Avatangiisinik innarlitsaaliuinissaq pillugu Inatsisartut inatsisaanni nr. 9-mi, 22. november 2011-meersumi, kingusinnerusukkut allannguuteqartinneqartumi § 18, imm. 1, nr. 4-5 aamma § 28, imm. 3 naapertorlugit aalajangersarneqarpoq:

Siunertaq atuuffiillu

§ 1.  Nalunaarut Qaqortumi imeqarfiup killeqarfianut atuuppoq.
  Imm. 2.  Nalunaarummi Qaqortup ilaani, imeqarfimmut killeqarfiup iluaniittumi suliassat ilaannut akuersissuteqarnissaq siunertarineqarpoq.
  Imm. 3.  Imeqarfiup killeqarfiata iluani innarlitsaaliuinissamut killeqarfinnik pilersitsisoqarpoq. Innarlitsaaliuinissamut killeqarfinni imeqarfiup killeqarfiata iluani suliassat uku maleruagassiuunneqarput:
1)  Illuliorneq sanaartornerlu.
2)  Illunik pioreersunik alliliineq.
3)  Imermik errortuutikumik imermillu nunap qaaneersumik kuutsitsineq.
4)  Assartuutinik sakkunillu motoorilinnik ingerlatilinnik atuineq.  
5)  Suliffeqarfinnik inuussutissarsiutinik ingerlataqarfiusunik, sullissivinnik assigisaannillu ingerlatsineq.
6)  Akuutissanik imermik mingutsitsisinnaasunik assartuineq, uninngasuuteqarneq atuinerlu.

Qaqortumi imeqarfiup killeqarfiata iluani innarlitsaaliuinissamut killeqarfinnik pilersitsineq

  § 2.  Qaqortumi imeqarfiup killeqarfia innarlitsaaliuinissamut killeqarfinnut sisamanut avinneqarpoq.
  Imm. 2.  Killeqarfik 0 ilanngussaq 1-imi takutinneqarpoq. Killeqarfik 0 Tasersuup sinaaniit nunamut 30 meterinut killeqarpoq.
  Imm. 3.  Killeqarfik 1 ilanngussaq 1-imi takutinneqarpoq. Killeqarfik 1 pingaartumik inissiaqarfittut atorneqarpoq.
  Imm. 4.  Killeqarfik 2 ilanngussaq 1-imi takutinneqarpoq. Killeqarfik 2 inuussutissarsiutinik ingerlataqarfiuvoq.
  Imm. 5.  Killeqarfik 3 imeqarfiup killeqarfiata sinneranut atuuppoq, taannalu ilanngussaq 1-imi aamma 2-mi takutinneqarpoq.

 
Killeqarfik 0-imut maleruagassat immikkut ittut 

  § 3.  Kommunalbestyrelsip imermut errortuutikumut pilersaarut aqqutigalugu illunit imermik errortuutikumik tatsimut imeqarfimmut Tasersuarmut kuuttoqannginnissaa, kiisalu tankit katersuiviit anartarfiillu imaartakkat kingusinnerpaamik 31. december 2020-mi atorunnaarsinneqarnissaat qulakkiissavaa.
  Imm. 2.  Killeqarfik 0-imi illunik isaterisoqarsinnaavoq, tatsip imeqarfiup Tasersuup pujoralammik illulluunniit atortuinik mingutsinneqarnissaa pinngitsoortinniarlugu immikkut ittumik nakkutilliisoqarpat.
  Imm. 3.  Killeqarfik 0-imi nutaanik illuliornissaq inerteqqutaavoq.
  Imm. 4.  Killeqarfik 0-imi illut pioreersut allilerneqarsinnaapput sanaqqinneqarsinnaallutillu, allannguinerit Tasersuup mingutsinneqarnissaanut ulorianartorsiorfiunngitsumik suliarineqarsinnaappata.
  Imm. 5.  Killeqarfik 0-imi uuliamik illunik kiassaanermut atorneqartussamik tankini taakkununnga naleqqussakkani uninngatitsisoqarsinnaavoq.
  Imm. 6.  Tankit uninngatitsiviit taakkununngalu aqqusersuutit tatsip imeqarfiup Tasersuup mingutsinneqarnissaanik ulorianartorsiortitsissanngillat.
  Imm. 7.  Imm. 6 naapertorlugu misissuisarnerit minnerpaamik ukiut pingasukkaarlugit pisassapput, tassanilu illut silataannilu nunaminertat qaavi ilanngullugit misissorneqartassapput. Mingutsitsisoqarneranik pasitsaassaqartoqartillugu erngerluni misissuisoqartassaaq.
  Imm. 8.  Killeqarfik 0-imi kussiniliortoqarsinnaavoq ruujorinilluunniit ikkussisoqarsinnaalluni, § 5, imm. 6-imi nassuiaatigineqartutut killeqarfik 2-mi nunap qaanit imermik kuutsitsiviusinnaasunik.

