Aalisarneq pillugu Inatsisartut inatsisaanni nr. 18, 31. oktober 1996-imeersumi, ilaatigut Inatsisartut inatsisaatigut nr. 5, 21. maj 2002-meersukkut allanngortinneqartumi, kingullermillu Inatsisartut inatsisaatigut nr. 12, 13. december 2012-imeersukkut allanngortinneqartumi § 10, § 10a, § 13, imm. 2 aamma imm. 3, § 23, § 33, imm. 1, nr. 3 aamma imm. 2 aamma § 34, imm. 3 naapertorlugit aalajangersarneqarpoq:

Atuuffia

§ 1.  Sinerissap titarnerullu aalisarnikkut oqartussaaffiup tunngaviusumik killingata 3 sømilinik avataaniittup akornanni angallatit 75 BRT/120 BT-mit mikinerusut atorlugit inuussutissarsiutigalugu qaleralinniarnermi nalunaarut atuuppoq.

Nassuiaatit

§ 2.  Sinerissap qanittuani qaleralinniarnermi aqutsiveqarfiit ukua aalajangersaavigineqarput:
1)   Aqutsiveqarfik Upernavik, nassuiarneqartoq 71° 30’N avannaanit 75° 00’N kujataanut imartami sinerissamiit aamma titarnerup aalisarnikkut oqartussaaffigisami tunngaviusumik killigititamit 3 sųmilit avataanut.
2)  Aqutsiveqarfik Uummannaq, nassuiarneqartoq 70° 30’N avannaanit 71° 30’N ku-jataanut imartami sinerissamiit aamma titarnerup aalisarnikkut oqartussaaffigisamut tunngaviusumik killigititamit sųmilit pingasut avataanut. Kisiannili 70° 30’N kujataani taamaallaat Ikerasaap Sulluani Qarassallu Imaani aalisartoqarsinnaavoq. Aammattaaq 71° 30’N avannaani kangerlunni aalisartoqarsinnaavoq, kangerlunni ukunani: Karrat, Kangilleq, Inngiata Kangerlua, Ukkusissat Kangerluat, Kangiussap Imaa, Umiiviup Kangerlua aamma Nuugaatsiap tunua.
3)  Aqutsiveqarfik Qeqertarsuup Tunua, Qeqertarsuup Tunua nassuiarneqarpoq 68° 52,5’N avannaanit 70° 30’N kujataanut imartami sinerissamiit aamma titarnerup aalisarnikkut oqartussaaffigisamut tunngaviusumik killigititamit sųmilit pingasut avataanut
4)  Kalaallit Nunaata aqutsiveqarfiit nr. 1-3-mi taaneqartut avataanniittoq aqutsiveqarfimmik Kalaallit Nunaata sinneranik taagorneqassaaq

Inuussutissarsiutigalugu qaleralinniarnermi angallatit

§ 3.  Aqutsiveqarfinni Upernavimmi, Uummannami, Qeqertarsuullu Tunuani angallatit 19,99 BRT / 31,99 BT-mit anginerusut atorlugit inuussutissarsiutigalugu qaleralinniarnissaq akuerisaanngilaq.

Akuersissutit, pisassiissutit aqutsiveqarfiillu

§ 4.  Angallatit 6 meterimik (tamarmiusumik takissusia) taannalu tikillugu angissusillit atorlugit imaluunniit taanna ataallugu angissusilinnik inuussutissarsiutigalugu qaleralinniassagaanni, tamatumunnga akuersissummik peqarnissaq piumasaqaataavoq.
Imm. 2.  Angallatit 6 meter sinnerlugu tamakkiisumik angissusillit atorlugit inuussutissarsiutigalugu qaleralinniassagaanni, tamatumunnga akuersissummik peqarnissaq piumasaqaataavoq.  Akuersissummi angallatit FTJ-normullit imaluunniit GR-normullit suut atorneqarniarnersut allanneqassaaq.
Imm. 3.  Imm. 1 aamma 2 naapertorlugit angallatip angissusaa nalornissutigineqartillugu angallatip angissusaa pillugu nutaamik uuttortaasoqareerpat Aalisarsinnaanermut Akuersissutinik Nakkutilliisoqarfik aalajangiissaaq.
Imm. 4.  Angallammut 6 meter sinnerlugu imaluunniit inorlugu tamakkiisumik angissusilimmut akuersissut aamma qimusseq atorlugu qaleralinniarnermut atorneqarsinnaavoq.

