Aalisarneq pillugu inatsisartut inatsisaanni nr. 18-mi, 31. oktober 1996-imeersumi 23 imm. 2, § 33, imm. 2 aamma § 34 naapertorlugit aamma Inatsisartut inatsisaata allannguutaa nr. 12, 3. december 2012-imeersoq tunngavigalugu Kommuneqarfik Sermersuumi bundgarnersorneq pillugu malittarisassat aalajangersarneqarput.

Nunap iluani atuuffia il.il.

§ 1. Malittarisassat atuuffigaat Kommuneqarfik Sermersooq.

§ 2.  Kommuneqarfik Sermersuumi bundgarnersorneq pillugu aalisartoqarsinnaavoq.
Imm. 2.  Kapisillilli qinnguani bundgarnersorluni aalisartoqaqqusaanngilaq. Inerteqquteqarfiuvoq kangerlummi Quassungaarssuup – Pingup eqinga akornanni titarneq narlumukaartoq atuarlugu, takuuk ilanngussaq 1.

Budgarninik atuinissamut nalunaarneq, inniminniineq il.il.

§ 3. Bundgarninik atuerusuttup tamanna Kommunalbestyrelsimut nalunaarutigissavaa. Nalunaarummi ilisimatitsissutigineqassaaq sumiiffik bundgarninik qassusersorfigerusutaq qularnaarneqassaarlu nalunaaruteqarnerup nalaani sumiiffik bundgarnersorfissaq allamit bundgarnersorfigineqannginnera. Nalunaarut kommunimi Innuttaasunik Kiffartuussivimmut tunniunneqassaaq.
Imm. 2. Kommunalbestyrelsip sumiiffimmi aalisartut piniartullu peqatigiiffiat tusarniaavigissavaa sumiiffimmik bundgarninik aalisarfissamik tunniussinissaq pillugu aalajangiisoqartinnagu.
Imm. 3. Kommunalbestyrelsi bundgarnersorfissaq pillugu aalajangeereerpat, nalunaaruteqartoq natersiutinik qassusersorsinnaalissaaq.
Imm. 4. Sumiiffik bundgarnersorfissaq aalajangiinermiit ukioq ataaseq atorneqarsinnaatitaavoq.
Imm. 5.  Sumiiffik bundgarnersorfissaq atorneqaqqusaanngilaq piffissami decembarip aallaqqaataanit aamma februaarip 28-iata akornanni.

§ 4.  Sumiiffimmik bundgarnersorfimmik sivitsuiniarluni qinnuteqaat Kommunalbestyrelsimut tunniunneqassaaq kingusinnerpaamik ulloq 1. februar. Qinnuteqartoqanngippat sumiiffimmik atuisinnaaneq kipissaaq aalajangiinermi atuuffissatut aalajangerneqartoq naappat, takuuk § 3 imm. 4.
Imm. 2. Imm. 1 naapertorlugu sumiiffik bundgarnersorfissatut inniminnerneqartoq natersiutinik qassusersornerup aallartiffissaani atorneqalersimanngippat, sumiiffik bundgarnersorfissaq allamut tunniunneqarsinnaavoq, tigunissaq illuatungeriit naqitanngorlugu isumaqatigiissutigisimappassuk. Tunniussinermut atatillugu isumaqatigiissut piffissalerneqarsinnaavoq killilimmik.

§ 5.  Aalisartoq sumiiffimmik bundgarnersorfimmik pissarsisimasoq, atorsinnaasani sipporlugit, tamatumannga kommunalbestyrelsimut erngiinnaartumik nalunaaruteqassaaq. Inissat tamatuma kingorna utertinneqartutut isigineqassapput.

Bundgarnersornermi piumasaqaatit

§ 6. Sumiiffimmik bundgarnersorfissamik atuisup sumiiffik ersarissumik nalunaaqutsissavaa nunami nalunaaqutsiilluni. Nalunaaqutsiissummi bundgarnersorfiup aqqa allassimassaaq. Nalunaaqutsiissut nunamiit minnerpaamik 1,5 meterinik portutigissaaq.

§ 7.  Kangerlunni bundgarnersortoqassanngilaq allap qassusersortup qassutaanut sissaq sinerlugu 500 meterinik qaninnerusunik.

§ 8.  Ningittagarsorneq aalisarnerlu inerteqqutaapput bundgarnersorfimmiit 50 meterinik qaninnerusumi.
Imm. 2. Kisarneq inerteqqutaavoq bundgarnersorfimmiit150 meterinik qaninnerusumi.

§ 9.  Sissamut imaanulluunniit eqqaaneq inerteqqutaavoq. Igitassat sulluunniit aamma aalisakkat perlukui ingerlaqqinnermi narsarneqartassapput.

Bundgarninik qaqitsineq

§ 10. Kinaluunniit bundgarnersorunnaartoq pisussaavoq bundgarninik qaqitsinissaminut pissutissaqanngitsumik sivitsorsaanani.

§ 11.  Bundgarnit qaqinneqassapput kangerluk sikutinnagu kingusinnerpaamik ulloq 1. december ukiut tamaasa.

Pineqaatissiissutit il.il.

§ 12.   Malittarisassani § 2 imm. 2, § 3 imm. 1 aamma imm 5, kiisalu § 5-11 unioqqutinneqarpata akiliisitsisoqarsinnaavoq arsaarittoqarsinnaallunilu. Akiliisitaanermi akiliut arsaarinnissutigineqartullu nalingi Landskarsimut akiliutigineqassapput.

§ 13.  Malittarisassat atulissapput ulloq 15.04.2014 aallarnerfigalugu.
Stk. 2.  Tamatuma peqatigisaanik maleruagassat uku atorunnaarput:
1)  Angmassalik Kommunemi natersiutinik qassusersornermi malittarisassat 24. oktober 1980-meersoq.
2) Godthåb Kommunemi bundgarnersornermi malittarisassat  2. marts 1960-meersut, atulersut ulloq 29. marts 1960-mi allanngortinneqartullu ulloq 21. marts 1983-mi, akuerineqarlutillu ulloq 7. juni 1983-mi aamma allanngorteqqinneqartut ulloq 3. juli 2001-mi.

Kommuneqarfik Sermersuumi kommunalbestyrelsimit atuutilersinneqarpoq ulloq 26.11.2013.

____________________________________________

Asii Chemnitz Narup, Borgmesteri i Kommuneqarfik Sermersooq

Namminersorlutik Oqartussat, ulloq 3. april 2014

____________________________________________

Finn Karlsen, Aalisarnermut, Piniarnermut, Nunalerinermullu Naalakkersuisoq