Inatsisartut Naalakkersuisullu pillugit Inatsisartut inatsisaat nr. 26, 18. november 2010-meer-sumi § 23, imm. 1 naapertorlugu Naalakkersuisunut ilaasortanut tamanut makku aalajanger-sarneqarput:

Inatsisitigut nalunaarutit pillugit

  § 1. Inatsisitigut nalunaarut tassaavoq nalunaarut pingaarnertut inatsimmik aamma pingaarnertut inatsisip allanngortinneqarneranik inatsimmik pisortatigoortumik ataatsimoortitsinermik imalik. Inatsisitigut nalunaarut naalakkersuisoqarfimmit suliassaqarfimmut akisussaasumit suliarineqartarpoq.

  Imm. 2. Inatsisitigut nalunaarutit imarisaat namminerminni inatsisitut sunniuteqanngillat, kisiannili taamaallaat innuttaasunut, namminersortunut pisortanilu oqartussaasunut allanullu iluaqutissaallutik, taakku inatsisit atuuttut pitsaanerusumik paasisinnaassammatigit. Inatsisitigut nalunaarutikkut inatsisit Inatsisartunit akuersissutigineqarsimasut inatsisitigut atuuttussaanerat allanngortinneqanngilaq.

Inatsisitigut nalunaarutit pillugit piumasaqaatit

  § 2.  Allannguutissatut inatsit Inatsisartunit akuersissutigineqartillugu naalakkersuisoqarfiup suliassaqarfimmut akisussaasup inatsisitigut nalunaarut suliarissavaa, tassani inatsit pingaarneq aamma allannguutissatut inatsisit tamaasa ataatsimoortillugit allanneqassallutik.

  Imm. 2. Inatsisitigut nalunaarut kalaallisut danskisullu allassimassaaq saqqummiunneqassallunilu, § 5 tunngavigalugu. Inatsisitigut nalunaarutit tusarniaassutigalugit nassiunneqartanngillat.

Inatsisitigut nalunaarummut akisussaaffik

  § 3. Naalakkersuisoqarfiup suliassaqarfimmut akisussaasup inatsisitigut nalunaarutip imarisamigut eqqortuunissaa kaajallaasitamilu matumani piffissanut killiliussat malinne-qarnissaat akisussaaffigai.

  Imm. 2. Inatsisitigut nalunaarut inaarutaasoq Inatsiseqarnermut immikkoortortamut saqqummiunneqartussanngorlugu nassiunneqartinnagu allaffissornikkut atsiorneqarsimassaaq.

Ilusilersugaanera inatsisitigullu periutsit

  § 4. Inatsisitigut nalunaarutit malittarisassat Inatsiseqarnermut immikkoortortap aalajangersagai malillugit suliarineqassapput, sivikinnerpaamillu sapaatit akunnerinik sisamanik piffissaliilluni Inatsiseqarnermut immikkoortortap inatsisitigut periutsinut tunngatillugu misissugassanngortinneqartassallutik.

Saqqummiussineq

  § 5. Inatsisitigut nalunaarut inatsisip allanngortinneqarnerata saqqummiunneqarneranit kingusinnerpaamik qaammatit pingasut qaangiunneranni Inatsiseqarnermut immikkoortortamut saqqummiunneqartussanngorlugu nassiunneqassaaq.

  Imm. 2. Inatsisit arlallit imaluunniit annertunerusut allanngortinneqarnerini ataatsimoortillugit allanneqarnerini qaammatit arfinillit killissarititaapput.

Inatsisitigut nalunaarutip inatsisillu akornanni assigiinngissuteqartoqartillugu

  § 6. Inatsisitigut nalunaarutip inatsisillu inatsisitigut nalunaarummut ilanngunneqarsimasut akornanni assigiinngissuteqartoqartillugu naalakkersuisoqarfiup suliassanut akisussaasup Inatsiseqarnermut immikkoortortaq tamatuminnga erngerlugu nalunaarfigisassavaa.

  Imm. 2. Naalakkersuisoqarfiup suliassanut akisussaasup sapinngisamik piaartumik assigiin-ngissutit tamakku iluarsissavai taamaalereerpallu inatsisitigut nalunaarut inatsisitigut periutsinut tunngatillugu misissugassanngortillugu nassiuteqqissallugu, takuuk § 4, tulliullugulu saqqummiutissallugu, takuuk § 5.

Ulloq atortuulerfia

  § 7. Kaajallaasitaq kaajallaasitap saqqummiunneqarnerata aqaguani atuutilissaaq, atuutissalluni inatsisit allanngortinneqarnerini ulloq 1. juli 2019-ip kingornatigut Inatsisartunit akuersissutigineqartunut.

Naalakkersuisut Siulittaasuata Naalakkersuisoqarfia, ulloq 17. juli 2019

Kim Kielsen (atsior.)

/

Hans-Peder B. Christensen (atsior.)