Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersumi kingusinnerusukkut allannguuteqartinneqartumi § 28, imm. 3 naapertorlugu aalajangersarneqarpoq:

Siunertaq atuuffialu

§ 1.  Nalunaarut Sisimiut eqqaanni imeqarfiup killeqarfiinut atuuppoq.
Imm. 2.  Nalunaarutip siunertaraa Sisimiut eqqaanni imeqarfiusut mingutsinneqarsinnaanerisa killilersimaarniarneqarnissaa. Mingutsitsisoqaratarsinnaaneranik killilersimaarinninniarneq taanna pissaaq, imeqarfiup killeqarfiata iluani illersuinissamut killeqarfinnik immikkut ittunik pilersitsinikkut, aamma imeqarfiup killeqarfiata iluani sulianut ukununnga maleruagassiuinikkut:
1)  Sisoraatinik arpanneq.
2)  Qamuteralannik sisorartartunullu illiniliuutinik ingerlaarneq.
3)  Alanngorsuarmi sisorartarfimmik ingerlatsineq.
4)  Orsussamik assartuineq, toqqortaqarneq atuinerlu.

Sisimiut eqqaanni imeqarfiup killeqarfiata iluani illersuinissamut killeqarfiit immikkut ittut

§ 2.  Kuunniit tatsiniillu 30 meterit iluanni tatsit, kuuit sumiiffiillu immikkut ittumik illersuivittut killeqarfiupput.

Sisimiut eqqaanni imeqarfiup killeqarfiani qamuteralannik ingerlaartarneq 

§ 3.  Taamaallaat sumiiffinni ukunani qamuteralannik ingerlaartoqarsinnaavoq:
1) Qamuteralannut illinerni 10 meterinik silissusilinni, tamatumunnga atugassatut nalunaaqutsersorneqarsimasuni.
2) Sungiusarnissamut immikkoortuni, tamatumunnga atugassatut nalunaaqutsersorneqarsimasuni
Imm. 2. Kommunalbestyrelsi sumiiffinni imm. 1-imi taaneqartuni ersarissumik nalunaaqutsersuissaaq. Qamuteralaat illerni sungiusarfiillu taamatut nalunaqutsersuisoqariinngippat atorneqassanngillat.
Imm. 3.  Immikkut ittumik illersuiviusunut killeqarfiit iluanni ingerlaarnissaq sapinngisamik pinngitsoorniarneqassaaq.
Imm. 4.  Qamuteralannut illiniliornermi immikkut ittumik illersuiviusunut killeqarfiit aqqusaarneqartariaqarpata, kommunalbestyrelsip aqqutissaq peqqissaartumik nalunaaqutsissavaa.
Imm. 5. Tatsini sikusimasuni ingerlaarneq taamaallaat pisinnaavoq, kommunalbestyrelsip misissuereernermigut siku qajannaatsutut nalunaarutigisimappagu.

Sisimiut eqqaanni imeqarfimmut killeqarfiup iluani sisorartartunut illiniliuutinik ingerlaartarneq

§ 4.  Sisorartartunut illiniliuutinik ingerlaarneq taamaallaat pisinnaavoq, ilanngussaq 1-imi sisoraatinik arpattartut illinissaattut imaluunniit qamuteralaat illinissaattut nalunaarsorneqarsimasuni, kiisalu Alanngorsuarmiittumi sisorartarfimmi.
Imm. 2.  Sisoraatinik arpattartut illerni imm. 1-imi taaneqartut sisorartartunut illiniliuutit atorlugit aatsaat suliarineqarsinnaapput, kommunalbestyrelsi sisoraatinik arpattartut illineqarfissaannik ersarissunik nalunaaqutsersuisimappat.
Imm. 3.  Tatsit sikuisigut sisorartartunik illiniliuutinik aatsaat ingerlasoqarsinnaavoq, kommunalbestyrelsip misissuereernermini siku isumannaatsoq nalunaarutigisimappagu.
Imm. 4  Illiniliornermi immikkut ittumik illersuinissamut killeqarfiit aqqusarneqarnissaat pisariaqarpat, kommunalbestyrelsi aqqutissamut ersarissumik nalunaaqutsersuissaaq.
Imm. 5. § 3-mi aalajangersakkat apeqqutaatinnagit, sisoraatinik ujakkaartartut illinissaat qamuteralaat atorlugit suliarineqassapput.

