Aalisarneq pillugu Inatsisartut inatsisaanni nr. 18-imi, 31. oktober 1996-imeersumi § 9-mi, imm. 1, § 10-mi, imm. 1-imi, nr. 4, § 25-mi, imm. 1, §§ 26, 27 kiisalu § 33-imi, imm. 2, Inatsisartut Inatsisaanni nr. 12-imi, 6. november 1997-imi allanngortinneqartumi, Inatsisartut Inatsisaanni nr. 6-imi, 20. maj 1998-imi, Inatsisartut Inatsisaanni nr. 8-mi, 22. november 2011-imi kiisalu Inatsisartut Inatsisaanni nr. 18-imi, 3. juni 2015-imi kingullermik allanngortinneqartut naapertorlugit aalajangersarneqarpoq:

 

Atuuffia

 

  § 1.  Nalunaarut Kalaallit Nunaanni aalisakkanik aalisakkanillu tunisassianik siullermeerluni pisinermut atatillugu nalunaarutiginnittarnermut atuuppoq, aamma aalisakkat Kalaallit Nunaanni pisiortortartunut tunineqarneq ajortut taakkununnga ilaapput.
  Imm. 2  Nalunaarut kalaallit aalisariutaasa nunani allani tulaassisarnerannut, aalisariutit nunanit allaneersut Kalaallit Nunaanni akuersissut atorlugu aalisakkanik nunani allani tulaassisarnerannut, aamma siullermeertumik kaaviiaartitaqarneq sioqqullugu avammut niuernissaq siunertaralugu Kalaallit Nunaanni aalisariutit tulaassisarnerannut atuuppoq.

Nassuiaatit

 

  § 2.  ”Aalisakkanik tunisassiat” ima paasineqassapput uumasut imarmiuusut taakkunanngalu tunisassiat tamarmik. Tassunga aamma immami miluumasut, timmissat imarmiut, koralit, pupiit, taakkunanngalu tunisassiat tamarmik ilaapput.
  Imm. 2.  ”Aalisariut” ima paasineqassaaq aalisarnermut atatillugu atorneqartoq imaani nunamiluunniit assartuut sunaluunniit.
  Imm. 3.  ”Pisiortortoq” ima paasineqassaaq aalisakkanik tunisassianik pisiniartartussatut oqartussanit akuerisaq.
  Imm. 4.  ”Aalisartoq” ima paasineqassaaq, kinaluunniit akuersissummik piginnittoq, taamaasillunilu malittarisassat malinneqarnissaannut akisussaasuusoq".
  Imm. 5.  ”Tulaassat annertussusaat” ima paasineqassaaq aalisariummiit usingiarneqarlutik pisisumut tunniunneqartut aalisakkanik tunisassiat annertussusaat tamarmiusut kiilunngorlugit.
  Imm. 6.  Taaguut ”tulaassineq” atorneqartarpoq aalisariummiit aalisakkanik tunisassianik usingiarnerit suulluunniit, annertussutsit nuunneqartut tamarmik usiuneri imaluunniit usit ilaannarinerai apeqqutaatinnagu, aamma umiarsualivimmi imaluunniit imaani usingiartoqarnersoq apeqqutaatinnagu.
  Imm. 7.  ”Sapaatip akunnera” ima paasineqassaaq piffissaq ataasinngorneq nal. 00:00-imiit sapaammut nal. 24:00-imut Kalaallit Nunaata Kitaani nalunaaqutaq malillugu.
  Imm. 8.  ”Aalisariarluni angalaneq” ima paasineqassaaq aalisariutip useqarnani aalisarnermik aallartitsineraniit aalisariutip tamakkiisumik usingiarneqarnissaata tungaanut piffissaq atorneqartoq.

Aalisartup pisussaaffii

 

§ 3.  Inuit ingerlatseqatigiiffiilluunniit pisiortortumut tulaassisut, ilanngussaq 1-imi paasissutissanik allassimasunik imaqartunik tulaassinermik nalunaarummik tunniussillutillu atsiugaqassapput.
  Imm. 2.  Aalisakkanik tunisassiat saniatigut, imm. 1-imi taaneqartut inuit ingerlatseqatigiiffiillu aamma aalisakkanit tunisassianut tamanut tulaanneqarneq ajortunut paasissutissanik tunniussisassapput.

