§ 1

Ilinniarnertuunngorniarneq pillugu Inatsisartut inatsisaanni nr. 13, 22. november 2011-meersumi imatut allannguisoqarpoq:

1.  § 1, imm. 5-6-itut ilanngunneqassaaq:
”Imm. 5.  Ilinniarnertuunngorniarfimmi ilinniartitsissutit ataasiakkaat ilinniartitsissutigineqarnissaat neqeroorutigineqarsinnaavoq.
Imm. 6.  Ilinniarnertuunngorniarfimmi ilinniartitsissutini ataasiakkaani ilinniartitsineq pillugu Naalakkersuisut malittarisassiorsinnaapput, tassunga ilanngullugit neqerooruteqartarneq neqerooruteqarsinnaanerlu”

2. § 1 kingorna ilanngunneqassaaq:
"§ 1a.  Ilinnialernissamut piareersarluni pikkorissarnernik Kalaallit Nunaanni sivikitsumik akunnattumillu sivisussusilimmik ingerlaqqilluni ilinniarnernut isissutaasinnaasunik Naalakkersuisut pilersitsisinnaapput.
Imm. 2.  Ilinnialernissamut piareersarluni pikkorissarnerit pillugit Naalakkersuisut malittarisassiorsinnaapput, tassunga ilanngullugit neqerooruteqartarneq, inissanik aqutsineq, ilinnialersinnaaneq ilinniarnermillu aallartitsineq, aaqqissuussaaneq imarisaalu, nalilersuisarneq uppernarsaasiornerlu, takkuttussaatitaaneq peqataavinnerlu il.il., tapersiilluni ingerlatat aningaasalersuinerlu aamma peqataasut akiliutaat.”

3.  § 57, imm. 2, imatut oqaasertalersorneqassaaq
”Imm. 2.  Suliamik ingerlatsinermi perorsaanermillu piginnaasat pillugit Naalakkersuisut annertunerusumik malittarisassiorsinnaapput, tassunga ilanngullugit suliamik ingerlatsinermi minnerpaamik piumasaqaatit pillugit aamma §§ 58-59-imi piumasaqaatit aalajangersakkat saneqqussinnaanerinut periarfissat pillugit.”

§ 2

Inatsisartut inatsisaat 1. juni 2014 atuutilersinneqarpoq.

Kalaallit Nunaanni Namminersorlutik Oqartussat, 30. maj 2014.

Aleqa Hammond