Aalisarneq pillugu Inatsisartut Inatsisaanni nr. 18, 31. oktober 1996-imeersumi, § 5, § 8, § 10, § 10a, imm. 1, § 13, imm. 2, § 23, § 25, § 26, § 33, imm. 2 aamma § 34, imm. 3, ilaatigut Inatsisartut Inatsisaanni nr. 6, 20. maj 1998-imeersukkut, Inatsisartut Inatsisaanni nr. 5, 21. maj 2002-meersukkut, Inatsisartut Inatsisaanni nr. 28, 18. december 2003-meersukkut, Inatsisartut Inatsisaanni nr. 17, 3. december 2009-meersukkut, Inatsisartut Inatsisaanni nr. 12, 3. december 2012-imeersukkut, Inatsisartut Inatsisaat nr. 18, 3. juni 2015-imeersukkut kiisalu kingullermik Inatsisartut Inatsisaatigut nr. 28, 28. november 2016-imeersukkut allanngortinneqarsimasut tunngavigalugit aalajangersarneqarpoq:

Kapitali 1

Atuuffia nassuiaatillu

Attuuffii

  § 1.  Nalunaarut una Kalaallit Nunaata aalisarnikkut oqartussaaffigisaani kapisilinniarnermut atuuppoq:

1) Nunap Isuata kitaani NAFO-p sumiiffilersuiffiani 1-imi ingerlanneqartumut atuuppoq. Tunngaviusumik killigititamit 40 sømilit avataanni aalisarneq inerteqqutaavoq.

2) Kalaallit Nunaata Kangiata aalisarfiini. Paragraffit tulliuttut kisimik atuutissapput, tassalu § 6, § 7, § 8, § 9, § 10, § 11, § 12, § 13, § 14, § 15  aamma § 16.  Tunngaviusumik killigititamit 12 sømilit avataani kapisilinniarluni aalisarneq inerteqqutaavoq.

Nassuiaatit

  § 2.  Inuussutissarsiutigalugu kapisilinniarneq nalunaarummi matumani paasineqassaaq pisat tamaasa ilaannaasaluunniit tuniniarnissaat siunertaralugu kapisilinniarnertut.

 Imm. 2.  Inuussutissarsiummut atatinnagu kapisilinniarneq nalunaarummi matumani paasineqassaaq nammineq atugassanik kapisilinniarnertut.

  Imm. 3.  Kapisilinnik pisineq nalunaarummi matumani paasineqassaaq inunnit kapisilinniarnissamut akuersissummik allagartaqartunit toqqaannartumik pisineq tigusinerlu.

Kapitali 2

Inuussutissarsiutigalugu kapisilinniarneq

 Inuussutissarsiutigalugu kapisilinniarnermut piumasaqaatit

  § 3.  Inuussutissarsiutigalugu kapisilinniarnissamut akuersissummik allagartallit kisimik kapisilinnik tuniniaasinnaatitaapput.

  § 4.  Inuussutissarsiutigalugu kapisilinniarsinnaanermut allagartat akuersissutit Naalakkersuisunit tunniunneqassapput.

  Imm. 2.  Allagartat imm. 1 naapertorlugu akuersissutit qinnuteqartunut piumasaqaatinik makkuninnga naammassinnittunut taamaallaat tunniussisoqarsinnaavoq:

1) Qinnuteqartoq inuiaqatigiinnut kalaallinut attuumassuteqavissoq, tak. aalisarneq pillugu Inatsisartut Inatsisaanni § 3, imm. 4.

2) Qassutinik kapisilinniutinik aamma angallammik kapisilinniummik 12,8 meterit (42 fod) tikillugit tamakkerlugu angissusilimmik qinnuteqartoq nammineq pigisaqartoq.

3) Qinnuteqarnermut atatillugu qinnuteqartumit pigineqartut qassutit kapisilinniutit qassiunerinik qanorlu ittuunerinik imaluunniit ilisarnaataannik nalunaaruteqartoq. 

4) Qinnuteqartunut aalisarnerup siuliani akuersissummik peqarsimasunut aalisarnerup siuliani nalunaaruteqartussaatitaaneq pillugu §§ 9 aamma 16 naapertorlugu naammassinnissimassapput, taamaattoq takuuk § 18, imm. 3. 

