Ilinniarnertuunngorniartarneq pillugu Inatsisartut inatsisaanni nr. 13, 22. november 2011-meersumi Inatsisartut inatsisaat nr. 4, 30. maj 2014-imeersukkut aamma Inatsisartut inatsisaat nr. 31, 9. december 2015-imeersukkut allanngortinneqartumi § 1, imm. 4 aamma 6, § 1a, imm. 2 aamma § 54, imm. 2 naapertorlugit aalajangersarneqarput:

 

Kapitali 1
Nassuiaatit siunertallu

 

Ilinniartitsissutit ataasiakkaat

 

  § 1.  Ilinniartitsissutit ataasiakkaat nalunaarummi matumani tassaatinneqarput ukiut 3 angullugit sivisussusilimmik ilinniarnertuunngorniarfimmi ilinniartitsissummik ataatsimik arlalinnilluunniit pikkorissartitsinerit aamma inunnut ilisimasaqarnermik, itisilerinermik, ungavarluni isiginneriaaseqarnermik takorluuisinnaanermillu soqutigisaqartunut sammitinneqartut kiisalu ingerlaqqiffiusumik ilinniagaqarnissaq pingaarnertut siunnerfigalugu nalinginnaasumik peroriartuutaasumik aamma ilinniagaqalernissamut piareersaataasumik ilinniagaqarnerit. Pikkorissarnerup qanoq sivisutiginissaanut apeqqutaapput ilinniartitsissutit ataasiakkaat suuneri aamma ilinniarnertuunngorniarfiup neqeroorutaasa suuneri.
  Imm. 2.  Ilinniartitsissutitut ataasiakkaatut neqeroorutigineqarsinnaapput:
1)  ukiuni pingasuni ilinniarnertuunngorniarnerup ilaattut ilinniartitsissut ataaseq arlallilluunniit,
2)  ilinniartitsissutit arlallit ilinniarnertuutut soraarummeerutaasinnaasut,
3)  ilinniartitsissutit (ilinniartitsissutit ataatsimoortut) Kalaallit Nunaanni sivikitsumik akunnattumillu sivisussusilimmik ingerlaqqilluni ilinniarnissamut isissutaasinnaasut, aamma
4)  ukiuni pingasuni ilinniarnertuunngorniarnerup avataatigut ilinniartitsissut ataaseq arlallilluunniit, tassunga ilanngullugu immikkut aaqqissuussamik ingerlatsineq.
  Imm. 3.  Ilinniarnertuunngorniarfimmi ilinniartitsissutit tamarmik ilinniartitsissutitut ataasiakaatut ilinniarneqarsinnaapput.
  Imm. 4.  Ilinniartitsissutit ataasiakkaat nuna tamakkerlugu piumasaqaataasut malillugit soraarummeernermik naggaserneqassapput.
  Imm. 5.  Soraarummeerneq ingerlaqqiffiusumik ilinniartitaanernut malittarisassat malillugit ingerlaqqilluni ilinniarnissamut isissutaasinnaavoq.

 

  § 2.  Ilinniartitsissutinik ataasiakkaanik ilinniartitsinermi siunertarineqarpoq ilinniartup ingerlaqqilluni ilinniaqarnissaanut imaluunniit suliffeqarfinni periarfissaqarnerulernissaanut tunngavissiisumik nalinginnaasumik peroriartornissaa, ilisimasaqalernissaa piginnaasaqalernissaalu. Ilinniartitsineq ukiuni pingasuni ilinniarnertuunngorniarnermi ilinniartitsissutinut ataasiakkaanut assinguvoq taamalu atuagarsornermut atuinissamullu sammitinneqarluni. Ilinniartoq suliatigut perorsaanikkullu inerisarneqarnermigut sulianik itisiliisinnaanermut ilinnialernissamullu piginnaanngorsarneqassaaq.

 

  § 3.  Ilinniartitsissutinik ataasiakkaanik ilinniartitsinermi ilinniarnertuunngorniarfimmi malittarisassat nalunaarutikkut matumuuna allannguutitaqartinneqartut malinneqassapput.

Ilassutitut ilinniarnerit

 

  § 4.  Ilassutitut ilinniarnerit nalunaarummi matumani tassaatinneqarput ukiut 3 angullugit pikkorissarnerit, siunertarineqarluni ilinniartut ilinniarnertuutut naammassisimasut ingerlaqqillutik ilinniagassamik aalajangersimasumik ilinniagaqalernissamut naammassinninnissamullu naammaginartumik tunngavissaqalernissaasa qulakkeerneqarnissaa.
  Imm. 2.  Ilassutitut ilinniagaqarnermi ilinniartitsissutit ataasiakkaat imaluunniit ilinniartitsissutit ataatsimoortut ilinniarneqarsinnaapput.
  Imm. 3.  Ilassutitut ilinniagaqarneq nuna tamakkerlugu piumasaqaataasut malillugit soraarummeernermik naggaserneqassaaq.
  Imm. 4.  Soraarummeerneq ingerlaqqiffiusumik ilinniartitaanernut malittarisassat malillugit ingerlaqqilluni ilinniarnissamut isissutaasinnaavoq. 

 

  § 5.  Ilassutitut ilinniagassanik ilinniartitsinermi ilinniarnertuunngorniarfimmi malittarisassat nalunaarutikkut matumuuna allannguutitaqartinneqartut malinneqassapput.

Imminut ilinniartittarneq

 

  § 6.  Nalunaarummi imminut ilinniartittarneq tassaatinneqarpoq:
1)  Inuit ukiuni pingasuni ilinniarnertuunngorniarlutik nalunaarsimasut aamma ilinniarnertuunngorniarnermi ilinniartitsissummi pineqartumi ilikkagassanut pilersaarut malillugu ilinniartitsissummik ataatsimik arlalinnilluunniit misilitsinnissamut nalunaarsimasut.
2)  Ilinniarnertuunngorniarfinni ilinniartut Ilinniarnertuunngorniarfinni ilinniarnermut ileqqorissaarnermullu malittarisassat pillugit Namminersorlutik Oqartussat nalunaarutaanni § 9, imm. 1, nr. 6 naapertorlugu imminnut ilinniartittussatut innersuunneqartut.
3)  Ilinniarnertuunngorniarfinni ilinniartut Ilinniarnertuunngorniartarneq pillugu Inatsisartut inatsisaanni § 54, imm. 2 naapertorlugu nalunaarsimasut ilinniarnerminnik imaluunniit ilinniarnermik ilaanik nammineerluni ilinniarnertut ingerlatsiumallutik.
  Imm. 2.  Imminnut ilinniartittut neqeroorfigineqassapput ilinniakkat pillugit ilitsersorneqarnissamik, tassunga ilanngullugu ilinniarnertuunngorniarfinni misilitseriaatsit ilinniartitsinerullu imai pillugit paasissutissinneqarnissamik. Imminnut ilinniartittunut ataasiakkaanut eqimattakkaanulluunniit ilitsersuisoqarsinnaavoq. Ilitsersuineq ilinniartitsissummut nalunaaqqaarnermi ilinniartitsissummut ataatsimut 1 tiimimik naleqarpoq.

 

  § 7.  Imminnut ilinniartittut ilinniarnertuunngorniarfinni ilinniartitaanernut malittarisassatut aalajangersarneqartut nalunaarut manna aqqutigalugu allannguutitaqartut malissavaat.

Kapitali 2
Neqeroorneq inissanillu aqutsineq

 

  § 8.  Ilinniarnertuunngorniarfimmit imaluunniit ilinniarfimmit allamit tamanna pillugu qinnuteqartoqareerneratigut Ilinniartitaanermut Naalakkersuisoqarfiup akuersissutigissavaa ilinniarnertuunngorniarfiup imaluunniit ilinniarfiup ilinniartitsissutinik ataasiakkaanik neqerooruteqarsinnaanera, ukiuni pingasuni ilinniarnermi aamma ilassutitut ilinniarnermi ilinniagassatut aaqqissuussaareersut saniatigut. Ilinniarnertuunngorniarfiup ilinniarfiulluunniit Ilinniartitaanermut Naalakkersuisoqarfimmut qinnuteqaammini ilanngutissavaa akuersissut killilimmik ataavartumilluunniit atuutsikkusunnerlugu.
  Imm. 2.  Qinnuteqaammik nalilersuinermi, tassunga ilanngullugu killilimmik ataavartumilluunniit atuutsitsisoqassanersoq nalilersuinermi pingaartinneqassaaq ilinniarnertuunngorniarfik ilinniarfilluunniit naammattunik inissaateqarnersoq, tassunga ilanngullugu ilinniarnermi atortussanik ilinniartitsisussanillu peqarnissaq aamma taakkua pillugit malittarisassat naapertorlugit ilinniartitsissutit ataasiakkaat ilassutitullu ilinniarnerit aaqqissuunneqarsimassapput.
  Imm. 3.  Ilinniarnertuunngorniarfiit ukiuni pingasuni ilinniarnertuunngorniarnermi ilinniartitsissutinut atuutereersunut tamatigut ilinniartitsissutinik ataasiakkaanik ilinniartussanik tamatigut tigusisassapput, taamaattoq takuuk § 10.

