Ilageeqarneq pillugu Inatsisartut inatsisaat nr. 9, 19. maj 2010-imeersumi § 4, imm 2 Inatsisartut inatsisaannit nr. 2, 29. november 2013-imi allanngortinneqartumit biskoppimillu inassutigineqartumik aalajangersarneqarpoq:

 

  § 1.  Ilageeqarnermut Naalakkersuisoq Biskoppip tamanna pillugu innersuussuteqarneratigut naalagiarnermi ileqqorisassanik, ritualinik, tussiutinik tussiutinullu tapinik akuersissuteqarsinnaavoq.
  Imm. 2. Biskoppi naalagiarnermi ileqqorisassanut, ritualinut, tussiutinut tussiutillu tapiinut ataatsikkut arlariisillugit atorneqartussanut najoqqutassanik aalajangersaasinnaavoq.

 

  § 2.  Akuersissuteqarnermi Ilaageeqarnermut Naalakkersuisup ukua naammassineqarsimaneri qulakkiissavai:
1)  Akuersissutigineqartussatut kissaatigisat kalaallisut aamma danskisut piussasut.
2)  Naalagiarnermi ileqqorisassat, ritualit, tussiutit tussiutillu  tapiisa pilerneri, Biskoppip najoqqutassatut aalajangersagai malillugit oqaluffimmi sulisunik ilagiinnillu  peqataatitsinikkut pissasut.  
3)  Naalagiarnermi ileqqorisassani rituaalinilu uku taaneqassapput:
a)  naalagiarnermi ileqqorisassat ritualilluunniit oqaluffimmi susoqarneratigut atorneqartassanersut.
b)  sumi qaqugukkullu naalagiarnermi ileqqorisassat ritualilluunniit atorneqarsinnaanersut.
c)  naalagiarnermi ileqqorisassat ritualilluunniit sukutsitai pinngitsooratik malitassaanersut suullu ilitsersuutaanersut.
d)  iliuutsit suut naalagiarnermi ileqqorisassanut atatillugu ingerlanneqartassanersut qaqugukkullu tamanna pissanersoq.
e)  allakkat sorliit naalagiarnermi ileqqorisassani ritualiniluunniit ilaatinneqassanersut.
4)  Tussiutit tussiutinik katersat saniatigut ukuninnga imaqassapput:
a)  Martin Lutherip Katekisimuusianit tigulaakkat.
b)  naalagiartitseriaaseq akuerisaasoq (alterbogi) ritualillu akuerisaasut.

 

  § 3.  Naalagiarnermi ileqqorisassat, ritualit, tussiutit tussiutillu  tapii akuerisaasut Kalaallit Nunaanni Ilagiit nittartagaanni Biskoppimik aqunneqartumi ataatsimoortillugit saqqummiunneqassapput. 
  Imm. 2.  Biskoppip oqaluffiup sulisuinik ilagiinnillu peqataatitsinissamut najoqqutassiai aamma Kalaallit Nunaanni Ilagiit nittartagaanni saqqummiunneqassapput.

 

  § 4.  Nalunaarut 1. april 2016 atuutilersinneqassaaq.

 

 

Namminersorlutik Oqartussat ulloq 31. marts 2016

 

 

Nivi Olsen

/

Mikael Kristensen