§ 1

Meeqqanik pinerliisimannginnermut uppernarsaatinik piumasaqaateqartussaatitaaneq pillugu Inatsisartut inatsisaanni nr. 8, 19. maj 2010-meersumi makku allanngortinneqarput:

1.  § 1 ima oqaasertaqassaaq:
”§ 1. Inatsisartut inatsisaat manna atuuppoq pisortat ingerlatsinikkut oqartussaaffiisa tamarmik, aamma inuit inatsisitigullu inuttaasut, inunnik  suliamik suliarineranni meeqqanut 15-it inorlugit ukiulinnut toqqaannartumik attaveqartartussanik atorfinitsitsineranni sulilersitsineranniluunniit, aamma inunnut sulinerminnut atatillugu meeqqat 15-it inorlugit ukiullit aalajangersimasumik akornanniittartunut, taamaalillutillu meeqqanut taakkununnga toqqaannartumik attaveqarsinnaasunut, tak. § 3.”

2.  § 2, imm. 1, naggat siulleq ima oqaasertaqassaaq:
”Inatsisartut inatsisaat manna naapertorlugu meeqqanik pinerliisimannginnermut uppernarsaatit paasineqassapput tassaasut Pinerluuteqarsimasunik Qitiusumik Nalunaarsuiffimmiit paasissutissat, inuit suliamik suliarinerannut ilaatillugu meeqqanut 15-it inorlugit ukiulinnut toqqaannartumik attaveqartartussat atorfinitsinnissaannut sulilersinnissaannulluunniit atatillugu imaluunniit sulinerminnut atatillugu meeqqat 15-it inorlugit ukiullit aalajangersimasumik akornanniittartunut, taamaalillutillu taakkununnga toqqaannartumik attaveqarsinnaasunut atatillugu, piumasarineqarnerata kingorna Naalagaaffiup Politiivinit ingerlateqqinneqarsinnaasut.”

3.  § 3, imm. 1, oqaaseqatigiinni siullerni ”ilinniartitsisutut” kingorna ilanngunneqassapput:
”atuakkanik atorniartitsisartutut, katersugaasivinni sulisutut”.

4.  § 3, imm. 1, nr. 1-imi ”meeqqat atuarfiinut” kingorna ilanngunneqassaaq: ”kommunimi atuakkanik atorniartarfinnut”.

5.  § 3, imm. 1, nr. 2, ima oqaasertalerneqassaaq:
”2) Naalakkersuisut, napparsimavinnut oqartussaasutut, uku ilanngullugit: Dronning Ingridip Napparsimavia, Namminersorlutik Oqartussat ulloq-unnuarlu paaqqinnittarfiutaat, innarluutilinnik paaqqinnittarfiit ilanngullugit, katersugaasiviit aamma Nunatta Atuagaateqarfia.”

6.  § 3, imm. 3-p kingorna, immikkoortutut nutaatut ilanngunneqassaaq:
”Imm. 4. Kommunalbestyrelsip meeqqanik 15-it inorlugit ukiulinnik nalinginnaasumik angajoqqaarsianut, tassanngaannartumik angajoqqaarsiaasartunut, inuussutissarsiutigalugu angajoqqaarsiaasartunut aamma ilaqutariinnik oqilisaasunut inissiinernut atatillugu qularnaassavaa, angajoqqaarsiat imaluunniit ilaqutariinnik oqilisaasut illoqataasa 15-it sinnerlugit ukiullit tamarmik meeqqanik pinerliisimannginnermik uppernarsaateqarnissaat, taamatullu kommunip aaqqissugaanik namminersortutulluunniit angerlarsimaffimmi paarsisartunut, paarsineq paarsisuusup angerlarsimaffiani pigaangat, aammattaaq nuuttoqarnerani.”

Tamatuma kingorna imm. 4-6 tassaalissapput imm. 5-7.

§ 2

Inatsisartut inatsisaat atuutilerpoq 1. august 2015, atuuffigalugillu 1. august 2015-imiit atorfinitsitsinerit sulilersitsinerillu.
Imm. 2.  § 1, nr. 6 atuuppoq angajoqqaarsiaqartitsinernut Inatsisartut inatsisaata atuutilernerata kingorna pilersinneqartunut. Angajoqqaarsiaqartitsinernut Inatsisartut inatsisaata atuutilernera sioqqullugu pilersinneqarsimasunut, § 1, nr. 6 atuutissaaq, inunnut Inatsisartut inatsisaata atuutilernerata kingorna illoqatigiinnut ilaalersunut.

Namminersorlutik Oqartussat,  3. juni 2015

Kim Kielsen