 

  § 9.  Ilinniarnertuunngorniarfiup imaluunniit tassunga atatillugu ilinniarfittut akuerisaasup allap (ilinniarfissatut akuerisaq) ilinniartitsissutinik ataasiakkaanik ilassutitulluunniit ilinniagaqarnissamik neqerooruteqartartup ukiuni  pingasuni ilinniarnertuunngorniarnermi klassinut atuutereersunut ilinniartut inississinnaavai, taamaattoq takuuk § 10, imm. 2-mi oqaaseqatigiit aappaat.
  Imm. 2.  Ilinniarnertuunngorniarfik ilinniarfilluunniit akuerisaasoq ilinniartitsissutinik ataasiakkaanik immikkut ilinniartussanik pilersitsisinnaapput immikkut ilinniartussanik pilersitsinissamut naammaginartumik amerlassusillit qinnuteqarpata, tak. § 10, imm. 1.
  Imm. 3.  Ilinniarnertuunngorniarfik ilinniarfilluunniit akuerisaasoq immikkut ilassutitut ilinniagaqartussanik pilersitsisinnaapput, qinnuteqartut uppernarsarsinnaappassuk ilinniagaq aalajangersimasumik ingerlaqqiffiusumik ilinniagaqarnissamut atorneqartussaasoq,  tak. § 15, imm. 3.
  Imm. 4.  Ilinniarnertuunngorniarfik ilinniarfilluunniit akuerisaasoq klassimik ilinniartitsissutinik ataasiakkaanik ataatsimoortunik ilassutitulluunniit ilinniagassanik ilinniagaqartussanik pilersitsisinnaapput, klassimik pilersitsinissamut naammaginartumik amerlassusillit qinnuteqarpata, tak. § 10, imm. 2.

 

  § 10.  Ilinniarnertuunngorniarfik ilinniarfilluunniit akuerisaasoq ilinniagaqatigiittussanik pilersitsisinnaapput, ilinniartut ikinnerpaamik arfineq pingasut ilinniartitsissutinik ataasiakkaanik ilassutitulluunniit ilinniagaqarnissamik aalajangersimasumik ilinniagaqarusuppata. Ilinniagaqatigiinni tamani ilinniartut amerlanerpaamik 24-usassapput, taamaattoq takuuk imm. 3.
  Imm. 2.  Ilinniarnertuunngorniarfik ilinniarfilluunniit akuerisaasoq klassimik pilersitsisinnaapput, ilinniartut ikinnerpaamik 16-it ilinniartitsissutinik ataatsimoortunik aalajangersimasunik ilinniagaqarusuppata, taamaattoq takuuk imm. 3. Klassini tamani ilinniagaqartut amerlanerpaamik 24-ussapput, taamaattoq takuuk imm. 3.
  Imm. 3.  Tamanna pillugu rektorip ilinniarfiulluunniit akuerisaasup pisortaata qinnuteqareerneratigut Ilinniartitaanermut Naalakkersuisoqarfiup immikkut ittumik pissutissaqartillugu akuersissutigisinnaavaa imm. 1-ip aamma 2-p avaqqunneqarsinnaanera.

Kapitali 3
Ilinniartunngorsinnaaneq, akuerisaaneq qinnuteqartarnerlu

Iserfissaq

 

   § 11.  Ilinniartitsissutinik ataasiakkaanik ilinniarnissaq ilassutitullu ilinniarnissaq kimulluunniit qinnuteqarfiup nalaani Kalaallit Nunaanni najugaqartumut ammavoq, taamaattoq tak. imm. 2 aamma 3.
  Imm. 2.  Qinnuteqartut siusinnerusukkut Kalaallit Nunaanni najugaqareersimasut, ilinniarnertuunngorniarluni ilinniakkamut qinnuteqarnermut naleqqiullugu Kalaallit Nunaanni najugaqavissutut isigineqassapput, Kalaallit Nunaata avataaniinnerat Kalaallit Nunaanni oqartussaasut peqataaffigisaannik isumagineqarnermik imaluunniit ilinniarnermik peqquteqarpat.  
  Imm. 3.  Ilinniarnertuunngorniarluni ilinniagaq qinnuteqartunut Kalaallit Nunaanni najugaqavissuunngitsunut ammavoq, taakku nunat tamat akornanni isumaqatigiissutaasut, Kalaallit Nunaanni atuuttut, naapertorlugit Kalaallit Nunaannit qinnuteqartut assigalugit ilinniartunngorsinnaatitaappata.

Ilinniartussanik tigusineq

 

  § 12.  Ilinniartitsissutinik ataasiakkaanik ilinniagaqarniaraanni piumasaqaataavoq ilinniakkamik ilinniartitsissutinit ataasiakkaanit appasinnerulaartumik ilinniartup malinnaasimanissaa imaluunniit malinnaanissaa.
  Imm. 2.  Ilinniartup ilinniartitsissutit aalajangersimasumik amerlassusillit ukiumi atuarfiusumi piffissaq tamakkerlugu ilinniarnermut naapertuuttut taamaallaat ilinniagassatut qinnutigisinnaavai.
  Imm. 3.  Ilinniartitsissutinik ataasiakkaanik ilinniagaqarnissamut qinnuteqartut ukiuni pingasuni ilinniarnertuunngorniarlutik qinnuteqartut inissaannik tigusisinnaanngillat.
  Imm. 4.  Rektori imaluunniit ilinniarfimmi akuerisaasumi pisortap qinnuteqartut ilinniakkatigut piginnaasaannik nunallu immikkoortuini sumi ilinniagaqarusunnerannik ataatsimut nalilersuineq tunngavigalugu aalajangissavaa, tak. § 16, imm. 2, qinnuteqartut sorliit imm. 1-imi piumasaqaatigineqartunik naammassinninnersut inissaqartitsineq naapertorlugu tiguneqassanersut, taamaattoq takuuk imm. 3.
  Imm. 5.  Rektorip imaluunniit ilinniarfimmi akuerisaasumi pisortap tamatumunnga peqatigitillugu aalajangiiffigissavaa qinnuteqartunit sorliit utaqqisunut allattorsimaffimmi salliutillugit allatsissanersut. Qinnuteqartut utaqqisunut allattorsimaffimmi salliutinneqarlutik allatsissimasut salliutinneqarnertik naapertorlugu ilinnialernissamut neqeroorfigineqarsinnaapput, ilinnialersussatut akuerisaasut taamaatiinnarnissartik kissaatigisimappassuk imaluunniit ilinniarnerup aallartinnerani aallartissimanngippata.

 

  § 13.  Ilassutitut ilinniagaqarnissamik akuerisaanissamut piumasaqaataapput:
1)  qinnuteqartut ilinniarnertuutut imaluunniit tassunnga assingusumik ilinniagaqarnerminnik naammassinnissimasut aalajangersimasumik ingerlaqqiffiusumik ilinniarfigerusutaminnut qinnuteqarnissamut ilinniartitsissummik ataatsimik arlalinnilluunniit imaluunniit qaffasissutsimik amigaateqartut,
2)  qinnuteqartut aalajangersimasumik ingerlaqqiffiusumik ilinniarfigerusutaminnut qinnuteqarnissamut piumasaqaatinik naammassinninnissamut ilinniartitsissummik naammassineqareersumik karakteeriminnik pitsanngorsaaniartut.
  Imm. 2.  Ilassutitut ilinniagaqarnissamut qinnuteqartut ukiuni pingasuni ilinniarnertuunngorniarlutik qinnuteqartut inissaannik tigusisinnaanngillat.
  Imm. 3.  Rektorip imaluunniit ilinniarfimmi akuerisaasumi pisortap qinnuteqartut kajumissuseqarlutik qinnuteqaataannik ilinniakkatigullu piginnaasaannik, taakkununnga ilanngullugit qinnuteqartut ilinniarnissamut qaffasissusaannik imaluunniit ilinniartitsissummi assingusumi ilinniartitsissutiniluunniit ilinniarusutaannik kiisalu siusinnerusukkut ilinniagarisimasaannik inuussutissarsiutigisimasaannillu aamma nunap immikkoortuini sumi ilinniagaqarusunnerannik ataatsimut nalilersuineq tunngavigalugu aalajangissavaat qinnuteqartut sorliit imm. 1-imi piumasaqaatigineqartunik naammassinninnersut inissaqartitsineq naapertorlugu tiguneqassanersut, taamaattoq takuuk imm. 2.
  Imm. 4.  Rektorip imaluunniit ilinniarfimmi akuerisaasumi pisortap aalajangiiffigissavaat qinnuteqartunit sorliit utaqqisunut allattorsimaffimmi salliutillugit allatsissanersut. Qinnuteqartut utaqqisunut allattorsimaffimmi salliutinneqarlutik allatsissimasut salliutinneqarnertik naapertorlugu ilinnialernissamut neqeroorfigineqarsinnaapput, ilinnialersussatut akuerisaasut taamaatiinnarnissartik kissaatigisimappassuk imaluunniit ilinniarnerup aallartinnerani aallartissimanngippata.

