Piniarneq aallaaniarnerlu pillugit Inatsisartut inatsisaanni nr. 12, 29. oktober 1999-imeersumi, kingullermik Inatsisartut inatsisaata allanngortinnera pillugu Inatsisartut inatsisaatigut nr. 1, 16. maj 2008-meersumi, § 2, imm. 4, § 8, § 9, imm. 2, § 12, § 13, § 15, imm. 4, § 17, imm. 2 aamma § 18, naapertorlugit aalajangersarneqarput:

Kapitali 1
Atuuffia

§ 1.  Nalunaarummi uani immami Kalaallit Nunaata oqartussaaffigisaani qilalukkanik qaqortanik (Delphinapterus leucas) aamma qilalukkanik qernertanik (Monodon monoceros) illersuineq piniarnerlu pineqarpoq.

Kapitali 2
Nassuiaatit

§ 2.  Ataatsimoorluni piniarneq ima paasineqassaaq, piniartunit ataatsimoortunit ukunannga inunnit piniarnermut allagartalinnit piniarneq ingerlanneqartoq.
  Imm. 2.  Sassat ima paasineqassapput qilalukkat qaqortat qernertalluunniit sikumi ammalatami mattussaasimasut taamaalillutillu uumallutik nammineerlutik aniguisinnaanngitsut.

Kapitali 3
Eqqissisimatitsineq

§ 3.  Qilalukkat qaqortat qernertallu immani Kalaallit Nunaata oqartussaaffigisaani tamani eqqissisimatitaapput, § 4-mi taaneqartut kisiisa pinnagit.
  Imm. 2.  Imm. 1-imi aalajangersagaq sassanut atuutinngilaq.

Kapitali 4
Piniagassanut pisassiissutinik aalajangersaaneq

§ 4.  Naalakkersuisut qilalukkanik qaqortanik qernertanillu uumasoqatigiinnut ataatsinut immikkut ukiumut ataatsimut imaluunniit ukiunut arlalinnut pisassiissutinik aalajangersaassapput. Pisassiissutinik aalajangersaaneq makkua eqqarsaatigalugit pissaaq:
1)  Nunani tamalaani isumaqatigiissutit atsiorneqarsimasut pisuussutit piujuartinnissaat amerliartornissaallu siunertaralugu,
2)  biologit siunnersuutaat,
3)  atuisut ilisimasaat, aamma
4)  Piniarneq pillugu Siunnersuisoqatigiit ilaasortaanit kommuninillu tusarniaaneq.
  Imm. 2.  Pisassiissutinik taakkununngalu piumasaqaatinik aalajangersaaneq pillugu nalunaarut ugguuna www.naalakkersuisut.gl aamma tusagassiuutit aqqutigalugit tamanut saqqummiunneqassaaq.

Kapitali 5
Piniakkat killeqarfii aallaavigalugit piniarfinnik aalajangersaasoqassaaq

§ 5.  Piniakkat nunap immikkoortuinik killeqarfeqarput nassuiarneqarlutillu ilanngussaq 2 takuuk.
  Imm. 2.  Uumasoqatigiit nunap imikkoortuini qanoq killeqarfeqarnerat pillugu ilisimasat nutaanerpaat tunngavigalugit piniarfissat aalajangersarneqassapput.
  Imm. 3.  Uumasoqatigiit nunap immikkoortuini qanoq killeqarfeqarnerat aamma nunatta imartaani piniarfissanik aalajangersaaneq pillugu nalunaarut ugguuna www.naalakkersuisut.gl aamma tusagassiuutit aqqutigalugit tamanut saqqummiunneqassaaq.

