Unammilleqatigiinneq pillugu inatsisartut inatsisaat (unammilleqatigiinnermut inatsit ) nr. 1, 15. maj 2014-imeersoq § 26, imm. 3 malillugu ima aalajangiineqarpoq:

Kapitali  1
Unammilleqatigiinnermut Ataatsimiititaliaq

§ 1.  Unammilleqatigiinnermut Ataatsimiititaliap unammilleqatigiinnermut inatsisip taassumalu malitsigisaanik maleruagassat aalajangerneqarsimasut  aqunneqarnissaat pingaarnersaallutik akisussaaffigai.
  Imm. 2.  Unammilleqatigiinnermut Ataatsimiititaliaq unammilleqatigiinnermut inatsisip aqunnerani Naalakkersuisunut attuumassuteqanngilaq.

§ 2.  Unammilleqatigiinnermut Ataatsimiititaliaq inuussutissarsiornermik ingerlataqartut atuisartullu soqutigisaannut attuumassuteqanngitsumik siulittaasup tullianik toqqaassaaq. Siulittaasup tullia siulittaasumut sinniisaavoq.
  Imm.  2.  Ilaasortaq toqqarneqarnermini inuussutissarsiornermik ingerlataqartut atuisullu soqutigisaannut attuumassuteqanngitsoq, piffissami atuuffigisamini inuussutissarsiornermi suliffeqarfinnut, inuussutissarsiornermi kattuffinnut imaluunniit atuisartut kattuffiinut taama attuumassuteqalissagaluaruni, taamaalillunilu arlaannut attuumassuteqannginnissamut piumasaqaat eqquutikkunnaarlugu,  ilaasortaq Unammilleqatigiinnermut Ataatsimiititaliamit tunuassaaq. Taamaalereerpat ilaasortaagaluartup piffissap atuuffissaraluata sinneranut Naalakkersuisut ilaasortamik allamik toqqaassapput.
  Imm.  3.  Nalunaarut manna malillugu ilaasortaq nipangiussisimasussaatitaanerminik unioqqutitsisimappat imaluunniit pisussaaffimminik annertuumik sumiginnaasimappat tunuartinneqarnissaa pillugu siulittaasoq Naalakkersuisunut inassuteqarsinnaavoq.
  Imm. 4.  Unammilleqatigiinnermut Ataatsimiititaliamut ilaasortat tamarmik unammilleqatigiinnikkut niueqatigiinnikkullu pissutsinik piffissamut tulluuttunik piginnaaneqassapput kiisalu pissutsinik unammilleqatigiinnermut inatsimmi § 27, 3. pkt.-imi taaneqartut arlaannik arlalinnilluunniit annertuumik ilisimasaqartussaallutik.
  Imm.  5.  Unammilleqatigiinnermut Ataatsimiititaliamut ilaasortat Unammilleqatigiinnermut Ataatsimiititaliami atuunnerminni arlaannut attuumassuteqarnatik sulissapput, taamaalillutillu  ilaasortaanertik arlaannut attuumassuteqanngitsumik peqqissaartumik torersumillu ingerlatissallugu.
  Imm.  6.  Kattuffiit ilaasortanik innersuussisinnaatitaasut, ilaasortassanik Unammilleqatigiinnermut Ataatsimiititaliamut innersuussinerminni imm. 4-mi piumasaqaatit taaneqartut tungaasigut eqquutsitsisinnaasutut tunngavilersuuteqarlutik ilaasortanik innersuussissapput.

§ 3.  Inuussutissarsiornermi kattuffiit makku ataatsimoorlutik Unammilleqatigiinnermut Ataatsimiititaliamut ilaasortamik ataatsimik inassuteqarsinnaatitaapput:
1)  Sulisitsisut
2)  NUSUKA.

Kapitali  2
Piginnaatitaanerit aamma aalajangiinerit

§ 4.  Unammilleqatigiinnermut Ataatsimiititaliaq, Naalakkersuisunit peqquneqarnermigut, unammilleqatigiinnermut inatsit malillugu maleruagassanik aalajangiinissamut atatillugu oqaaseqaateqartassapput.

