Nioqqutissanik eqqussuineq annissuinerlu pillugit Inatsisartut inatsisaanni nr. 18, 30. oktober 1992-imeersumi, kingullermik Inatsisartut inatsisaatigut nr. 38, 9. december 2015-imeersukkut allanngortinneqartumi § 2, § 3, § 11, imm. 2, § 16, § 18, § 19, imm. 2, § 20, § 22, imm. 2, § 35, § 39, § 40, § 42, imm. 2 aamma § 46, imm. 5 naapertorlugit aalajangersarneqarput:

 

Kapitali 1
Ataatsimut aalajangersakkat

 

  § 1.  Danmarkimit, Savalimmiunit nunanilluunniit allanit eqqussinermi aammalu Danmarki­mut, Savalimmiunut nunanulluunniit allanut annissinermi nioqqutissanik tigusisussat nioqqutissanillu nassiussisut nioqqutissat eqqunneqartut anninneqartullu nalingi, suussusaat, anner­tussusaat, nunamit sumit pisiaaneri, nunamit sumit pinngortuuneri, nunamut sumut tunineqarneri, nunami sumi atorneqarnissaat qanorlu assartorneqarneri il.il. pillugit paasissutissat nalunaarutigisassavaat.
  Imm. 2.  Oqimaassutsimik, angissutsimik aammalu nalinginik il.il. aalajangiinermi maleruagassat danskit ilanngaaserisoqarfiannit maleruarneqartut taamatulli atuupput.

Kapitali 2
Nioqqutissanik eqqussuineq

 

  § 2.  Useqarnermik nalunaaruteqarnermi, akitsuusigassanik nalunaaruteqarnermi aammalu eqqussinermik nalunaaruteqarnermi immersugassat Akileraaruseriffimmit akuerineqarsimasut, immersugassat immikkoortortalersorneri immersornissaannullu najoqqutassat naapertor­lugit immersorneqartussat atorneqassapput.
  Imm. 2.  Paasissutissat elektroniskiusumik nassiunneqarnissaat Akileraaruseriffiup piumasarisinnaavaa.
  Imm. 3.  Paasissutissat qanoq ittuunissaat, iluseqarnissaat tulleriiaarneqarnissaallu, pissutsillu allat Akileraaruseriffiup digitaliusumik nalunaarutigineqartunik suliaqarnissaanut pingaaruteqartut pillugit piumasaqaatit Akileraaruseriffiup aalajangersarsinnaavai.
  Imm. 4.  Immersugassat ilaqartinneqassapput ilumoortuunerannik uppernarsaatitut allagartanik, soorlu akiligassat allagartaannik, nassiussinermi uppernarsaatinik imaluunniit eqqussinissamut akuersissutinik.

 

  § 3.  Danmarkimit, Savalimmiunit nunanilluunniit allanit sikaritsinik eqqussinermi tunisisup pisussaaffigaa poortat ataasiakkaat Kalaallit Nunaannut eqqunneqarnerannut nipitittakkamik nalunaaqutsissalugit akitsuuserneqarsimanerannut takussutissamik.

 

  § 4.  Nioqqutissat toqqaannartumik imaluunniit Danmarki aqqusaarlugu Savalimmiuniit nunanilluunniit allaniit nassiunneqartut pillugit eqqussinermik nalunaarut Akileraaruseriffimmut tunniunneqassaaq.
  Imm. 2.  Eqqussinermik nalunaarummut akitsuusiinissamillu nalunaarummut ilanngunneqassapput tunisisumit akiligassap allagartaa, nassiussat uppernarsaataat allallu akitsuusiinermut kisitsisitigullu naatsorsueqqissaarluni takussutissiornermut il.il. uppernarsaatitut pisariaqartin­neqarsinnaasut.

 

  § 5.  Nioqqutissat Danmarkimi pisiarineqartut Kalaallit Nunaanni akitsuusigassat Akileraaruseriffimmut akitsuusigassatut nalunaarutigineqartassapput, taamaattorli tak. imm. 2.
  Imm. 2.  Nioqqutissat imm. 1-imi taaneqartut Aalborgimi Grønlandshavni aqqutigalugu umiarsuakkut nassiunneqarpata tunniunneqarnerannut atatillugu akitsuusiinissamik nalunaarut Akileraaruseriffimmut tunniunneqartassaaq.
  Imm. 3.  Akitsuusiinissamik nalunaarummut ilanngunneqassapput tunisisumit akiligassap allagartaa, nassiussat uppernarsaataat allallu akitsuusiinermut kisitsisitigullu naatsorsueqqissaarluni takussutissiornermut il.il. uppernarsaatitut pisariaqartinneqarsinnaasut.

 

  § 6.  Palitsit, containerit imaqanngitsut, qerattaqqutit, poortuutit imaqanngitsut atornikullu, illerfiit aamma toqusut ikuallatat arsakuinut qummuattaasat kiisalu angalanermi atortut, angalanermi taqussat assigisaallu eqqussinermik nalunaarsorneqarnissaat piumasarineqanngilaq.
  Imm. 2.  Aammattaaq eqqussinermik nalunaarsuisoqartariaqanngilaq Akileraaruseriffiup nassiussat tigusassatut tunniuppagik. Nassiussat nioqqutissanik akitsuusigassanik imaluunniit eqquteqqusaanngitsunik imaqanngippata Akileraaruseriffiup nassiussat makkuninnga imallit tigusassatut tunniunneranni nalunaarutigineqartussaajunnaarsissinnaavai
1) tunissutit inunnit ataasiakkaanit ingerlatitat,
2) atortut pilertortumik annertunerusumillu annaassiniarnerni ikiuiniarnerniluunniit atorneqartussat,
3) imarsiortunik sammisassaqartitsiniutit umiarsuit umiarsualivissisimaneranni inuttaasunit atorneqartussat,
4) imarsiortunik sammisassaqartitsiniutit nunat allat umiarsuaasa nunat tamalaat akornanni angalaartut iluarsagassatut nunamut oqqussaat,
5) danskit savalimmiormiullu umiarsuaataannut timmisartuinullu nunanut allamukartaatinut aammalu nunat allamiut umiarsuaannut timmisartuinullu kingoraartissat atortussallu il.il., kingoraartissat atortussallu umiarsuarnut timmisartunulluunniit pineqartunut tunniunneqarpata,
6) nioqqutissat, Danmarkimi, Savalimmiuni nunaniluunniit allani iluarsarneqarsimallutik atorneqarallarsimallutilluunniit eqquteqqinneqartut, nioqqutissanik tigusisoq annissinermik nalu­naarutip nuutinneranik uppernarsaammilluunniit allamik pisariaqartumik takutitsisinnaappat,
7) pequtit pialuutillu atoreersimasutut isikkullit inunnillu Kalaallit Nunaanni najugaqalersunit eqqunneqartut, imaluunniit
8) nioqqutissat atortussallu sakkutooqarfinni, Kalaallit Nunaata illersorneqarnissaa pillugu isumaqatigiissummi 27. april 1951-imeersumi pineqartuni USA-p sakkutuuisa ingerlataanni atugassatut eqqunneqartut.

 

  § 7.  Nioqqutissat § 6, imm. 1-imi taaneqartut assigisaat, eqqunneqarneranni anniseqqinneqartussatut aalajangerneqartut eqqaassanngikkaanni, nioqqutissat Savalimmiuniit nunanilluunniit allaniit umiarsuakkut toqqaannartumik imaluunniit Danmarki aqqusaarlugu tikittut kiisalu nioqqutissat Danmarkimiit, Savalimmiuniit nunanilluunniit allaniit timmisartukkut tikittut usigineqartutut nalunaarsorneqartassapput.
  Imm. 2.  Usigisanik nalunaarsuineq pissaaq nassiussat ataasiakkaat immikkut usigineqarnerisa nalunaarutigineqarnerisigut.
  Imm. 3.  Usigisanik nalunaaruteqarneq nassiussalerisumit, speditørimit, assartuisumit taassumaluunniit tuniniaasuanit suliarineqartassaaq, tunisisumillu akiligassap allagartaata assilineranik kiisalu usilersuinermik nalunaarutip allagartaata assilineranik, tassa imaappoq umiarsuup imaluunniit timmisartup usiisa nalunaarsorneqarfiannik ilaqartillugu Akileraaruseriffimmut tunniunneqarluniluunniit nassiunneqartassaaq usit Kalaallit Nunaanni umiarsualivimmut timmisartoqarfimmulluunniit siullermut tikiunneqarnerisa kingorna piaartumik.
  Imm. 4.  Nassiussanut usinik isumannaallisarneqarsimasunik imaqartunut tunngatillugu usigisat suuneri pillugit sukumiisumik nalunaarsuiffiup assilineqarnera Akileraaruseriffimmut nassiunneqassaaq.