Kapitali 6
Tusarniaaneq aamma piniagassanut pisassiissutinik agguaassineq

§ 6.  Piniarneq pillugu Siunnersuisoqatigiinni ilaasortat tamarmiusunik kommuninillu tusarniaareernerup kingornatigut piniakkanut pisassiissutinik agguaassineq Naalakkersuisunit suliarineqassaaq.
  Imm. 2.  Nunap immikkoortuani killeqarfiup iluani qilalukkanut qaqortanut qernertanulluunniit piniagassatut pisassiissutit, kommunikkaarlugit, ingerlatsivikkaarlugit aamma nunaqarfikkaarlugit aalajangersaavigineqarsinnaapput.
  Imm. 3.  Naalakkersuisut ukiumi pisassiiffiusumi imaluunniit ukiumi pisassiiffiusumi tulliuttumi kommunimut pisassiissutinik appaasinnaavoq, qilalukkanik qaqortanik imaluunniit qilalukkanik qernertanik  aqutsiveqarfimmi unioqqutitsisumik piniartoqartoq paasineqarpat. Uiaq pisarineqartoq qilalukkamik qaqortamik qernertamilluunniit inersimasumik ataatsimik amerlassusiliinertut atuuppoq.
  Imm. 4.  Qilalukkanik qaqortanik qernertanilluunniit nunap immikkoortuata ataatsip killeqarfiata iluani pisassiissutit atunngitsuukkat pisassiissutinut tamarmiusunut nunap immikkoortuani pineqartumi ukiup pisassiiffiusup tullianut nuunneqarsinnaapput.
  Imm. 5.  Qilalukkanik qaqortanik qernertanillu piniarnermi ukioq pisassiiffik tassaavoq Januarip 1-ianiit – Decembarip 31-anut ullut taaneqartut ilanngullugit.
  Imm. 6.  Piniarnermi ukiumoortumik pisassiissutit agguataarnerat ugguuna www.naalakkersuisut.gl aamma tusagassiorfinnut nalunaarutit aqqutigalugit tamanut saqqummiunneqassapput.

Kapitali 7
Piniarsinnaatitaasut, akuersissutinik tunniussineq agguaassinerlu

§ 7.  Nalunaarummi pineqartut naapertorlugit akuersissutinik pigisaqartut kisimik qilalukkanik qernertanik imaluunniit qaqortanik pisaqarsinnaapput.
  Imm. 2.  Akuersissut inummut atiatigut taasamut taamaallaat atuuppoq allanullu tunniunneqarsinnaanani imaluunniit tuniniarneqassanani.
  Imm. 3.  Akuersissut ataaseq ukiumi pisassiiffiusumit ataatsimit akuersissutip aqutsiveqarfimmi tunniunneqarfiani qilalukkamik ataatsimik pisaqarnissamut periarfissiivoq.
  Imm. 4.  Nunap immikkoortuini uumasoqatigiit killeqarfiisut nassuiaasimanerit akimorlugit piniarnissaq inerteqqutaavoq.
  Imm. 5.  Piniarneq aallartitsinnagu pisassiissutit aqutsiveqarfinni illoqarfinnut nunaqarfinnullu tamanut Kommunalbestyrelsimit agguaanneqassapput.

§ 8.  Nunap immikkoortuani uumasoqatigiinnut pisassiissutinik Naalakkersuisut aalajangersaanerisa iluanni qinnuteqarneq malillugu Kommunalbestyrelsi qinnuteqartunut ataasiakkaanut ataatsimoorlunilu piniarnissamut akuersissutinik tunniussisassaaq.
  Imm. 2.  Akuersissutinik agguaassinermi peqataasinnaajumalluni piffissami qinnuteqaateqarfiusussami aamma piniarnerup nalaani qinnuteqartoq:
1) inuussutissarsiutigalugu piniarnermut allagartamik atuuttumik imaluunniit sunngiffimmi piniarsinnaanermut allagartamik atuuttumik peqassaaq aamma
2) aqutsisoqarfimmi akuersissutip tunniunneqarfigisaani najugaqartutut inuit nalunaarsorsimaffianni nalunaarsorsimassaaq.
  Imm. 3.  Akuersissummik tunniussinerminut peqatigitillugu kommunalbestyrelsip immersugassiaq nalunaarummi ilanngussap 1-ip assinga akuersissummik pissarsisumut tunniutissavaa.
  Imm. 4.  Kommunalbestyrelsi piniartumut ataatsimut akuersissummik ataasiinnaanngitsumik tunniussisinnaavoq.