 

  § 14.  Ilinniartitsissutinik ataasiakkaanik ilassutitullu ilinniagassanik pikkorissartut ilinniagaqalernissamik qinnuteqarnerminnut atatillugu aamma ilinniarnerup nalaani nalunaarutigissavaat qinnuteqartut ilinniartitsissutinik ataasiakkaanik ilinniagaqarusunnerlutik imaluunniit ilassutitut ilinniagaqarusunnerlutik.

Qinnuteqarnermi periutsit

 

  § 15.  Ilinniartitsissutinik ataasiakkaanik ilinniagaqarnissamut aamma ilassutitut ilinniagaqarnissamut qinnuteqarnermi immersugassaq Ilinniartitaanermut Naalakkersuisoqarfimmit akuerisaasoq atorlugu qinnuteqartoqassaaq.
  Imm. 2.  Ilinniartitaanermut Naalakkersuisoqarfiup akuersissuteqarneratigut nalinginnaasumik qinnuteqarnissamut piffissarititap avataatigut ilinniartussanik tigusinissamut akuersissuteqartoqarpat ilinniarnertuunngorniarfik imaluunniit ilinniarfik akuerisaasoq namminneerlutik qinnuteqarnermi immersugassamik suliaqassapput. 
  Imm. 3.  Ilassutitut ilinniagaqarnissamut qinnuteqartut ilanngutissavaat appasinnerulaartumik ilinniagarisimasaminni angusaminnut uppernarsaat siunissami ilinniagarerusutaminnut piumasaqaatitut uppernarsaat aamma kajumissuseqarlutik qinnuteqaatertik siunissami ilinniagarerusutamik nassuiaatitalik.
  Imm. 4.  Qinnuteqarnissamut piffissarititap Ilinniarnertuunngorniartarneq pillugu Namminersorlutik Oqartussat nalunaarutaanni § 3 naapertorlugu ukiuni pingasuni ilinniarnertuunngorniarnissamut nalinginnaasumik qinnuteqarnissamut piffissarititaq malissavaa. Ilinniarnertuunngorniarfiilli ataasiakkaat imaluunniit ilinniarfik akuerisaasoq kingusinnerusukkut qinnuteqarnissamut piffissamik aalajangersaasinnaapput ilinniartitsissutit ataasiakkaat ilassutitullu ilinniarnerit ukiuni pingasuni ilinniarnertuunngorniarnissamut qinnuteqarfissatut periarfissarititaasumit kingusinnerusukkut neqeroorutigineqarpata. Tamanna aamma immikkut ittumik eqikkakkamik ilinniagaqarnissamut atuuppoq.

 

  § 16.  Qinnuteqartup kommunitut najugarivisamini ilinniarnertuunngorniarfik imaluunniit ilinniarfik akuerisaasoq salliutillugit ilinnialerfissatut qinnutigissavaa ilinniarnertuunngorniarfiup imaluunniit ilinniarfiup akuerisaasup ilinniartitsissut imaluunniit ilinniartitsissutit neqeroorutigippagit. 
  Imm. 2.  Qinnuteqartup imm. 1 malillugu ilinniarfigisassaraluanit qinnuteqartoq ilinniarnertuunngorniarfimmi imaluunniit ilinniarfimmi allami ilinniagaqalerusukkuni ilinniakkatigut piginnaasani inuttullu tunngavigisani ilanngutissavai. Qinnuteqartup qinnuteqaammini pingaarnerutitaminik tulleriiaarilluni ilisimatitsissutigissavaa ilinniarnertuunngorniarfiit imaluunniit ilinniarfittut akuerisat sorliit ilinniartitsissutinik ataasiakkaanik aamma ilassutitut ilinniagassanik ilinniarusutaminik neqerooruteqarnersut.
  Imm. 3.  Qinnuteqaat qinnuteqartumit atsiorneqassaaq. Qinnuteqartoq angajoqqaatut oqartussaassusilinnit oqartussaaffigineqarpat qinnuteqaat aamma angajoqqaatut oqartussaassusilinnit atsiorneqassaaq.

 

  § 17.  Ilinniagaqarnissamut qinnuteqaat qinnuteqartup kommunitut najugarivisaani iffissanut, ilitsersuisarnernut pikkorissaqqinnernullu qitiusumik ingerlatsivimmut nassiunneqassaaq, ilinniarnertuunngorniarfik imaluunniit ilinniarfik akuerisaasoq nalinginnaasumik qinnuteqarnissamut piffissarititap avataatigut allamik qinnuteqarnissamut piffissaliisimanngippata, allamik piffissaliisimagunik namminneerlutik qinnuteqarnermi immersugassamik suliaqassapput. Pisuni taakkunani ilinniagaqarnissamut qinnuteqaat ilinniarnertuunngorniarfimmut imaluunniit ilinniarfimmut akuerisaasumut ilinniartitsissutinik ataasiakkaanik ilassutitulluunniit ilinniagaqarnissamik neqerooruteqartunut toqqaannartumik nassiunneqassaaq.
  Imm. 2.  Qinnuteqartut qinnuteqarnermi nalaanni Kalaallit Nunaata avataani aalajangersimasumik najugaqartut akuerisaanissaannut atatillugu kommuni ilaqutariittut attuumassuteqarfiginerusaq angerlarsimaffittut naatsorsuunneqassaaq. Ilaqutariittut attuumassuteqarfigisaq nalinginnaasumik tassaassaaq, qinnuteqartup kingullermik Kalaallit Nunaanniinnermini illoqarfik najugarisimasaa.

 

  § 18.  Ukiuni pingasuni ilinniarnertuunngorniarnissamut qinnuteqaammik nassiussinissamut piffissarititatut aalajangersarneqartoq ilutigalugu qinnuteqartup kommunitut najugarivisaani suliffissanut, ilitsersuisarnernut pikkorissaqqinnernullu qitiusumik ingerlatsiviup qinnuteqaat ilinniarnertuunngorniarfimmi rektorimut imaluunniit ilinniarfimmi akuerisaasumi pisortamut qinnuteqartup salliutillugu ilinniarfigerusutaaniittumut nassiutissavaa.
  Imm. 2.  Kingusinnerpaamik ullormi nassiussiviusumi paasissutissat qinnuteqaammiittut tamaasa suliffissanut, ilitsersuisarnernut pikkorissaqqinnernullu qitiusumik ingerlatsiviup elektroniskiusumik database-mut IT-reg-imut immiutissavai.

 

  § 19.  Ilinniartitsissutit ataasiakkaat imaluunniit ilassutitut ilinniagassat kommunimi qinnuteqarnerup nalaani qinnuteqartup najugarisaaniittumi ilinniarnertuunngorniarfimmi imaluunniit ilinniarfimmi akuerisaasumi pilersinneqarpata qinnuteqartoq ilinniarnertuunngorniarfimmi imaluunniit ilinniarfimmi akuerisaasumi tiguneqassaaq, taamaattoq tak. imm. 3.
  Imm. 2.  Ilinniartitsissutit ataasiakkaat imaluunniit ilassutitut ilinniagassat qinnuteqartup kommunitut najugarivisaani pilersinneqarsimanngippata ilinniarnertuunngorniarfimmi imaluunniit ilinniarfimmi akuerisaasumi qinnuteqartup salliutinnerpaallugu ilinniarfigerusutaani aamma ilinniartitsissutinik ataasiakkaanik imaluunniit ilassutitut ilinniagassanik pilersitsiffiusimasumi qinnuteqartoq tiguneqassaaq.
  Imm. 3.  Qinnuteqartoq ilinniakkatigut piginnaasani inuttullu tunngavigisani pissutigalugit kommunitut najugarivisap avataani ilinniarnertuunngorfimmi imaluunniit ilinniarfimmi akuerisaasumi ilinniagaqalerusuppat, kommunitut najugarivisami ilinniarnertuunngorniarfik imaluunniit ilinniarfik akuerisaasoq ilinniartitsissutinik ataasiakkaanik ilassutitulluunniit ilinniagassanik neqerooruteqaraluarpalluunniit, qinnuteqartoq ilinniarnertuunngorniarfimmi imaluunniit ilinniarfimmi akuerisaasumi inissaqarpat tiguneqarsinnaavoq, aamma rektori imaluunniit ilinniarfimmi pisortaq isumaqarpata qinnuteqartup ilinniarnertuunngorniarfimmi imaluunniit ilinniarfimmi akuerisaasumi ilinniagaqalerusulluni tunngavilersuutai pingaaruteqartut.