 

  § 8.  Usigisanik nalunaaruteqartussaanermi ilaapputtaaq aalisakkat aalisakkanillu tunisassiat danskit, savalimmiormiut nunallu allat aalisariutaannit nunnigunneqartut. Usigisanik nalunaa­ruteqarneq umiarsuup ingerlatitsisuanit imaluunniit umiarsuup piffimmi tassani tuniniaasuanit assigisaannilluunniit isumagineqartassaaq.
  Imm. 2.  Umiarsuarmik timmisartumilluunniit Danmarkimi, Savalimmiuni nunaniluunniit allani pisinermut atatillugu, umiarsuarlu timmisartorluunniit nammineq ingerlalluni Kalaallit Nunaannukarpat usigisanik Akileraaruseriffimmut nalunaaruteqartoqassaaq. Usigisanik nalu­naaruteqarneq umiarsuup timmisartulluunniit ingerlatitsisuanit, piginnittuanit imaluunniit piginnittup sinniisuanit isumagineqartassaaq.
  Imm. 3.  Usigisanik nalunaarut Kalaallit Nunaannut apuunnerup kingorna piaartumik Akileraaruseriffimmut nassiunneqarluniluunniit tunniunneqartassaaq.

 

  § 9.  Usit nassiunneqarfiannut tikiunneqarnerisa kingorna kingusinnerpaamik ulluinnaat qulit  qaangiunnerini nioqqutissanik tigusisup nioqqutissat anniseqqillugilluunniit Akileraaruseriffimmut eqqussinermik nalunaarsuusiussaaq imaluunniit akitsuusiinissamik nalunaaruteqassaaq.
  Imm. 2.  Assartuinermik isumaginnittoq pisussaavoq nassiussat nassiussatut nalunaarsorneqarsimasut nassiunneqarfiannut apuunnerat nalunaarutigissallugu.
  Imm. 3.  Nioqqutissat anniseqqitassatut aalajangerneqarsimasut kissaatigineqartulluunniit ammarnagit puuiniitiinnarneqassapput.

 

  § 10.  Taamaattorli § 9, imm. 1-imi 3-milu aalajangersagaq atuukkaluartoq, nioqqutissat makku eqqunneqarnerminni anniseqqitassatut aalajangiivigineqareersimasut anninneqarnis­saannut piffissaliussaq qaammatit arfineq-pingasut tikillugit sivitsorneqarsinnaavoq:
1) Ilisimatusarnermut atortut kiisalu ilisimasassarsiortut atortui, piginnitsiminnit danskiusu­mit, savalimmiormiuusumit nunamilluunniit allamiumit atugassatut eqqunneqarallartut.
2) Radiomut, videomut fjersynimullu atortut kiisalu filmiliornermut atortut piginnitsiminnit danskiusumit, savalimmiormiuusumit nunamilluunniit allamiumit radiukkut fjersynikkullu aallakaatitassiornissat imaluunniit filmiliornissat siunertaralugit eqqunneqarallartut.
3) Sulinermi atortut, soorlu sakkuutit, atortut, apparatit, uuttortaatit maskiinallu piginnitsi­minnit danskiusumit, savalimmiormiuusumit nunamilluunniit allamiumit atugassatut eqqunneqarallartut.
  Imm. 2.  Annisseqqinnissap sivitsorneqarsinnaaneranut piumasaqaataavoq nioqqutissat immikkuutaarlugit nalunaarsuutip useqarnermik nalunaarummut ilanngullugu nassiussat tunniunneqannginneranni Akileraaruseriffimmut tunniunneqarsimanissaa.

 

  § 11.  Nioqqutissat nassiussatut nalunaarsuinerup nalaani allamut tigusassanngortinneqarpata nassiussalerisup allamulluunniit tigusassanngortitsisup piginnittup allanngornera piaartumik Akileraaruseriffimmut nalunaarutigissavaa, piginnittunngortup aqqa najugaalu nalunaarutigalugit.

 

  § 12.  Nioqqutissat Kalaallit Nunaanni najugaqanngitsumut nalunaarneqarsimappata, nassiussinermi nalunaarummik suliaqartoq nioqqutissanik tigusisutut isigineqassaaq, taamalu ilaatigut eqqussinermi akitsuutip suliarinninnermilu akiliutit akilerneqarnissaannut akisussaassalluni.

 

  § 13.  Nioqqutissat nassiussatut nalunaarsorneqartut tigusisussamut tunniunneqarsinnaalissapput nassiussat Akileraaruseriffimmut nalunaarutigineqarpata. Piumasaavorli nioqqutissanik tigusisup nioqqutissanut pineqartunut immikkut eqqussinermi piumasaqaataasinnaasut naammassisimassagai, aamma akitsuutit akilerneqartussanngortinneqarsinnaasut akilersimassagai.
  Imm. 2.  Inuussutissarsiutigalugu suliffeqarfiit Kalaallit Nunaanni angerlarsimaffeqartut nassiussat pillugit Akileraaruseriffimmut nalunaaruteqannginnerminni qinnuteqarnermikkut nassiussanik nalunaarsorneqarsimasunik tigusisinnaanissaat Akileraaruseriffiup akuersissutigisin­naavaa. Nassiussalli tunniunneqarneranniit kingusinnerpaamik ulluinnaat qulit qaangiunne­ranni Akileraaruseriffimmut nalunaarutigineqarsimassapput. Akuersissutip suliffeqarfinnut § 25, imm. 1 naapertorlugu akuersissuteqarfigineqartunut taamaallaat atuunnissaa Akileraaruseriffiup aalajangersinnaavaa.
  Imm. 3.  Imm. 1 naapertorlugu akuersissut nalunaaruteqarnissamut piffissaliussap annertuumik arlaleriartumilluunniit eqquutsinneqannginnerani, taamaaliortoqaratarsinnaaneraniluunniit atorunnaarsinneqarsinnaavoq.

 

  § 14.  Nassiussat piffissaliussatut aalajangikkap qaangiutinnginnerani nalunaarutigineqan­ngippata Akileraaruseriffiup nalunaaruteqartussaq allakkatigut piumasaqarfigissavaa, aaqqiinissamullu ullut pingasut piffissaliunneqassallutik.
  Imm. 2.  Piumasaqartoqartillugu, tak. imm. 1, nalunaaruteqartussaq suliarinninnermut 500 kr.-inik akileeqquneqassaaq.

Allakkat

 

  § 15.  Poortukkat Savalimmiuneersut nunanilluunniit allaneersut Danmarki aqqusaarlugu Kalaallit Nunaannut nassiunneqartut adressekortimik, akiligassat allagartaannik, immaqalu eqqussisinnaanermut akuersissummik uppernarsaammillu allamik, eqqussinermik nalunaaru­teqarnissamut kiisalu nioqqutissat akitsuusigassaasut nassiussap imarisimasinnaasaasa akitsuutaannik naatsorsuinissamut pisariaqartunik ilaqartinneqassapput.
  Imm. 2.  Post Greenland eqqussinermik nalunaarummik Akileraaruseriffimmut tunniussissaaq, kiisalu akitsuutit annertussuserisinnaasaannik naatsorsuissaaq akitsuullu naatsorsorneqartoq nassiussat tunniutinnginnerini akileqqullugu.
  Imm. 3.  Post Greenlandip nassiussat 3.000 kr.-it inorlugit naleqartut ataatsimoortillugit nalunaarutigisinnaavai. Nalunaaruteqarfissat ilusiligaanerat Akileraaruseriffiup aalajangersassavaa.