§ 5.  § 2 naapertorlugu aqutsiveqarfinni sisamani sinerissamut qanittumi qaleralittarineqarsinnaasutut pisassiissutit ukiut tamaasa Naalakkersuisut aalajangersartassavaat uumassusilerinikkut siunnersuineq tunngavigalugu.
Imm. 2.  Aqutsiveqarfiit Upernavik, Uummannaq Qeqertarsuullu Tunua eqqarsaatigalugit angallatinut 6 meter sinnerlugit tamakkiisumik angissusilinnut aamma angallatinut 6 meter taannaluunniit inorlugu angissusilinnut immikkut pisassanik aalajangersaasoqassaaq.

§ 6.  Sumiiffinni ukunani pisat § 5 naapertorlugu pisassiissutinut ilaanngillat: 
1) Sumiiffimmi nassuiarneqartoq 71° 30’N avannaanit 72° 30’N kujataanut kiisalu su­miiffimmi nassuiarneqartoq 73° 52,5’N avannaanit 75° 00’N kujataanut Aqutsiveqarfik Upernavimmi.
2) Sumiiffimmi nassuiarneqartoq allorniusat ammukaartut 52°30V kitaani aqutsiveqarfik Uummannami.
3) Sumiiffimmi nassuiarneqartoq allorniusat ammukaartut 51°30V kitaani aqutsiveqarfik Qeqertarsuup Tunuani. 
4) Sumiiffimmi nassuiarneqartoq allorniusat aammukaartut 51°00V kangiani Ilulissat Kangerluani aqutsiveqarfimmi Qeqertarsuup Tunuani pisat qimussimik pisaallutillu assartorneqarpata.

§ 7.  Angallatit 6 meterisut tamakkiisumik angissusillit taannaluunniit ataallugu angissusillit atorlugit qaleralinniarsinnaanermut akuersissutinik ukuninnga tunniussisoqartassaaq:
1) Aqutsiveqarfinni Upernavimmi, Uummannami aamma Qeqertarsuup Tunuani piffissami killiligaanngitsumi pisassat qaffasinnerpaaffissalerlugit aalisarsinnaanermut akuersissutit tunniunneqartassapput
2) Aqutsiveqarfimmut Kalaallit Nunaata sinneranut aalisarsinnaanermut akuersissutit sivisunerpaamik ukiumik ataatsimik killilerlugit tunniunneqartassapput pisarineqarsinnaasullu qaffasinnerpaaffissaannik qummut killiliinngitsumik

§ 8.  Angallatinut 6 meterinik tamakkiisumik angissusilinnut taannaluunniit ataallugu angissusilinnut qaleralinniarnissamut akuersissutit makkua tunniunneqartassapput:
1) Aqutsiveqarfinni Upernavimmi, Uummannami aamma Qeqertarsuup Tunuani akuersissutit piffissamik killilerlugit pisassallu tamakkiisumik qaffasinnerpaaffissalerlugit aalisarsinnaanermut akuersissutit tunniunneqartassapput.
2) Aqutsiveqarfimmi Kalaallit Nunaata sinneranut akuersissutit piffissamik killilerlugit tunniunneqartassapput aalisarneqarsinnaasullu qaffasinnerpaaffissaannik qummut killiliinngitsumik.
Imm. 2.  Akuersissutit imm. 1 naapertorlugu sivisunerpaamik ukioq ataaseq atuuttussatut tunniunneqartassapput

§ 9.  Aqutsiveqarfinni Upernavimmi, Uummannammi aamma Qeqertarsuup Tunuani qaleralinniarnissamut akuersissutit aqutsiveqarfinni taaneqartuni tamani atorneqarsinnaapput, kisianni aqutsiveqarfimmi Kalaallit Nunaata sinneranut pinnani.
Imm. 2.  Aqutsiveqarfimmut Kalaallit Nunaata sinneranut aalisarsinnaanermut akuersissutit taamaallaat aqutsiveqarfimmi Kalaallit Nunaata sinnerani atorneqarsinnaapput.