§ 5.  Unammilleqatigiinnermut Ataatsimiititaliaq nammineq piumassutsini malillugu, nalunaarutiginninnerit malillugit, imaluunniit maalaaruteqarnerit tunngavigalugit sulianik sammisaqarsinnaavoq, tak. unammilleqatigiinnermut inatsimmi § 26, imm. 1, 2. pkt.
  Imm.  2.  Unammilleqatigiinnermut Ataatsimiititaliaq pisortani oqartussanut tunngavilersuuteqarluni oqaaseqaatinik nalunaarutigisat pillugit aalajangiissaaq, unammilleqatigiinnermut ajoqutaasumik sunniutaasinnaasut kiisalu sammisami pineqartumi unammilleqatigiinneq siuarsarniarlugu uparuarlugit, tak. unammilleqatigiinnermut inatsimmi § 2, imm. 4.
  Imm.  3.  Unammilleqatigiinnermut Ataatsimiititaliaq sammisat tunngavissaqarluartut imaluunniit immikkut ittumik pingaaruteqarluinnartut pillugit aalajangiissaaq.
  Imm.  4.  Unammilleqatigiinnermut Ataatsimiititaliap unammilleqatigiinnermut inatsit malillugu aalajangigai ilaasortat kikkut suliap sammineqarnerani peqataasimanersut pillugit paasissutissanik imaqassapput.
  Imm.  5.  Ataatsimiititaliap suliaqarnera pillugu nassuiaatit paasissutissallu Atuisartunut Unammilleqatigiinnermullu Aqutsisoqarfiup tamanut saqqummiussinnaavai.

§ 6.  Unammilleqatigiinnermut Ataatsimiititaliaq suliamik sammisaqarnissamik kinguartitsinissaq pillugu aalajangersinnaavoq, paasissutissanik amerlanerusunik pissarsiornissamut pisariaqarpat, taamattaaq Unammilleqatigiinnermut Ataatsimiititaliaq sulianik immikkut ilisimasaqartut Unammilleqatigiinnermut Ataatsimiititaliap suliarinninneranut peqataaqqullugit qinnuigisinnaallugit. Sulianik ilisimasaqartut suliffeqarfinnut imaluunniit suliffeqarfinnut kattussimasunut suliamik suliarinninnerminni peqataaffigisaminnut attuumassuteqassagunik soqutigisaqassanngillat imaluunniit attuumassuteqarfeqassanngillat.

Kapitali  3
Unammilleqatigiinnermut Ataatsimiititaliap allattoqarfia

§ 7.  Unammilleqatigiinnermut Ataatsimiititaliap allatseqarnikkut suliai Atuisartunut Unammilleqatigiinnermullu Aqutsisoqarfimmit isumagineqartarput.
  Imm.  2.  Atuisartunut Unammilleqatigiinnermullu Aqutsisoqarfiup suliassai pisinnaatitaaffiilu Atuisartunut Unammilleqatigiinnermullu Aqutsisoqarfiup suliassai pillugit Namminersorlutik Oqartussat nalunaarutaani aalajangersarneqarput.