 

  § 16.  Poortukkanik, nioqqutissanik inuussutissarsiornermut tunngassuteqartunik akitsuusigassanik Danmarkimi pisiarineqarsimasunik imalinnik Danmarkimi nassiussisut Post Greenlandimut akitsuusiinissamik nalunaaruteqassapput, tassunga ilanngullugit adressekortit, tunisisumit akiligassap allagartaa aamma eqqussisinnaanermut akuersissutaasinnaasoq il.il.
  Imm. 2.  Poortukkat allat, nioqqutissanik akitsuusigassanik Danmarkimi pisiarineqarsimasunik imallit adressekortimik, tunisisumit akiligassap allagartaanik, uppernarsaammilluunniit allamik, akitsuutip naatsorsorneqarnissaanut pisariaqartinneqartunik ilaqartinneqassapput.
  Imm. 3.  Post Greenlandip nassiussanut imm. 2-mi ilaatinneqartunut akitsuutissat annertussusiat naatsorsussavaa, kiisalu nassiussanut imm. 1-imi 2-milu ilaatinneqartunut akitsuutit nassiussat tunniutinnginnerini akileqqussallugit.

 

  § 17.  Akileraaruseriffiup ilitsersuutaani inassutigineqarpoq Post Greenlandip allakkerisarfikkut nassiussanik annikitsunik kisitsisitigut naatsorsueqqissaarnermut tunngasunut il.il. nalunaarsorneqanngitsumik ingerlatseqqiisarnissaa.

Sakkutooqarfinnut nioqqutissanik eqqussineq

 

  § 18.  Sakkutooqarfimmi Pituffimmi danskisut innuttaassuseqartunut danskillu suliffeqarfiinut nioqqutissanik eqqussineq, niuernikkut kisitsisinik naatsorsueqqissaarnermut tunngasunik nalunaarsuutinik paasissutissiinissaq eqqarsaatigalugu Kalaallit Nunaata sinneranut nioqqutissanik eqqussinermi maleruagassat naapertorlugit pissaaq.

Kapitali 3
Eqqussuinermi akitsuutit

 

  § 19.  Nioqqutissap akiligassap allagartaani nalingata annertussusia akitsuummik naatsorsuinermi tunngavigineqassappat, akiligassap allagartaani aki tassaavoq nioqqutissap pisiarineqarnermini akia, tassa imaappoq aki nioqqutissap eqqunneqarfia sioqqullugu akilerneqarsimasoq, imaluunniit akiliineq piffissami nioqqutissap eqqunneqarfiani pissappat akilerneqartussaagaluaq. Tamatuma nassataraa nioqqutissamut akikillisaatitut ilanngaatip suulluunniit, imaluunniit akimik appartitsissutip allap naliliinermi ilanngaatigineqarsinnaanera, nioqqutissamut akikillisaatitut ilanngaat akimut akilerneqarsimasumut akiligassamulluunniit naapertuuttuuppat. Piumasaqaataavoq akikillisaatitut ilanngaatip nioqqutissanut nalilerneqartussanut tunngassuteqartuunissaa. Nioqqutissamut akikillisaatitut ilanngaatit kingumoortumik atortuusut ilan­ngaatigineqarsinnaanngillat.
  Imm. 2.  Akiligassat allagartaata aningaasartaasa nunat allamiut aningaasaataannit naatsorsornissaanni aningaasat nalingisa Danmarks Nationalbankimi allattorsimaffiat kingulleq atorneqassaaq.
  Imm. 3.  Naatsorsuinermi tunngavigineqartut pillugit Akileraaruseriffimmut assuarlertoqassaaq nalunaarummik tigusinerup kingorna ullut 14-it qaangiutsinnagit.

 

  § 20.  Akitsuutit naatsorsorneqassapput ullormi nioqqutissat akitsuuteqarfiusumut eqqunneqarfianni akitsuutit atuuttut tunngavigalugit.
  Imm. 2.  Nioqqutissanulli § 5, imm. 2-mi ilaatinneqartunut ulloq tunngavigineqartussaq tassaavoq ulloq akitsuusiinissamik nalunaarutip Akileraaruseriffimmit tiguneqarfia.

 

  § 21.  Akitsuutit akilerneqartussanngussapput nioqqutissat akitsuuteqarfiusumut eqqunneqarnerini.
  Imm. 2.  Immiaaqqat, viinnit imigassallu kimittuut ethanolimik akullit, Nioqqutissanik eqqussuineq annissuinerlu pillugit Inatsisartut inatsisaanni taaneqartut, nioqqutissat puui Kalaallit Nunaanni puiaasaaqqanik utertittakkanik aaqqissuussinermi atorneqartut atorlugit inuussutissarsiutigalugu tuneqqinneqarnissaat siunertaralugu eqqunneqarpata akitsuutit akilerneqartussanngussapput nioqqutissat, suliffeqarfimmit puiaasaaqqanut utertittakkanut immiiffiusumiit anninneqarneranni.

 

  § 22.  Nioqqutissat Danmarkimiit, Savalimmiuniit nunanilluunniit allaniit timmisartukkut tikittut akitsuutaasa akiligassanngorsimasut ulloq piffissaagallartillugu akilerneqarfissaat kingulleq tassaavoq nioqqutissat tigusisussamut tunniunneqarfiat.

 

  § 23.  Nioqqutissat Danmarkimiit umiarsuakkut tikittut akitsuutaasa akiligassanngorsimasut ulloq piffissaagallartillugu akilerneqarfissaat kingulleq tassaavoq ulloq nioqqutissat tigusisussamut tunniunneqarfiat, taamaattorli tak. § 24, imm. 1.

 

  § 24.  Nassiussanut inuussutissarsiornermut tunngassuteqartunut Danmarkimiit, Savalimmiuniit nunanilluunniit allaniit tikittunut tunngatillugu, suliffeqarfiit inuussutissarsiummik ingerlataqartut Kalaallit Nunaanni angerlarsimaffeqartut akiliinissaannut piffissarititaasoq § 23-mi taaneqartoq Akileraaruseriffiup qinnuteqartoqarneratigut sivitsorsinnaavaa. Tamatumunnga peqatigitillugu Akileraaruseriffiup aalajangersinnaavaa akuersissut taamaallaat nassiussanut akuersissutit normuannik normulerneqarsimasunut atuutissasoq.
  Imm. 2.  Imm. 1 malillugu akuersissutinik nalunaaruteqarnissami piumasaqaataavoq suliffeqarfiup qinnuteqaammut ilanngullugit nassiutissagai inuussutissarsiummik ingerlataqarsinnaanermut uppernarsaatitut allagartap atuuttup nuutinnera, kiisalu akitsuutit akilerneqarnis­saannut qularnaveeqqutitut aningaaserivimmit sillimmasiisarfimmilluunniit Kalaallit Nunaanni, Danmarkimi Savalimmiuniluunniit angerlarsimaffeqartumit uppernarsaat 500.000 kr.-inik aningaasartalik. Aammattaaq suliffeqarfiup IIN-normua qinnuteqaammi nalunaarneqassaaq, suliffeqarfiup suunera pillugu paasissutissat ilanngullugit.
  Imm. 3.  Akiliinissamut piffissarititaasoq annertuumik arlaleriarluniluunniit eqquutsinneqan­ngippat, taamatulluunniit pisoqarnialerpat akuersissutit imm. 1 malillugu nalunaarutigineqartut utertinneqarsinnaapput.
  Imm. 4.  Akiliinissamut piffissarititaasut, qinnuteqartup aalajangersimasumik ingerlatsivia tunngavigalugu sivitsuiffigineqartut qaammammi tassani piffissaagallartillugu akiliiffissap naaneraniit naatsorsorneqassapput, takuuk § 23. Akiliinissamut piffissarititaasut sivitsuiffigineqartut piffissaliussat uku qaangerlugit sivitsorneqarsinnaanngillat:
1) Nanortalik, Qaqortoq, Narsaq, Narsarsuaq, Kangilinnguit, Paamiut, Nuuk, Maniitsoq aamma Sisimiut taakkulu nunaqarfii ilanngullugit qaammatip tulliuttup ulluisa 20-anni.
2) Aasiaat, Kangaatsiaq, Qeqertarsuaq, Qasigiannguit aamma Ilulissat taakkulu nunaqarfii ilanngullugit qaammatip piffissaagallartillugu akiliiffissap naaneraniit, qaammatit marluk ullullu 15-it.
3) Uummannaq aamma Upernavik taakkulu nunaqarfii ilanngullugit  qaammatip piffissaagallartillugu akiliiffissap naaneraniit, qaammatit pingasut ullullu 15-it.
4) Ammassalik taassumalu nunaqarfii ilanngullugit kiisalu Kangerlussuaq  qaammatip piffissaagallartillugu akiliiffissap naaneraniit, qaammatit pingasut ullullu 20-it.
5) Ittoqqortoormiit kiisalu Tunup avannaani sumiiffiit allat, aamma Qaanaaq taakkulu nunaqarfii ilanngullugit qaammatip piffissaagallartillugu akiliiffissap naaneraniit, qaammatit tallimat ullullu 15-it.
  Imm. 5.  Ulloq piffissaagallartillugu akiliiffissaq arfininngornerulluni, sapaataalluniluunniit nalliuttuuppat, piffissarititaq ulluinnarmut tullermut sivitsorneqassaaq.
  Imm. 6.  Nassiussanut Danmarkimiit umiarsuarmik tikittunut tunngatillugu imm. 4 malillugu piffissarititaasut naatsorsorneqartassapput, ulloq umiarsuup Aalborgimit aallarfia aallarnerfi­galugu. Nassiussanut allanut tunngatillugu imm. 4 malillugu piffissarititaasut naatsorsorneqartassapput ulloq nioqqutissat Kalaallit Nunaanni umiarsualivimmut siullermut tikiffiat aallar­nerfigalugu.