 Inuussutissarsiutigalugu kapisilinniarnermi piniutit

  § 5.  Uku atorlugit inuussutissarsiutigalugu taamaallaat kapisilinniartoqarsinnaavoq: 

1) qarsorsat, imaluunniit

2) qassutit tasillugit  minnerpaamik 140 mm-inik nigartallit atorlugit. Qassutit tissukartittakkat atorneqarsinnaapput, taamaattorli atuinermi ataatsimi amerlanerpaamik uiguleriit 20-kkutaarlugit.

  Imm. 2.  Qassutit nigartaat uuttorneqassapput uuttuutit ½ kiilumik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput.  Nigartat tamarmik imm. 1-imi piumasaqaat eqqortissavaat.

  Imm. 3.  Qassutit kapisilinniutit atorneqartut tamarmik piginnittup aqqanik imaluunniit taassuma angallataata normuanik nalunaaqutsersugaassapput. Nalunaaqutsiinermi atorneqartoq imermi allanngujaatsuussaaq.

  Imm. 4.  Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat atorluarneqarsinnaanissaat ajornerulertussaajunnaarlugit.

Inuussutissarsiutigalugu kapisilinniarnerup aqunneqarnera

  § 6.  Inuussutissarsiutigalugu kapisilinniarneq pisassiissutit aallaavigalugit nunami tunitsivinnut tunisassanik imaluunniit najukkani kalaalimineerniarfinnut tuniniarneqartussanik aalisarnertut ingerlanneqarsinnaavoq.

  Imm. 2.  Illoqarfinni imaluunniit nunaqarfinni kalaalimineerniarfeqanngitsuni, suliffeqarfinnut toqqaannartumik tunisineq ingerlanneqarsinnaavoq.

  § 7.  Aalisarnermut § 6 malillugu  Naalakkersuisut ukiut tamaasa, nunat tamalaat akornanni isumaqatigiissutit mianeralugit, Kalaallit Nunaanni kapisilittassanik aalajangersaasassapput.

  Imm. 2.  Naalakkersuisut KNAPK-lu isumasioqatigereerlugu inuussutissarsiutigalugu kapisilinniarnissamut piffissat ilaannut ataasiakkaanut ulloq aallartiffissaq aalajangertassavaat.  Ulloq aallartiffia nuna tamakkerlugu tusagassiutit aqqutigalugit nalunaarutigineqartassaaq.

  Imm. 3.  Inuussutissarsiutigalugu kapisilinnik aalisarneq ulloq aalajangiiffigineqartoq sioqqullugu aallartinneqassanngilaq.

  Imm. 4.  Inuussutissarsiutigalugu kapisilinniarneq taamaallaat pisassatut aalajangerneqartut, aalisakkat uumatillutik uuttuutaattut (ilivitsuutillugit) kiilunngorlugit taaneqartut, iluanni pisinnaavoq.

  Imm. 5.  Inuussutissarsiutigalugu kapisilinniarnermit pisat Kalaallit Nunaata avataani taamaallaat pisiariortorneqarsinnaapput tuniniarneqarsinnaallutillu Naalakkersuisut akuersissuteqarnerisigut.

  § 8.  Kapisilittassiissutit aalajangikkat tamakkerlugit pisarineqarnissaat qanillippat, Naalakkersuisut nalunaarutigissavaat, qaqugu inuussutissarsiutigalugu kapisilinniarneq kiisalu taamatut aalisarnermit pisanik pisineq aamma tunisineq unissanersoq.

  Imm. 2.  Imm. 1 malillugu nuna tamakkerlugu tusagassiutit aqqutigalugit nalunaarutigineqartassaaq.

  Imm. 3.  Aalisarneq unitsinneqarpat, tak. imm. 1, inuussutissarsiutigalugu kapisilinniarneq kiisalu taamatut aalisarnermit pisanik pisiortorneq tunisinerlu inerteqqutaalissapput.

 Inuussutissarsiutigalugu kapisilinniarnermit pisanik nalunaaruteqartarneq

  § 9.  Kapisillit pisarineqartut tamarmik Kalaallit Nunaanni Aalisarnermik Akuersissutinik Nakkutilliisoqarfimmut (KANUAANA) nalunaarutigineqassapput.

  Imm. 2.  Tunisat imaluunniit akigineqartut amerlassusii "niaquernagit erlaveerlugit" nalunaarutigineqarpata naatsorsueriaaseq 1,11 atorneqassaaq aalisakkat ilivitsunngortillugit naatsorsorneranni.

