§ 1

Nappaatit tunillaassortut akiorniarlugit iliuutsit pillugit Inatsisartut peqqussutaat nr. 20, 12. november 2001-imeersumi makkuninnga allanngortitsisoqassaaq:

1.  § 3, imm. 1, ima oqaasertalerneqassaaq:

”  Tunillaassortunik nappaalanersuaqarneranut ataatsimiititaliarsuaq nunamut tamarmut atuuttoq pilersinneqassaaq, tassanilu ilaasortaassapput Politimesteri, Nunatta Nakorsaanera, Uumasut nakorsaasa pisortaat, Akileraartarnermi Pisortaqarfiup pisortaa kiisalu ilaasortat allat pingasut, taakkunannga marluk Naalakkersuisut toqqagaat ataaserlu kommunit peqatigiillutik toqqagaat.”

2. I § 3-mi imm. 1-ip kingorna immikkoortutut nutaatut ikkunneqassaaq:

”  Imm. 2. Kommunit ilaasortassaq ataaseq isumaqatigiissutigisinnaanngippassuk kommunit tamarmik immikkut annerpaamik inuk ataaseq tunillaassortunik nappaalanersuaqarneranut ataatsimiititaliarsuarmut inassutigisinnaavaat. Kommunit inassutigisaasa ilaat ataaseq ilaasortassatut Naalakkersuisut toqqassavaat.”

Tamatuma kingorna imm. 2-4 allanngortinneqassapput imm. 3-5-nngorlugit.

3.  § 3, imm. 3, imm. 4-nngortoq, ima oqaasertalerneqassaaq:

”  Imm. 4. Ilaasortaq, imm. 1 malillugu kommuninit, imaluunniit imm. 2 malillugu kommunit inassuteqareernerannit toqqarneqartoq ilaasortatut toqqarneqartut allat assigalugit qinigaaffimmi atuutissaaq, tak. imm. 3.”

4. Inatsisartut peqqussutaata qallunaatuuani tamarmi ”Landsstyre” aamma ”Landsstyret” ”Naalakkersuisut”-nut allanngortinneqassaaq. § 3, imm. 2-mi, imm. 3-nngortumi,”Landstinget” ”Inatsisartut”-nngorlugu, aamma ”Landstingets” ”Inatsisartuts”-nngorlugu allanngortinneqassaaq.

5. Inatsisartut peqqussutaanni tamarmi ”Peqqinnissaqarfimmik Nakkutilliisoqarfiup inassuteqarneratigut” ima allanngortinneqassaaq ”Nakorsaaneqarfiup inassuteqarneratigut”.

§ 2-mi ”Peqqinnissaqarfimmik Nakkutilliisoqarfiup tusarniaaffigereerneratigut” ima allanngortinneqassaaq ”Nakorsaaneqarfiup tusarniaaffigereerneratigut”.

§§ 9 aamma 12, imm. 2 ”Peqqinnissaqarfimmik Nakkutilliisoqarfik isumaqatiginiareerlugu” ima allanngortinneqassaaq ”Nakorsaaneqarfik isumaqatiginiareerlugu”.

6. § 4, imm. 1-imi, qallunaatuuani ”af Grønlands hjemmestyre” ima allanngortinneqassaaq ”af Grønlands Selvstyre”.

7. § 28, imm. 2, ima oqaasertalerneqassaaq:”  Imm. 2.  Aningaasartuutit, pisortatut oqartussat imm. 1, nr. 1-5-imi taaneqartut pissutigalugit aningaasartuutigisariaqarsimasaat, pigisat nalillit qularnaveeqqusiullugit akiliisitsiniarneq pingitsaaliinikkut naammassisinniarneqarsinnaatitaavoq, tak. § 598, imm. 3, Kalaallit Nunaannut Eqqartuussisarnermi inatsit.”

8. § 29-mi imm. 3-tut nutaatut ilanngunneqassaaq:

”  Imm. 3. Inatsisartut peqqussutaanni imaluunniit Inatsisartut peqqussutaa naapertorlugu maligassat saqqummiunneqartut naapertorlugit akiligassiisinnaanermik aalajangiisinnaanermik tunngaveqartumi, akiligassiissut Kalaallit Nunaanni Pinerluttulerisarnermi inatsimmi malittarisassat naapertorlugit inatsisitigut piginnaatitaasumut akiligasssiissutigineqarsinnaavoq.”

§ 2

Inatsisip saqqummiunneqareernerata aqaguani inatsisartut inatsisaat atuutilissaaq.
Imm. 2. Nappaatit tunillaassortut akiorniarlugit iliuutsit pillugit Inatsisartut peqqussutaat nr. 20, 12. november 2001-imeersumi § 3 malillugu tunillaassortunik nappaalanersuaqarneranut ataatsimiititaliarsuaq pilersinneqartoq Inatsisartunik qinersisoqarnissaata tungaanut atuutissaaq. Tunillaassortunik nappaalanersuaqarneranut ataatsimiititaliarsuarmut ilaasortaq Inatsisartunut qinersisoqarnissaa sioqqullugu tunuarpat Inatsisartut inatsisaanni matumani oqaasertalerneqartutut, Inatsisartut peqqussutaanni § 3, imm. 1-2-mi aalajangersakkat malillugit nutaamik ilaasortamik toqqaasoqassaaq.

Namminersorlutik Oqartussat, ulloq 27. november 2018