Inuussutissarsiutigalugu qaleralinniarnermi piniutit atorneqartut

§ 10.  Qassutinik qalorsuarsorlunilluunniit inuussutissarsiutigalugu qaleralinniarneq inerteqqutaavoq.
Imm. 2.  Kommunit ileqqoreqqusaliaanni imm. 1-imi immikkut akuersissuteqarsinnaanermut malittarisassanik erseqqinnerusunik aalajangersaasoqarsinnaavoq, taamaalilluni aalisarfinni killilersorsimasuni qaasusersorluni aalisarnissaq akuerineqarsinnaatillugu.
Imm. 3.  Taamaattorli Aalisarnermut, Piniarnermut Nunalerinermullu Naalakkersuisoq aalajangiisinnaavoq, imm. 2 naapertorlugu qassusersorluni aalisarneq piffissami aalajangersimasumi matuneqassasoq, tamanna pisassiissutitigut pissutsit pisariqartilerpassuk imaluunniit qalerallit tunisassiarineqarnerisa pitsaassusaat pitsanngortinniarlugu.

§ 11.  Aalisarneq unitsinneqartillugu aalisartoq pisussaavoq atortumi qaqinnissaanut pisariaqanngitsumik kinguarsaanani.
Imm. 2.  Aalisartoq atortuminik annaasaminik ujaasinissamut pisussaaffeqarpoq.
Imm. 3.  Aalisarnermut atortut piginnittup aqqanik najugaqarfianilluunniit imaluunniit angallatip aqqanik aamma angallatip normuanik nalunaaqutsersugaassapput. Nalunaaqutsiinermi atortoq imermit allanngortinneqarsinnaasuusanngilaq. Qassutinut nalunaaqutsiussaq qimiaanut qullermut ikkunneqassaaq. Ningittakkanut nalunaaqutsiussaq ningittakkanut ikkunneqassaaq. Nalunaaqutsiussat atorneqartut atortunut atorneqanngitsunut tamanut assingusumik ikkussorneqassapput.
Imm. 4.  Qaleralinniarnermi atortoq atortunut allanut minnerpaamik 50 meterinik ungasitsitigillugu inissinneqassaaq.
Imm. 5.  Atortut marluk ilarussimatillugit, nammineq atortut killorlugit ilarussimasut piiarneqartassapput.

Immikkut ittumik akuersissutit

§ 12.  Aalisarnermut, Piniarnermut Nunalerinermullu Naalakkersuisoq § 4, imm. 1 aamma imm. 2 naapertorlugit aalisarnissamut akuersissummik piumasaqaammut immikkut akuersissuteqarsinnaavoq, Qaanaami najugalinnut nunaqarfiinilu, Illoqqortoormiuni nunaqarfiinilu kiisalu Tasiilami nunaqarfiinilu najugalinnut.

Pineqaatissiissutit

§ 13.  § 3, § 4, imm. 1 aamma imm. 2, § 10, imm. 1, kiisalu § 11-imik unioqqutitsisoqartillugu, akiligassiisoqarsinnaavoq.
Imm. 2.  Inuussutissarsiutigalugu qaleralinniarneq akuersissuteqarfiusup avataani ingerlanneqartoq tassunga ilanngullugu § 8-mik sumiginnaaneq, imm. 1 naapertorlugu akuersissuteqarnani aalisarnertut isigineqassaaq.
Imm. 3.  Qaleralinniarnermut akuersissummi atugassarititaasumik unioqqutitsisoqartillugu akiligassiisoqarsinnaavoq.
Imm. 4.  Imm. 1-3-lu malillugit akiligassiinerit Kalaallit Nunaanni Pinerluttulerinermut inatsimmi malittarisassat naapertorlugit inatsisitigut attuumassutilittut isigineqarsinnaasunut akiligassiissutigineqarsinnaapput.

Atuutilersitsineq

§ 14.  Nalunaarut ulloq 15. september 2014-imi atuutilerpoq.
Imm. 2  Peqatigitillugulu Sinerissap qanittuani qaleralinniarneq pillugu Namminersorlutik Oqartussat nalunaarutaat nr 2, 2 februar 2012-imeersoq atorunnaarsinneqarpoq.

Kalaallit Nunaanni Namminersorlutik Oqartussat, ulloq 28. august 2014.

Finn Karlsen

/

Jørgen Isak Olsen