 

  § 20.  Qinnuteqartup salliutillugu ilinniarfigerusutaani ilinniarnertuunngorniarfimmi rektorip imaluunniit ilinniarfimmi akuerisaasumi pisortap ukiuni pingasuni ilinniarnertuunngorniarnermi qinnuteqarnissamut piffissarititaasup naannginnerani qinnuteqartoq nalunaarfigissavaa tiguneqarsimanersoq, tassunga ilanngullugu Ilinniarnertuunngorniartarneq pillugu Namminersorlutik Oqartussat nalunaarutaanni § 9 naapertorlugu tiguneqarneq piumasaqaatitaqarnersoq imaluunniit Ilinniarnertuunngorniartarneq pillugu Namminersorlutik Oqartussat nalunaarutaanni § 10 naapertorlugu naammattunik inissaqarnissaa apeqqutaatillugu nalunaaruteqartoqarnersoq.
  Imm. 2.  Qinnuteqartup tiguneqarsimasutut nalunaarfigineqarnera ilutigalugu ilinniarnertuunngorniarfimmi imaluunniit ilinniarfimmi akuerisaasumi sorlermi qinnuteqartoq tiguneqarsimanersoq pillugu nalunaarfigineqassaaq, qinnuteqartoq ilinniartitsissutinik ataasiakkaanik imaluunniit ilassutitut ilinniagassanik ilinniagaqarnissamut qinnuteqarsimappat, ukunani pilersinneqarsimasunik:
1)  kommunitut najugarivisami ilinniarnertuunngorniarfimmi imaluunniit ilinniarfimmi akuerisaasumi, imaluunniit
2)  kommunitut najugarivisap avataani ilinniarnertuunngorniarfimmi imaluunniit ilinniarfimmi akuerisaasumi qinnuteqartup salliutinnerpaallugu ilinniarfigerusutaani aamma ilinniartitsissutinik ataasiakkaanik imaluunniit ilassutitut ilinniagassanik pilersitsiffiusimanngitsuni.
  Imm. 3.  Qinnuteqartoq inissaqarniarnikkut pissutsit tunngavigalugit tiguneqartutut nalunaarfigineqarsinnaasimanngitsoq rektorimit imaluunniit ilinniarfimmi akuerisaasumi pisortamit nalunaarfigineqassaaq utaqqisuni salliutitassanut ilanngunneqartoq.

 

  § 21.  Qinnuteqartut piumasaqaatitalimmik tiguneqarsimasutut nalunaarfigineqartut tiguneqavittutulli nalunaarfigineqarsinnaanngitsut, piumasaqaatitalimmik tiguneqarsimanerat pillugu nalunaarfigitinnerat ilutigalugu ilisimatinneqassapput inissat naammattut apeqqutaatillugit tiguneqartut, kiisalu ilinniartitsissutinit ataasiakkaanit ilassutitullu pikkorissarfissanit appasinnerulaartunik ilinniagaqarsimanerat naammassinnissimanerallu apeqqutaatillugit tiguneqartut aamma kingusinnerusukkut nalunaarfigineqassasut ilinniarnertuunngorniarfimmi imaluunniit ilinniarfimmi akuerisaasumi sorlermi tiguneqavissinnaanersut.

 

  § 22.  Qinnuteqartup salliutillugu ilinniarfigerusutaani ilinniarnertuunngorniarfimmi rektorip imaluunniit ilinniarfimmi akuerisaasumi pisortap qinnuteqartut piumasaqaatitalimmik tiguneqarsimanerannik imaluunniit inissat naammattut apeqqutaatillugit tiguneqarsimanerannik siusinnerusukkut nalunaarfigineqarsimasut ilinniartussatut tiguneqavissimanersut kingusinnerpaamik 1. juli inaarutaasumik nalunaarfigissavai.
  Imm. 2.  Qinnuteqartut naammattunik inissaqarnissaq apeqqutaatillugu tiguneqarnissamik siusinnerusukkut nalunaarfigineqarsimasut inaarutaasumillu tiguneqanngitsut nalunaarfigineqassapput utaqqisuni salliutitassanut ilanngunneqartut.
  Imm. 3.  Qinnuteqartut utaqqisuni salliutitassanut ilanngunneqartut salliutitsinerit naapertorlugit tiguneqartussatut kingusinnerusukkut neqeroorfigineqassapput, ilinniartussatut tiguneqartuni ilinniartunngortinneqarnissamik kissaateqarnermik taamaatitsiinnartoqarpat imaluunniit ilinniarnerup aallartinnerani aallartissimanngippata, tak. Ilinniarnertuunngorniartarneq pillugu Namminersorlutik Oqartussat nalunaarutaanni § 14.

 

  § 23.  Tiguneqavissut tiguneqarnerminnik nalunaarfigineqarnerat ilutigalugu ilinniarnertuunngorniarfimmi imaluunniit ilinniarfimmi akuerisaasumi sorlermi tiguneqarnersut pillugit ilisimatinneqassapput. 

 

  § 24.  Qinnuteqartoq tiguneqarnerminik ilisimatinneqarsimasoq ilinniarnerup aallartinnerani ilinniartitsissutinik ataasiakkaanik imaluunniit ilassutitut ilinniagassanik ilinniarluni aallartissaaq, taamaattoq tak. imm. 3.
  Imm. 2.  Qinnuteqartoq tiguneqarnissamut nutaamik qinnuteqaqqissaaq qinnuteqarfiup nalaani ilinniartitsissutinik ataasiakkaanik imaluunniit ilassutitut ilinniagassanik ilinniarluni aallartitserusunngikkuni.
  Imm. 3.  Pissutsit immikkut ittut tunngavissaqartitsippata ilinniarnerup aallartinnerata kinguninngua ilinniartitsissutinik ataasiakkaanik imaluunniit ilassutitut ilinniagassanik ilinniarnerup aallartinneqarnissaa rektorip imaluunniit ilinniarfimmi akuerisaasumi pisortap akuersissutigisinnaavaa.

Kapitali 4
Aaqqissuussaanera imarisaalu

 

  § 25.  Ilinniartitsissutinik ataasiakkaanik ilassutitullu ilinniagassanik ilinniarneq nalinginnaasumik aallartissaaq ukiup ilinniartitsiviusup aallartinnerani naammassissallunilu ukiup ilinniartitsiviusup naanerani, taamaattoq tak. imm. 2.
  Imm. 2.  Ilinniartitaanermut Naalakkersuisoqarfiup pissutsit immikkut ittut tunngavissaqartitsippata ilinniarnertuunngorniarfimmit imaluunniit ilinniarfimmit akuerisaasumit qinnuteqartoqarneratigut ilinniartitsissutit ataasiakkaat ilassutitullu ilinniagassat ilinniarnerup aallartinnerani ilinniartitsissutigineqannginnissaat aalajangersinnaavaa.

 

  § 26.  Ilinniartitsissutit ataasiakkaat ilassutitullu ilinniagassat ilinniartitsissutigineqarnissaannut apeqqutaapput ilinniartitsissutit pineqartut tiimini qassini ilinniartitsissutigineqarsinnaanerat kiisalu ilinniarnertuunngorniarfiup imaluunniit ilinniarfiup akuerisaasup taakkunannga qanoq neqerooruteqarnerat aaqqissuussaqarnerallu.

 

  § 27.  Ilikkagassatut pilersaarutit pillugit malittarisassat Ilinniarnertuunngorniarfimmi ilikkagassatut pilersaarutit pillugit Namminersorlutik Oqartussat nalunaarutaanni §§ 1-7-ni, § 8, imm. 1-imi, § 11, imm. 2-mi, §§ 14-16-ini, §§ 18-25-ni, § 27, § 28, imm. 1-imi aamma §§ 29-31-ni malittarisassat malippaat.

 

  § 28.  Ilinniartitsissutinik ataasiakkaani ilassutitullu ilinniagassanik ilinniartitsineq internetikkut ilinniartitsissutissatut ilinniartumut neqeroorutigineqarsinnaavoq.
  Imm. 2.  Ilinniartitsissut ilinniarnertuunngorniarfimmi imaluunniit ilinniarfimmi akuerisaasumi ilinniartup § 19 malillugu ilinniarfigerusullugu qinnuteqarfigisimasaani neqeroorutigineqanngippat imaluunniit ilinniartup ilinniartitsinermik malinnaaniarluni illoqarfimmut allammut nuunnissaa ajornarpat imaluunniit siunertamut naapertuutinngippat ilinniartup naammagisariaqarpaa ilinniartitsinerup internetikkut ilinniartitsissutitut neqeroorutigineqarnera. Ilinniartulli piumasarisinnaavaa ilinniartitsissutit ataasiakkaat imaluunniit ilassutitut ilinniagassat internetikkut ilinniartitsissutitut neqeroorutigineqarnissaat.