Sinerissamut qanittumi aalisarneq

 

§ 4.  Angallatit 75 BRT / 120 BT inorlugit angissusillit angallatit allattaaviinut allattuinissamut pisussaaffillit, Kalaallit Nunaanni pisiortortumut tulaassuisut, aalisariarneq tamaat pisanut allattaavinnik tulaassinermi pisiortortumut tunniussisassapput.

 

Avataasiorluni aalisarneq

 

  § 5.  Angallatit 75 BRT / 120 BT sinnerlugu angissusillit angallatit allattaaviinik tulaassinerup kingorna ingerlaannartumik Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA) nassiussisassapput.
  Imm. 2.  Angallatinut kalaallit nunaanneersunut nunani allani usingiartunut umiarsuaatileqatigiiffik tulaassinerup kingorna akunnerit 48 iluanni tulaanneqartut annertussusaannut uppernarsaammik KANUAANA-mut nassiussisassaaq, tak. ilanngussaq 1.
  Imm. 3.  Aalisariutinut nunanit allaneersunut Kalaallit Nunaanni akuersissut atorlugu aalisartunut nunanilu allani usingiartunut umiarsuaatileqatigiiffik tulaassinerup kingorna akunnerit 48 iluanni tulaanneqartut annertussusaannut uppernarsaammik KANUAANA-mut nassiussisassaaq, tak. ilanngussaq 1.
  Imm. 4.  Angallatinut siullermeertumik kaaviiaartitaqarneq sioqqullugu avammut niuernissaq siunertaralugu Kalaallit Nunaanni usingiartunut umiarsuaatileqatigiiffik tulaassinerup kingorna akunnerit 48 iluanni tulaanneqartut annertussusaannut uppernarsaammik KANUAANA-mut nassiussisassaaq, tak. ilanngussaq 1.

 

  § 6.  Inuit aamma ingerlatseqatigiiffiit pisiortortumut tulaassisut, tunitsivimmiit tunisinermut uppernarsaammik imaluunniit allatigut uppernarsaataasinnaasumik tunisat annertussusaannik allaffigineqarsimasumik piniartassapput.

 

Pisiortortup pisussaaffii

 

  § 7.  Aalisakkanik tunisassianik tulaassinermi ilanngussaq 1-imi oqaatigineqartutut pisiortortut paasissutissanik KANUAANA-mut tunniussisassapput.
  Imm. 2.  Aammattaaq pisiortortut pisat tunineqanngitsut aalisartumilli § 3 naapertorlugu paasissutissiissutigineqartut pillugit paasissutissanik nalunaarsuisassapput ingerlateqqillugillu.
  Imm. 3.  Kinaluunniit, paasissutissanik KANUAANA-mut nassiussisussaq elektronikkikkut nassiussisassaaq KANUAANA-p innersuussutai malillugit.
  Imm. 4.  Ukiup ingerlanerani allanut naleqqiullugu paasissutissanik ikittuinnarnik taamaallaat nassiussisimasunut, imaluunniit qaammammut annerpaamik tulaassinernik 50-inik tigusisimasunut ukiumullu 1 mio. kr.-it inorlugit kaaviiaartitaqartunut imm. 3-mut ilaatitsinnginnissamik KANUAANA inunnut suliffeqarfinnullu nalunaaruteqarsinnaavoq.

 

  § 8.  Paasissutissat tamarmik KANUAANA-mut nassiunneqartussat oqimaalutaanermik tunngaveqassapput.
  Imm. 2.  Uuttortaaneq uuttortaatinik akuerineqarsimallutik nakkutigisaasunit isumagineqartassaaq. Kapisillit, uumasut miluumasut imarmiut timmissallu imarmiut kisitsisinngorlugit nalunaarutigineqassapput.

 

  § 9.  Paasissutissat, KANUAANA-mut nassiunneqartussat, paasissutissat ilaasortamut ataatsimut tunngasuuppata, aamma suleqatigiiffimmut ilaasortaanermut piumasaqaatinit paasissutissat ingerlateqqinneqarsinnaasut takuneqarsinnaappat, tamannalu ilaasortap allakkatigut akuerisimappagu, taakkua aalisarnermik kattuffimmut ingerlateqqinneqarsinnaapput.
  Imm. 2.  Pisiortorneq aamma pisassiissutinit qaqinneqartut pillugit takussutissianik KANUAANA tamanut saqqummiussisinnaavoq.

