§ 1

Soraarnerussutisiaqalernissamut aningaasaatit ilaannit pissarsiat akileraaruserneqartarnerat pillugu Inatsisartut inatsisaanni nr. 44, 23. november 2017-imeersumi makku allannguutigitinneqarput:

1. § 1, imm. 1, ima oqaasertaqarpoq:

”Soraarnerussutisiaqarsinnaatitaasut aningaasarsianit akileraarutit pillugit inatsimmi § 1, imm. 1, nr. 1 aamma 2, aammalu imm. 2 naapertorlugit akileraartussaatitaasut marloqiusamik akileraartannginnissamik isumaqatigiissummi aalajangersakkat malillugit naalagaaffimmi allami, Danmarkimi Savalimmiuniluunniit angerlarsimaffilittut isigineqanngitsut, inatsit manna malillugu soraarnerussutisiaqalernissamut aaqqissuussinernit soraarnerussutisiaqalernissamut aningaasaateqarfinni Kalaallit Nunaanni angerlarsimaffilinni sillimmasiisarnermillu ingerlatsineq pillugu inatsimmut ilaasuni, imaluunniit inuunermik soraarnerussutisiaqalernissamulluunniit sillimmasiisarnermik ingerlatseqatigiiffinni Kalaallit Nunaanni angerlarsimaffilinni sillimmasiisarnermillu ingerlatsinissamik Aningaasaqarnermik Nakkutilliisoqarfimmit (Finanstilsynimit) akuerineqarsimasuni pilersinneqarsimasunit akileraartussaapput kiisalu soraarnerussutisiaqarnissaq siunertaralugu ileqqaakkanit aningaaserivinni Kalaallit Nunaanni angerlarsimaffeqartuni aalajangersimasumilluunniit ingerlatsiveqartuni, Finanstilsynimil­lu akuersissummik peqarlutik nunami maani aningaaseriveqarnermik ingerlatsisuni pilersinneqarsi­masunit akileraarutinik, Inatsisartut inatsisaat manna malillugu akiliissapput.”

2. § 2-p kingornagut ilanngunneqarpoq:

”  § 2 a.  Soraarnerussutisiaqarnissaq siunertaralugu ileqqaakkat aningaasatigut iluanaarutaat suul­luunniit akileraarusigassanut ilanngunneqassapput.

  Imm. 2.  Pisassarisanit annaasat naatsorsuinermi ilanngunneqassanngillat, pisassarisanit erniatigut isertitat pisassarisanilluunniit iluanaarutit, marloriaammik akileraarnissaq pinngitsoorniarlugu isu­maqatigiissutip kingunerisaanik akileraarusigassat naatsorsorneranni ilanngunneqartussaanngippata.

 Imm. 3.  Aningaasanut tigoriaannarnut kontut erniaat, pappiaqqat aningaasanik nalillit pappiaqqanit aningaasanik nalilinnit allanit aningaaseriviup pigisaanit immikkoortinneqartut iluanaarutaat tunngavigalugit tunniunneqartut akileraaruteqaataasussat naatsorsorneranni ilanngaatissat ilanngaatigereerlugit ukiumut iluanaarutit tamarmiusut ilanngunneqassapput. Kontup taamaattup atorunnaarsinneqarnerani uninngasuutinut tunngatillugu iluanaaruteqarpat annaasaqaateqarpalluunniit assigiinngissut taanna akileraarusigassanut ilanngunneqassaaq.

Imm. 4.  Ingerlatseqatigiiffinnit suliffeqarfissuarmut atasuusunit pisassarisatigut annaasat ilanngaatigineqar­sinnaanngillat. Annaasat ilanngaatigineqarsinnaanngitsut, piffissami pisassarisat pissarsiarineqarfi­anni nalingat tunngavigalugu naatsorsorneqassapput, nalingisa allanngorarnerat apeqqutaatinnagu, taamaattorli tak. imm. 6-8.

