§ 1

Imaani avatangiisit illersorneqarnissaat pillugu Inatsisartut inatsisaat nr. 15, 8. juni 2017-imeersumi makkua allanngortinneqarput:

1.  § 41 imatut oqaasertalerneqarpoq:
“  § 41.  Assartuutinik piginnittut, atuisut taakkulu aquttui pisuni § 58-imi pineqartuni imaanut eqqaasimagunik imaaniluunniit ikuallaasimagunik, tamanna Naalakkersuisunut ingerlaannartumik nalunaarutigissavaat.”

2.  § 44-imi imm. 2-tut ilanngunneqarpoq:
“  Imm. 2.  Imm. 1 malillugu misissuinerni oqartussat imm. 1-imi taaneqartut uppernarsaatissanik assiliisinnaapput, assileeqqiisinnaapput tigusisinnaallutilluunniit, kiisalu pigisanik allanik akeqanngitsumik tigusisinnaapput. Pigisanut tiguneqartunut uppernarsaat tunniunneqassaaq.”

3.  § 49-imi imm. 4-tut ilanngunneqarpoq:
“  Imm. 4.  Imm. 3 malillugu misissuinerni oqartussat imm. 1-imi aamma 2-mi taaneqartut uppernarsaatissanik assiliisinnaapput, assileeqqiisinnaapput tigusisinnaallutilluunniit, kiisalu pigisanik allanik akeqanngitsumik tigusisinnaapput. Pigisanut tiguneqartunut uppernarsaat tunniunneqassaaq.”

4.  § 62, imm. 3, imatut oqaasertalerneqassaaq:
“  Imm. 3.  Piaaraluni imaluunniit annertuumik mianersuaalliorluni unioqqutitsisoqarnerani akiligassiissutaasoq annertusineqarsinnaavoq imaluunniit Kalaallit Nunaanni pinerluttulerinermut inatsit malillugu allanik pineqaatissiisoqarsinnaalluni, unioqqutitsinermi:
1)  avatangiisinik ajoqusiisoqarpat imaluunniit taamatut pisoqarnissaanut ulorianartorsiortitsisoqarpat, imaluunniit
2)  pineqartup nammineerluni allalluunniit aningaasaqarnerannut, tassungalu ilanngullugu sipaaruteqarnissamut, iluaqusiinissaq anguneqarsimappat siunnerfigineqarpalluunniit.”

5.  § 63 imatut oqaasertalerneqassaaq:
“  § 63.  Peqqussutini, § 10, imm. 3 aamma 4, § 11, imm. 2, § 12, § 15, imm. 2 aamma 3, § 16, imm. 2, § 18, imm. 3, § 19, imm. 4, § 20, imm. 4, § 21, § 26, § 30, imm. 7, § 31, imm. 5, § 32, imm. 4, § 33, imm. 1 aamma 2, § 34, § 35, imm. 1 aamma 2, § 36, imm. 3, § 42, imm. 1 aamma 2, § 43, imm. 1-3, aamma § 45, imm. 4 naapertorlugit suliarineqartuni Kalaallit Nunaanni pinerluttulerinermut inatsimmi maleruagassat naapertorlugit akiliisussanngortitsinikkut pineqaatissiissutissanik aalajangersaasoqarsinnaavoq. Kiisalu pissutsinik § 62, imm. 2-mi aamma 3-mi taaneqartunut assingusunik pisoqartillugu akiliutissap annertussusilerneqarneranik sukannernerulersitsinissaq annertusisitsinissarluunniit aalajangersarneqarsinnaavoq, imaluunniit Kalaallit Nunaannut pinerluttulerinermut inatsit malillugu allanik pineqaatissiisoqarsinnaalluni.”

§ 2

Inatsisartut inatsisaat ulloq 1. januar 2019 atuutilerpoq.

Namminersorlutik Oqartussat, ulloq 27. november 2018

Kim Kielsen