 

  § 10.  Pisiortortup paasissutissat § 5 imm. 1-3 naapertorlugit tigusimasani KANUAANA-mut ingerlateqqittassavai. Sapaatip akunnerata siulianit paasissutissiissutaasut ataasinngornerit tamaasa Kalaallit Nunaata Kitaani nalunaaqutaq malillugu nalunaaqutaq 12 sioqqullugu nassiunneqartassapput. 
  Imm. 2.  Pisiortortoq aamma paasissutissanik nassiussissaaq sapaatip akunnerata siuliani tulaassisoqarsimanngippat.
  Imm. 3.  Pisiortortoq piffissami sivisuumi matoqqappat, soorlu suliassaaleqinermut atatillugu, tamanna KANUAANA-mut nalunaarutigineqassaaq. Aammattaaq pisiortorneq aallarteqqinneqarpat pisiortortoq KANUAANA-mut nalunaaruteqassaaq.
  Imm. 4.  Tulaassinermik nalunaarutit pisiortortumit sivikinnerpaamik ukiuni pingasuni toqqortarineqassapput. KANUAANA-p tulaassinermut nalunaajaatit nuunnerinik nassitsivigineqarnissaminik piumasaqaateqarsinnaavoq.
  Imm. 5.  § 5, imm. 1 naapertorlugu tiguneqartuni angallatit allattaaviani pisineq pillugu naqitsissut, ateq aamma ulloq pisiortortumit allanneqartassapput.  
  Imm. 6.  Sapaatip akunneranut qaangiuttumut angallatit allattaavii ataasinngornerit tamaasa nassiunneqartassapput. Angallatit allattaavii immikkut frimærkilerlugit allakkat puuini KANUAANA-mut nassiunneqassapput imaluunniit toqqaannartumik tunniunneqarlutik. Apeqqutilliisoqartillugu allakkat puui KANUAANA-mit tunniunneqassapput.
  Imm. 7.  Paasissutissat, imm. 1 aamma 4 naapertorlugu akulikinnerusumik nassiunneqartarnissaat KANUAANA-mit piumasarineqarsinnaavoq.

Nakkutilliineq

 

  § 11.  Nunami namminermi nunanilu tamalaani nakkutilliinermi maleruagassat atortinnissaat siunertaralugu aalisakkanik tunisassiat aalajangersimasut imaluunniit sumiiffinnit aalajangersimasuniit pisat tulaanneqarfissaannik umiarsualivinnik aalajangersimasunik KANUAANA toqqaasinnaavoq.

Pineqaatissiissutit

 

  § 12.  §§ 3, 4, 5, 6, 7, 8 aamma 10-mik unioqqutitsisoq pinerluttulerinermi inatsimmi maleruagassat malillugit akiliisinneqartassaaq.
  Imm. 2.  Taamatuttaaq nalunaarut naapertorlugu peqqussutaasunik nalunaaruteqanngitsoornerit imaluunniit eqqunngitsunik nalunaaruteqarneq imaluunniit salloqittaalluni paasissutissiineq pineqaatissiissutaasinnaapput.
  Imm. 3.  Inatsisitigut pisinnaatitaasut pisussaatitaasullu taamaaqataannik pinerluttulerinermi inatsimmi maleruagassat malillugit imm. 1-imut ilaapput.

Atortuulersitsineq

 

  § 13.  Nalunaarut atuutilerpoq ulloq 5. april 2016-imi.
  Imm. 2.  Peqatigisaanik aalisakkanik aalisakkanillu tunisassianik tunisisarnermik nalunaarutiginnittarneq pillugu Namminersorlutik Oqartussat nalunaarutaat nr. 16, 22. december 2011-imeersoq atorunnaarsinneqarpoq.

 

 

Namminersorlutik Oqartussat, ulloq 4. april 2016.

 

 

Karl-Kristian Kruse

/

Jørgen I. Olsen