§ 1

Kalaallit Nunaata Aatsitassarsiornermi Aningaasaateqarfia pillugu Inatsisartut inatsisaanni nr. 6, 5. december 2008-meersumi, Inatsisartut inatsisaanni nr. 25, 9. december 2015-imeersukkut allanngortinneqartumi, ima allannguuteqartoqassaaq:

1.  Inatsisartut Inatsisaata danskisuuani sumiluunniit “landstingsfinanslov” allanngortinneqassaaq imaalillugu: “Inatsisartutfinanslov”, “landstingsfinanslove” allanngortinneqassaaq imaalillugu: “Inatsisartutfinanslove”, “landstingsfinansloven” allanngortinneqassaaq imaalillugu: “Inatsisartutfinansloven” aamma “Landstingsfinansloven” allanngortinneqassaaq imaalillugu: “Inatsisartutfinansloven”.   

2.  § 2, imm. 2, nr. 3, ima oqaasertalerneqassaaq:
“3)  Inatsisartut inatsisaanni matumani maleruaqqusat aamma Inatsisartut aningaasanut inatsisai imaluunniit ilassutitut aningaasaliissutai aalajangersarneqartut naapertorlugit aningaasaateqarfiup aningaasaataasa Namminersorlutik Oqartussat aatsitassarsiornermut aningaasaliissutaannut, aatsitassarsiornermut aningasartuutaanut aamma suliassanut naalagaaffimmit utertinneqartunut aningaasartuutaannut matussusiissutitut atorneqassasut qulakkiissallugu.”

3.  § 2, imm. 2, nr. 4, ima oqaasertalerneqassaaq:
”4)  Inatsisartut inatsisaanni matumani maleruaqqusat malillugit aamma inatsisartut aningaasanut inatsisaanni imaluunniit ilassutitut aningaasaliissutini akuersissutigineqartut malillugit aningaasaateqarfiup aningaasaatai aamma aningaasaateqarfiup aningaasaataanit pissarsiat tamatuma saniatigut taamaallaat Namminersorlutik Oqartussanut akilerneqartassasut qulakkiissallugu, aamma”

4.  § 2, imm. 2, nr. 5, ima oqaasertalerneqassaaq:
”5)  piffissaq ungasinnerusoq eqqarsaatigalugu inuiaqatigiit aningaasaqarneranni pissarsiat sapinngisamik annertunerpaat aamma sunniutissat sapinngisamik iluaqutaanerpaat inuiaqatigiinnit kalaallinit anguneqarnissaannut aningaasaateqarfimmi aningaasaatit kiisalu aningaasaateqarfiup aningaasaataanit pissarsiat atorneqarnissaannut qulakkeerinninnermut peqataassasut.”

5.  § 3, imm. 6-ip kingornatigut immikkoortoq nutaaq ilanngunneqassaaq:
“  Imm. 7.  Pissarsiatut paasineqassapput aningaasaateqarfiup aningaasaataasa ukiumi aningaasanut inatsiseqarfiusumi ataatsimi arlalinniluunniit naleerukkiartornerisa kingorna ukiumi aningaasanut inatsiseqarfiusumi pineqartumi imaluunniit pineqartuni aningaasaateqarfiup allaffissorneranut ingerlanneranullu ilanngaateqareerluni pissarsiat nalinginnaasut (pissarsiaviit).”

6.  § 4-mi imm.1 Inatsisartut inatsisaata danskisuuani ”Fonden formue opbygges af” allanngortinneqassaaq imaalillugu:”Fondens formue opbygges af”

7.  Kapitali 4-mi kapitalip qulequtaa ima oqaasertalerneqassaaq:

”Aningaasaateqarfimmi aningaasaanik aamma aningaasaanit pissarsianit Namminersorlutik Oqartussanut nuussisarneq”

8.  § 6, imm. 2. Ima oqaasertalerneqassaaq:
“  Imm. 2.  Aningaasaateqarfiup isumagissavaa Namminersorlutik Oqartussat aningaasaliissutaat aamma aningaasartuutaat imm. 1-imi taaneqartut aningaasaateqarfiup aningaasaataanit pissarsianit matussuserneqartarnissaat,  maleruaqqusat Inatsisartut Inatsisaaniittut malillugit kiisalu Inatsisartut aningaasanut inatsisaanni imaluunniit ilassutitut aningaasaliissutinik akuersissuteqarsimanerit naapertorlugit, taamaattorli tak. imm. 3 aamma 4.”