 

  § 25.  Allatut aalajangiisoqarsimanngippat akitsuutit Akileraaruseriffiup akiliiffigineqartussatut innersuussaanut akilerneqartassapput.
  Imm. 2.  Akiliiffigineqartartup akitsuutit qaammatip siuliani akiligassanngorsimasut kingusinnerpaamik qaammatip tulliata ulluisa 15-ianni Akileraaruseriffimmut akilertassavai.

 

  § 26.  Inunnut ataasiakkaanut tunissutitut nassiussanut tunngatillugu akitsuutit nassiussamut ataatsimut 50 kr.-init ikinnerusut akilersinneqartassanngillat.

 

  § 27.  Akileraaruseriffik timmisartunut mittarfinni niuertarfiit nioqqutissanik akitsuuteqanngitsunik eqqussuinissaannut nioqquteqarnissaannullu akuersissuteqartartuuvoq, nioqqutissallu akitsuuteqanngitsunut peqqumaasivinnut il.il. ilanngunneqartut taakkunanngaanniillu ilanngaatigineqartut qanoq toqqortarineqarnissaat nakkutilliinerlu pillugit erseqqinnerusunik aalajangersagaliortuulluni.
  Imm. 2.  Akuersissuteqarnissami piumasaqaataavoq akitsuuteqanngitsumik tuniniaanerup, akitsuuteqanngitsunik tuniniaavimmi immikkoortumiittumi, mittarfeqarfinni oqartussaasoqarfinnilu sulisuusut tamaani susassaqartut, timmisartut inuttaasa kiisalu angalasut timmisartunut Danmarkimiit, Savalimmiuniit nunanilluunniit allaniit tikittut taakkununngaluunniit aallartussat kisimik iserfigisinnaasaanni taamaallaat pinissaa. Angalasut Danmarkimut, Savalimmiu­nut nunanulluunniit allanut aallartussat akitsuuteqanngitsumik tuniniaavik taamaallaat qimassinnaavaat timmisartumut ikiartornerminni, imaluunniit taamaaliornissaq Akileraaruseriffimmit erseqqissumik akuersissutigineqarpat. Inuit akitsuuteqanngitsumik tuniniaavimmit aniumasut Akileraaruseriffimmit akuersissuteqarfigineqarsimanissaat mittarfeqarfimmi isumannaallisaanermik sulisunit misissorneqassaaq.
  Imm. 3.  Nioqqutissat akitsuuteqanngitsut niuertarfiit ammasarfiisa avataanni inimi parnaarsimasumi toqqortarineqartassapput.

 

  § 28.  Umiarsuit silaannakkullu angallatit danskit, savalimmiormiut nunalluunniit allat umiarsualiviinut mittarfiinulluunniit ingerlassallutik Kalaallit Nunaanni akitsuuteqarfiusumik qimatsilersut akitsuuteqanngitsunik taquassarsiniarsinnaapput.
  Imm. 2.  Nioqqutissanik ataani taaneqartunik umiarsuit taquassarsiniarneranni annertussutsit inummut ataatsimut ullormut unnuamullu ataatsimut angallavissamut naatsorsuutigineqartumut sinnerneqassanngillat:
1) 40 g tupat,
2) 0,25 liter imigassaq kimittooq,
3) 0,25 liter viinni aamma
4) 2 liter immiaaqqat.
  Imm. 3.  Akileraaruseriffiup umiarsuit ilaasunik angallassisut nunanit allaneersut umiarsualivimmi, Kalaallit Nunaanni umiarsualivimmit kingullertut aallarfimmit siusinnerusumi akit­suuteqanngitsumik taquassarsiniarnissamut akuersissuteqarfigisinnaavai.
  Imm. 4.  Nioqqutissat imm. 3 malillugu taquassarsiarineqartut, umiarsuup akitsuuteqarfiusumik qimatsinissaata tungaanut akitsuuteqanngitsumik umiarsuarmi nioqqutissaasivimmi Akileraaruseriffimmit naqissuserlugu parnaarneqartumi toqqortarineqassapput.
  Imm. 5.  Umiarsuit imm. 3-mi taaneqartut aamma timmisartut taquassarsiniarneranni ilaasui­sa inuttaasalu amerlassusii kiisalu umiarsuarmi timmisartumiluunniit atugassatut tunisassatullu naatsorsuutigineqartut eqqarsaatigineqartassapput.
  Imm. 6.  Timmisartut akitsuuteqarfiusumut tikinnerminni nioqqutissanik imm. 1 naapertorlu­gu pisiarineqarsimasunik nassataqarpata, taakku timmisartup tikinnerani akitsuuteqanngitsumik nioqqutissaasivimmut parnaarsimasumut immikkoortillugit ingerlaannaq toqqorneqassapput.

 

  § 29.  Suliffeqarfiit aatsitassaqarneranik misissueqqaarnernut, misissueqqissaarnernut piiaanermulluunniit atatillugu aningaasarsiortut akitsuuteqanngitsumik taquassarsiniarsinnaapput, suliffeqarfiup tunisassiorfiutaani, uuliamik qalluiviutaani tassungalu atatillugu atortuutaani kiisalu umiarsuaataani atortunilu allani, aatsitassaqarneranik misissueqqaarnernut, misissueq­qissaarnernut piiaanermulluunniit atatillugu, akitsuuteqarfiup avataani kisiannili Kalaallit Nunaata immami killeqarfiata iluani imaluunniit immap naqqani nunap toqqaviata iluani atugassanik.
  Imm. 2.  Inuussutissarsiummik ingerlataqartup, umiarsuarnik silaannakkullu angallatinik imaluunniit tunisassiorfinnik il.il. imm. 1-imi taaneqartunik nioqqutissanik akitsuuteqanngit­sunik taquassarsisitsisimasup, akitsuutip utertinneqarnissaa siunertaralugu taquassarsiniarner­mut qinnuteqaat imm. 1-imi pineqartoq, akiligassallu allagartaata assilineranik ilaqartinneqar­toq Akileraaruseriffimmut nassiutissavaa.

