§ 1.  Inatsisartut inatsisaat kommuninit pigineqartut suliffeqarfinni atuuppoq.

  Imm. 2. Suliffeqarfiit kommuninit pigineqartut Inatsisartut inatsisaat matumani pineqartumi ima paasineqassapput ataatsimoorfinni, soqutigisaqaqatigiiffinni, piginneqatigiilluni ingerlatseqatigiiffinni, aktiaateqarluni ingerlatseqatigiiffinni, piginneqataassuteqarluni ingerlatseqatigiiffinni, suliffeqarfinnut imminut pigisuni kiisalu suliffeqarfeqariaatsinut assingusuni, kommunit immikkut imaluunniit ataatsimut, toqqaannartumik imaluunniit toqqaannanngitsumik suliffeqarfiup aningaasaataasigut 50 procent sinnerlugu imaluunniit taasisinnaasut 50 procentii sinnerlugit (suliffeqarfinni kommunit pigisaanni) pigisaqarfigisaanni atuuppoq.

  § 2.  Suliffeqarfik kommuninit pigineqartoq kommunalbestyrelsimit akuersissummik pigisaqarnani illunik, allaffiit illutaannik, atuarfinnik, ulluunerani paaqqinniffinni, aqqusinernik, umiarsualivinnik, mittarfinnik il.il. suliffeqarfiup allanut pisussaaffiinut qularnaveeqqusiisinnaanngilaq.

  Imm. 2.  Suliffeqarfik kommuninit pigineqartoq kommunalbestyrelsimit akuersissummik pigisaqarnani allaffiit illutaannik, atuarfinnik, ulluunerani paaqqinniffinnik, ulloq unnuarlu angerlarsimaffinnik, aqqusinernik tamanut atugassianik, umiarsualivinnik, mittarfinnik il.il. attartornissamik attartortitsinissamilluunniit isumaqatigiissuteqarsinnaanngilaq, suliffeqarfiup isumaqatigiissutinut taamaattunut ukiumoortumik aningaasartuutai tamarmiusut 5 mio. kr.-t qaangissanngippatsigit.

  Imm. 3.  Suliffeqarfik kommuninit pigineqartoq kommunalbestyrelsimit akuersissummik pigisaqarnani ukiunit pingasunit sivisunerusumik inissianik attartornissamik attartortitsinissamilluunniit isumaqatigiissuteqarsinnaanngilaq. Kommunalbestyrelsimit akuersissummik pigisaqarnani inissiat attartornerisa attartortinnerisaluunniit ukiunit pingasunit sivisunerusumik sivitsornerannik isumaqatigiissuteqartoqarsinnaanngilaq.

  Imm. 4.  Imm. 1-3 naapertorlugit akuersissutinut qinnuteqaatit imarisaat kiisalu inuiaqatigiit aningaasaqarnerannut kingunissanik nalilersuutit imarisaallu qinnuteqaatinut qaqugukkut ilanngunneqartarnissaat pillugu Naalakkersuisut erseqqinnerusunik maleruagassiorsinnaapput.

Piginnittuunermi periutsip kommunalbestyrelsimit akuerineqartup qinnuteqaatinut ilanngunneqarnissaa pillugu Naalakkersuisut erseqqinnerusunik aamma maleruagassiorsinnaapput.

  § 3.  Suliffeqarfik kommuninit pigineqartoq annikinnerpamik 25 procentimik akiliisinnaassuseqarpat kommunalbestyrelsi taamaallaat § 2, imm. 1 naapertorlugu akuersisinnaavoq, tamatumani ilanngullugit naatsorsorneqassallutik akiitsut akuersissummik qinnuteqarnermut ilanngunneqartussat. Aammattaaq pigisat il. il. taarsigassarsianut il. il. sanaartornermi, pisinermi imaluunniit inissianik, allaffiit illutaannik, atuarfinnik, ulluunerani paaqqinniffinnik, ulloq unnuarlu angerlarsimaffinni, aqqusinernik tamanut atugassianik, umiarsualivinni, mittarfinnik il. il. sanaartornermi qularnaveeqqusiunneqarnerannut taamaallaat § 2, imm. 1 naapertorlugu akuersissuteqartoqarsinnaavoq.

  Imm. 2. Taamattaaq atuisut akiliutaasa pisortallu aningaasartuutikinnerulernerisa sanaartornermi, pisinermi sananermiluunniit aningaasartuutit aningaasalersorsinnaassavaat, soorluttaaq taarsigassarsinermi il. il. ungasissumik sammisumik aningaasaqarnikkut attassisinnaassuseq pitsaanngitsumik sunnissanngikkaa.

  Imm. 3.  Kommunalbestyrelsi aatsaat § 2, imm. 2 aamma 3 naapertorlugit akuersissummik tunniussisinnaavoq, tamanna suliffeqarfiup kommuninit pigineqartup piffimmi pineqartumi sulianik ingerlatsisinnaaneranut pingaaruteqarpat.

  Imm. 4. Kommunip naatsorsuutai kommunalbestyrelsip § 2, imm. 1-3 naapertorlugit akuersissutai pillugit nalunaarsukkanik ilaqartinneqassapput.

  Imm. 5.  Nalunaarsukkat imm. 4-mi taaneqartut imarisassaat pillugit Naalakkersuisut erseqqinnerusumik maleruagassiorsinnaapput, tassungalu ilanngullugu akuersissutit qaqugukkut nalunaarsukkanit peerneqassanersut aalajangersaasinnaallutik.

  § 4.  Inatsisartut inatsisaat ulloq 1. januar 2019-imi atuutilerpoq.

Namminersorlutik Oqartussat, ulloq 28. november 2018