§ 9.  Kommunalbestyrelsi nunaqarfinni ataasiakkaani aqutsisut, najukkanilu aalisartut piniartullu peqatigiiffii kiisalu sunngiffimmi piniartartut peqatigiiffii isumasioqatigereerlugit kommunip aamma aqutsiveqarfiit qilalukkanik qaqortanik qernertanillu pisassiissutaannik inuussutissarsiutigalugu piniartunut aamma sunngiffimmi piniartartunut agguaassinissaq pillugu piumasaqaatinik aalajangersaassaaq, pisassiissutinik agguaassinissaq sioqqullugu.
  Imm. 2.  Kommunalbestyrelsi inuussutissarsiutigalugu piniartunut aamma sunngiffimmi piniartartunut ataatsimut piniarnissamut akuersissummik tunniusseqqusaanngilaq.
  Imm. 3.  Kalaallit Nunaata kitaani aqutsiveqarfimmi qilalukkanut qaqortanut qernertanullu pisassiissutit 10 procentii angullugit sunngiffimmi piniarsinnaatitaasunut tunniunneqarsinnaapput.
  Imm. 4.  Kangiani aqutsiveqarfinni qilalukkanut qaqortanut qernertanullu pisassiissutit 15 procentii angullugit sunngiffimmi piniarsinnaatitaasunut tunniunneqarsinnaapput.

§ 10.  Kommunalbestyrelsi kommunimi ileqqoreqqusakkut pisassiissutit ataatsimoorluni piniarneqarnissaat pillugu malittarisassanik aalajangersaasinnaavoq. Ataatsimoorluni piniarnermi pisassiissutinik sippuinnginnissaq Kommunalbestyrelsimik imaluunniit taamaasiorsinnaanissamut piginnaatinneqarsimasunik qulakkeerneqassaaq.
  Imm. 2.  Inuussutissarsiutigalugu piniarnermut allagartamik atuuttumik imaluunniit sunngiffimmi piniarsinnaanermut allagartamik atuuttumik peqartut kisimik ataatsimoorluni piniarnermut peqataasinnaatitaapput.
  Imm. 3.  Ataatsimoorluni piniartoqassatillugu piniarnermut naalakkatut toqqarneqartumut akuersissuteqartoqassaaq. Ataatsimoorluni piniarnermut naalagaq peqataasullu sinnerisa aqqi inuuiilu akuersissummut allanneqassapput.
  Imm. 4.  Kommunalbestyrelsi pisassiissutigineqartunik nakkutilliissaaq, pisassiissutigineqartunik atuineq malittareqqissaarneqassaaq piniarnerlu ingerlaannartumik tusagassiuutinut nalunaaruteqarnikkut unitsinneqassalluni, kommunimut pisassiissutit imaluunniit aqutsiveqarfimmut pisassiissutit tamakkerneqarpata.
  Imm. 5.  Kommunalbestyrelsi kommunimut pisassiissutigineqartut imaluunniit aqutsiveqarfimmut pisassiissutigineqartut tamakkerlugit pisarineqarpata ingerlaannaq tusagassiuutinut nalunaarutip assinga nassiullugu Aalisarnermut Piniarnermullu Naalakkersuisoqarfimmut saaffiginnissaaq.

§ 11.  Kommunalbestyrelsi pisaqarnissamut akuersissutit aaneqarnissaannut piffissamik killiliisinnaavoq.
  Imm. 2.  Piniartut akuersissummik tunineqarsimasut akuersissummilli atuisinnaanngitsut imaluunniit atuerusunngitsut, piaarnerpaamik akuersissut atorneqanngitsoq Kommunalbestyrelsimut imaluunniit taamaasiorsinnaanissamut piginnaatinneqarsimasunut utertissavaat.
  Imm. 3.  Akuersissutit piffissaliussatut killiliussap iluani aaneqanngitsut, sumiiffimmi aqutsiviup iluani pisortatigoortumik utaqqisunut allattorsimaffik naapertorlugu agguaateqqinneqarsinnaapput.
  Imm. 4.  Akuersissutit Kommunalbestyrelsip piffissaliussaa naapertorlugu atorneqarsimanatillu aaneqarsimanngitsut agguaanneqaqqissinnaapput, tamatumalu kingornatigut siusinnerusukkut akuersissummik piginnittumit atorneqarsinnaassanatik.
  Imm. 5.  Tamatuma kingornatigut akuersissutit kommunip iluani immikkut piniakkanut pisassiissutit aalajangiunneqareernikut aamma kommunip ileqqoreqqusaliaanut tunngatillugu aalajangersakkat naapertorlugit agguaateqqinneqassapput. Agguaasseqqinnermut piffissaliussaq piffissap piniarfiusussap aallartinnginnerani kommunalbestyrelsip nalunaarutigissavaa aamma tamanna akuersissummi takuneqarsinnaassaaq.
  Imm. 6.  Kommunini aamma sumiiffinni aqutsivinni pineqartuni najukkani aalisartut piniartullu peqatigiiffiinik tusarniaareernerup kingornatigut agguaasseqqinneq ingerlanneqassaaq.

