§ 1

Folkehøjskolit pillugit Inatsisartut inatsisaanni nr. 24, 18. november 2010-meersumi makku allanngortinneqassapput:

1.  § 1, imm. 1, naggatit aappaat ima oqaasertalerneqassaaq:
”Folkehøjskolit nalinginnaasumik peroriartuutaasumik ilinniartitsinerup iluani, ilinniartitsissutit ataasiakkaat imaluunniit ilinniartitsissutit ataatsimoortut, taakkununnga ilanngullugit timersorneq, nerisassiorneq imaluunniit ilinniartitsissutit sullivilinnut sammisut, salliunerusumik inississinnaavaat”.

2.  § 1, imm. 3, naggat siulleq ima oqaasertalerneqassaaq:
”Folkehøjskolit ilinniartitsineq, misilitsinnissamut piareersaataasumik ilinniartitsinermik ilaqartoq, neqeroorutigisinnaavaat, meeqqat atuarfianni inaarutaasumik naliliinerup ilaanik ingerlatsinissaq siunertaralugu, tamatumunnga ilanngullugit inaarutaasumik misilitsinnerit, ilinniartitsinerit ilinniakkanut ingerlaqqiffiusinnaasut allat, inuutissarsiutinik tunngaviusumik ilinniartitsinerup iluani ilinniartitsineq aamma ilinniarnertuunngorniarfimmi iliniartitsissutit ataasiakkaat ilinniartitsissutiginerat, pineqartut pillugit malittarisassat atuuttut naapertorlugit.” 

3.  § 1, imm. 4, naggammi siulleq ima oqaasertalerneqassaaq:
” Folkehøjskolit ilinniartitsinermik inaarutaasumillu misilitsinnernik imm. 3-mi taaneqartumik aallartitsinertat pisassaaq, ilinniarfimmik oqartussaasunilluunniit, inniakkamik pineqartumik nalinginnaasumik neqeroortartumik, suleqatigiinnissamik isumaqatigiissuteqarneq tunngavigalugu.”

4.  § 1-imi, imm. 4-p kingorna  immikkoortutut nutaatut ikkunneqassaaq:
”Imm. 5.  Folkehøjskolit ilinniartitsinermik ingerlatsinerit imm. 1-3-mi taaneqartunit allaanerusut neqeroorutigisinnaavaat, ingerlatsisut allat tamanna pillugu isumaqatigiissuteqarfigereernerisigut.”

Imm. 5 tamatuma kingorna tassaalissaaq imm. 6 imatullu oqaasertalerneqassaaq:

“Imm. 6. Naalakkersuisut imm. 1-5-imi aalajangersakkat pillugit erseqqinnerusumik malittarisassaliorsinnaapput.”

5.  § 14 ima oqaasertalerneqassaaq:
”  § 14.  Ilinniartunut § 1, imm. 1-imut ilaasunut, Naalakkersuisut, aningaasanut inatsimmi aningaasaliussatut aalajangersakkat iluanni, folkehøjskolinut ingerlatsinermut tapiissuteqartassapput, ullorsiutit malillugit ukiup ingerlanerani sapaatip-akunnerini ilinniartoqarfinni minnerpaamik 700-ni ilinniartinneqarsimappata. 
  Imm. 2.  Naalakkersuisut taxameteri malillugu tapiisarput, tamatumanilu aallaavigissallugit folkehøjskolimi sapaatip-akunneri ilinniartoqarfiit, akigititamik ukiut tamaasa aningaasanut inatsimmi sapaatip-akunneranut ilinniartoqarfimmut ataatsimut aalajangiunneqartartumik amerlisarneri.
  Imm. 3.  Folkehøjskolip sapaatip-akunneri ilinniartoqarfiit imm. 1-imi aalajangiunneqartutut amerlassuseqartut ingerlassimanngikkunigit, ingerlatsinermut tapit naleqqiussinikkut utertissavai. Utertillugit akiliutissat ingerlatsinermut tapit tunniunneqarsimasut aalajangersimasumik procentiattut annertussuseqassapput, taannalu aalajangerneqassaaq sapaatip-akunneri ilinniartoqarfiit imm. 1-imi minnerpaaffissaat eqqaaneqartut naapertorlugit ingerlanneqarsimanngitsut procentinngornerat naapertorlugu. Naalakkersuisut taxameteri malillugu tapiissutit tunniunneqartarnerat allatigullu allaffissornikkut ingerlannerat pillugit malittarisassanik aalajangersaasinnaapput.
  Imm. 4.  Ilinniartunit, folkehøjskolit ilinniartunut tapisissutisissutigisartagaannit, nammineq akiliuteqarnissaq piumasarineqarsinnaanngilaq.
  Imm. 5.  Ilinniartut tapiissutisissutigineqarsinnaasut amerlanerpaaffissaat Inatsisartut aningaasanut inatsimmi aalajangersarsinnaavaat.”

6.  § 20, ima oqaasertalerneqassaaq:
”  § 20.  Ilinniartut § 1-imut ilaasut, tapiiffigineqarsinnaasumik minnerpaamik sapaatip-akunnerini 10-ni folkehøjskoliniittut, ilinniagaqarnersiaqarneq pillugu nalunaarummi aalajangersakkat naapertorlugit ilinniagaqarnersiaqassapput. Taamaattoq taamaallaat ilinniagaqarnersiat tassaasinnaapput ilinniarnerup aallartinnerani, unitsinnerani, tamatumunnga ilanngullugu ilinniartup qanigisaani pinartumik napparsimasoqartillugu toqusoqartilluguluunniit, ilinniarnerullu naammassinerani akiliunneqarluni angalanerit, kiisalu folkehøjskolernermut immikkut aalajangiussamik ilinniagaqarnersiarititat nerisaqarnermut ineqarnermullu ilanngaanneqartut.”

§ 2

Inatsisartut inatsisaat atuutilissaaq 1. januar 2018.

Namminersorlutik Oqartussat, 8. juni 2017

Kim Kielsen