  Imm. 5.  Ingerlatseqatigiiffiit suliffeqarfissuarmut atasuusut tassaapput

1) ingerlatseqatigiiffiit peqatigiiffiillu il.il., aktiaatillit allanngoratik piffissami pisassarisap pissarsiarineqarfia­ni kingusinnerusumiluunniit ingerlatseqatigiiffinni tamani aktiatigut aningaasaatit 50 procentiinit amerlanerusu­nik toqqaannartumik toqqaannanngitsumilluunniit piginnittuuffigisaat,

2) ingerlatseqatigiiffiit peqatigiiffiillu il.il., aktiaatillit allanngoratik piffissami pisassarisap pissarsiarineqarfia­ni kingusinnerusumiluunniit ingerlatseqatigiiffinni tamani taasisinnaanerit 50 procentiinit amerlanerusunik toq­qaannartumik toqqaannanngitsumilluunniit pisinnaatitaaffigisaat,

3) aningaasaateqarfik ingerlatseqatigiiffillu, aningaasaateqarfiup piffissami pisassarisap pissarsiarineqarfiani kingusinnerusumiluunniit ingerlatseqatigiiffinni tamani aktiatigut aningaasaatit 50 procentiinit amerlanerusunik toqqaannartumik toqqaannanngitsumilluunniit piginnittuuffigisai, imaluunniit

4) aningaasaateqarfik ingerlatseqatigiiffiillu, aningaasaateqarfiup piffissami pisassarisap pissarsiarineqarfiani kingusinnerusumiluunniit ingerlatseqatigiiffinni tamani taasisinnaanerit 50 procentiinit amerlanerusunik toq­qaannartumik toqqaannanngitsumilluunniit pisinnaatitaaffigisai.

Aktiaatillit aningasarsianit akileraarutit pillugit Inatsisartut inatsisaanni § 86, imm. 3-mi taaneqartut aktiaatillit kikkuunerinik naliliinermi tassaatinneqassapput aktiaatillit taakkoqqissaat. Taasisinnaa­nerit ilaannik qassinik peqarnermik naatsorsuinermi ilanngunneqassanngillat taasisinnaanerit, aktianik pisisinnaanermik qularnaarinermut atatillugu taamaallaat tunniunneqarsimasut.

  Imm. 6.  Imm. 4 atuutissanngilaq pisassarisat nioqqutissanik pigisanillu allanik tunisaqarnikkut kii­salu sullissinikkut akiliutitut akileraaruteqaataasussatut pisassarilerneqarsimappata, akiligassaqarfi­usorlu akiligassaqartorlu ataatsimut akileraartussaasimanngippata, imaluunniit pisassarisat ataatsi­mut akileraartussaanerup kipinerata kingorna pilersinneqarsimappata. Tamannali aatsaat atuutissaaq akiitsutigut iluanaarutit akiligassaqartumut akileraaruteqaataasussaanerat imaluunniit amigartooru­ti­nik annaasaqaatinillu ilanngaatigineqarsinnaasunik suli ilanngaatigineqarsimanngitsunik ikilisitsi­sarneq pillugu maleruagassani pineqartunut ilaanerat uppernarsaatissaqartinneqarpat. Akiligassaqar­fiup ilanngaatiginnissinnaanera akiligassallip akileraaruteqarnissaanut aammalu amigartoorutinik annaasaqaatinillu ilanngaatigineqarsinnaasunik suli ilanngaatigineqarsimanngitsunik ikilisitsinis­saa­nut aalajangiisuuppat iluanaarutit aalajangersagaq taanna malillugu akileraaruteqaataasussatut aam­malu amigartoorutinik annaasaqaatinillu ilanngaatigineqarsinnaasunik suli ilanngaatigineqarsiman­ngitsunik ikilisitsisarneq pillugu maleruagassani pineqartunut ilaasutut isigineqassapput. Imm. 1 aam­mattaaq atuutissanngilaq obligationitigut pisassarisatigulluunniit allatigut, aaqqissuussaasumik niu­erfimmi nioqqutigineqarsinnaasutut akuerisaasutigut annaasaqaatinut.