Kapitali 8
Piniariaatsit

§ 12.  Qilalukkanik qaqortanik qernertanillu piniarnermi taamaallaat qoorortuut akuerisaasut minnerpaamik .30-06 (7,62x63 mm)-mik sulloqqortussusillit atorneqassapput. Qoorortuunik eqittaannartakkanik atuineq inuussutissarsiutigalugu piniarnermut allagartalinnut ajornartitaanngilaq.
  Imm. 2.  Ajornartinnagu qilalugaq qaqortaq qernertarluunniit nangillugu toqussutissaanik aallaaneqartinnagu naalillugu annaanaveerneqassaaq.
  Imm. 3.  Qilalukkanik qaqortanik qernertanillu piniarnermut atatillugu qassutinik nigartap tamakkerluni iluatungimigut nerutussusianik minnerpaamik 380 mm-inik atuinissaq, taamaallaat Qaanaap aqutsiveqarfiani kiisalu Kangiani sumiiffinni aqutsiveqarfinni ajornartitaanngilaq. Qassutit atorneqartut piginnittup aqqanik nalunaaqutserneqarsimassapput, minnerpaamillu ullormut ataasiarlugu alakkarneqartassallutik piniarnermilu atorneqareernermik kingornatigut qaqinneqassallutik.
  Imm. 4.  Qassutit atorlugit imm. 3-mi nassuiaatit naapertorlugit qilalukkanik qaqortanik qernertanillu piniarnermi, qilalugaq qaqortaq qernertarluunniit qassuteqarfimmut apuunnermi suli uumasoq aallaaneqarluni imaluunniit naalinneqarluni toqunneqassaaq.
  Imm. 5.  Aqutsiveqarfinni qilalukkanik qaqortanik imaluunniit qilalukkanik qernertanik piniarnermut atatillugu atorneqarfiini, kommunalbestyrelsi qassusersorluni piniarneq pillugu kommunimi ileqqoreqqusamik suliaqassaaq.
  Imm. 6.  Qilalukkanik qaqortanik aamma qernertanik piniarneq Qimusseriarsuarmi eqqissisimatitsivik 1-ip iluani qajaq atorlugu ingerlanneqassaaq. Qaqortat imaluunniit qernertat aallaaneqartinnagit naalinneqassapput.
  Imm. 7.  Eqqissisimatitsiviup 2-p iluani eqqissisimatitsineq tamanut atuuppoq.

§ 13.  Timmisartut, qulimiguullit qamutillu motoorinik ingerlatillit suugaluartulluunniit qilalukkanik qaqortanik qernertanillu piniarnermut atatillugu imaluunniit piniarfimmut tassanngaannillu angallatitut atoqqusaanngillat.

§ 14.  Taamaallaat angallatit, angallatip angissusianut uppernarsaat malillugu 15 meterinik takissuseq tamakkerlugu (t.t.) takitigisut taassuminngaluunniit mikinerusut, qilalukkanik qaqortanik qernertanilluunniit piniarnermut atatillugu atorneqassapput.
  Imm. 2.  Angallatini GR-normulinni 15 meterinik takissusillit taassuminngaluunniit mikinerusut aalajangersimasumik inuttat angallammik piginnittoq sinnerlugu piniarsinnaapput.

Ungusineq

§ 15.  Ungusilluni piniarnerit tamarmik soorlu sinerissamut patugullugit aninaveersitsineq imaluunniit sinerissamut, kangerlummut sikup sinaavanulluunniit tatisillugit assiinerit inerteqqutaapput.