 

  § 29.  Ilinniartitsissutinik ataasiakkaanik ilassutitullu ilinniagassanik pikkorissartut ukiuni pingasuni ilinniarnertuunngorniarfimmi klassinut pilersinneqareersimasunut ilanngunneqartut suleqatigiiaanik ilinniartitsisoqartitsinermik aaqqissuussamut klassini pineqartuni atuutereersumut ilaatinneqassapput.
  Imm. 2.  Ilinniartitsissutinik ataasiakkaanik ilassutitullu ilinniagassanik pikkorissartunut tunngatillugu rektorip imaluunniit ilinniarfimmi akuerisaasumi pisortap ilinniartitsisoqatigiit ilinniartitsisunik arlalinnik ilinniartitsinermi isumaginnittussanik inuttaqartut katitissavai.
  Imm. 3.  Ilinniartitsisoqatigeeqarneq pillugu malittarisassat allat Ilinniarnertuunngorniartarneq pillugu Inatsisartut inatsisaanni § 38, imm. 2-5-ini malittarisassanik malinnissapput.

 

  § 30.  Ilinniarnertuunngorniarfik imaluunniit ilinniarfik akuerisaasoq ilinniartunut ataasiakkaanut tapersersuisassaaq, siunnersuisassalluni aamma ilinniartitsissutit ataasiakkaat imaluunniit ilassutitut pikkorissarnissat kiisalu ilinniagassatut inuussutissarsiutissatullu toqqakkat naammassineqarnissaannut ilitsersuisassalluni. Suliassat tamakkiisumik ilaannakortumilluunniit piffissap ilinniartitsiffiup skemaqartup avataani isumagineqarsinnaapput.
  Imm. 2.  Rektorip imaluunniit ilinniarfimmi akuerisaasumi pisortap qulakkiissavaa ilinniarfimmi akuerisaasumi ilinniartitsissutinik ataasiakkaanik imaluunniit ilassutitut ilinniagassanik ilinniarnermi suliassat periutsillu pillugit ilitsersuisoqarnissaa. Aamma rektori imaluunniit pisortaq ilitsersuinerup aaqqissugaanissaa pilersaarusiorneqarnissaalu pillugit aalajangiissaaq.
  Imm. 3.  Ilinniartoq siunnersuinermut ilitsersuinermullu, imm. 1 naapertorlugu ingerlanneqartumut peqataasussaatitaavoq.

 

  § 31.  Angusimasanik ilinniarnermut allamut nuussisarnermi malittarisassat Ilinniarnertuunngorniarfimmi angusimasanik ilinniarnermut allamut nuussisarneq allatullu atuartitsinermut peqataannginnissaq pillugu Namminersorlutik Oqartussat nalunaarutaanni §§ 1-3-ni, § 13-imi aamma § 19-imi malittarisassat malissavaat.

 

  § 32.  Angusimasanik ilinniarnermut allamut nuussineq taamaallaat ilaannakortumik nuussinertut atuutsinneqarsinnaavoq.

 

  § 33.  Ilaannakortumik angusimasanik ilinniarnermut allamut nuussinerup kingunerisinnaavaa ilinniartup taamaallaat ilinniartitsissummik imaluunniit ilinniartitsissutinik misilitsinnera.

Kapitali 5
Ilinniarnermi ileqqorissaarnissamullu malittarisassat

 

  § 34.  Ilinniarnermi ileqqorissaarnissamullu malittarisassat Ilinniarnertuunngorniarfinni ilinniarnermut ileqqorissaarnermullu malittarisassat pillugit Namminersorlutik Oqartussat nalunaarutaanni §§ 1-8-ni, §§ 10-11-ni malittarisassat malippaat.

 

  § 35.  Ilinniartumut ilinniarnertuunngorniarfiup imaluunniit ilinniarfiup akuerisaasup ilinniarnermut ileqqorissaarnissamullu malittarisassaanik malinninngitsumut perorsaanikkut avoqqaarineq rektorimit imaluunniit ilinniarfiup akuerisaasup pisortaanit naammanngitsutut isigineqarpat iliuuserisassat makku atorneqarsinnaapput:
1)  Mianersoqqussut.
2)  Aaqqissuussani ingerlataniluunniit aalajangersimasuni peqataaqqusinnginneq.
3)  Ukiup ilinniarfiusup ingerlanerani piffissani sivikinnerusuni atuartitsinermi peqataanngikkallartitsineq.
4)  Nammineq ilinnialersussatut innersuussineq.
5)  Ilinniarfimmiit peersitaaneq (anisitaaneq).
  Imm. 2.  Imm. 1, nr. 4-5 naapertorlugit aalajangiinerit misilitsinnerit ingerlanneqarnissaannut ukiumoortumik pilersaarutip tamanut saqqummiunneqarnissaani kingusinnerpaamik qaammat ataaseq sioqqullugu aalajangerneqartassapput.  
  Imm. 3.  Iliuuserisaq ilinniarnertuunngorniarfiup imaluunniit ilinniarfiup akuerisaasup ilinniarnermi ileqqorissaarnissamullu malittarisassaanik unioqqutinneqartumut naleqquttuussaaq.

Kapitali 6
Naliliisarneq nalilersuisarnerlu

 

Naliliisarneq

 

 § 36.  Nalilersuinermi Greenlandic Grading System skala atorlugu karakteeriliisoqartassaaq.

 

  § 37.  Misilitseriaaseq apeqqutaatinnagu ilinniartut ataasiakkaarlutik naliliiffigineqassapput.

 

  § 38.  Suliassat annertuut tamarmik immikkullu suliat pikkorissartunit pilersaarusioqataaffigineqartut immikkut nalilersuiffigineqartassapput.

Ingerlaavartumik naliliineq

 

  § 39.  Ilinniarnerup sivisussusaa apeqqutaatinnagu ilinniartup ilinniartinneqarnermini pissarsiai pillugit ingerlaavartumik nalilersuisoqartassaaq.
  Imm. 2.  Naliliinermi ilinniartup nammineq imminut nalilernera ilaatinneqassaaq.

 

  § 40.  Naliliinerup imarissavai ilinniartup angusanut tunngatillugu karakteerii, ilinniarfiup iluani misilitsinnermi karakteerii aamma oqaasiinnakkut allakkatigullu oqaaseqaatit kiisalu ilinniartup ilinniartinneqarnermini pissarsiai allat.

 

  § 41.  Angusanut tunngatillugu karakteerit tassaapput, ilinniartitsissummi pineqartumi ilinniakkatigut ilisimasassani anguniakkanik, ilikkagassatut pilersaarummi paasinninnermut periutsinullu tunngatillugu ilinniartut ataasiakkaat karakteeriliinerup nalaani qanoq piviusunngortitsitiginerannik oqariartuutit.

 

  § 42.  Ilinniarfiup iluani misilitsinnermi karakteerip oqariartuutigaa ilinniartut ataasiakkaat suliakkiissummut naleqqiullugu ilinniakkatigut ilisimasassani anguniakkanik, paasinninnermut periutsinullu tunngatillugu qanoq piviusunngortitsitiginerat.

 

  § 43.  Oqaasiinnakkut allakkatigullu oqaaseqaatit oqariartuutigaat ilinniartut ataasiakkaat suliakkiissummut naleqqiullugu ilinniakkamilu pineqartumi ilinniakkatigut ilisimasassani anguniakkanik, paasinninnermut periutsinullu tunngatillugu qanoq piviusunngortitsitiginerat. Tassunga ilaassaaq ilinniartup angusaanut tunuliaqutaasut pillugit nassuiaat, aammalu ilinniartup ilinniartitsissummi pineqartumi qanoq sulinerminik ingerlatseqqissinnaanera pillugu nassuiaammik ilaqarsinnaalluni.

 

  § 44.  Ingerlaavartumik naliliisarnerup ilinniartoq nammineq siumukassusianik paasissutississavaa, tassuunakkut ilinniartup ilikkariartoqqinnera inerikkiartorneralu pillugit ilitsersuinissamut pilersaarusiornissamullu tunngavissiisoqaqqullugu. Tamatuma saniatigut naliliinerup isumannaassavaa,
1)  ilinniagaqartup ilinniartitsissutit qaffasissusaasigut qanoq inissisimanini ilisimassagaa, nammineq ilinniarnerminik ingerlatsinissaminut ineriartornissaminullu tunuliaqutassatut,
2)  ilinniagaqartup misilitsinnissamut namminerlu ineriartornerminik ilikkakkatigullu nalilersuisarnissaminut sungiusarneqarnissaa,
3)  ilinniartitsisup aamma ilinniarnertuunngorniarfiup imaluunniit ilinniarfiup akuerisaasup ilinniartinneqarnermini pissarsiaasa ineriartornerat ataatsimut isigalugu malinnaaffigissagai,
4)  ilinniartitsisup aamma ilinniarnertuunngorniarfiup imaluunniit ilinniarfiup akuerisaasup ataatsimut isigalugu ilinniartitsinermi ilinniartup pissarsiaanik tassunga ilanngullugu ilinniartup ilinniarnermik naliliineranik ilisimatinneqarnissaat,
5)  ilinniartitsisup aamma ilinniarnertuunngorniarfiup imaluunniit ilinniarfiup akuerisaasup ilinniakkat sammivissaannik toqqaanissaq, ilinniartitsissutinik qinigaqarnissaq ilinniartitsissutillu qaffasissusaat eqqarsaatigalugit ilinniagaqartup ilinniarnermini ingerlaqqinnissaa ineriartoqqinnissaalu ataatsimut isigalugit siunnersuinissaminut pilersaarusiornissaminullu tunngavissinneqarnissaa, aamma
6)  ilinniarnertuunngorniarfiup imaluunniit ilinniarfiup akuerisaasup ilinniartup ilinniarnermini pissarsiarisai pillugit angajoqqaatut oqartussaassuseqartunut ilisimatitsissuteqarnissamut tunngavissinneqarnissaa.  

