Avatangiisit innarlitsaaliorneqarnissaat pillugu Inatsisartut inatsisaat nr. 9-mi, 22. november 2011-meersumi, Inatsisartut inatsisaatigut nr. 1-ikkut, 29. maj 2012-imeersukkut allannguuteqartinneqartumi § 10, imm. 1, nr. 6, § 11, § 66, imm. 3 aamma § 67, imm. 1 naapertorlugit aalajangersarneqarpoq:

Atuuffii il.il.

  § 1.  Nalunaarummi matumani kommunalbestyrelsip nipiliornernut illersuinissaq pillugu kommunimi malittarisassiornissamut periarfissaqarneranut maleruagassat aalajangersarneqarput.

Kommunini peqqussutit

  § 2.  Kommunalbestyrelsi nipiliornernut illersuinissamut maleruagassanik aalajangersaasinnaapput.
  Imm. 2.  Imm. 1 naapertorlugu maleruagassat kommunit malittarisassaanni aalajangersarneqassapput, tamatuma kingorna Naalakkersuisunit akuerineqassallutik.

  § 3.  Kommunalbestyrelsip maleruagassiai minnerpaamik ukuninnga imaqassapput:
1) Nipiliornernut killissarititaasunut nassuiaatit, decibel-inut kiisalu tamatumunnga naatsorsueriaatsit atorlugit uuttorlugit.
2) Sulianut nipiliorfiusunut agguaaneq (suussutsit).
3) Suliat nunami sumiiffinnut killilerneqarneri.
4) Suliat piffissat qanoq ilinerinut killilerneqarneri (piffissaq).

  § 4.  Uku nalunaarummut matumunnga ilaatinneqanngillat:
1) Annaassiniarnerit.
2) Politiit suliaqarneri.
3) Sakkutuut suliaqarneri.

  § 5.  Sumiiffinni inatsisit allat tunngavigalugit illersuinissamut maleruagassiuiffiusuni maleruagassat atuuttut sukannernerpaat sukkulluunniit atuuttut atuutissapput.

Immikkut ittumik akuersissuteqartarnerit

  § 6.   Naalakkersuisut pisuni immikkorluinnaq ittuni § 3-mi maleruagassanik saneqqutsinissamut akuersissuteqarsinnaapput.
  Imm. 2.   Naalakkersuisut immikkut ittumik akuersissuteqarnerminni piumasaqaatinik naapertuuttutut isigineqarsinnaasunik aalajangersaasinnaapput.
  Imm. 3.  Immikkut ittumik akuersissutit, imm. 1 naapertorlugu nalunaarutigineqartut sukkulluunniit immikkut ittumik akuersissuteqarnermi piumasaqaatit unioqqutinneqarpata, imaluunniit malillugu pissutsit pinngortitamut avatangiisinullu ajoqusiisinnaasutut Naalakkersuisunit naliliiffigineqarpata, Naalakkersuisunit allanngortinneqarsinnaapput utertinneqarsinnaallutilluunniit.
  Imm. 4.  Immikkut ittumik akuersissutit annerpaamik ukiunut marlukkaarlugit atuuttussanngorlugit tunniunneqarsinnaapput.

Nakkutilliineq il.il.

  § 7.  Maleruagassat, nalunaarut manna naapertorlugu suliarineqarsimasut malinneqarnissaat kommunalbestyrelsimit nakkutigineqassaaq.
  Imm. 2.  Maleruagassat § 3-mi taaneqartut malinneqanngippata, kommunalbestyrelsi peqqussummik inerteqqummillu nalunaaruteqassaaq.

  § 8.  Nipiliorneq annertuumik akornutaappat, kommunalbestyrelsi makku pillugit peqqussuteqarsinnaavoq:
1) nipiliornerup killilerneqarnissaannik, tassunga matut igalaallu matoqqatinneqarnissaat ilanngullugu.
2) ingerlatsinerup killilerneqarnissaanik, tassunga sulinerup nipiliorfiusup taamaallaat piffissani aalajangersimasuni ingerlanneqarnissaa ilanngullugu.

  § 9.  Nalunaarut manna naapertorlugu aalajangiinerit tamarmik Avatangiisit innarlitsaaliorneqarnissaat pillugu Inatsisartut inatsisaat nr. 9-mi, 22. november 2011-meersumi, Inatsisartut inatsisaatigut nr. 1-ikkut, 29. maj 2012-imeersukkut allannguuteqartinneqartumi kapitali 14-imi maleruagassat naapertorlugit maalaarutigineqarsinnaapput.

Pineqaatissiisarnermut atuutsitsilernissamullu aalajangersakkat.

  § 10.  § 7, imm. 2 aamma § 8 naapertorlugu peqqussummik inerteqqummilluunniit naammassinninngitsoortoqarnerani akiliisussanngortitsisoqarsinnaavoq.
  Imm. 2.  § 6, imm. 2 naapertorlugu piumasaqaatinik aalajangersarneqartunik unioqqutitsisoqarnerani akiliisussanngortitsisoqarsinnaavoq.
  Imm. 3.  Pinerluttulerinermi Kalaallit Nunaannut inatsimmi maleruagassat naapertorlugu kapitali 5-imi ingerlatsisumut inuunngitsumut akiliisussanngortitsisoqarsinnaavoq.
  Imm. 4.  Akiligassiissutit, imm. 1-3 naapertorlugit aalajangersarneqartut Nunap Karsianut tutsinneqassapput.

  § 11.  Nalunaarut manna 1. august 2016-imi atuutilissaaq.
  Imm. 2.  Nalunaarummi matumani suliffeqarfiit atortullu, avatangiisit innarlitsaaliorneqarnissaat pillugu Inatsisartut inatsisaat, kingusinnerusukkut allannguuteqartinneqartoq malillugu annertuumik mingutsitsisutut imaluunniit sanaartorfittut annerusutut suliffeqarfimmilluunniit allamik pilersitsiviusutut taaneqartunut, avatangiisinut annertuumik sunniuteqartussatut isigineqartunut maleruagassiuunneqanngillat.

Namminersorlutik Oqartussat, ulloq 6. juli  2016

Mala Høy Kuko

/

Mette Skarregaard Pedersen