  Imm. 3.  Inuussutissarsiutigalu aalisarnissamut akuersissutillit kalaalilimineerniarfinni toqqaannaq tunisisartut  tulaassinerit tamaasa nalunaaruteqartassapput. Nalunaaruteqarnermi kapisillit pisat tamarmik ilaatinneqassapput.  Pisat pillugit nalunaarutiginninneq nalunaarummi ilanngussaq 1 atorlugu pisassaaq. Pisat pillugit nalunaarutiginninnissaq uunga nassiunneqassaaq KANUAANA, Postboks 501, 3900 Nuuk, Telefax 34 63 60 imaluunniit e-mailikkut gflk@nanoq.gl kapisilinnik tikiussinerit kinguninngua pisassaaq.

Kapitali 3

 Inuussutissarsiummut atatinnagu kapisilinnik aalisarnermit pisanik nalunaaruteqartarneq

Inuussutissarsiummut atatinnagu kapisilinnik aalisarneq

  § 10.  Inuussutissarsiummut atatinnagu kapisilinniarnissamut akuersissut qinnuteqareernikkut Naalakkersuisunit tunniunneqartassaaq.

  Imm. 2.  Imm. 1 malillugu allagartat akuersissutit qinnuteqartunut piumasaqaatinik makkuninnga naammassinnittunut tunniussisoqarsinnaavoq:

1) Aalisarneq pillugu Inatsisartut Inatsisaanni § 8, imm. 1-imi piumasaqaatinik naammassinnissimasut.

2) Qinnuteqartunut aalisarnerup siuliani akuersissummik peqarsimasunut aalisarnerup siuliani nalunaaruteqartussaatitaaneq pillugu §§ 15 aamma 16 naapertorlugu naammassinnissimassapput, taamaattoq takuuk § 18, imm. 3. 

 Inuussutissarsiutiginagu kapisilinniarnermi piniutit

  § 11.  Inuussutissarsiummut atatinnagu uku taamaallaat atorlugit kapisilinniartoqarsinnaavoq: 

1) qarsorsat, imaluunniit 

2) qassutit (ataatsit) 2000-inik qilernillit, taakkua tasillugit nigartaat minnerpaamik 140 mm-iusut.

  Imm. 2.  Qassutit nigartaat uuttorneqassapput uuttuutit ½ kiilumik oqimaalutserlugu nigartamut ikkunneratigut nakkartinneratigullu. Qimiaa puttalatitsisoq atuarlugu nigartat 20-t qimiaanut ungaseqatigiit uuttorneqassapput.  Nigartat tamarmik imm. 1-imi piumasaqaat eqqortissavaat.

  Imm. 3.  Qassutit kapisilinniutit piginnittut aqqanik nalunaaqutserneqarsimassapput.  Nalunaaqutsiinermi atorneqartoq imermi allanngujaatsuussaaq.

  Imm. 4.  Silap pissusaata taamaattoqartissinnaappagu qassutit kapisilinniutit akuttunngitsumik akulikitsumillu qassusiarfigineqartassapput, pisat atorluarneqarsinnaanissaat ajornerulertussaajunnaarlugit.

Inuussutissarsiutiginagu kapisilinniarnerup aqunneqarnera

  § 12.  Inuussutissarsiummut atatinnagu kapisilinniarneq pisassiissuteqarnikkut ingerlanneqarsinnaavoq.

  § 13.  Inuussutissarsiummut atanngitsunik, tak. § 12,  Naalakkersuisut ukiut tamaasa, nunat tamalaat akornanni isumaqatigiissutit mianeralugit, Kitaani kapisilittassanik aalajangersaasassapput.

  Imm. 2.  Inuussutissarsiummut atatinnagu kapisilinnik aalisarneq inuussutissarsiutigalugu aalisarnerup aallarteqatigissavaa, takuuk § 7, imm. 2.

  Imm. 3.  Inuussutissarsiummut attuumassuteqanngitsumik kapisilinniarneq taamaallaat pisassatut aalajangerneqartut, aalisakkat uumatillutik uuttuutaattut (ilivitsuutillugit) kiilunngorlugit taaneqartut, iluanni pisinnaavoq.

  § 14.  Kapisilittassiissutit aalajangikkat tamakkerlugit pisarineqarnissaat qanillippat, Naalakkersuisut nalunaarutigissavaat, qaqugu inuussutissarsiutiginagu kapisilinniarneq unissanersoq.

  Imm. 2.  Imm. 1 malillugu nuna tamakkerlugu tusagassiutit aqqutigalugit nalunaarutigineqartassaaq.