  Imm. 7.  Imm. 4 aamma erniatigut pisassarisanut atuutissanngilaq, erniat pineqartut akiligassaqar­fiup aningaasarsiaasa akileraaruteqaataasussat naatsorsorneranni ilanngunneqarsimappata, akiligas­sa­qarfiusorlu akiligassaqartorlu ataatsimut akileraartussaasimanngippata imaluunniit pisassarisat ataatsimut akileraartussaanerup kipinerata kingorna pilersinneqarsimappata.

  Imm. 8.  Imm. 4 aamma akileraartussaatitaasunut pisassarisanik pisisarlutillu nioqquteqarnermik inuussutissarsiuteqartunut imaluunniit aningaasalersuinikkut inuussutissarsiummik ingerlataqartu­nut atuutissanngilaq, ingerlatseqatigiiffissuarmut attuumassuteqarneq akiligassaqarfiup siusinneru­sukkut taarsigassarsiarititat akilersorneqarnissaat pillugu akiligassallip suliffeqarfiutaanik ingerlatsi­gallarneranik imaluunniit inuussutissarsiutigalugu suliffeqarfinnik aaqqissuusseqqinnermi peqataa­neranik taamaallaat peqquteqarsimappat.”

3.  § 10, imm. 1, ima oqaasertalerneqassaaq:

”§ 1, imm. 2-mi akileraartussaatitaasut taaneqartut, pissarsianik akileraarutaasussaasunik inatsisitigut pisussaatitaasumit pissarsianit iluanaarutit katinnerattut naatsorsorsinnaagaat aamma pissarsianit iluanaarutit annaasaqaatillu imm. 2 naapertorlugu naatsorsorneqartut, taamaattorli tak. Imm. 3 aamma 4, inatsisitigut pisussaatitaasoq Kalaallit Nunaanni akileraarnermut inatsisit naapertorlugit namminersorluni akileraartarnermi iliuuseqartuunngippat. Piumasaqaataavoq, akileraartussaatitaasoq ukiumi isertitaqarfiusumi qaqugukkulluunniit inatsisitigut pisussaatitaasumut suliffissuakkut attuumassuteqassanngitsoq, tak. aningaasanik ingerlataqarneq pillugu inatsisip Kalaallit Nunaannut atuutsinneqarnera pillugu peqqussummi § 5. Oqaaseqatigiit siulliit aamma aappaat assinganik atuupput, aningaasaliineq aningaasaliisarfik kontonik ingerlatsiviusoq atorlugu pippat.”

4. § 11-mi imm. 7-itut 8-tullu ilanngunneqarput:

”  Imm. 7.  Aktianit piginneqataassutinilluunniit aaqqissuussaasumik niuerfimmit assigiinngitsorpassuarnilluun­niit niuerfimmit nalunaarsugaajunnaartunit iluanaarutinik annaasaqaatinillu naatsorsuinermi aktiat anpartilluunniit uninngasuutigineqartut imm. 3 malillugu akileraaruserneqartussat nalunaarsugaa­junnaarnertik sioqqullugu nalingat nalunaarsorneqartoq kingulleq malillugu tunineqartutut isigine­qassapput. Akileraartussaasup naliliussat oqaaseqatigiit siulliit malillugit naatsorsorneqartut pillugit paasissutissat Inatsisartut inatsisaat manna naapertorlugu akileraarusiinissami atorneqartussat ukiut tamaasa ukiumi aningaasarsiorfiusumi kingusinnerpaamik 1. december aningaaserivimmut nalunaa­rutigisassavai. Akileraartussaasoq oqaaseqatigiit siulliit malillugit naliliussanik aningaaserivimmut piffissaagallartillugu nalunaaruteqanngippat, aningaaseriviup uninngasuutigineqartut imm. 3, taamaattorli takuuk imm. 8, malil­lugu naatsorsorneqarneranni pisiarineranni akiat tunngavigissavaa.