Naliliisarnerup aaqqissuunneqarnera

 

  § 45.  Rektorip imaluunniit ilinniarfimmi akuerisaasumi pisortap qulakkiissavaa holdit atuaqatigiillu tamarmik naliliiffigineqarnissaannut pilersaarusiortoqartarnissaa makkunannga imalimmik:
1)  Holdit atuaqatigiillu ilinniarfiup iluani misilitsittarnerannut takussutissiaq.
2)  Ilinniarnerup ingerlanerani qaqugukkut angusanut tunngatillugu karakteeriliisoqartarneranut takussutissiaq.
3)  Ilinniartoq ingerlaavartumik aaqqissuussamillu qanoq angusaqarsimaneq pillugu ilinniartitsissutini tamani ilisimatitsissuteqartarnissamut pilersaarut, tamatumunnga ilanngullugu oqaaseqaateqarnerni.
4)  Nalilersuisarnerit ilinniartunik siunnersuinermi atorneqarnissaannut pilersaarutit.
5)  Ilinniartut tamarmik nalilersuiffigineqarneranni angusat pillugit angajoqqaatut oqartussaassuseqartut ilisimatinneqarnissaannut pilersaarut.

 

  § 46.  Ilinniartitsissutinik ataasiakkaanik ilassutitullu ilinniagassanik ilinniarnermi semesterimut ataatsimut minnerpaamik ataasiarluni angusanut tunngatillugu karakteeriliisoqartassaaq aamma ilinniartitsissutit ataasiakkaat ilinniarneqarneri imaluunniit ilassutitut ilinniarnerit semesterinit marluusunit sivikinneruppata minnerpaamik marloriarluni angusanut tunngatillugu karakteeriliisoqartassaaq.

 

  § 47.  Ilinniarnertuunngorniarfik imaluunniit ilinniarfik akuerisaasoq ukiut atuarfiusut naaneri tamaasa ilinniartut ilinniarfiup iluani misilitsinnermi karakteerii aamma inaarutaasumik angusat pillugit karakteerii pillugit uppernarsaasiortassaaq. Uppernarsaat ilinniartumit pissarsiariuminartuussaaq aamma atortut elektroniskiusut atorlugit pissarsiariuminartuussalluni.
  Imm. 2.  Ukiumi atuarfiusumi angusat pillugit karakteerit tamarmik akunnaallisarneqanngitsut agguaqatigiissinnerat ilinniartitsissutit ataasiakkaat imaluunniit ilassutitut ilinniarnerit ukiuni arlalinni sivisussuseqassappata ilinniartup ingerlaqqinnissamut tunngavigisaanut ilaatinneqassapput.

Angajoqqaatut oqartussaassuseqartut ilisimatinneqartarnerat

 

  § 48.  Ilinniartup ilinniarnermini pissarsiaanut tunngatillugu ilinniarnertuunngorniarfiup imaluunniit ilinniarfiup akuerisaasup qanoq isiginninnera pillugu angajoqqaatut oqartusaassuseqartut akulikitsumik ilisimatinneqartassapput.
  Imm. 2.  Ilisimatitsisoqartassaaq angusat pillugit karakteeriliinerni tamani.
  Imm. 3.  Ilisimatitsineq ilinniartup angusanut tunngatillugu karakteerii aammalu misilitsinnerni karakteerii, kiisalu ilinniartup atuarnermini tamakkiisumik pissarsiai pillugit oqaloqateqarnissamut neqerooruteqarnikkut pisassaaq.

 

  § 49.  Ilinniartunut angajoqqaatut oqartussaassuseqartunit oqartussaaffigineqanngitsunut angerlarsimaffimmut ilisimatitsineq ilinniartup akuersereerneratigut aatsaat ingerlanneqarsinnaavoq.

Ingerlaqqinneq

 

  § 50.  Ilinniartitsissutit ataasiakkaat ilassutitulluunniit ilinniarnerit ukiuni arlalinni sivisussuseqassappata ukiumut atuarfiusussamut tullermut taamaallaat ingerlaqqittoqarsinnaavoq ilinniartoq ilinniarnermini naammaginartumik aatsaat pissarsisimappat.
  Imm. 2.  Ukiup atuarfiusup naanerani rektorip imaluunniit ilinniarfimmi akuerisaasumi pisortap nalilersussavai ilinniartup angusarisimasai aamma ilinniarnermi pissarsiarisimasai.
  Imm. 3.  Ilinniartoq ingerlaqqinnissamut pisinnaatitaaffeqarpoq ilinniartup ukiup atuarfiusup naanerani angusaqarnissamik piumasaqaatit naammassisimagunigit, tak. Ilinniarnertuunngorniarluni ilinniakkami naliliisarneq aamma uppernarsaasiisarneq pillugit Namminersorlutik Oqartussat nalunaarutaanni § 95, imm. 4.

 

  § 51.  Rektorilli imaluunniit ilinniarfimmi akuerisaasumi pisortap § 50, imm. 3 naapertorlugu ilinniartup ukiup atuarfiusup tullianut ingerlaqqissinnaanera itigartitsissutigisinnaavaa ilinniartoq maannamut ilinniarnermini pissarsiarisimasaminik naammaginartumik angusaqarsimanngippat. Rektorip imaluunniit ilinniarfimmi akuerisaasumi pisortap tassunga ilanngullugu nalilissavaa ilinniartup ilinniarnini naammassisinnaaneraa, tassunnga ilanngullugu perorsaanikkut immikkut ikiorsiissutaasunik aaqqissuussisoqarneratigut, tamatumunnga ilanngullugu immikkut aaqqissuussamik siunnersuinikkut iliuuseqarnerit aqqutigalugit ilinniartup ilinniarnini naammassisinnaaneraa.

 

  § 52.  Ilinniartoq ingerlaqqinnissamut itigartitaappat ilinniartoq ilinniarnermit anisinneqassaaq.
  Imm. 2.  Ilinniarnertuunngorniarfik imaluunniit ilinniarfik akuerisaasoq ilinniartumik anisitsinermi ilinniartumut taassumalu angajoqqaatut oqartussaaffigisaanut ilinniarnermi ingerlaqqinnissamut periarfissat allat pillugit, tassunga ilanngullugu ilinniartitsissummut allamut imaluunniit ilinniarnermut allamut nuussinnaaneq pillugu ilitsersuussissaaq.

Inaarutaasumik naliliineq

 

  § 53.  Inaarutaasumik naliliineq ilinniartitsissummik ataatsimik arlalinnilluunniit soraarummeernikkut pissaaq.

 

  § 54.  Ilinniarnertuutut soraarummeertoqarsinnaavoq ilinniartitsissutini ataasiakkaani ilinniartitsissutini pinngitsoorani peqataaffigisassani misilitsinnermi, ilinniartitsissutini toqqagassani pisariaqartunik amerlassusilinni aamma ilinniartut ataasiakkaarlutik ilinniarnerminni suliaanni karakteerinik katiterinikkut.

 

  § 55.  Ilinniartitsissutini ataasiakkaani aamma ilassutitut ilinniarnermi soraarummeerutigineqarsinnaapput ilinniarnertuunngorniarnermi ilinniartitsissutit tamarmik, taamaallaat ilinniartitsissutit timersorneq, nipilersorneq aamma assilissanik eqqumiitsuliorneq killiffik C-miittoq pinnagit kiisalu ilinniartitsissutit science ilinniarnermilu periutsit pinnagit. 

 

  § 56.  Misilitsinnerit § 54-imi pineqartut imminnut ilinniartittunit ingerlanneqassapput, tak. 6, imm. 1.
  Imm. 2.  Imminnut ilinniartittut laboratoriami misileraanermik misilitsikkusuttut ilinniartitsissummi sungiusaatinik sammisamut tunngassuteqartunik naammassinnissimanerminnut uppernarsaat tunniutissavaat imaluunniit imminnut ilinniartittut laboratoriami pikkorissarsimassapput.
  Imm. 3.  Ilinniarnertuunngorniarfiit imaluunniit ilinniarfiit akuerisaasut ataasiakkaat immikkut ittumik pissuteqartoqartillugu laboratoriami pikkorissaasinnaapput. Taamaattoqassappat minnerpaamik ukiumut ataasiarluni laboratoriami pikkorissaasoqartassaaq. Laboratoriami pikkorissaanerup imarissavai ilinniartitsissutini misilitsinnissamut piumasaqaataasuni sungiusaatinik sammisamut tunngassuteqartunik sungiusarnissamut pisariaqartut.
  Imm. 4.  Ilinniarnertuunngorniarfinni ataasiakkaani rektori imaluunniit ilinniarfimmi akuerisaasumi pisortaq tigussaasumik nalilersuereernermi aalajangiissapput laboratoriami pikkorissaasoqassanersoq. 