9.  § 6-imi imm. 2-p kingornatigut immikkoortutut nutaatut ilanngunneqassapput:
“  Imm. 3.  Aningaasaateqarfik ukiumi aningaasanut inatsiseqarfiusumi taamaallaat Namminersorlutik Oqartussanut pissarsianik imm. 2 malillugu tunniussisinnaavoq Namminersorlutik Oqartussat ukiumi aningaasanut inatsiseqarfiusumi aningaasaliinerannut aamma aningaasartuutaannut imm. 1-imi taaneqartunut matusissutissatut. Tamatuma saniatigut imm. 2 malillugu aningaasaateqarfik Namminersorlutik Oqartussanut ukiumi aningaasanut inatsiseqarfiusumi pissarsianik tunniussisinnaanngilaq, ukiumi aningaasanut inatsiseqarfimmi pineqartumi pissarsiat katillugit ukiuni aningaasanut inatsiseqarfiusuni kingullerni tallimani ukiumut agguaqatigiissillugu pissarsiat angunngippagit, taamaattorli tak. imm. 4. 
  Imm. 4.  Naalakkersuisut aalajangersaasinnaapput aningaasaateqarfiup pissarsiaanik imm. 2 aamma 3 malillugit Namminersorlutik Oqartussanut tunniussinissaanut, imatut annertussuseqartunik ukiumi aningaasanut inatsiseqarfiusumi aningaasat katillugit tunniunneqartut, katillugit pissarsianit annertunerussanngillat, tassa ukiuni kingullerni 5-ini isertitarineqarsimasunit aamma Namminersorlutik Oqartussanut tunniunneqarsimanngitsunit ukioq aningaasanut inatsiseqarfiusoq pineqartoq sioqqullugu.”

Tamatuma kingornatigut imm. 3-6 tassaalerput imm. 5-8.

10.  § 6, imm. 3, imm. 5-inngortoq ima oqaasertalerneqassaaq:
“  Imm. 5  Aningaasaateqarfiup aningaasaataanit pissarsiat imm. 1-imi aningaasaliinernut aningaasartuutinullu taaneqartunut matusissutitut atorneqarnerat ilutigalugit, taava aningaasaateqarfiup isumagissavaa aningaasaateqarfimmit pissarsiat Nunatta Karsianut nuunneqarnissaat Inatsisartut Aningaasanut Inatsisaata imaluunniit ilassutitut aningaasaliissutit akuersissutigineqareernerisa kingornatigut kingusinnerpaamik qaammatit marluk qaangiunneranni, taamaattorli ukiumi aningaasanut inatsiseqarfiusumi pineqartumi siusinnerpaamik 1. januaarimi. Aningaasaqarnermut imaluunniit niuernermut tunngassuteqartut, tamatumunnga ilanngullugit pissutsit ingerlatsinermut aamma aningaasaateqarfiup aningaasaataanit aamma aningaasaateqarfiup aningaasaataanit pissarsianit aningaasaliissuteqarnermut tunngasut, tamanna pisinnaatippassuk, taava Naalakkersuisut aningaasaateqarfiup siulersuisuisa inassuteqaataat naapertorlugu aalajangersarsinnaavaat, nuussinerup kingusinnerusukkut pisinnaanera, taamaattorli Inatsisartut Aningaasanut Inatsisaata imaluunniit ilassutitut aningaasaliissutit akuersissutigineqareernerisa kingornatigut qaammatinit 6-init kingusinnerunngitsumik.  