Kapitali 9
Naalakkersuisoqarfimmit akuerineqareernerup kingornatigut toqutsineq

§ 16.  Aalisarnermut Piniarnermullu Naalakkersuisoqarfimmit akuerineqareernikkut qilalukkanik qaqortanik qernertanilluunniit annertuumik ikilerneqarsimasunik, qilalukkanik qaqortanik qernertanilluunniit aalisarnermut atatillugu qassutinut imaluunniit aalisarnermut atortunut allanut nuiguussimasunik toqutsisoqarsinnaavoq.
  Imm. 2.  Qilalukkamik qaqortamik qernertamilluunniit akuerisaasumik pisaqareernerup kingunerisaanik paasineqarpat pisaq nappaammik imaluunniit assigisaanik pissuteqartumik inunnut nerisassatut naleqquttuunngitsoq, tamatuma kingunerisaanik Aalisarnermut Piniarnermullu Naalakkersuisoqarfiup pisap toqunneqartutut isigineqarnera akuerisinnaavaa. Akuersissut atorneqarsimappat taanna atuutiinnassaaq.
  Imm. 3.  Imm. 1 naapertorlugu piniakkat toqunneqartut najukkami innuttaasunut agguaanneqarsinnaapput, pisaq nerisassatut naleqquppat. Saarngit aamma kigutit (tuugaaq) Aalisarnermut Piniarnermullu Naalakkersuisoqarfiup pigisarai, toqunneqarneratalu kingornatigut kingusinnerpaamik ullut 14-t qaangiunneranni uunga Postboks 269, 3900 Nuuk, nassiunneqassallutik. Nassitsinermut atatillugu aningaasartuutit Aalisarnermut Piniarnermullu Naalakkersuisoqarfiup akilissavai.

Kapitali 10
Sassat

§ 17.  Sassanik naammattuuisoqarpat tamanna najukkami oqartussaasumit Aalisarnermut Piniarnermullu Naalakkersuisoqarfimmut uppernarsarneqassaaq. Sassineq Naalakkersuisoqarfimmit akuerineqaqqaarani aallartinneqassanngilaq, aatsaallu nalilerneqarpat qilalukkat aniguisinnaanerat ilimananngitsoq. Akuersissut kommunalbestyrelsimut imaluunniit sumiiffimmi aqutsiviusumi najukkani oqartussaasunut nalunaarutigineqassaaq, tamatuma kinguninngua nunaqarfiit illoqarfiillu pineqartut ilisimatinneqassallutik.
  Imm. 2.  Kikkulluunniit inuussutissarsiutigalugu piniarsinnaanermut imaluunniit sunngiffimmi aallaaniarsinnaanermut atuuttumik allagartallit sassinermi peqataasinnaapput. Sassinermi pisat piniartut ataasiakkaat qilalukkanik qaqortanik qernertanilluunniit pisassaannit imaluunniit sumiiffimmi aqutsiviusumi pisassanit ilaatinneqassanngillat.
  Imm. 3.  Sassinermi pisat ima amerlatigisinnaapput kingusinnerpaamik sassinerup naammassinerata kingornatigut pisat tamakkerlutik qularnaatsumik qimussimik angallanneqarsinnaassallutik.
  Imm. 4.  Taamaattorli pisuni immikkut ittuni silap sikullu pissusii pissutigalugit pisat tuaviortumik immikkullu ittumik angerlaassorneqartariaqalersillugit sassivimmiit qamuteralaat angerlaassuinermi atorneqarnissaannut kommunalbestyrelsi immikkut akuersissuteqarsinnaavoq.

§ 18.  Neqit, mattaat orsullu nalunaaqutsikkat qilalukkallu pitutat piginnittui akuersitinnagit nikisinneqassanngillat, kommunalbestyrelsi imaluunniit sumiiffimmi aqutsiviusumi najukkami oqartussaasut sila pissutigalugu pisat angerlaannissaannut tunngatillugu, piffissamik aalajangiisimanngippata piffissaliussarlu taanna eqqortinneqarsimanngippat.

Kapitali 11
Pilanneq

§ 19.  Qilalugaq nunamut sikumulluunniit qaqiinnavillugu pilanneq aallartinneqassaaq. Nerisassartai atorneqarsinnaasullu allat tamarmik angerlaanneqarlutilluunnit qimatulineqassapput. Pilaffiusimasoq perlukuiarneqarsimassaaq. 
  Imm. 2.  Iliveqqiviit najukkami piniarnermut aalisarnermullu nakkutilliisumut kommunilluunniit allaffianut nalunaarutigineqassapput.
  Imm. 3.  Taamaallaat angallatit, angallatip angissusianut tamakkiisumut uppernarsaat malillugu 15 meterinik t.t.-mik takissusillit taannaluunniit inorlugu angissusillit angallatip nammineq pisaanik pilaffigineqarsinnaapput.