  Imm. 3.  Aalisarneq unitsinneqarpat, tak. imm. 1, inuussutissarsiummut atatinnagu kapisilinniarneq inerteqqutaalissapput.

 Inuussutissarsiummut atatinnagu kapisilinnik aalisarnermit pisanik nalunaaruteqartarneq

  § 15.  Inuussutissarsiummut atatinnagu kapisilinnik aalisarnermi kapisillit pisarineqartut tamarmik KANUAANA-mut nalunaarutigineqassapput.

  Imm. 2.  Pisat pillugit nalunaarutiginninneq nalunaarummi ilanngussaq 1 atorlugu pisassaaq. Pisat pillugit nalunaarutiginninnissaq uunga nassiunneqassaaq KANUAANA, Postboks 501, 3900 Nuuk, Telefax 34 63 60 imaluunniit e-mailikkut gflk@nanoq.gl kapisilinnik qassutit  qassusiarfigineqarnerisa kinguninngua pisassaaq, tak. § 11, imm. 4.

Kapitali 4

Inuussutissarsiutigalugu aamma inuussutissarsiummut attuumassuteqanngitsumik kapisilinniarnermi pisaqanngitsoornerit nalunaarutigineri

  § 16.  Inuussutissarsiutigalugu kiisalu inuussutissarsiummut attuumassuteqanngitsumik kapisilinniarnissamut akuersissutaatillit tamarmik kapisilinniarsimanngitsut tamanna pillugu ilanngussaq 1 atorlugu nalunaarutigissavaat. 

  Imm. 2.  Inuussutissarsiutigalugu kiisalu inuussutissarsiummut attuumassuteqanngitsumik kapisilinniarnissamut akuersissutaatillit tamarmik kapisilinniarsimasut, kapisilinnillu pisaqarsimanngitsut, tamanna pillugu ilanngussaq 1 atorlugu nalunaarutigissavaat. 

  Imm. 3.  Akuersissutinik atorneqanngitsunik pisaqanngitsoornerillu nalunaaruteqarneq nalunaarummut ilanngussaq 1 aqqutigalugu pissaaq. Taamatut nalunaarutiginninnissaq ukioq aalisarfiusumi kingusinnerpaamik 1. december uunga nassiunneqassaaq KANUAANA, Postboks 501, 3900 Nuuk, Telefax 34 63 60 imaluunniit e-mailikkut gflk@nanoq.gl.

Kapitali 5

Pineqaatissiinerit

  § 17.  § 1, nr. 1) aamma nr. 2), § 3, imm. 1, § 4, § 5, imm. 1, imm. 3, aamma imm. 4, § 7, imm. 3, 4 og 5, § 8, imm. 3, § 9, § 10, imm. 1, § 11, imm. 1, imm. 3, aamma imm. 4., § 13, imm. 3, § 14, imm. 3, § 15  aamma § 16-imik unioqqutitsinerit Kalaallit Nunaanni Pinerluttulerinermik Inatsit naapertorlugu akiliisitsinermik kinguneqarsinnaapput. 

  Imm. 2.  Inatsisilerinermi immikkoortut inuttut isigineqarsinnaasut pinerluttulerinermut inatsimmi malittarisassat malillugit imm. 1-imut ilaapput.

  Imm. 3. Imm. 1 aamma 2 malillugit suliat Kalaallit Nunaanni Eqqartuussivimmut suliaqartussatut siullertut suliakkiutigineqassapput.

  Imm. 4.  Akiliisitsissutit imm. 1-3 malillugit pineqaatissiissutigineqartut Nunatta Karsianut pisassanngortinneqassapput.

Kapitali 6

Atortuulersitsineq, atorunnaarsinneqarnissaa kiisalu ikaarsaariarnermi aalajangersakkat

  § 18.  Nalunaarut una atortuulissaaq 24. septembari 2018-imi.

  Imm. 2.  Peqatigitillugu Namminersorlutik Oqartussat kapisilinniarneq pillugu nalunaarutaat nr. 2, 10. august 2018-imeersoq atorunnaarpoq.

  Imm. 3.  § 4, imm. 2, nr. 4 aamma § 10, imm. 2, nr. 2-mi piumasaqaatit 2019-imut taakkulu kingorna piffissani aalisarfiulersussani akuersissutinik tunniussiniarnermi atuutissapput.

Namminersorlutik Oqartussat, ulloq 21. septembari 2018

 
Erik Jensen

/

Jørgen Isak Olsen