Killeqarfik 1-imut maleruagassat immikkut ittut

  § 4.  Killeqarfik 1-imi suliffeqarfinnik niuernermik allaffissornermillu suliaqartunik, sullissivinnik assigisaannilluunniit ingerlatsisoqarsinnaavoq, kisiannili sanasut suliffeqarfiinik, entreprenørit suliffeqarfiinik, suliffissuarnik imaluunniit suliffeqarfinnik avatangiisinut inatsimmi kapitali 5-imut ilaasunik ingerlatsisoqarsinnaanani.
  Imm. 2.  Imm. 1-imi aalajangersakkanut kiassaateqarfiit pioreersut ilaatinneqanngillat.
  Imm. 3.  Killeqarfik 1-imi qamutit assakaasullit sakkullu motoorillit atorneqarsinnaapput.
  Imm. 4.  Killeqarfik 1-imi illunik, aqqusinernik aqqusineeqqanillu sanasoqarsinnaavoq.
  Imm. 5.  Kommunalbestyrelsip imermut errortuutikumut pilersaarut aqqutigalugu illunit imermik errortuutikumik tatsimut imeqarfimmut Tasersuarmut kuuttoqannginnissaa, kiisalu tankit katersuiviit anartarfiillu imaartakkat kingusinnerpaamik 31. december 2020-mi atorunnaarsinneqarnissaat qulakkiissavaa.
  Imm. 6.  Killeqarfik 1-imi illunik isaterisoqarsinnaavoq, tatsip imeqarfiup Tasersuup pujoralammik illulluunniit atortuinik mingutsinneqarnissaa pinngitsoortinniarlugu immikkut ittumik nakkutilliisoqarpat.
  Imm. 7.  Killeqarfik 1-imi illut pioreersut allineqarsinnaapput.
  Imm. 8.  Killeqarfik 1-imi uuliamik illunik kiassaanermut atorneqartussamik tankini taakkununnga naleqqussakkani uninngatitsisoqarsinnaavoq.
  Imm. 9.  Kommunip tankit uninngatitsiviit taakkulu aqqusersuutaasa tatsimut imeqarfimmut Tasersuarmut mingutsitsinissamut ulorianartorsiortitsinnginnissaat nakkutigissavaa.
  Imm. 10.  Imm. 8 naapertorlugu misissuisarnerit minnerpaamik ukiut pingasukkaarlugit pisassapput, tassanilu illut silataannilu nunaminertat qaavi ilanngullugit misissorneqartassapput. Mingutsitsisoqarneranik pasitsaassaqartoqartillugu erngerluni misissuisoqartassaaq.

Killeqarfik 2-imut maleruagassat immikkut ittut

  § 5.  Killeqarfik 2 inuussutissarsiutinik ingerlataqarfiuvoq, 2020-p naanissaata tungaanut sanasut suliffeqarfiinik, entreprenørit suliffeqarfiinik, ujaqqerinermik, suliffissuarnik imaluunniit inuussutissarsiutinik avatangiisinut inatsimmi kapitali 5-imut ilaasunik ingerlatsiviusinnaasoq.
  Imm. 2.  Killeqarfik 2-mi qamutit assakaasullit sakkullu motoorillit atorneqarsinnaapput.
  Imm. 3.  Killeqarfik 2-mi illunik, aqqusinernik aqqusineeqqanillu sanasoqarsinnaavoq.
  Imm. 4.  Killeqarfik 2-mi illut pioreersut allineqarsinnaapput.
  Imm. 5.  Killeqarfik 2-imi illunik isaterisoqarsinnaavoq, tatsip imeqarfiup Tasersuup pujoralammik illulluunniit atortuinik mingutsinneqarnissaa pinngitsoortinniarlugu immikkut ittumik nakkutilliisoqarpat.
  Imm. 6.  Suliffeqarfiit imm. 1-imi taaneqartut 2020-p naanissaata tungaanut killeqarfik 2-mi ingerlanneqarsinnaapput, 2020 nallertinnagu kussinermik ruujorimilluunniit, killeqarfik 2-mi nunap qaavaniit imaanut kuummulluunniit, tatsimut imeqarfimmut Tasersuarmut kuunngitsumut kuuffissamik sanasoqarsimappat.

Killeqarfik 3-imut maleruagassat immikkut ittut

  § 6.  Illiniliorfissatut nalunaarsugaq ilanngussaq 2-mi takutinneqartoq aqqutigalugu sisoraatinik ujakkartartunut illiniliornermut illiniliuutinik qamuteralannilluunniit atuinissamut kommuni akuersissuteqarsinnaavoq.
  Imm. 2.  Illiniliuutit imm. 1-imi taaneqartut sikukkooqqusaanngillat.
  Imm. 3.  Qamuteralaat imm. 1-mi taaneqartut taamaallaat tatsip imeqarfiup Tasersuup sikuatigut angalasinnaapput, oqartussaasut akisussaasuusut misissuereernerminni siku qajannaallisimasoq nalunaarutigisimappassuk
  Imm. 3.  Tasersuaq kaajallallugu pisuinnaat aqqusernat pioreersoq qisunnik ikaartarfilersugaalluni pitsanngorsarneqarsimavoq. Kommunalbestyrelsip suliniuteqarneratigut taakku aserfallatsaalineqarsinnaapput. Atortussat tamatumunnga atorneqartussat killeqarfiup iluanut nammallugit assartorneqassapput, imaluunniit illineq imm. 1-mi taaneqartoq aqqutigalugu illiniliuutinik qamuteralannilluunniit assartorneqassallutik.

 
Atuutilerfia ikaarsaarnermullu aalajangersakkat

  § 7.  Nalunaarut 3. juni 2016-imi atuutilersinneqarpoq.

Namminersorlutik Oqartussat, ulloq 1. juni 2016

Mala Høy Kúko

/

Mette Skarregaard Pedersen