Kapitali 12
Saniatigut pisat aamma pissaaneq

  § 20.  Qilalukkanik qaqortanik imaluunniit qilalukkanik qernertanik saniatigut pisat kommunip imaluunniit sumiiffiup aqutsiviusup pisassaanit ilanngaatigineqassapput.
 Imm. 2.  Qilalukkanik qaqortanik qernertanilluunniit pissaasoqartillugu sapinngisamik piaarnerpaamik piniarnermik aalisarnermillu nakkutilliisoq kommunilluunniit allaffia tamanna pillugu attavigineqassaaq aamma pissaaneq kommunimi imaluunniit sumiiffimmi aqutsiviusumi pisassiissutinit ilanngaatigineqassaaq. Saniatigut pisarisuukkat Aalisarnermut Piniarnermullu Naalakkersuisoqarfimmut nalunaarutigineqassapput.

Kapitali 13
Tunisinermi piumasaqaatit

§ 21.  Qilalukkat qaqortat qernertallu pisat, tassanilu ilaapput akuerineqaqqaareersumi sassinermi pisat, tunineqassanngillat kommunimi imaluunniit nunaqarfimmi allaffik akuersissummik naqissusiinikkut ullulerlugu pisamik nalunaarsuereertinnagu.
  Imm. 2.  Qilalukkat qaqortat qernertalluunniit unioqqutitsinikkut pisarineqarsimasut mattaannik, neqaannik aamma kigutaannik (tuugaavinik) pisineq, tunisineq imaluunniit pissarsineq inerteqqutaavoq.
  Imm. 3.  Pisarineqartumit taassumaluunniit ilaanit tunisineq imaluunniit pisineq aatsaat pisinnaavoq akuersissummik piginnittup akuersissutip assilinerani uppernarsarlugu atsiorpagu. Taanna tuniniaasoqartillugu qinnuigineqarnikkut takutinneqarsinnaassaaq. Assilinerani takuneqarsinnaassaaq pisap kommunimi oqartussaasumit nalunaarsorneqarsimanera.
  Imm. 4.  Taamaattoq kommunip allaffia nunaqarfimmiluunniit allaffiup ammanerisa avataatigut tuniniaaneq ingerlanneqarsinnaavoq, allaffik ammarniariartoq nalunaarsuisoqarsinnaappat.

Tunisineq

§ 22.  Qilalukkat qaqortat qernertallu neqaannik, orsuinik, mattaannik, qilalukkat qaqortat qernertallu ilaannik kiisalu qilalukkat qernertat tuugaavanilluunniit angallatit tunitsivittut atorneqassanngillat.
  Imm. 2.  Tunitsivinnut akuerisaasunut inuussutissarsiutigalugu piniartut, inuussutissarsiutigalugu piniarnermut atuuttumik allagartallit akuersissumillu naqissusersimasumik takutitsisinnaasut kisimik pisanik tunisisinnaapput.
  Imm. 3.  Naalakkersuisut kommuninut pisassiissutini pisassiissutinik tunisassanik aalajangersaasinnaapput, kommunini piniarsinnaanermut pisassiissutinik tunineqarsimasuni.
  Imm. 4.  Tunisinissamut atatillugu pisassiissutinik aalajangersaasoqarsimatillugu, tunitsiviit ullormut tunisat annertussusiat pillugu paasissutissanik Aalisarnermut Piniarnermullu Naalakkersuisoqarfimmut nassitsissapput, tunisinerup akuerisaanerata atuunnerani.
  Imm. 5.  Aalisarnermut Piniarnermullu Naalakkersuisoqarfiup kommunimi pineqartumi imaluunniit sumiiffimmi aqutsiviusumi tunitsivimmut tunisinerup qaqugu uninnissaa nalunaarutigissavaa.