11.  § 7-imi imm. 1-4, ima oqaasertalerneqassapput:
“  § 7.  § 6-imi taaneqartut eqqassanngikkaanni aningaasaateqarfiup aningaasaatai aamma aningaasaateqarfiup aningaasaataanit pissarsiat Namminersorlutik Oqartussanut taamaallaat akilerneqarsinnaapput Inatsisartut inatsisaanni matumani maleruaqqusat malillugit aamma Inatsisartut Aningaasanut Inatsisaasa imaluunniit ilassutitut aningaasaliissutaasa akuersissutigineqarneri tunngavigalugit, taamaattorli tak. imm. 2.
  Imm. 2. Aningaasaateqarfiup aningaasaatai aamma aningaasaateqarfiup aningaasaataanit pissarsiat Namminersorlutik Oqartussanut akilerneqassanngillat piffissaq tassaasoq, Namminersorlutik Oqartussat ukiumi aningaasanut inatsiseqarfiusumi aatsitassanit isertitaat siullermeertumik ima annertussuseqalersimatigippata, tamatuma kinguneralugu Namminersorlutik Oqartussanut naalagaaffimmit ataatsimoortumik tapiissutit ikilisinneqarlutik, tassa Namminersorlutik Oqartussat aatsitassanit isertitaat aamma ataatsimoortumik tapiissutit pillugit pisinnaatitaaffiat pillugu inatsit naapertorlugu. Piffissap taassuma kingorna aningaasaateqarfiup aningaasaatai aamma aningaasaateqarfiup aningaasaataanit pissarsiat taamaallaat Namminersorlutik Oqartussanut tunniunneqarsinnaapput, ukiumi aningaasanut inatsiseqarfiusumi Namminersorlutik Oqartussat aatsitassanit isertitaat naalagaaffimmit Namminersorlutik Oqartussanut ataatsimoortumik tapiissutit ikilisinneqarnerannit kinguneqarpat, taamaattorli tak. imm. 3.  
  Imm. 3. Ukiumi aningaasanut inatsiseqarfiusumi Namminersorlutik Oqartussat aatsitassanit isertitaat siullermeertumik ima annertutigilerpata, tamatuma kinguneralugu Namminersorlutik Oqartussanut naalagaaffiup ataatsimoortumik tapiissutaat atorunnaarlutik, taava aningaasaateqarfiup aningaasaataanit aamma aningaasaateqarfiup aningaasaataanit pissarsianit Namminersorlutik Oqartussanut akilerneqartartut annertunerusinnaapput, Namminersorlutik Oqartussat ukiumi aningaasanut inatsiseqarfiusumi aamma ukiuni tulliuttuni isertitaasa ikilisinneqarneranni Namminersorlutik Oqartussanut naalagaaffiup ataatsimoortumik tapiissutaasa ikilisinneqarnerisigut.
  Imm. 4.  Inatsisartut aningaasanut inatsisaanni imaluunniit ilassutitut aningaasaliissutini aalajangersarneqarpat aningaasaateqarfiup aningaasaataasa ilaat imaluunniit aningaasaateqarfiup aningaasaataannit pissarsiaasa ilaat Namminersorlutik Oqartussanut tunniunneqassasut, aningaasaateqarfiup aningaasat nunatta karsianut akiliutigissavai, imm. 1 aamma 2-mi piumasaqaataasut eqquutsinneqarsimappata. Inatsisartut aningaasanut inatsisaata imaluunniit ilassutitut aningaasaliissutit akuerineqarnerisa kingorna kingusinnerpaamik qaammatit marluk qaangiunnerini akiliineq pissaaq, taamaattorli ukiumi aningaasanut inatsiseqarfiusumi pineqartumi siusinnerpaamik 1. januaari. Aningaasaqarnermut niuernermullu tunngasut, tamatumunnga ilanngullugit aningaasaateqarfiup aningaasaataanik aamma aningaasaateqarfiup pissarsiaanik aqutsinerup aamma aningaasaliisarnermut pissutsit tamanna ajornartinngippassuk, taava Naalakkersuisut aningaasaateqarfiup siulersuisuisa inassuteqaataat naapertorlugu aalajangersarsinnaavaat, nuussinerup kingusinnerusukkut pisinnaanera, taamaattorli Inatsisartut Aningaasanut Inatsisaata imaluunniit ilassutitut aningaasaliissutit akuersissutigineqareernerisa kingornatigut qaammatinit 6-init kingusinnerunngitsumik.”  