 

  § 30.  Umiarsuup silaannakkulluunniit angallatip danskit, savalimmiormiut nunalluunniit al­lat umiarsualiviannut mittarfiannulluunniit ingerlaassalluni akitsuuteqarfiusumit aallalerner­mini, akitsuuteqanngitsumik taquassarsinerani taquassarsiarineqartut annertussusiat, taquassarsiniarnermut qinnuteqaat Akileraaruseriffimmit akuerineqarsimasoq atorlugu inuussutissarsiummik ingerlataqartumut uppernarsaaserneqassaaq.

 

  § 31.  Akitsuutit akilerneqarsimasut qinnuteqarnerup kingorna utertinneqarsinnaapput, nioq­qutissanut
1) assartuinermik ingerlatseqatigiiffimmit assartorneqartillutik tammartutut ajoquserneqartutulluunniit nalunaarutigineqartunut,
2) inuussutissarsiummik ingerlataqartumiitsillutik ajoquserneqarsimasunut imaluunniit inunnit ataasiakkaanit suliffeqarfinnilluunniit ingerlatsinermut attuumassuteqanngitsunit tillinneqarsimasunut,
3) inuussutissarsiummik ingerlataqartumiitsillutik nakkutigisaasumik suujunnaarsinneqarsi­masunut,
4) inuussutissarsiutigalugu tuniniaaqqinnermut atatillugu Danmarkiliaanneqartunut, Savalimmiuliaanneqartunut nunanulluunniit allanukaanneqartunut,
5) inuussutissarsiummik ingerlataqartumit inunnut ataasiakkaanut suliffeqarfinnulluunniit sakkutooqarfimmi Pituffimmi aalajangersimasumik najugaqartunut najugaqavissunulluunniit tuniniaqqinneqartunut,
6) inunnit ataasiakkaanit eqqunneqartunut, nioqqutissap amigaateqarnera kukkuneqarneraluunniit pissutigalugu akitsuuteqarfiusumit anniseqqinneqartunut,
7) tunisisumit akitsuusigassatut kukkusumik nalunaarutigineqartunut, tunniunneqarnerannilu nioqqutissanik tigusisussamit nakkutilliisunut takutinneqartunut, imaluunniit
8) naatsorsuinerlunnikkut kukkusumik akitsuuserneqarsimasunut.
  Imm. 2.  Akitsuutit utertinneqarnissaannik qinnuteqaateqarnermi Akileraaruseriffiup qinnuteqaateqarnermi immersugassiaa atorneqassaaq. Qinnuteqaat akitsuutit uppernarsaatitaannik, tunisisumit akiligassap allagartaanik nassiussinermilu uppernarsaatinik kiisalu nioqqutissaq tammarsimappat, aserorsimappat, anniseqqinneqarsimappat il.il. uppernarsaatinik pisariaqartunik ilaqartinneqartoq Akileraaruseriffimmut nassiunneqassaaq, nioqqutissanik nassiussinerup pineqartup akitsuuserneqarneranut uppernarsaat ilanngullugu.
  Imm. 3.  Nioqqutissanut imm. 1, nr. 1-imiit 5-imut taaneqartunut akitsuutit utertinneqassanngillat, qinnuteqaatit ataasiakkaat akitsuutitaat tamarmiusoq 500 kr.-init minneruppat.
  Imm. 4.  Nioqqutissanut akitsuutit imm. 1, nr. 3 naapertorlugu utertinneqartunut akiliut aalajangersimasoq 1.000 kr.-iusoq kiisalu aningaasat uterteqquneqartut 2 pct.-ii, aaqqissuussinerup isumagineqarneranut atatillugu aningaasartuutinut matussutissatut akilerneqassapput. Ani­ngaasat taakku aningaasat utertinneqartussat tuniunneqannginneranni ilanngaatigineqassapput.
  Imm. 5.  Akitsuutinik imm. 1, nr. 3 naapertorlugu utertitsisoqarnissaani nioqqutissat pineqartut sumiiffinnut, nakkutigisaasumik suujunnaarsitsiffiusinnaasunut assartorneqarnissaat Akileraartarnermut Aqutsisoqarfiup piumasarisinnaavaa. Assartuinermut atatillugu aningaasartuutit qinnuteqartup akilissavai.

 

  § 32.  Qamutit motoorillit, inatsisini tamanna pillugu aalajangersakkat naapertorlugit akit­suuteqanngitsumik eqqunneqarsimasut kingusinnerusukkut akitsuusigassanngortillugit Akileraaruseriffiup akitsuut, Eqqussuinermi akitsuutit pillugit Inatsisartut inatsisaanni taaneqartoq qinnuteqartoqarneratigut appartissinnaavaa pisiarinerani akiatut, minnerpaamilli nalinginnaasumik niuernermi nalingatut annertutigisunngorlugu.
  Imm. 2.  Akitsuummik appaanissaq aatsaat pisinnaavoq qamutit motoorillit siunertamut akitsuuserneqannginnissaminnut pissutaasumut ukiut sisamat sinnerlugit atorneqarsimappata, imaluunniit akitsuuteqarfiusup avataani ukiut sisamat sinnerlugit nalunaarsorneqarsimappata.

 

  § 33.  Qamutit motoorillit nunakkoorutit minnerit sisamanik amerlanerusunilluunniit assakaasullit angallannermut inatsimmi § 2, imm. 1, nr. 3 naapertorlugu qamutitut motoorilittut taaneqarsinnaasut eqqunnerini akitsuut appartitaq 5.000 kr.-iusoq akitsuummut, Eqqussuinermi akitsuutit pillugit Inatsisartut inatsisaanni taaneqartumut taarsiullugu akilerneqassaaq.

Kapitali 4
Annissuineq

 

  § 34.  Nioqqutissanik Savalimmiunut nunanulluunniit allanut toqqaannartumik imaluunniit Danmarki aqqusaarlugu annissinermi tuniniaasoq/nassiussisoq annissineq pillugu nalunaaruteqassaaq.
  Imm. 2.  Nioqqutissat, nioqqutissat allattorsimaffianni kapitalini 2-mi, 3-mi, 5-imi, 15-imi, 16-imi, 22-mi, 23-mi, 25-mi, 26-mi, 41-mi, 43-mi 51-imilu inissisimasut Kalaallit Nunaanniit umiarsuakkut Danmarkimut assartorneqartut pillugit avammut nioqquteqartup/nassitsisup annissinermik nalunaarut Akileraaruseriffimmut nalunaarutigissavaa.
  Imm. 3.  Aammattaaq annissinermut nalunaarut piumasarineqarpoq nunat allamiut umiarsuaat, tassani ilaallutik danskit savalimmiormiullu umiarsuaat, Kalaallit Nunaanniikkallarner­minni uuliamik orsussamillu immerneqartillugit. Tamanna aamma timmisartunut Kalaallit Nunaanni nalunaarsorneqarsimanngitsunut akitsuuteqarfiusumi uninngagallarnerminni orsersortunut atuuppoq.

 