  Imm. 8.  Imm. 7 aktianut piginneqataassutinulluunniit aaqqissuussaasumik niuerfimmi assigiinngitsorpassu­arnilluunniit niuerfimmi nalunaarsugaasimasunut atuutinngilaq, ingerlatseqatigiiffiup akiliisinnaajunnaarnera eqqartuussivimmit nalunaarutigineqarsimappat. Aammattaaq imm. 7 aktianut anpartinulluunniit aaqqissuussaasumik niuerfimmi assigiinngitsorpassuarnilluunniit niuerfimmi nalunaarsugaasimaga­luarlutik nioqqutaajunnaarsikkallarneqarsimasunut atuutinngilaq. Iluanaarutinik annaasaqaatinillu imm. 3 malillugu naatsorsuinermi aktiat piginneqataassutilluunniit nioqqutaajunnaarsikkallarneqarnissartik si­oqqullugu nalingat nalunaarsorneqarsimasut oqaaseqatigiit aappaat malillugu nalilerneqassapput.”

5. § 16-ip kingornagut ilanngunneqarpoq:

”  § 16 a.  Aningaaseriviit akileraarusigassat amerlassusiisa taakkualu ilaasa akileraaruteqaataasussat kiisalu soraarnerussutisiaqarnissamut aaqqissuussinerit ataasiakkaat akileraaruteqaataasussat § 1, imm. 1-imi pineqartut akileraarutitaasa naatsorsorneqarnerat ukiumi ukiup aningaasarsiorfiusup tul­liani kingusinnerpaamik 22. januar akileraaruseriffimmut nalunaarutigissavaat. Ukiumi aningaasar­siorfiusumi akileraarutissaviit naatsorsorneqartut ukiumi, ukiup aningaasarsiorfiusup tulliani 8. ja­nuarimiit ukiumi, ukiup aningaasarsiorfiusup tulliani 15. januarip tungaanut erniaat naatsorsorne­qassapput. Akileraarutit ernianik naatsorsorneqartunik ilallugit naatsorsukkap nassiunneqarnerata ilutigisaanik akilerneqassapput. Aningaaseriviup erniat soraarnerussutisianik ileqqaartut sinnerlugit akilissavai, kingornalu aalajangersakkat aningaaserivinni ataasiakkaani aalajangersarneqartut aal­laavigalugit soraarnerussutisiaqarnissamut ileqqaagaqartunut ataasiakkaanut tunngatillugu immik­kut ernialersuisinnaallutillu ernianik akiliisitsisinnaallutik. Ukiumi ukiup aningaasarsiorfiusup tulli­ani erniat ernianut § 22, imm. 5-imi taaneqartunut naapertuutissapput.

  Imm. 2.  Aningaaseriviup akileraarutit kontomit akileraarutit tunngassuteqarfigisaannit, ulloq pif­fissaagallartillugu akilerneqarfissaat sapaatit akunneranik ataatsimik sioqqullugu tigussavai. Aningaasanut konto­mi pappiaqqanik nalilinnik uninngasuutinut attuumassuteqartumi matussutissaqanngikkaluarpal­luunniit aningaaseriviup aningaasat tigussavai. Kontomik piginnittup konto imassarisaanik imaqanngippat, taava aningaasat amigaataasut ernialersorneqassapput aningaasariviup uninngasuutit ernialersorneqartarnerat malillugu, imaluunniit aningaaseriviup kontomik piginnittoq allakkatigut nalunaarfianiit konto aningaasanik amigaateqarneranik, atukkiinermut ernialersuisarneq malillugu, imm. 6 aalaavigalugu. Aningaasartuutigineqartoq isertitanit akileraarutaasussanit pensionisiaqarsinnaatitaasumit naatsorsuusiarineqartunit ilanngaatigineqarsinnaanngilaq. Aningaaseriviup akileraarutit akilerneqarnerisa ki­ngorna kingusinnerpaamik sapaatit akunneri 8-t qaangiunneranni akileraartussaasumut ilisimatitsissutigissa­vai. Konto sipporneqarsimappat kontup aningaasanik qanoq amerlatigisunik sipporneqarsimanera aningaaserivimmit soraarnerussutisiaqarsinnaatitaasumut ilisimatitsissutigineqassaaq.”