Kapitali  4
Siulittaasup pisinnaatitaaffii

§ 8.  Unammilleqatigiinnermut Ataatsimiititaliap siulittaasuata Unammilleqatigiinnermut Ataatsimiititaliap ataatsimiinneri pilersaarusiussavai aqullugillu, tamatumunngalu atatillugu ilaatigut makkuninnga pisinnaatitaaffeqarluni.
1)  Oqaasiinnartigut ilanngussaqarnissamut sivisussusissaanullu piffissamik aalajangersaanissaq.
2) Oqaasiinnartigut ilanngussaqarnissamik piareersarnermut tunniussinermullu atatillugu suleriaasissaq pillugu aalajangiinissaq, ilanngullugu § 10, imm. 4, uniffik siullermi oqaatigineqartutut sunniuteqartussamik piffissaliussanik aalajangersaaneq.
3) Ilanngussaqarneq pissutsinut suliami aalajangiinissamut pingaaruteqanngitsunut tunngasimappat imaluunniit innersuussippat, oqaasiinnartigut ilanngussaqarnissamik mattussineq.
4)  Sammisat taasissutaasussat inissitsiterneri.
5)  Unammilleqatigiinnermut Ataatsimiititaliap isumaqatiginninniarsimaneri pillugit isummerfigissallugit.
6)  Allannguutissatut siunnersuutit taasissutigineqarnissaasa tulleriiaarnissaannut aalajangiissalluni.
7)  Ataatsimiinnermut oqaluuserisassani allannguissalluni.
  Imm.  2.  Paasissutissanik illersuilluni mianersuussuteqarnissaq pillugu siulittaasoq inaarutaasumik aalajangiissaaq, tak. § 15, imm. 2.
  Imm.  3.  Suliat ataatsimiititaliap aalajangiiffigisassaatut pisussaaffii, ataatsimiititaliallu ataatsimiinnissaanut utaqqissunneqarsinnaanngitsut pillugit siulittaasoq Atuisartunut Unammilleqatigiinnermullu Aqutsisoqarfimmi pisortaq peqatigalugu aalajangiisinnaavoq. Aalajangiinerit taamaattut pillugit Unammilleqatigiinnermut Ataatsimiititaliap tulliani ataatsimiinnerani nalunaarutigineqassapput.
  Imm.  4.  Allaganngorlugit najoqqutassat ataatsimiititaliap ataatsimiinnerani aatsaat agguarneqarnissaat ataatsimiinnerullu naammassinerani utertinneqarnissaat pillugu siulittaasoq aalajangersinnaavoq.

Kapitali  5
Ataatsimiinnerit

§ 9.  Unammilleqatigiinnermut Ataatsimiititaliaq  ulluni ataatsimiiffissatut  Unammilleqatigiinnermut Ataatsimiititaliamit akuerineqarsimasaanni ataatsimiittassaaq, imaluunniit siulittaasup tamatumunnga peqqutissaqartitsinera malillugu qanorluunniit akulikitsigisunik ataatsimiittassaaq.
  Imm.  2.  Ataatsimiinnissanut sivikinnerpaamik ulluni 14-inik sioqqutsisumik kalerriilluni aggersaasoqartassaaq, suliap nukinginnassusia eqqarsaatigalugu siulittaasoq allamik aalajangiisimanngippat.
  Imm.  3.  Ataatsimiinnissamut aggersaaneq oqaluuserisassanik malitseqassaaq, suliat sammineqartussat pillugit sapinngisamik imaqarnerinik nalunaarutiginnittumik, najoqqutassallu sulianik samminninnissanut pisariaqartitanik ilanngussisoqartussaalluni, takuulli § 8, imm. 4.
  Imm.  4.  Ilaasortat ataatsimiinnermi peqataasinnaanngitsut, tamanna pillugu sapinngisamik piaarnerpaamik Atuisartunut Unammilleqatigiinnermullu Aqutsisoqarfimmut nalunaarutigissavaa.
  Imm.  5.  Atuisartunut Unammilleqatigiinnermullu Aqutsisoqarfiup pisortaa, taassumalu aalajangigaa malillugu Atuisartunut Unammilleqatigiinnermullu Aqutsisoqarfiup sulisui allat taasisinnaatitaanatik Unammilleqatigiinnermut Ataatsimiititaliap ataatsimiinneranni peqataasassapput.
  Imm.  6.  Unammilleqatigiinnermut Ataatsimiititaliap ataatsimiinneri tamanut ammasuunngillat.