  § 35.  Annissinermik nalunaaruteqarnissamik piumasaqaammi uku pineqanngillat:
1) Tunissutitut nassiussat annerpaamik 950 kr.-inik nalillit (Kalaallit Nunaanni pisiniarfimmi akia) inuussutissarsiornermut attuumassuteqanngitsut inunnit ataasiakkaanit nassiunneqartut. Nassiussat allagartaanni allassimassaaq:"Tunissutitut nassiussaq".
2) Nioqqutissat misiligutit niuernermut attuumassuteqartut annerpaamik 500 kr.-inik nalillit. Puuanni nassiussallu allagartaanni allassimassaaq: "Nioqqutissat misiligutit".
3) Kitaata Tunullu akornanni nassiussat Danmarki aqqusaarlugu ingerlatitat.
4) Aalisakkat aalisakkanillu nioqqutissiat nunat allamiut aalisariutaanneersut, danskit savalimmiormiullu aalisariutaanneersut ilanngullugit, nioqqutissiat pineqartut Kalaallit Nunaanni aalisakkerivinni suliarineqarsimanngippata.
  Imm. 2.  Annissinermik nalunaaruteqarnissami aammattaaq ilaatinneqanngillat:
1) Nioqqutissat tigummiaannarlugit nassarneqartut imaluunniit nassatatut tunniunneqarsimasut, anninneqarnerat inuussutissarsiummik ingerlatsinissamik siunertaqanngippat.
2) Angalanermi atortut, taqussat nioqqutissallu allat angalanermi nassatarineqartut, anninneqarnerat inuussutissarsiummik ingerlatsinissamik siunertaqanngippat.
3) Sakkuutit, uuttortaatit, atortut assigisaallu, assassorlutik sulisartut eqqumiitsuliortulluunniit assassornerminni eqqumiitsuliornerminniluunniit atortagaat aallarnerminni nassataat.
4) Nigaliliat naasullu, ilisinermut imaluunniit ilivernut pinnersaatissatut naatsorsuussat nunanut allanut nassiunneqartut nassarneqartulluunniit kiisalu naasut qilertat assigisaalluunniit nalliuttorsiornermi tunissutissatut nunanut allanut nassiunneqartut nassarneqartulluunniit.
5) Silaannakkut angallatit qamutillu motoorillit nunani allani nalunaarsortissimasut, Kalaallit Nunaannut eqqunneqarallarsimasut.
6) Umiarsuit, pujortuleeqqat angallatillu tuniniagaanngitsut nammineerlutillu aallartut. Tuni­niarnissaat siunertarineqarpat annissinermi nalunaarusiortoqassaaq Umiarsuillu Nalunaarsor­neqarfianni allassimajunnaarnissaannik nalunaarnermi annissinermi nalunaarusiaq takutinne­qassalluni.
7) Timmisartut Kalaallit Nunaanni angerlarsimaffeqartut tuniniagaanngitsut. Tuniniarnissaat siunertarineqarpat annissinermi nalunaarusiortoqassaaq taannalu Silaannakkut Angallannikkut Pisortaqarfimmi allassimajunnaarnissaannik nalunaarnermi annissinermi nalunaarusiaq taku­tinneqassalluni.
8) Atuakkat, nuutit, allatsitsivissat, akit allattorsimaffii, nalunaarutit, allagartarsuit, atuinissamut ilitsersuutit naqitallu allat, atukkiussassatut tunissutissatulluunniit anninneqartut.
9) Naqitigassanngorlugit allatat, atuagassiat qaammatikkuutaartumik sapaatip akunnikkuutaartumillu saqqummersartut, aviisit assigisaallu Kalaallit Nunaanni naqiterneqarsimasut, ka­laallillu suliffeqarfiinit nunani allani pisartagalinnut tuniniaasartunullu nassiunneqartut.
10) Frimærkit frimærkinik allanik paarlaalluni taarsigassanngorlugit nunanut allanut nassiunneqartut.
11) Illerfiit inuup timaanik imallit qummuattaasallu inuit timaasa ikuallanneqarsimasut arsakuinik imallit.
12) Klichit aamma papmatricet.
13) Timersornermi atortut, tamatumani ilaallutik qamutit sukkaniutit umiatsiallu iporsuutit, nunani allani timersuutinik assigisaannillu unamminermi atugassatut anninneqarallartut, ima­luunniit Kalaallit Nunaanni taamatut atorneqareerlutik anniseqqinneqartut.
14) Aningaasat pappiaqqat aggorsimasullu, akiitsukkanut uppernarsaatit (vekselit), checkit assigisaallu, kiisalu naalagaaffiup pappiaraatai, aktiat piginneqataassutit pappiaqqallu nalillit allat, taakku 50.000 euro nalingat sinnerlugu naleqanngippata.

 

  § 36. Nioqqutissanik usitut nalunaarsorneqarsimasunik, akitsuusiiffigineqaratillu kisitsisinut naatsorsoqqissaagassanut ilanngullugit nalunaarsorneqanngitsunik annisseqqinnermi annissi­nermik nalunaarusiortoqassanngilaq, akerlianilli useqarnermik nalunaarutip immersugassartaa annisseqqinnermi uppernarsaammik ilaqartillugu Akileraaruseriffimmut takutinneqassalluni.
  Imm. 2.  Timmisartukkut nassiussat Kalaallit Nunaannut tikinnermi usitut nalunaarsorneqarsimasut, Danmarkimiillu tikittut danskiusumillu pisiffimmit nassiunneqarsimasut anniseqqinneqarpata imm. 1-imi allassimasoq apeqqutaatinnagu annisseqqinnermik nalunaaruteqartoqas­saaq.

 

  § 37.  Nioqqutissat nassiunneqartut anninneqarnerminni nalingisa tamarmiusut nalunaarummut ataatsimut 10.000 kr.-it sinnersimappatigik, avammut niuertup nioqqutissanik tigusisussap akiligassaatut allagartaliaq imaluunniit taassuma assilinera Akileraaruseriffimmut tunniu­tissavaa.
  Imm. 2.  Nioqqutissanut atorneqarallartussanngorlugit nassiunneqartunut akiligassanut allagartaliaagallartoq tunniunneqassaaq, anninneqartut qanoq naleqarnerat apeqqutaatinnagu.

Allakkat

 

  § 38. Poortukkanik Savalimmiuni nunaniluunniit allani tigusisussanut nassiussinermi annissinermik nalunaarusiortoqassaaq.

  Imm. 2.  Annissinermili nalunaarusiortoqassanngilaq § 35, imm. 1, nr. 1 aamma 2 kiisalu imm. 2, nr. 1-imiit 4-mut aammalu 8-miit 14-imut allassimasunik nassiussinermi.
  Imm. 3.  Nioqqutissat nassiunneqalerneranni annissinermik nalunaarut Post Greenlandimut tunniunneqassaaq.

 

  § 39.  Poortukkanik Danmarkimi tigusisussanut nassiussinermi Kalaallit Nunaanni annissinermik nalunaarusiortoqassanngilaq.

Danmarkimut nunanullu EU-mut ilaasortaasunut allanut annissinermi nioqqutissat uppernarsaataat

 

  § 40.  Nunanut EU-mut ilaasortaasunut eqqussineq akitsuutitigut ajornaannerusumik pisin­naaqqullugu nioqqutissaq nioqqutissat uppernarsaataannik, Akileraaruseriffimmit atsiorneqarlunilu naqissuserneqarsimasumik EUR 1-imik ilaqartinneqassaaq.
  Imm. 2.  Allakkatigulli nassiussanut, taamaallaat nioqqutissanik nunami aalajangersimasumi pilerseqqaarneqarnertik pissutigalugu nioqqutissanik eqqussinermi akitsuutitigut ajornaannerusumik pineqartussanik, aammalu nalimikkut EU-p killissarititaanik qaangiisimanngitsunik imalinnut tunngatillugu, avammut niuertup uppernarsaat EUR 2, Akileraaruseriffimmut atsiugassanngortitassaanngitsoq atorsinnaavaa.
  Imm. 3.  Nioqqutissat inuussutissarsiornermut tunngassuteqanngitsut poortukkani mikisuni Danmarkimi inunnut ataasiakkaanut nassiunneqartut nioqqutissat uppernarsaataannik ilaqartinnagit nassiunneqarsinnaapput, nassiussat tamakkerlutik nalingisa EU-p killissarititaa qaangersimanngippassuk, aammalu nassitsisup nalunaarutigippagu nassiussat nioqqutissanik nunami aalajangersimasumi pilerseqqaarneqarnertik pissutigalugu akitsuutitigut ajornannginerusumik pineqartussanik imaqartut.

Nunanut allanut, Kalaallit Nunaata niueqateqarnissamik isumaqatigiissuteqarfigisimasaanut annissinermi nioqqutissat uppernarsaataat

 

  § 41.  Nunami, Kalaallit Nunaata niueqateqarnissamik assigisaanilluunniit isumaqatigiissuteqarfigisimasaani nioqqutissanik eqqussineq akitsuutitigut ajornaannerusumik pisinnaaqqullugu, nioqqutissaq nioqqutissat uppernarsaataannik imaluunniit nioqqutissat nunami sorlermi pilersinneqaqqaarnerannut uppernarsaammik, Akileraaruseriffimmit atsiorneqarlunilu naqissuserneqarsimasussamik ilaqartinneqassaaq.
  Imm. 2.  Nioqqutissat uppernarsaataat imaluunniit suminngaanneernerinut uppernarsaat isumaqatigiissutigisamik imaqarlunilu iluseqarpoq, taamaammat nioqqutissanik avammut niuertoq/nassiussisoq uppernarsaatip qanoq ittup atorneqarnissaa pillugu Akileraaruseriffimmut sukumiinerusumik paasiniaasariaqarpoq.