Tuniniaaneq

§ 23.  Igaffissuaqarfinnut, neriniartarfinnut, sullissiveqarfinnut assigisaannulluunniit, kiisalu najukkani kalaalimineerniarfinniit tuniniaanerit aamma inuinnarnut tunisaqartarnerit taamaallaat inuussutissarsiutigalugu piniartunit inuussutissarsiutigalugu piniarnermut allagartamik atuuttumik pigisaqartumit isumagineqarsinnaavoq aamma akuersissummi § 21 imm. 1 naapertorlugu naqissuserneqarsimasunik takutitsisinnaasumit, imaluunniit taamaasiorsinnaanissamut piginnaatinneqarsimasunik qinnuigineqarnerminni uppernarsaatinik takutitsisinnaasunik.
  Imm. 2.  Suliffeqarfinnut toqqaannartumik tuniniaaneq taamaallaat inuussutissarsiutigalugu piniartunit inuussutissarsiutigalugu piniarnermut allagartamik atuuttumik peqartumit isumagineqarsinnaavoq aamma akuersissummik allagartamilluunniit § 21-mi imm. 1 aamma 2 naapertorlugit naqissuserneqarsimasunik takutitsisinnaasumit, imaluunniit taamaasiorsinnaanissamut piginnaatinneqarsimasunik qinnuigineqarnerminni uppernarsaatinik takutitsisinnaasunik.
  Imm. 3.  Igaffissuaqarfiit, neriniartarfiit, sullissiveqarfiit assigisaallu imm. 1-imi taaneqartut, kiisalu suliffeqarfiit imm. 2-mi taaneqartut uppernarsarsinnaassavaat neqi, tuugaaq, orsoq, mattallu inuussutissarsiutigalugu piniartunit inuussutissarsiutigalugu piniarnermut atuuttumik naqissuserneqarsimasunik allagartalinnit akuersissutilinniilluunniit pisisimanertik uppernarsarsinnaassavaat, § 21, imm. 3 naapertorlugu.
  Imm. 4.  Imm. 1-imiit 3-mut naapertorlugit uppernarsaat, akiligassaavoq atsiorneqarsimasoq inuussutissarsiutigalugu piniarnermut allagartamik atuuttumik nuutinneqarsimasumik naqissuserneqarsimasumik akuersissutitalik allagartalilluunniit.
  Imm. 5.  Taamaallaat inuussutissarsiutigalugu piniarnermut allagartamik atuuttumik aamma akuersissummik naqissusikkamik peqartut, takuuk § 21, imm. 1, qilalukkat qernertat tuugaavinik imaluunniit qilalukkap qaqortap kigutaanik tunisisinnaapput. Allagartaq akuersissutip normutalik tuugaamut ilivitsumut allunaasartalerlugu ikkunneqassaaq.

 
Kapitali 14
Nalunaaruteqarneq nakkutilliinerlu

§ 24.  Qilalukkanik qaqortanik qernertanillu pisat, saniatigut pisat pissatallu sapinngisamik piaarnerpaamik kommunimut angerlarsimaffigisamut, illoqarfigisamut imaluunniit nunaqarfimmi allaffimmut nalunaarutigineqassapput. Nalunaaruteqarneq piniartumit pisaqartumit namminermit isumagineqassaaq, sassinermili pisat, inuussutissarsiutigalugu piniartut eqqarsaatigalugit najukkami Aalisartut Piniartullu Peqatigiiffiannit aamma sunngiffimmi aallaaniartartut pineqartillugit kommunalbestyrelsimit/nunaqarfinni aqutsisunit nalunaarutigineqassallutik. Ataatsimoorluni piniarnermi pisat nalunaarutigineqassapput taamaallaat ataatsimoorluni piniarnermut atatillugu aqutsisussatut toqqarneqarsimasumit.
  Imm. 2.  Pisamik nalunaaruteqarnermi immersugassaq nalunaarummut ilanngussap 1 atorneqassaaq. Qilalukkanut pisanut pissatanullu ataasiakkaanut tamanut immersuiffissaq ataaseq immersorneqassaaq, taamaattorli sassinermi pisat tamarmik immersuiffissami ataatsimi nalunaarutigineqassallutik.  Akuersissut kommunimit naqissusikkap assilinera pisanik nalunaarutiginninnermi ilanngunneqassaaq.
  Imm. 3.  Aammattaaq qilalukkanik qaqortanik qernertanillu pisat tamarmik Piniarneq-mi www.sullissivik.gl-imiluunniit pisanik nalunaarsuiffimmi nalunaarutigineqassapput.
  Imm. 4.  Kommunalbestyrelsip nalunaarummi ilanngussami 1-imi immersuiffiit kiisalu § 21, imm. 1 naapertorlugu akuersissutit naqissusikkat assingi tiguneqarnerisa kinguninngua piaarnerpaamik Aalisarnermut Piniarnermullu Naalakkersuisoqarfimmut nassiutissavai.