Alanngorsuarmi sisorartarfik

§ 5. Sisorartarfik pioreersoq massakkut atorneqarnermisut atorneqaannarsinnaavoq. Sisorartarfik makkuninnga illutaqarlunilu atortulersuuteqarpoq:
1) Illu ataatsimoorussaq igaffilik, kiosk/cafeteriartalik aamma imaartakkamik perusuersartarfilik (Inissisimaffia N66.56.360’, W053.31.972’).
2) Majuartaatip illuarartaa/aqutsiviup illuarartaa (Inissisimaffia N66.56.342’, W053.31.888’).
3) Piffissamik nalunaarsuisartunut illuaraq nr. 1 (Inissisimaffia N66.56.330’, W053.31.998’).
4) Illuaraq aallartarfittut atorneqartartoq nuuttagaq.
5) Containerit pingasut, taakku ilaat ataaseq sarfaliuummik orsussamullu tankimik imaqartoq.
6) Majuartaat innaallagissamik ingerlatilik arfineq marlunnik napparutitalik.
7) Sarfaliuut dieselimik ingerlatilik.
8) Illuaraq nuuttagaq kiisalu illuaqqat perusuersartarfinnut ilassutaasut.
Imm. 2.  Iluarsaanneqarnissamik pisariaqartitsiviusut iluarsaanneqarsinnaasassapput, atortulersuutinik allilerisoqanngippat imaluunniit iluarsaassineq ima annertutigissanngippat, nutaamik sanasoqarneranut nallersuunneqarsinnaasumik pilersitsisoqarluni.
Imm. 3.  Nalornisoqartillugu iluarsaassineq nutaamik sananermut nallersuunneqarsinnaasutut annertutiginersoq Naalakkersuisut aalajangissavaat.

Sisimiut eqqaanni imeqarfiup killeqarfiata iluani orsussamik assartuineq toqqortaateqarnerlu

§ 6.  Orsussamik assartuineq toqqortaateqarnerlu taamaallaat pisinnaavoq orsussamut puussat CE-mik allagartallit atorlugit.
Imm. 2.  Orsussamut puussat qamutinut ikillugit qamuteralaat imaluunniit qimmit atorlugit assartorneqartussat annerpaamik 20 literinik imaqqortussuseqarsinnaatitaapput.
Imm. 3.  Orsussap qamutit, qamuteralannik imaluunniit qimminik uniarneqartut atorlugit assartorneqartussap annerpaaffissaa 100 literiuvoq.
Imm. 4.  Imm. 2-mi aamma 3-mi aalajangersakkat apeqqutaatinnagit, orsussamik sisorartarfimmut assartuinermi orsussamut puussat CE-mik nalunaaqutsikkat atorneqartussat annerpaamik 250 literinik imaqqortussuseqarsinnaaapput. Sisorartarfimmut assartuinermi ataatsimi uulianik tunisassiat annerpaamik 800 literit nassarneqarsinnaatitaapput.
Imm. 5.  Alanngorsuarmi sisorartarfimmi orsussap toqqortaatigineqarsinnaasup annerpaaffissaa 1400 literiuvoq.

Nakkutilliineq

§ 7.  Ingerlaarnermut illernit, sisoraatinik ujakkaarnermut illernit aamma qamuteralannik sungiusartarfiit nalunaaqutsersorneqarneri allanngutsaalineqarnersut kommunalbestyrelsip nakkutigissavaa.
Imm. 2.  Ingerlaarnermut illernit, sisoraatinik ujakkaarnermut illernit aamma qamuteralannik sungiusartarfiit suliarineqarnissaat, aamma § 3 aamma § 4-mi malittarisassat naapertorlugit nalunaaqutsersorneqarnissaat Naalakkersuisut nakkutigissavaat.

 
Atulersitsineq aamma ikaarsaarnermut aalajangersakkat

§ 8.  Nalunaartut ulloq maaji 15-iat 2015 aallarnerfigalugu atuutilerpoq.

Namminersorlutik Oqartussat, ulloq apriili 30-iat 2015

Mala Høy Kúko

/

Mette Skarregaard Pedersen