Imigassanik aalakoornartortalinnik nioqquteqartarneq sassaallertarnerlu pillugit Inatsisartut inatsisaanni nr. 11-mi, 11. november 2000-meersumi, Inatsisartut inatsisaata allanngortinneratigut Inatsisartut inatsisaatigut nr. 3-kkut, 21. maj 2001-imeersukkut allanngortinneqartumi, § 26, imm. 1, nr. 2, aamma 3-mi aammalu § 27, imm. 3, naapertorlugit aalajangersarneqarput:  

 

Atuuffia

 

  § 1. Nalunaarut Qaanaamut aamma nunaqarfinnut Qeqertanut, Savissivimmut, Siorapalunnut, Aappilattumut, Kangersuatsiamut, Kullorsuarmut, Innaarsunnut, Naajaanut, Nuussuarmut, Tasiusamut, Nutaarmiunut aamma Upernavik Kujallermut atuuppoq.

Imigassanik aalakoornartortalinnik nioqquteqarneq sassaallertarnerlu

 

§ 2. Nunaqarfimmi Savissivimmi imigassanik kimittuunik kimikitsunillu aalakoornartortalinnik tuniniaaneq inerteqqutaavoq

 

  § 3. Nunaqarfimmi Savissivimmi imigassanik kimittuunik 15 procentimik taannaluunniit sinnerlugu kimittutigisumik sassaallertarneq inerteqqutaavoq.

 

  § 4. Qaanaami kiisalu nunaqarfinni Qeqertani aamma Siorapalummi imigassanik 15 procentitut, taannaluunniit sinnerlugu, kimittutigisumik aalakoornartortalinnik nioqquteqartarneq sassaallertarnerlu inerteqqutaapput.

 

  § 5. Nunaqarfinni Aappilattumi, Kangersuatsiami, Kullorsuarmi, Innaarsunni, Naajaani, Nuussuar-mi, Tasiusami, Nutaarmiuni aamma Upernavik Kujallermi kingorna nassiunneqartussanik inniminneereernikkut imigassanik kimittuunik kimikitsunillu taamaallaat nioqquteqartoqarsinnaavoq.  Nassiussineq Upernavimmiit imaluunniit Kalaallit Nunaanni illoqarfimmit allamiit pisassaaq. Imigassat pisiariniakkat pisiniartumut toqqaannartumik imaluunniit nunaqarfimmi pisiniarfik aqqutigalugu tunniunneqartassapput.
  Imm. 2.  Imigassanik siumoortumik inniminnikkanik tunniussineq taamaallaat pisinnaavoq, imigassanik aalakoornartortalinnik nioqquteqartarneq sassaallertarnerlu pillugit qaqugukkulluunniit Inatsisartut inatsisaanni atuuttumi nioqquteqarnissamut piffissaliussatut aalajangersakkat iluini.

Pineqaatissiissutit

 

  § 6. aamma §§ 2-5-imik unioqqutsitsinerit akiliisitsissutaasussanngorlugit eqqartuunneqarsinnaapput.

Atortuulersitsineq

 

  § 7. Nalunaarut ulloq 7. november 2016-imi atortuulerpoq.
  Imm. 2. Peqatigitsillugu Qaasuitsup Kommuniani imigassanik aalakoornartortalinnik nioqquteqartarneq sassaallertarnerlu pillugit Namminersorlutik Oqartussat nalunaarutaat nr. 5, 4. marts 2011-meersoq atorunnaarsinneqarpoq.

 

 

Namminersorlutik Oqartussat, ulloq 4. november 2016

 

 

Agathe Fontain                                         

/

Lone Nukaaraq Møller