Imm. 5.  Sanaartornermi neqerooruteqartitsisarneq pillugu inatsisartut inatsisaat malillugu naammagittaalliuummik tunniussinermi, naammagittaalliortoq sanaartugassanut akigititassap 1 procentiatut ilusilimmik naammagittaalliuuteqarnermut akitsuummik akiliissaaq, taamaattoq annerpaamik kr. 100.000-inik.

  Imm. 6.  Imm. 3 malillugu naammagittaalliuut itigartitsissutigineqarpat, imm. 4 aamma 5 malillugit naammagittaalliuuteqarnermut akitsuut akiliutigineqartoq utertinneqassaaq.

  Imm. 7.  Naammagittaalliuuteqarnermut akitsuut akiliutissaq akilerneqartinnagu maalaaruteqartarfiup naammagittaalliuut suliaralugu aallartissanngilaa. Naammagittaalliuutip tunniunneqarneranit kingusinnerpaamik sapaatip akunneri sisamat qaangiuppata naammagittaalliuuteqarnermut akitsuut akilerneqarsimanngippat naammagittaalliuut atorunnaartutut isigineqassaaq.

  Imm. 8.  Naammagittaalliortoq naammagittaalliornermini tamakkiisumik ilaannakuusumilluunniit taperserneqarpat, imm. 4 aamma 5 malillugit naammagittaalliuuteqarnermut akitsuut utertinneqassanersoq, pillugu maleruagassanik erseqqinnerusunik Naalakkersuisut aalajangersaasinnaapput.

 

Suliassap piareersarneqarnera

 

  § 6. Pisortat Pisiortortarneranni Neqerooruteqartitsinermi Maalaaruteqartarfiup naammagittaalliuuteqarfigineqartoq qinnuigissavaa suliami pisut inatsisitigullu pissutsit pillugit nassuiaammik tunniusseqqullugu kiisalu naammagittaalliuuteqartarfiup piffissaliussaa nallertinnagu suliamut tunngatillugu uppernarsaatinik nassiusseqqullugu.

  Imm. 2.  Maalaaruteqartarfiup § 4, imm. 2 naapertorlugu naammagittaalliuuteqartoq, naammagittaalliuuteqarfigineqartoq inulluunniit alla qinnuigisinnaavai paasissutissanik suliap naliliiffigineqarnissaanut pisariaqartutut naliliiffigineqartunik maalaaruteqartarfiup piffissaliussaa nallertinnagu pissarseqqullugit.

 

  § 7. Naammagittaalliuuteqartoq suliamullu peqataatinneqalersimasoq, taamaattoqarpat, nassuiaammik § 6, imm. 1-imi taaneqartumik allagaatinillu suliamut tunngasunik maalaaruteqartarfimmit ilisimatinneqassapput, tassa tunniussineq inatsisinut allanut akerliunngippat.

  Imm. 2.  Siulittaasup sulianut ataasiakkaanut tunngatillugu aalajangersinnaavaa allaganngorlugu ilanngussanik allanik paarlaasseqatigiittoqassasoq.

 

  § 8. Suliassaq allaganngorlugu ilanngussanik paarlaasseqatigiinnikkut piareersarneqassaaq tamannalu tunngavigalugu aalajangiiffigineqarluni, tassa oqaasiinnartigut isumaqatiginninni-artoqarnissaa siulittaasup aalajangersimanngippagu.

  Imm. 2. Naammagittaalliuuteqartoq, naammagittaalliuuteqarfigineqartoq suliamullu peqataatinneqalersoq eqqartuussissuserisumik, kukkunersiuisumik allamilluunniit suliamut tunngatillugu ilisimasalimmik sinniisoqarnissamut pisinnaatitaavoq. Siulittaasup kaammattuutigisinnaavaa naammagittaalliuuteqartoq naammagittaalliuuteqarfigineqartoq suliamullu peqataatinneqalersoq naammagittaalliuuteqartup siuliani allassimasutut sinniisoqarnissaa.