 

  § 57.  Inaarutaasumik nalilersuinermi siunertaavoq angusat karakteerilerneqarnerisigut pikkorissartup ilinniakkani pikkorissarfiusuni ilikkagassatut siunniussanik qanoq pissarsiaqartigisimaneranik uppernarsaanissaq.
  Imm. 2.  Inaarutaasumik nalilersuineq tunngaviuvoq ilinniartitsissutinik ataasiakkaanik imaluunniit ilassutitut ilinniagassanik ilinniagaqarsimanermut uppernarsaammik tunniussinissamut imaluunniit ilinniartitsissutit ataasiakkaat ilassutitulluunniit ilinniarnerit ilinniartitsissutitut ataatsimoortutut ilinniarneqarsimanerannut uppernarsaammik tunniussinissamut.

Naliliisarnerup aaqqissuunneqarnera

 

  § 58.  Soraarummeerneq piffissami immikkut soraarummeernissamut immikkoortitami ingerlanneqartassaaq, ukiut atuarfiusut ataasiakkaat naammassinerannut atatillugu.
  Imm. 2.  Kulturilerineq pillugu ilinniartitsissummi C-mi soraarummeerneq decembarip qaammataani ingerlanneqarsinnaavoq. Soraarummeernerit nalinginnaasut allat maajimi juunimilu ingerlanneqartassapput (Aasaanerani soraarummeerneq). Napparsimasunik soraarummeersitsineq aggustimi-septembarimi ingerlanneqartassaaq. Ilinniartitaanermut Naalakkersuisoqarfik pineqartut saniatigut ukiup ingerlanerani piffissani allani soraarummeertoqarnissaanut akuersisinnaavoq.
  Imm. 3.  Misilitsinnerit aaqqissuunneqarlutillu ingerlanneqartassapput kapitali 6-imi tamatumunnga tunngasumik aalajangersakkat naapertorlugit.

 

  § 59.  Imminnut ilinniartittut misilitsinnissaannut piffissarititap ilinniarnertuunngorniarfimmi imaluunniit ilinniarfimmi akuerisaasumi ilinniartitsissummik pineqartumik misilitsinnermut piffissarititaq malissavaa.
  Imm. 2.  Imminut ilinniartittup nammineerluni ilisimasassavaa qaqugukkut misilitsittoqassanersoq.

 

  § 60.  Naliliineq ingerlanneqartassaaq oqaluttariarsorluni misilitsinnertigut, allattariarsorluni misilitsinnertigut, ilinniarnermi suliaqarnikkut, ajornanngippat suliaqarluni misilitsinnikkut aammalu ajornanngippat pisimasuutitaliornikkut.

 

  § 61.  Misilitsinnerit aaqqissuunneqassapput ataatsimut isigalugu ilinniartitaanerup siunertaanut naapertuuttumik ilinniartullu ataasiakkaarlutik nalilersorneqarnissaannik isumannaarisumik.

 

  § 62.  Ilinniarnertuunngorniarfik ilinniarfilluunniit akuerisaasoq ilikkagassatut pilersaarutaasunut maleruagassat naapertorlugit misilitseriaatsit assigiinngitsut akornanni toqqaasinnaappat, toqqaaneq ilinniartumut atugassarititaasut pissutsillu atuuttut eqqarsaatigalugit pissaaq.

 

  § 63.  Pikkorissaaneq 1. semesterip naanerani soraarummeernermik imaqarsinnaavoq, taamaattoq taamaallaat Kulturilerineq pillugu ilinniartitsissummut C-mut tunngatillugu. Pikkorissaaneq ukiumi atuarfiusumi ilinniartitsissutip naammassineqarnissaa sioqqullugu soraarummeernermik imaqarsinnaavoq.

 

  § 64.  Ilinniarnertuunngorniarfiup imaluunniit ilinniarfittut akuerisaasup ilinniartitsinermi pikkorissaaneq tamarmiusoq aaqqissuutissavaa uku eqqarsaatigalugit:
1)  ilinniartitsissummi ataatsimi nalunaaquttap akunneri atuartitsiviusussat tamarmik ingerlanneqarsimanissaat piffissap soraarummeerfiusussap aallartinneqannginnerani, aamma
2)  ilinniartitsissut allattariarsorluni oqaluttariarsorlunilu misilitsinnermik naggaserneqassappat pikkorissartup misilitsinnerup ilaanik allattariarsorluni oqaluttariarsorlunilu soraarummeernissaa.

 

  § 65.  Pikkorissartut imminnut ilinniartittut misilitsinnissamut nalunaaruteqartut ingerlaannartumik misilitsissapput.
  Imm. 2.  Pikkorissartoq ilinniartitsissummik ataatsimik arlalinnilluunniit misilitsikkusunngikkuni piffissap soraarummeerfiusussap aallartinnginnerani piaarnerpaamik nammineerluni peqataaniannginnini nalunaarutigissavaa.
  Imm. 3.  Imminnut ilinniartittut pikkorissarnissamut allatsissimanngitsut imaluunniit siusinnerusukkut allatsissimasut namminneerlutik pikkorissarnissamut peqataarusullutik nalunaassapput.

 

  § 66.  Soraarummeernissamut peqataarusulluni peqataarusunnanilu nalunaarneq pissaaq ilinniarnertuunngorniarfimmut imaluunniit ilinniarfimmut akuerisaasumut pikkorissartut allatsiffigisimasaanut saaffiginninnikkut.

 

  § 67.  Misilitsinnissamut peqataarusulluni nalunaarneq pissaaq aasaanerani soraarummeernissaq sioqqullugu kingusinnerpaamik ulloq 15. december, ukiorlu taanna ukiukkut soraarummeernissaq sioqqullugu kingusinnerpaamik ulloq 15. august.
  Imm. 2.  Ilinniartitsissummik soraarummeeruteqarnissamut taamaallaat nalunaaruteqartoqarsinnaavoq ukiuni pingasuni ilinniarnertuunngorniarnerup piffissami pineqartumi inaarutaasumik misilitsiffiunerani.
  Imm. 3.  Pikkorissartut Ilinniarnertuunngorniarluni ilinniakkami naliliisarneq aamma uppernarsaasiisarneq pillugit Namminersorlutik Oqartussat nalunaarutaanni § 32 naapertorlugu ilinniarnerminni suliaqarusuttut suliassat aallartinneqarnissaat kingusinnerpaamik qaammatinik marlunnik sioqqullugu nalunaaruteqassapput. Ilinniarnermut atatillugu taamaallaat suliaqartoqarsinnaavoq ilinniarnertuunngorniarfiup imaluunniit ilinniarfiup akuerisaasup ilinniarnermut atatillugu sulianik allanik isumannaarinerani. 

 

  § 68.  Pikkorissartut imminnut ilinniartittutut inissisimasut imaluunniit imminnut ilinniartittuusut ilinniarnertuunngorniarfimmi ilinniartitsissutinik ataasiakkaanik ilassutitullu ilinniagassanik ilinniagaqarnissamut ilaatinneqanngillat ilinniarnertuunngorniarfimmilu ilinniartitsinermut malinnaanissamut pisussaatitaanatik.

 

  § 69.  Censori ilisimatinneqassanngilaq misilitsinnermut peqataasup imminut ilinniartittutut misilitsinnermut ilaatinneqarnera pillugu.

Kapitali 7
Uppernarsaasiineq

 

  § 70.  Ilinniartup soraarummeerluni angusereernermini pissarsiarissavai ilinniartitsissutinik ataasiakkaanik imaluunniit ilassutitut ilinniagassanik ilinniagaqarsimanermut uppernarsaatit imaluunniit ilinniartitsissutini ilinniartup ilinniartitsissutinik ataatsimoortunik naammassiffigisimasaani soraarummeernermi uppernarsaatit karakteerinik imallit.
  Imm. 2.  Ilinniartitsissutinik ataasiakkaanik ilassutitullu ilinniagassanik ilinniagaqarsimanermut uppernarsaatip imarissavai ilinniartitsissummi imaluunniit ilinniartitsissutini ilinniartup naammassisimasaani angusanut tunngatillugu karakteerii aamma ilinniarfiup iluani misilitsinnermi karakteerii kiisalu kisimiilluni ilinniarnermini suliaanut tunngatillugit karakteerii.
  Imm. 3.  Ilinniartitsissutinik ataasiakkaanik ilassutitullu ilinniagassanik ilinniagaqarsimanermut uppernarsaammi allanneqassaaq ilinniartup imminut ilinniartittutut inissisimasimanera, tak. § 6, imm. 1-imi malittarisassat.
  Imm. 4.  Ilinniartoq ilinniartitsissutit ataasiakkaat katiterlugit ilinniarnertuutut soraarummeersimanngippat ilinniartitsissutini ilinniartup naammassisimasaani karakteerit agguaqatigiissillugit naatsorsorneqassanngillat.