Nioqqutissanik annissuineq pillugu aalajangersakkat nalinginnaasut

 

  § 42.  Aalisakkanik aalisakkanillu nioqqutissianik annissinermi, aalisakkat sumi pisarineqarsimaneri, angallat suna atorlugu pisarineqarsimaneri, suuneri, anninneqartut qanoq annertutigineri, avammut nioqquteqarsinnaanermut akuersissutip normua il.il. pillugit paasissutissiinis­samut Akileraaruseriffik erseqqinnerusunik aalajangersaasinnaavoq.
  Imm. 2.  Nioqqutissat uppernarsaataannik § 40-mi § 41-milu taaneqartunik atsiuinissamut naqissusiinissamullu piumasarineqarsinnaavoq paasissutissanik imm. 1-imi pineqartunik eqqortumik piffissarlu eqqorlugu paasissutissiisoqarnissaa.

 

  § 43.  Annissinermik nalunaaruteqarnermi immersugassat Akileraaruseriffimmit akuerineqarsimasut, immersugassat immikkoortortalersorneri immersornissaannullu najoqqutassat naapertorlugit immersorneqartussat atorneqassapput.
  Imm. 2.  Paasissutissat elektroniskiusumik nassiunneqarnissaat Akileraaruseriffiup piumasarisinnaavaa.
  Imm. 3.  Paasissutissat qanoq ittuunissaat, iluseqarnissaat tulleriiaarneqarnissaallu, pissutsillu allat Akileraaruseriffiup digitaliusumik nalunaarutigineqartunik suliaqarnissaanut pingaaruteqartut pillugit piumasaqaatit Akileraaruseriffiup aalajangersarsinnaavai.
  Imm. 4.  Immersugassat ilaqartinneqassapput ilumoortuunerannik uppernarsaatitut allagartanik, soorlu akiligassat allagartaannik, nassiussinermi uppernarsaatinik imaluunniit eqqussinissamut akuersissutinik.

Kapitali 5
Nakkutilliineq

 

Umiarsuarnik nakkutilliineq

 

  § 44.  Umiarsuarmi, ingerlaarfimmik Akileraaruseriffimmut siumut nalunaarutigineqarsimasumik aalajangersimasumik ingerlaarfeqanngitsumi naalagaasup, umiarsuup Kalaallit Nu­naanni akitsuuteqarfiusumut tikinnerani, tikinnertik umiarsualivimmi oqartussaasunut qaninnerpaanut erngerluni nalunaarutigissavaa, Kalaallillu Nunaanni umiarsualiviup tikinnissaa kingusinnerpaamik nal.ak. 24-nik sioqqullugu umiarsualivimmi tikiffissami oqartussaasut nalunaarfigissallugit piffissaq umiarsuup tikiffissaatut ilimagisaq pillugu. Danskit umiarsuaasa si­nerissami nakkutilliisut taamaallaat umiarsualivimmi oqartussaasunut tikiffissartik nalunaaru­tigisassavaat, tamanna illersornissamut qullersaqarfiup suliassaasa isumagineqarnerannut naapertuuttuuppat.
  Imm. 2.  Umiarsuup qaqugu tikissangatinneqarneranik nalunaarut tiguinnarlugu umiarsualivimmi oqartussaasut Akileraaruseriffik tamatuminnga nalunaarfigissavaat kiisalu umiarsuit nalunaaruteqarsimanngitsut tikinnerat nalunaarutigissallugu. Umiarsualivimmili oqartussaasut umiarsuit, ingerlaarfimmik Akileraaruseriffimmut siumut nalunaarutigineqarsimasumik aalajangersimasumik ingerlaartut tikiffissaat nalunaarutigisariaqanngilaat.
  Imm. 3.  Tikinnermi piaarnerpaamik umiarsuup naalagaata imaluunniit umiarsuup piginnittuata tuniniaasiataluunniit Akileraaruseriffik umiarsuaq, usit taqussallu pillugit allakkatigut nalunaarfigissavaa, kiisalu umiarsuup inuttallu nioqqutissaataat akitsuusigassaatitat pillugit allakkatigut nalunaaruteqassalluni, taamaattorli takukkit imm. 4 aamma 5.
  Imm. 4.  Umiarsuarmi Kalaallit Nunaanni nalunaarsorneqarsimasumi naalagaasup imaluunniit umiarsuup piginnittuata tuniniaasiataluunniit, umiarsuup Danmarkimi Savalimmiuni nu­naniluunniit allani imaluunniit akitsuuteqarfiusup avataani angalareerluni akitsuuteqarfiusumut tikinnissaa nal.ak. 24-nik sioqqullugu Akileraaruseriffik umiarsuaq, usit taqussallu pillugit allakkatigut nalunaarfigissavaa kiisalu umiarsuup inuttallu nioqqutissaataat akitsuusigassaatitat pillugit allakkatigut nalunaaruteqassalluni.
  Imm. 5.  Akitsuuteqarfiusumut tikinnermi umiarsuup naalagaa erngerluni nioqqutissat akitsuusigassat umiarsuup nassatai pillugit akitsuusiinissamik nalunaaruteqassaaq akitsuusertissallugillu, aammalu inuttat ataasiakkaat nioqqutissat akitsuusigassaatitat namminneq atugas­satut nassataasa allattorsimaffiannik Akileraaruseriffimmut tunniussaqassalluni.
  Imm. 6.  Umiarsuup akitsuuteqarfiusumi umiarsualivimmiit umiatsialivimmiilluunniit aallar­tussanngortup naalagaata aallarnissaq Akileraaruseriffimmut nalunaarutigissavaa, umiarsuarlu aallassanngilaq Akileraaruseriffik akuersissuteqartinnagu. Aallarnissamik nalunaaruteqartussaatitaanngillat umiarsuit, angalanermut pilersaarut Akileraaruseriffimmut siumut nalunaarutigineqareersimasoq naapertorlugu angalasut.
  Imm. 7.  Nioqqutissat taqussallu, malittarisassat unioqqutillugit akitsuuteqarfiusumi umiarsuarmiit peerneqartut atorneqartulluunniit akitsuutaat umiarsuup naalagaata akisussaaffigai.

Timmisartunik nakkutilliineq

 

  § 45. Timmisartoqarfimmi pisortat timmisartup tikiffissaatut aallarfissaatullu naatsorsuutigi­saq Akileraaruseriffimmut nalunaarutigissavaat kiisalu timmisartut tikinnissartik nalunaarutigisimanagu tikittut nalunaarutigissallugit. Timmisartut aalajangersimasumik angalaartut, angalanermut pilersaarut Akileraaruseriffimmut siumut nalunaarutigineqareersimasoq naapertorlugu tikittut nalunaarutigineqartariaqanngillat.
  Imm. 2.  Akitsuuteqarfiusumut tikinnermi timmisartup naalagaata piaarnerpaamik nalunaaru­tigissavaa timmisartoq suminngaanneernersoq, kiisalu timmisartoq, usit taqussallu pillugit Akileraaruseriffimmut allakkatigut nalunaaruteqassalluni aammalu timmisartup inuttallu nioqqutissaataat akitsuusigassaatitat pillugit allakkatigut nalunaaruteqassalluni.
  Imm. 3.  Timmisartumi, nunat tamalaat akornanni ilaasunik angallassissutitut angalanngitsumi naalagaasup, imm. 2-mi taaneqartup saniatigut, akitsuuteqarfiusumut tikiinnavilluni nioqqutissat akitsuusigassat timmisartup nassatai akitsuusigassatut nalunaarutigissavai akitsuutillu akilerlugit.
  Imm. 4.  Timmisartup, akitsuuteqarfiusumi timmisartoqarfimmiit aallartussanngortup naalagaata aallarnissaq Akileraaruseriffimmut nalunaarutigissavaa, timmisartorlu aallassanngilaq Akileraaruseriffik akuersissuteqartinnagu. Aallarnissamik nalunaartussaanngillat timmisartut, angalanermut pilersaarut Akileraaruseriffimmut siumut nalunaarutigineqareersimasoq naapertorlugu angalasut.
  Imm. 5.  Nioqqutissat taqussallu, malittarisassat unioqqutillugit akitsuuteqarfiusumi timmisartumiit peerneqartut atorneqartulluunniit akitsuutaat timmisartup naalagaata akisussaaffigai.