§ 10.  Unammilleqatigiinnermut Ataatsimiititaliap aalajangiinerani pineqartoq imaluunniit pineqartut, Unammilleqatigiinnermut Ataatsimiititaliap suliami aalajangiinnginnerani Unammilleqatigiinnermut Ataatsimiititaliamut oqaasiinnartigut naatsumik ilanngussisinnaatitaapput. Ilanngussinerup sivisussusaata, siulittaasoq § 8, imm. 1, nr. 1 naapertorlugu allatut aalajangersaasimanngippat, minutsit 10-it qaangissanngilai. Oqaasiinnartigut ilanngussaqarniartoq allanit sinniisoqarsinnaavoq imaluunniit ikiorneqarsinnaalluni.
  Imm. 2. Suliami allaganngorlugit najoqqutassat annertunerpaatigut Unammilleqatigiinnermut Ataatsimiititaliamit ilisimaneqartut naatsorsuutigineqarsinnaavoq, taamaattumillu oqaasiinnartigut ilanngussaqarneq suliami pissusiviusuni inatsisitigullu pisunik annertunerusumik itisiliinermut imaluunniit paasinarsisitsinermut taamaallaat tunngassuteqassaaq. Oqaasiinnartigut ilanngussaqarnermut nangissutigalugu, siulittaasup akuersineratigut, ilanngussaqartumut itisiliisunik apeqquteqarnissaq periarfissaqarpoq.
  Imm. 3.  Oqaasiinnartigut ilanngussisoq imaluunniit ilanngussisut, ataatsimiinnissaq sioqqullugu allakkiamik Atuisartunut Unammilleqatigiinnermullu Aqutsisoqarfimmut nassiussinissamut pisussaaffeqarpoq, tassani pisut pissusiviusut taamatullu inatsisinut tunngasut tamarmik, ataatsimiinnerup nalaani eqqartorneqartussat, takussutissianngorlugit allassimassallutik. Siulittaasup tamatumunnga killissaliussaq erseqqinnerusoq aalajangersassavaa, takuuk § 8, imm. 1, nr. 2.
  Imm. 4.  Unammilleqatigiinnermut Ataatsimiititaliap aalajangiinerani pineqartoq imaluunniit pineqartut, piffissaliussaq siulittaasumit aalajangersarneqartoq, takuuk § 8, imm. 1, nr. 2, malinngippassuk imaluunniit allatigut Atuisartunut Unammilleqatigiinnermullu Aqutsisoqarfik nalunaarfigippassuk, pineqartoq ataatsimiinnermi Unammilleqatigiinnermut Ataatsimiititaliap suliami aalajangiinissaa naatsorsuutigineqartumi najuussinnaanngitsoq, Unammilleqatigiinnermut Ataatsimiititaliamut ataatsimiinnerup nalaani oqaasiinnartigut naatsumik ilanngussaqarnissamut pisinnaatitaaffeqarneq annaaneqassaaq. Taamaattoq pineqartoq taamatut pisoqartillugu tamatumunnga taarsiullugu Unammilleqatigiinnermut Ataatsimiititaliami ataatsimiinnissaq sioqqullugu Atuisartunut Unammilleqatigiinnermullu Aqutsisoqarfiup ataatsimeeqatiginissaanik neqeroorfigineqassaaq. Atuisartunut Unammilleqatigiinnermullu Aqutsisoqarfiup Unammilleqatigiinnermut Ataatsimiititaliaq pineqartumik ataatsimeeqateqarneq pillugu ilisimatissavaa.
  Imm. 5.  Ataatsimiinnermit Unammilleqatigiinnermut Ataatsimiititaliap suliami aalajangiinissaanik naatsorsuutigineqartumit, Unammilleqatigiinnermut Ataatsimiititaliap aalajangiinerani pineqartoq imaluunniit pineqartut takkutinngitsoorpata, Unammilleqatigiinnermut Ataatsimiititaliaq tunngavissat pigineqartut tunngavigalugit suliami aalajangiisinnaavoq.
  Imm. 6.  Unammilleqatigiinnermut Ataatsimiititaliap aalajangiinerani pineqartoq imaluunniit pineqartut, taamaallaat oqaasiinnartigut ilanngussaqarnissamut imaluunniit ilanngussaqarnissanut, aammalu tassunga atatillugu apeqqutissaasinnaasunut atatillugu Unammilleqatigiinnermut Ataatsimiititaliami ataatsimiinnerup nalaani najuussinnaatitaapput.