§ 25.  Inuussutissarsiutigalugu piniarnermut allagartaq atuuttoq imaluunniit sunngiffimmi piniarsinnaanermut allagartaq atuuttoq aamma akuersissut imaluunniit tunisisinnaanermut akuersissut sukkulluunniit politiit, piniarnermik aalisarnermillu nakkutilliisut tamatumunngalu piginnaatitaasut piumasaqarnerisigut takutinneqartassaaq.

Kapitali 15
Misissugassat nalunaaqutsersuinerlu

§ 26.  Aalisarnermut Piniarnermullu Naalakkersuisoqarfik kinaluunniit qilalukkamik qaqortamik qernertamilluunniit pisaqarsimasoq, pisussaatissinnaavaa pisap mattaanik, neqaanik anginngitsumik imaluunniit kigutaata ilaanik misissugassanik kommunip allaffianut tunniussinissamik, tassani pisap suunera, ulloq sumilu pisarineqarsimanera pillugu ilisimatitsissutigalugu. Misissugassat Pinngortitaleriffiup plastik-imik puussarititamut tunniunneqarsimasumut asiunaveersaammik imerpalasortalimmut imaluunniit allakkap puuanut ikineqassapput. 
  Imm. 2.  Kommunip allaffiata misissugassat paasissutissallu tiguneqareernerisa kinguninnguatigut Pinngortitaleriffik, Box 570, 3900 Nuummut nassiutissavai. Nassiussinermut aningaasartuutit Pinngortitaleriffiup akilissavai.

§ 27.  Misissugassanik tigusineq, nalunaaqutsersuineq suliallu allat qilalukkanik uumasunik attuumassuteqartut taamaallaat Pinngortitaleriffimmit ingerlanneqarsinnaapput. Allat Aalisarnermut Piniarnermullu Naalakkersuisoqarfimmut akuersissuteqarnissamik qinnuteqaqqaassapput.
  Imm. 2.  Imm. 1 naapertorlugu pisat Aalisarnermut Piniarnermullu Naalakkersuisoqarfimmut nalunaarutigineqassapput.
  Imm. 3.  Naalakkersuisut qilalukkanut qaqortanik qernertanillu piniarnermut atatillugu piumasaqaatinik aalajangersaasinnaavoq, tassunga ilanngullugu ilisimatuussutsikkut misissuinernut atugassanik qilalukkap qaqortap qernertallu ilaanik tunniussisarnissamut.

Kapitali 16
Immikkut akuerineqarneq

§ 28.  Aalisarnermut Piniarnermullu Naalakkersuisoqarfik ilisimatusarnermut atugassanik nalunaarummi matumani aalajangersakkanik immikkut saneqqutsisoqarnissaanut akuersissuteqarsinnaavoq.

Kapitel 17
Pineqaatissiissutit

§ 29.  § 3, § 7, § 10, imm. 2, §§ 12-13, § 14, imm 1, § 15, § 16, imm. 1,  imm. 3, §§ 17-26-mik unioqqutitsinerit akiliisitsinermik aamma pisamik arsaarinnissuteqarnermik Kalaallit Nunaanni pinerluttulerinermik inatsit malillugu pineqaatissiissutaasinnaapput.
  Imm. 2.  Nalunaarut malillugu kommunimi ileqqoreqqusanik atortussanngortinneqarsimasunik unioqqutitsisoqartillugu akiliisitsinermik pisanillu arsaarinninnermik Kalaallit Nunaanni pinerluttulerinermik inatsit malillugu pineqaatissiisoqarsinnaavoq. Arsaarinnittarneq eqqarsaatigalugu tamanna pillugu Pinerluttulerinermik inatsimmi malittarisassat atuupput.
  Imm. 3.  Akiliisitsissut Nunap Karsianut nakkartinneqassapput.

Kapitali 18
Atuutilersitsineq

§ 30.  Nalunaarut ulloq 1. februar 2017 atuutilerpoq. Ilutigitillugu Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 1, 15 januar 2016-imeersoq atorunnaarpoq. Taamaakkaluartoq kommunip ileqqoreqqusai nalunaarut malillugu atulersinneqartut allanngortinneqarnissamik atorunnaarsinneqarnissamilluunniit tungaannut atuutiinnarallassapput.

Namminersorlutik Oqartussat, ulloq 27. januar 2017

Hans Enoksen

/

Jørgen Isak Olsen