Akileraaruseriffiup pisussaaffii piginnaatitaaffiilu il.il.

 

§ 46.  Akileraaruseriffiup nioqqutissap suuneranik misissuinerminut atatillugu nioqqutissap oqartussaasunit allanit, soorlu uumasut nakorsaattut aatsitassarsiornermullu oqartussaasunit misissoqqinneqarnissaa innersuussutigisinnaavaa, tamanna eqqussuineq annissuinerlu pillugit aalajangersakkat, peqqinnissaq, isumannaallisaanissaq, uumasut nakorsaqarneq allalluunniit pissutigalugit immikkut aalajangersagaasut malinniarlugit pisariaqarsorineqarpat. Misissuineq Akileraaruseriffiunngitsumit, oqartussaasunilli allanit isumagineqarpat, misissuineq taanna Akileraaruseriffik isumaqatigilluinnarlugu pisassaaq, sapinngisamillu piffissami sumiiffimmilu aalajangersimasumi pisassalluni.
  Imm. 2.  Akileraaruseriffik nioqqutissanik misissugassanngortitsisimappat, nioqqutissat aatsaat tunniunneqarsinnaalissapput misissuineq naammassineqarpat nioqqutissallu Akileraaru­seriffiup tunniutassanngortippagit. Nioqqutissat peqqinnissaq, isumannaallisaanissaq allal­luunniit pissutigalugit, nioqqutissat pillugit aalajangersakkani immikkut ittuni pineqartunut ilaappata, aalajangersakkat taakku eqquutsinneqarpata aatsaat Akileraaruseriffimmit tunniutassanngortinneqarsinnaapput.
  Imm. 3.  Akileraaruseriffiup nioqqutissanik misissuinissaq siunertaralugu, umiarsuit timmisartullu akitsuuteqarfinnut taaneqartunut innersuussinnaavai, ingerlavissarlu Akileraaruseriffimmit aalajangerneqartoq ingerlaffigeqqullugu.

 

  § 47.  Akileraaruseriffiup Kalaallit Nunaanni Politimesteri isumaqatigiissuteqarfigisinnaavaa, politiit nakkutilliinermik sulianik Akileraaruseriffittuulli isumaginninnissaannut pigin­naatitsinissamik, tak. Nioqqutissanik eqqussuineq annissuinerlu pillugit Inatsisartut inatsisaanni § 38.

 

  § 48.  Nassiussat usigineqartut Akileraaruseriffiup piumasaqarneratigut ammarlugit misis­sorneqarsinnaapput.
  Imm. 2.  Nioqqutissat nassiussat misissorneqarnerannut atatillugu nioqqutissanik tigusisut nassiussisullu pisussaapput pisariaqartunik isumaginnissallutik, matumanilu puuiaallutik, poortuillutik, oqimaalutaallutik aamma uuttortaallutik. Nioqqutissalli puuiarneqarnerminni akornuserneqarsinnaasut aserorneqarsinnaasulluunniit, imaluunniit pigisanik inunnilluunniit ajoquseeratarsinnaasut nakkutilliinermi ammarneqassanngillat. Tamatumani soorlu makku pineqarput: natrium, gassit naqitsinilinnik puullit, akuutissat radiop qinngornerinik ulorianartunik akullit, akuutissat tunillannartut, filmit qaamanermut misikkarissut qajuusaasallu plastikimik seqqitsaatissiat aqerlorterlugit matusanik puukkat.
  Imm. 3.  Nassiussat nioqqutissanik imm. 2-mi taaneqartunik imallit ammarneqarniarpata tigusisussaq Akileraaruseriffimmit tamatuminnga nalunaarfigineqassaaq, taamaalilluni taassu­ma ilitsersuussutigisinnaammagu nioqqutissat isumannaatsumik qanoq ammarneqarsinnaanersut.
  Imm. 4.  Akileraaruseriffik nioqqutissat suunerinik misissuinissamini, nioqqutissanik misissugassanik naammattunik taarsiinertaqanngitsumik tigusisinnaatitaavoq. Akileraaruseriffik nioqqutissat misissorneqartussatut tigusat assinginik amerlaqataannillu taarserneqarnissaannik akuersissuteqarsinnaavoq, nassiussat tamarmiusinnaaqqullugit.
  Imm. 5.  Nioqqutissanik nassitsisoq nioqqutissat misissorneqareernerisa kingorna pisinnaatitaavoq misissugassatut tiguneqartut misissuinermi atorneqanngitsut piumasaqarnikkut utertissallugit.
  Imm. 6.  Nioqqutissanik nassitsisoq, tigusisoq imaluunniit annissisoq pisussaavoq nioqqutissat Akileraaruseriffimmut piaartumik takutissallugit pisarialimmik misissuisinnaaneq ingerlanneqarsinnaaqqullugu.

 

  § 49.  Poortukkat Post Greenlandikkut nassiunneqartut adressekortiusinnaasunik sunillu imaqarnerinik nassuiaatinik ilaqartinneqartut Akileraaruseriffimmut misissugassanngorlugit allakkerivimmit saqqummiunneqassapput.
  Imm. 2.  Misissuineq allakkeriviup iniutaani ingerlanneqassaaq, taamalu Akileraaruseriffik piginnaatitaavoq nakkutilliinerup ingerlanneqarnissaanut pisariaqartumik qanorluunniit iliorluni misissuinissaminut. Misissuinermi puuiaaneq poortuinerlu allakkerisoqarfimmit isumagineqassaaq.

Kapitali 6
Pineqaatissiisarnermut atortussanngortitsinermullu aalajangersakkat

 

  § 50.  § 1, imm. 1-imi, § 2, imm. 1-imi 2-milu, § 4-mi, § 5-imi, § 7-imi, § 8-mi, § 9, imm. 1-imiit 3-mut, § 11-mi, § 34-mi, § 36-mi, § 37-mi, § 38, imm. 1-imi, § 43, imm. 1-imi 2-milu, § 44, imm.1 aamma 3-7-imi, § 45, imm. 2-4-mi aamma § 48, imm. 2-6-imi aalajangersakkanik piaaraluneerluni mianersuaalliorujussuarluniluunniit unioqqutitsisoq akiliisitaasussanngortinneqarsinnaavoq.
  Imm. 2.  § 3-mi, § 27, imm. 2-mi 3-milu, § 28, imm. 2, 4 aamma 6-imi aammalu § 33-mi aa­lajangersakkanik piaaraluneerluni mianersuaalliorujussuarluniluunniit unioqqutitsisoq unioq­qutitseriaraluartorluunniit akiliisitaasussanngortinneqarsinnaavoq.
  Imm. 3.  Imm. 3-mi taaneqartutut unioqqutitsisoqarneratigut imaluunniit unioqqutitseriaraluartoqarneratigut akiliisitaasussanngortitsinermi akiliisitaasussanngortitsinnginnermiluunniit nioqqutissaq, taannaluunniit peqanngippat taassuma aningaasanngorlugu nalingata amerlaqatai arsaarinnissutigineqarsinnaapput.

Kapitali 7
Atuutilerfia

 

  § 51.  Nalunaarut 15. oktober 2016-imi atortuulerpoq.
  Imm. 2.  Tamatumunnga peqatigitillugu Nioqqutissanik eqqussuineq annisuinerlu pillugit Namminersorlutik Oqartussat na­lunaarutaat nr. 8, 14. april 2015-imeersoq atorunnaarsinneqarpoq.

 

 

Namminersorlutik Oqartussat, ulloq 5. oktober 2016.

 

 

Randi Vestergaard-Evaldsen

/

Nikolai S. Christensen