Kapitali  6
Oqaluuserisassat

§ 11.  Unammilleqatigiinnermut Ataatsimiititaliap ataatsimiinnerini oqaluuserisassani immikkoortutut aalajangersimasutut makku ilaassapput:
1)  Unammilleqatigiinnermut Ataatsimiititaliaq  maleruagassat malillugit aggersarneqarsimasoq pillugu siulittaasup nalunaarutiginninnera, ataatsimiititaliarlu aalajangiisinnaassuseqarnersoq, kiisalu ilaasortat ilaat arlaannut attuumassuteqartuunersut.
2)  Unammilleqatigiinnermut inatsisip ulluinnarni aqunneqarnera pillugu Unammilleqatigiinnermut Ataatsimiititaliaq sinnerlugu Atuisartunut Unammilleqatigiinnermullu Aqutsisoqarfiup pisortaanit nalunaarut.
  Imm.  2.  Tamakku saniatigut  suliat ingerlaavartut apeqqutillu allat unammilleqatigiinnermut inatsisip nassuiarnissaanut tunngasut sammineqarnissaat pillugu Unammilleqatigiinnermut Ataatsimiititaliaq piumasaqarsinnaavoq

Kapitali  7
Taasisarnermi maleruagassat

§ 12.  Siulittaasoq, taassumaluunniit najuutinnginnerani siulittaasup tullia, ikinnerpaamillu ilaasortat arfiniliusut  (6) sinneri pingasut (3) najuutsillugit Unammilleqatigiinnermut Ataatsimiititaliaq aalajangiisinnaassuseqarpoq.
  Imm.  2.  Unammilleqatigiinnermut Ataatsimiititaliaq taasinermi nalinginnaasumik amerlanerussuteqarnikkut aalajangiisarpoq. Taasinerit amerlaqatigiinnerini, sulittaasup taassumaluunniit najuutinnginnerani siulittaasup tulliata taasinera aalajangiisuussaaq.

Kapitali  8
Allattuiffiit Protokol

§ 13.  Unammilleqatigiinnermut Ataatsimiititaliap ataatsimiinnerini tamani Atuisartunut Unammilleqatigiinnermullu Aqutsisoqarfik protokolimut allattuissaaq, tassani makku allattorneqassallutik:
1)  Suliat sammineqarnerini ilaasortat kikkut peqataasimanersut.
2)  Sulianut ataasiakkaanut tunngatillugu Unammilleqatigiinnermut Ataatsimiititaliap aalajangiineri. Taasisoqarnerani taasinerit kisitsisitai allanneqassapput.
3)  Unammilleqatigiinnermut Ataatsimiititaliap aalajangernermut tunngavilersuutaa, tunngavilersuut suliap aalajangiiffigineqarnissaanut Atuisartunut Unammilleqatigiinnermullu Aqutsisoqarfiup missiliuutaanit allaanerusimappat.
4)  Ikinnerussuteqartut isummernerat, pisariaqartitsinerlu malillugu tamatumunnga tunngavilersuutit.
5)  Arlaannut attumassuteqartuuneq pillugu aalajangerneq. Ilaasortaq arlaannut attuumassuteqartuusutut isigineqartoq, arlaannut attuumassuteqartuuneq pillugu apeqqummut tunngasoq Unammilleqatigiinnermut Ataatsimiititaliap aalajangigaa pillugu akerliliinini protokolinut ilanngullugu allanneqarnissaa piumasarisinnaavaa.
  Imm.  2.  Unammilleqatigiinnermut Ataatsimiititaliamut ilaasortat ataatsimiissimanerup kingorna kingusinnerpaamik ullut 14-it qaangiutinnginnerini protokolinut allattuiffiit assilinerinik nassinneqarsimassapput. Ilaasortanit ataatsimiinnermi peqataasimasunit protokolimut allassimasut pillugit akerliliissutit aamma naqqiutissatut siunnersuutit protokolip tigoreerneranit kingusinnerpaamik ullut 7-it qaangiutinnginnerini allaganngorlugit Atuisartunut Unammilleqatigiinnermullu Aqutsisoqarfimmut nassiunneqassapput.
  Imm.  3.  Protokoli tamanut saqqummiunneqartussaanngilaq.