  Imm. 3. Oqaasiinnartigut isumaqatiginninniarnerit tamanut ammasuunngillat. Pissutsilli immikkut ittut atuutsillugit siulittaasup aalajangersinnaavaa tamanut ammatitsinissaq.

 

Suliap aalajangiiffigineqarnera aamma suliamut aningaasartuutit

 

  § 9. Pisortat Pisiortortarneranni Neqerooruteqartitsinermi Maalaaruteqartarfiup illuatungeriinni aappaasoq tapersersornerusinnaanngilaa pineqartup piumasaqaatai sipporlugit aamma illuatungeriinni pineqartup pissutsit atuutsinnianngisai eqqarsaatigissanagit.

 

  § 10.  Pisortat Pisiortortarneranni Neqerooruteqartitsinermi Maalaaruteqartarfimmi sulianik aalajangiinermi siulittaasoq ikinnerpaamillu ilaasortat paasisimasallit 2 peqataassapput. Maalaaruteqartarfimmi aalajangigassat nalinginnaasumik amerlanerussuteqartoqarneratigut aalajangiiffigineqartassapput. Taasisut naligiippata siulittaasup taasinera aalajangiisuussaaq.

  Imm. 2.  Siulittaasup ilaasortanik sulianik ilisimasalinnik peqataasoqanngikkaluartoq suliani periaatsimut tunngaviunngitsumik pissuseqartuni aamma suliat ingerlanerinut tunngasut aalajangiiffigisinnaavai.

  Imm. 3.  Aalajangiineq tunngavilersorneqassaaq aamma naammagittaalliuuteqartumut, naammagittaalliuuteqarfigineqartumut suliamullu peqataatinneqalersimasumut nassiunneqarluni. Aalajangiineq isumaqatigiilluni pisimanngippat aalajangiineq isummernermik aalajangiinermut tunngavissiinngitsumik imaqassaaq.

  Imm. 4.  Maalaaruteqartarfiup aalajangersinnaavaa naammagittaalliuuteqartup suliamut aningaasartuutai tamakkiisumik ilaannakortumilluunniit illuatungeriinni ajorsartup akilissagai, taamaattoq tak. imm. 5 aamma 6.

  Imm. 5. Imm. 4 malillugu suliamut aningaasartuutit annerpaamik 75.000 kr.-ussapput, taamaattoq tak. imm. 6.

  Imm. 6. Maalaaruteqartarfiup naammagittaalliuuteqartup suliamut aningaasartuutaanik naammagittaalliuuteqarfigineqartoq akileeqqussappagu maalaaruteqartarfiup pissutsit immikkut ittut pissutissaqartippassuk imm. 5-imi aningaasat annertunerpaaffissaat avaqqussinnaavai.

 

  § 11. Pisortat Pisiortortarneranni Neqerooruteqartitsinermi Maalaaruteqartarfimmit aalajangiussinerit maalaaruteqartarfiup nittartagaatigut tamanut saqqummiunneqassapput.

  Imm. 2. Maalaaruteqartarfiup ukiumoortumik nalunaarutaa aalajangikkanik imalik ukiut tamaasa maalaaruteqartarfiup nittartagaatigut saqqummiunneqassapput.

 

Iliuuseqarnissamut kinguneqartitsinissamullu periarfissat

 

  § 12.  Pissutsit immikkut ittut pissutissaqartippassuk Pisortat Pisiortortarneranni Neqerooruteqartitsinermi Maalaaruteqartarfiup piumasaqaateqartoqarneratigut naammagittaalliuutip suliarinissaa atuuttussaatissinnaavaa.

  Imm. 2.  Maalaaruteqartarfiup naammagittaalliuutip suliarineqarnissaa taamaallaat atuuttussaatissinnaavaa:

1)  naammagittaalliuuteqartup suliami taperserneqarnissani ilimagippagu,

2)  naammagittaalliuuteqartoq naammagittaalliuumminik atuuttussaatissinnaannginnera pissutigalugu soqutigisaminik allatut isumaginninnissamut periarfissaqanngippat, aamma

3)  neqerooruteqartup neqeroorummi naammassineqarnissaanik soqutiginninnerata aamma naammagittaalliuuteqartup suliap atuuttussaatinneqarnissaanik soqutiginninnerata suliassap kinguartinneqarneranik kinguneqarnerata imminnut naapertuutsissinnaanerannik nalilersuilluartoqarsimappat.