6. § 17-imi imm. 4-tut ilanngunneqarpoq:

”  Imm. 4.  Aningaaseriviit imm. 1 malillugu akileraarutit akiligassanngortut sinneri imm. 3 malillugu erniaat ilanngullugit, ukiumi ukiup aningaasarsiorfiusup tulliani kingusinnerpaamik 22. januar aki­leraaruseriffimmut nalunaarutigalugillu akilissavaat. Ilutigitillugu nassiunneqassaaq akileraarusigas­sat amerlassusiisa taakkualu ilaasa akileraaruteqaataasussat kiisalu soraarnerussutisiaqarnissamut aaqqissuussinerit akileraaruteqaataasussat § 1, imm. 1-imi pineqartut akileraarutitaasa naatsorsorne­qarnerat. Akileraarutit sippuutaasa aningaasartaat ernianik imm. 3 malillugu naatsorsukkanik ilallu­git aningaaserivimmut tunniunneqassapput.”

7. § 18-imi imm. 3-tut ilanngunneqarpoq:

”  Imm. 3.  Akileraartussaatitap naliliussat § 11, imm. 7 malillugu naatsorsorneqartut pillugit paasis­sutissat aningaaseriviup naatsorsuinissaani imm. 1-imi taaneqartumi atorneqartussat aningaaseri­vimmut tunniutissavai.”

8. § 22, imm. 5-imi oqaaseqatigiit aappaattut nutaatut ilanngunneqarput:

”Akileraarutit aningaasartaat aningaaserivimmit, §§-it 16-imit 18-imut malillugit akilerneqarsima­sut allanngortinneqarpata aningaasat nikingassutaasut ukiumi, ukiup aningaasarsiorfiusup tulliani ulloq 8. januarimit akiliisoqarnissaata tungaanut ernialersorneqassapput.”

Oqaaseqatigiit aappaanniit arfineq-aappaannut matuma kingorna tassaalerput oqaaseqatigiit pinga­juannii arfineq-pingajuannut.

9.  § 22, imm. 5-imi oqaaseqatigiit arfernat ima oqaasertaqarpoq:

”Nalinginnaasumik agguaqatigiissitsineq, tak. oqaaseqatigiit pingajuat, uniffiup kingorna ataatsimik kisitsisilerlugu naatsorsorneqassaaq.”

10. § 24-p kingornagut ilanngunneqarpoq:

” § 24 a.  Akileraartussaasup § 11, imm. 7 malillugu naliliussat aningaaserivimmut piffissaagallartil­lugu nalunaarutiginngippagit, aningaaseriviup §§-it 16 a aamma 18 malillugit naatsorsukkamik tun­niussinermut atatillugu akileraaruserivimmut ilisimatitsissutigissavaa, naliliussap pineqartut pillugit paasissutissat tiguneqarsimanngitsut. Tamanna pereerpat akileraaruseriffiup akileraartussaasoq na­lunaarfigissavaa pineqartoq § 11, imm. 7 malillugu naliliussat pillugit paasissutissanik aningaaseri­vimmut nassiussisimanngitsoq, aningaaserivillu tamatuminnga ilisimatissallugu. Akileraartussaasup § 11, imm. 7 malillugu naliliussat pillugit paasissutissat nalunaarfigineqarnermi kingorna kingusin­nerpaamik qaammatip ataatsip qaangiunnerani aningaaserivimmut nalunaarutigissavai.”

§ 2

Inatsisartut inatsisaat 1. juli 2018-imi atuutilerpoq.

  Imm. 2.  Inatsisartut inatsisaat ukiumit aningaasarsiorfiusumit 2018-imit atuutilerpoq.

Namminersorlutik Oqartussat, ulloq 28. november 2018