Kapitali  9
Arlaannut attuumassuteqarneq

§ 14.  Unammilleqatigiinnermut Ataatsimiititaliamut ilaasortaq suliap sammineqarnerani, pisortat ingerlatsineranni sulianik sammisaqartarneq pillugu inatsisartut inatsisaat malillugu ilaasortaq suliami arlaannut attuuumassuteqaruni aalajangiisinnaatitaanngilaq, aalajangiinermi peqataasinnaanngilaq imaluunniit suliap sammiuneqarnerani arlaatigut peqataasinnaanani.
  Imm.  2.  Ilaasortaq pissutsinik nammineq suliamut arlaatigut attuumassuteqarsinnaanerminut nalornissutaasinnaasoq pillugu ilisimaleruniuk tamanna pillugu piaarnerpaamik Atuisartunut Unammilleqatigiinnermullu Aqutsisoqarfik nalunaarfigissavaa.
  Imm.  3.  Ilaasortaq pineqartoq peqataatinnagu taanna arlaanut attumassuteqarnersoq pillugu Unammilleqatigiinnermut Ataatsimiititaliaq aalajangiissaaq.

Kapitali  10
Nipangiussisimasussaatitaaneq

§ 15.  Unammilleqatigiinnermut Ataatsimiititaliamut ilaasortat, sulianullu immikkut ilisimasallit § 6-imi taaneqartut, pisortat ingerlatsineranni sulianik sammisaqartarneq pillugu inatsisartut inatsiaani maleruagassat malillugit nipangiussisimasussaatitaanermik malinnittussaapput. Nipangiussisimasussaatitaanermut ilaapput paasissutissat suulluunniit, ilaasortap pineqartup imaluunniit sulianik immikkut ilisimasallit Unammilleqatigiinnermut Ataatsimiititaliami atuunnerminnut atatillugu ilisimalersimasaat, assersuutigalugu tamakkununnga ilaallutik suliffeqarfiit aningaasarsiornikkut niuernikkullu atugaat pillugit paasissutissat, kiisalu paasissutissat allat suliffeqarfimmut pineqartumut pingaaruteqartut.
  Imm.  2.  Suliffeqarfiup paasissutissanik teknikkimut tunngasunik saqqummiussinerani, tamakkununnga ilaallutik ilisimatusarnerit, tunisassioriaatsit, tunisassiat kiisalu ingerlatsinermi niuernermilu isertuussat, unammilleqatigiinnermut inatsimmi § 30 malillugu inuk paasissutissanik Unammilleqatigiinnermut Ataatsimiititaliamut saqqummiussisussaq, Unammilleqatigiinnermut Ataatsimiititaliap siulittaasuanut piumasaqarsinnaavoq, paasissutissat tunniunneqassanngitsut imaluunniit tamanit pissarsiarineqarsinnaassanngitsut, tamakkununngattaaq ilaallutik Unammilleqatigiinnermut Ataatsimiititaliamut ilaasortat. Paasissutissat qanoq annertutigisumik qanorlu ilusilerlugit saqqummiunneqartariaqarnersut pillugit siulittaasoq inaarutaasumik aalajangiissaaq.

Kapitali  11
Atuutsinneqalerfissaa

§ 16.  Nalunaarut manna atuutsinneqalissaaq ulloq 15. aggusti 2015.
  Imm.  2.  Tamatumunnga ilutigitillugu Unammilleqatigiinnermut Ataatsimiititaliap suleriaasissaa taassumalu suliassai pillugit Namminersornerullutik Oqartussat nalunaarutaat nr. 2, 1. februar 2008-meersoq atorunnaarsinneqarpoq.

Namminersorlutik Oqartussat, ulloq 23. juuli 2015.

Vittus Qujaukitsoq

/

Jørn Skov Nielsen