 

  § 71.  Ilinniartup ilinniartitsissutit ilinniakkap sammivissaatut toqqarsimasami ilaasut tamaasa malinnaaffigisimappagit ilinniagassatut toqqakkami ilinniartitsissummut qaffasissusermullu assingusumik ilinniartoq angusaqarsimappat ilinniarnertuunngorniarfiup imaluunniit ilinniarfiup akuerisaasup ilinniartitsissutini ataasiakkaani ilinniarnertuutut soraarummeernermi uppernarsaat tunniutissavaa.

 

  § 72.  Ilinniartut inaarutaasumik misilitsissimanatik ilinniarnerminnik unitsitsippata ilinniartup piumasaqarneratigut ilinniarnertuunngorniarfik imaluunniit ilinniarfittut akuerisaasoq uppernarsaammik suliaqassaaq. Uppernarsaammi takuneqarsinnaassapput ilinniartitsissutit sorliit ilinniartup peqataaffigisimanerai, ilinniarnerup ilaanik naammassinnissimanermut uppernarsaat, ingerlaavartumik nalilersuisarnermit angusat kiisalu paasissutissat allat ilinniartup nalilersuinermut tamarmiusumut ilaatikkusutai.
  Imm. 2.  Ilinniakkamik naammassinnissimanermut uppernarsaammik tunineqassagaanni piumasaqaataavoq ilinniartup ilinniarnermi peqataanissamut ilinniarnermi ileqqorissaarnissamullu malittarisassanik malinninnissamut piumasaqaatinik naammassinnissimanissaa.

 

  § 73.  Ilinniartoq ilinniartitsissummi assigiimmik qaffasissusilimmi arlaleriarluni misilitsissimaguni, soraarummeernermilu karakteerit pillugit naammagittaalliuuteqarnerata malitsigisaanik aamma ilinniartup uppernarsarsinnaappagu ilinniarfigerusutamut isissagaanni karakteerit aalajangersimasut anguneqarsimasussaasut misilitseqqinnermi angusarineqartut soraarummeernermi uppernarsaammut ilanngunneqassapput.

 

  § 74.  Ilinniarnerup soraarummeerutigineqarnerata kinguninnguatigut ilinniarsimanermut uppernarsaat tunniunneqassaaq.

 

  § 75.  Naliliisarneq uppernarsaasiisarnerlu pillugit malittarisassat allat Ilinniarnertuunngorniarluni ilinniakkami naliliisarneq aamma uppernarsaasiisarneq pillugit Namminersorlutik Oqartussat nalunaarutaanni § 5-imi, § 7-imi, §§ 23-38-ni, § 42-mi, § 43, imm. 1-imi aamma 2-mi, §§ 44-54-ni, §§ 69-82-ni, § 85-imi, § 86-imi, § 97-imi aamma § 98-imi malittarisassat malippaat.

Kapitali 8
Naammagittaalliuuteqarsinnaaneq aningaasalersuinerlu

 

Naammagittaalliuut

 

  § 76.  Ilinniartoq imaluunniit ilinniartoq angajoqqaatut oqartussaaffigineqarpat angajoqqaatut oqartussaasut nalunaarut manna naapertorlugu rektorip imaluunniit ilinniarfiup akuerisaasup pisortaata aalajangiineranik, aalajangiinerup nalunaarutigineqarneranit sapaatit akunneri marluk qaangiutsinnagit Ilinniartitaanermut Naalakkersuisoqarfimmut inaarutaasumik aalajangiisussamut naammagittaalliuuteqarsinnaapput.
  Imm. 2.  Naammagittaalliuut tunngavilersorneqarsimassaaq.
  Imm. 3.  Naammagittaalliuut imm. 1-imi naammagittaalliornissamut piffissarititaq qaangiutsinnagu ilinniarnertuunngorniarfimmi rektorimut imaluunniit ilinniarfimmi akuerisaasumi pisortamut allaganngorlugu tunniunneqassaaq, rektorip pisortalluunniit naammagittaalliuut Ilinniartitaanermut Naalakkersuisoqarfimmut suliamut tunngatillugu oqaaseqaatiminik ilalerlugu ingerlateqqissavaa. Suliap ingerlateqqinneqannginnerani ilinniarnertuunngorniarfimmi rektorip imaluunniit ilinniarfimmi akuerisaasumi pisortap naammagittaalliuuteqartoq sapaatip akunnerata ataatsip ingerlanerani oqaaseqaammut oqaaseqaateqarnissamut periarfississavaa. Naammagittaalliuuteqartup oqaaseqaatigisinnaasai ilanngullugit Naalakkersuisoqarfimmut nassiunneqassapput.
  Imm. 4.  Rektorip imaluunniit ilinniarfimmi akuerisaasumi pisortap aalajangiinerata allanngortinneqannginnissaa pillugu imm. 1-imi piumasaqaatit eqqortinneqanngippata maalaarutip itigartinneqarnissaanik, maalaaruteqartoq ilalerlugu aalajangiinerup allanngortinneqarnissaanik imaluunniit aalajangiineq suliareqqitassanngorlugu rektorimut imaluunniit ilinniarfimmi akuerisaasumi pisortamut uterteqqinnissaanik Ilinniartitaanermut Naalakkersuisoqarfik aalajangiisinnaavoq.
  Imm. 5.  § 35, imm. 1 naapertorlugu iliuuseqarnissamik aatsaat aalajangiisoqarsinnaavoq ilinniartoq ilinniartorlu angajoqqaatut oqartussaaffigineqarpat taassuma angajoqqaatut oqartussaasui piffissaqartitsilluarluni tusarniaaffigineqarsimappata. Tusarniaanermi piffissaliussaq nalinginnaasumik tusarniaavigineqartussamut nalunaaruteqarnermiit ullunik marlunnik sivisunerusariaqanngilaq, taamaattoq tak. Ilinniarnertuunngorniarfinni ilinniarnermut ileqqorissaarnermullu malittarisassat pillugit Namminersorlutik Oqartussat nalunaarutaanni § 10, imm. 3.

Aningaasalersuineq

 

  § 77.  Ilinniartitsissutinik ataasiakkaanik ilassutitullu ilinniagassanik ilinniagaqarneq akeqanngilaq ilinniartup uppernarsarsinnaappagu ilinniagassamut aalajangersimasumut ilinniartup kingusinnerusukkut ilinnialerusutaanut tunngatillugu ilinniartitsissut piginnaasaqalissutaasussaasoq.
  Imm. 2.  Ilinniartitsissutinik ataasiakkaanik ilassutitullu ilinniagassanik ilinniagaqarneq akeqanngilaq ilinniartoq piginnaasaqalissutaasussamik siusinnerusukkut ilinniagaqarsimanngippat.
  Imm. 3.  Ilinniartoq ilinniagaqarnissamik siunnerfeqarani ilinniartitsissutinik ataasiakkaanik ilassutitullu ilinniagassanik piginnaanngorsaataasumik ilinniagaqarusukkuni nammineerluni ilinniarnerminut akiliuteqassaaq.

 

  § 78.  Imminnut ilinniartittut siusinnerusukkut ukiuni pingasuni ilinniarnertuunngorniarnermi imaluunniit ilinniartitsissutinik ataasiakkaanik ilassutitulluunniit ilinniagassanik ilinniagaqarsimanngitsut imaluunniit tiguneqarsimanngitsut soraarummeernerannut atatillugu akiliisinneqarsinnaapput.
  Imm. 2.  Akiliutissap annertussusissaa Ilinniartitaanermut Naalakkersuisoqarfimmit aalajangersarneqassaaq ilinniartitsissullu ilinniartup malinnaaffigerusutaa sorliunersoq apeqqutaalluni akiliutissap annertussusaa nikerarsinnaavoq. 
  Imm. 3.  Akiliutissaq ilinniarnertuunngorniarfimmit imaluunniit ilinniarfimmit akuerisaasumit soraarummeertitsisumit akileqquneqassaaq.
  Imm. 4.  Akiliutissap annertussusaa tamanut saqqummiunneqassaaq.

Atortuulersitsineq ikaarsaarnermilu aalajangersakkat

 

  § 79.  Nalunaarut atortuulersinneqarpoq ulloq 1. december 2016.

 

  § 80.  Nalunaarut 1. august 2016-ip kingorna pikkorissarlutik aallartittunut atuutsinneqassaaq.

 

 

Namminersorlutik Oqartussat, ulloq 17. november 2016

 

 

Doris Jakobsen

/

Mikael Kristensen