 

  § 13. Naammagittaalliuuteqarfigineqartup suliariumannittussarsiuussisarnermut inatsimmi malittarisassat unioqqutissimappagit Pisortat Pisiortortarneranni Neqerooruteqartitsinermi Maalaaruteqartarfiup:

1)  Naammagittaalliuuteqarfigineqartup neqerooruteqarnerminut atatillugu neqeroornermini suleriaasia imaluunniit aalajangigai tunuartissinnaavai.

2)  Naammagittaalliuuteqarfigineqartup unioqqutitsilluni aalajangigai imaluunniit neqeroorutai atorunnaarsissinnaavai.

3)  Neqerooruteqarnermut atatillugu neqerooruteqarnermi suleriaaseq imaluunniit aalajangiinerit inerteqqutaajunnaarnissaat peqqussutigisinnaavaa.

 

  § 14.  Naammagittaalliuuteqartup piumasaqarneratigut Pisortat Pisiortortarneranni Neqerooruteqartitsinermi Maalaaruteqartarfiup naammagittaalliuuteqarfigineqartoq peqqusinnaavaa suliariumannittussarsiuussisarnermut inatsimmik imaluunniit neqeroortitsisarnermut inatsimmik unioqqutitsisimanerup malitsigisaanik naammagittaalliuuteqartup annaasaanut taarseeqqullugu.

 

§ 15. Akileeqqusisoqarsinnaavoq inunnut:

1)  Piaaraluni mianersuaalliorujussuarluniluunniit eqqunngitsumik imaluunniit salloqittaalluni maalaaruteqartarfimmut paasissutissiisunut, tak. § 6.

2)  Maalaaruteqartarfiup inerteqqutaanik imaluunniit peqqussutaanik malinninngitsunut, tak. §§ 12-13.

  Imm. 2.  Inatsisartut inatsisaanni imaluunniit peqqussutini Inatsisartut inatsisaat naapertorlugu peqqusissutigineqartuni akileeqqusissuteqarnissamik aalajangersaanissaq inatsimmi tunngavissaqartillugu, akileeqqusissuteqarneq Kalaallit Nunaanni pinerluttulerinermut inatsisit malillugit inummut pisinnaatitaasumut pisussaatitaasumullu pisussaaffiliunneqarsinnaavoq.

  Imm. 3.  Akileeqqusissutit, imm. 1 aamma 2 naapertorlugit pisussaaffiliunneqartut, Nunap karsianut tutsinneqassapput.

 

Eqqartuussivinnut il. il. suliassanngortitsineq

 

  § 16.  Pisortat Pisiortortarneranni Neqerooruteqartitsinermi Maalaaruteqartarfiup aalajangiiffigisaa illuatungeriinnut nalunaarutigineqareernerata kingorna kingusinnerpaamik sapaatit akunneri arfineq pingasut qaangiunneranni eqqartuussivinnut suliassanngortinneqarsinnaavoq. Piffissaliussaq tamanna nallertinnagu suliassanngortitsisoqanngippat aalajangiineq inaarutaasumik aalajangiinerussaaq.

  Imm. 2. Maalaaruteqartarfiup aalajangiinera allaffissornikkut oqartussamut allamut suliassanngortinneqarsinnaanngilaq.

 

 

 

Atuutilernera il.il.

 

  § 17.  Inatsisartut inatsisaat 1. juli 2019 atuutilerpoq.

  Imm. 2. Inatsisartut inatsisaat neqeroortitsinernut 1. juli 2019 kingusinnerusumiluunniit pilersuisumut isumaqatigiissuteqarfigineqartunut atuuppoq.

 

 

 

Namminersorlutik Oqartussat, ulloq 12. juni 2019

 

 

 

Kim Kielsen