12. § 12, imm. 2, ima oqaasertalerneqassaaq:
”  Imm. 2.  Siulersuisunut ilaasortat Naalakkersuisunut imaluunniit Inatsisartunut ilaasortaassanngillat.”

13.  §24, imm. 4, ima oqaasertalerneqassaaq :
”  Imm. 4. Siulersuisut nakkutigissavaat naatsorsuuserinerup aningaasatigullu pisuussutinik aqutsineq aningaasaateqarfiup atuuffia naapertorlugu naammaginartumik nakkutigineqassasut. Taamattaaq siulersuisut akisussaaffigissavaat aningaasaateqarfiup aningaasaataanik atuineq akiliisarnerlu inatsisartut inatsisaata matuma malittarisassiuussineri malillugit pisassasut, takukkit §§ 6 aamma 7, tamatumunngalu atatillugu pisortaq malittarisassanik innersuussutinillu pisariaqartitaanik tamanik tunissallugu.”

14.  § 30, imm. 2, ima oqaasertalerneqassaaq:
”  Imm. 2.  Aningaasaateqarfiup aningaasaatai aningaasaateqarfiullu aningaasaataanit pissarsiat agguaariaaseq imaattoq malillugu inissinneqassapput:
1)  Aktiat: 60-70%.
2)  Obligationit: 25-35%.
3)  Illut aalajangersimasut: 5-8%.”

15.  Kapitali 15-imi kapitalip qulequtaa ima oqaasertalerneqassaaq:

“Atuutilerfia aamma aningaasaateqarfiup siulersuisui kiisalu aningaasaateqarfiup pisuussutaasa aamma ukiumoortumik pissarsiaasa killeqarnerisa nalaani allaffissorneq”

 16.  § 50-ip kingornatigut ilanngunneqassaaq:
” § 51.  Kapitali 7-imi aalajangersakkat aatsaat atuutilissapput 31. december kingorna ukiumi tassani, piumasaqaatit tulliuttut ataasiarlutik eqquutsinneqareerpata:
1)  Aningaasaateqarfiup aningaasaataasa 1 milliard koruuninit amerlanerulerpata.
2)  Aningaasaateqarfiup aningaasaataanit pissarsiat ukiumi tassani 50 millioner koruuninit amerlaneruppata.

  § 52.  Kapitali 7-imi aalajangersakkat atuutilernissaasa tungaanut, aningaasaateqarfiup aqunneqarnera, ingerlanneqarnera allaffissornertaalu Naalakkersuisunit ingerlanneqassaaq.
  Imm. 2. Inatsisartut inatsisaanni matumani malittarisassat naapertorlugit aningaasaateqarfimmik siunertarisat naapertorlugit aningaasaateqarfiup aqunnera, ingerlannera allaffissornertaalu Naalakkersuisunit ingerlanneqassaaq.
  Imm. 3. Aningaasaateqarfiup ingerlanneqarneranut ineriartorneranullu sunniuteqarsinnaasutut paasissutissat nalilerneqartut pillugit nalunaarutinik qaammatit pingasukkaarlugit Naalakkersuisut saqqummiussisassapput.”

§ 2

Inatsisartut inatsisaat 1. januaari 2018 atuutilissaaq.

Namminersorlutik Oqartussat, ulloq 23. november 2017

Kim Kielsen