Nukissamik pilersuineq pillugu Inatsisartut peqqussutaanni nr. 14-imi, 6. november 1997-imeersumi § 13, imm. 2 aamma § 21 naapertorlugit aalajangersarneqarpoq:

Kapitali 1
Atuuffissaq nassuiaatillu

§ 1.  Nalunaarummi nukissiuutinit ataavartunit (VE-anlæg), suliffeqarfinnit pilersuisuusunit pigineqanngitsunit pilersuinermut aqqusersuutinut ataatsimoorussanut innaallagissiamut sinneruttumut atassusiinissamut akiliisitsisarnermullu akuersissutit maleruagassiuunneqarput.

§ 2.  Nalunaarummi pineqartunut ilaatinneqanngillat:
1) Nukissiuutit ataavartut, innaallagissamik pilersuinermut aqqusersuutinut ataatsimoorussanut tunisisarnermut atorneqanngitsut.
2) Nukissiuutit ataavartut, kissamik pilersuisuusut.
Imm. 2.  Nukissiuutini ataavartuni sananermut, ikkussuinermut attaviliinermullu teknikkikkut aalajangersakkat akuersissutillu allat suut naammassineqassanersut nalunaarummi maleruagassiuunneqanngilaq, taamaattorli § 10, imm. 1, innaallagissiuutinik attaviliinermut suliffeqarfiup pilersuisuusup piumasaqaataannut tunngasoq takuuk.

§ 3.  Nalunaarummi matumani uku imatut paasineqassapput:
1) Nukissiuutit ataavartut (VE): Nukissiaq, nukissiuutit nutarterisinnaasut atorlugit tunisassiarineqartoq, taakkununngalu anori, seqineq, mallit, imeq il.il. atorlugu nukissiuutit ilaapput.
2) Nammineerluni tunisassiortoq: Nukissiuutinik ataavartunik piginnittoq
3) Pilersuinermi aqqusersuutit ataatsimoorussat: Illoqarfinni nunaqarfinniluunniit innaallagissamik siaruarterinermut aqqusersuutit, suliffeqarfimmit pilersuisumiit atuisumut innaallagissamik nuussiviusartut.
4) Suliffeqarfik pilersuisuusoq: Suliffeqarfik pilersuisuusoq, illoqarfimmi nunaqarfimmiluunniit nammineerluni tunisassiortup nukissiuutinik ataavartunik ingerlatsisuusoq imaluunniit ingerlatsinissamik siunertaqartoq.

Kapitali 2
Qinnuteqartarneq

§ 4.  Nukissiuutinit ataavartunit innaallagissamik pilersuinermut aqqusersuutinut ataatsimoortussanut pilersuinissamut tunisinissamulluunniit qinnuteqaat suliffeqarfimmut pilersuisuusumut tunniunneqassaaq. Qinnuteqaatip imarissavai:
1) Qinnuteqartup aqqa najugaalu imaluunniit suliffeqarfiup aqqa, najugaa CVR/GER normua attaveqarfissanullu paasissutissat.
2) Nukissiuutinut ataavartunut qinnuteqaatigisanut nassuiaat, kiisalu paasissutissat allattorsimaffiat tunisassianullu nassuiaatit attuumassuteqartut.
3) Nukissiuutit ataavartut inissiffissaattut pilersaarutigineqartunut nalunaarsuutit.

§ 5.  Suliffeqarfik pilersuisuusoq nukissiuutit ataavartut § 6-imi aamma § 7-imi taaneqartunik nalinginnaasumik tunisassiornissamut piginnaaneqartut suliffeqarfimmut pilersuisuusumut innaallagissamik pilersuisinnaanersut tunisisinnaanersullu aalajangiissaaq. Nukissiuutit ataavartut, § 8, imm. 1, nr. 1 – 3-mi piginnaasassatut nalinginnaasutut taaneqartut sinnerlugit piginnaasaqartut § 8 naapertorlugu suliarineqassapput.

§ 6.  Nukissiuutinut ataavartunut, nalinginnaasumik 6 kW-t sinnerlugit inoqutigiinnut ataatsinut imaluunniit suliffeqarfimmut pilersuisinnaasunut, imaluunniit 6 kW-t sinnerlugit inissiamut suliffeqarfimmulluunniit 100 m²-nik angissusilimmut pilersuisinnaasunut suliffeqarfiup pilersuisuusup nammineerluni tunisassiortoq suliffeqarfimmut pilersuisuusumut innaallagissamik pilersuinissamut tunisinissamullu akuersissuteqarfigisussaavaa, tamatumani eqqarsaatigisassat annertuut, matuma kinguliani taaneqartut peqqutaallutik itigartitsinissaq tunngavissaqarsimanngippat:
1) Nukissiuutit ataavartut pilersuinerup qularnaassusissaanut sunniuteqarnerluppata, soorlu nukissiuutit najukkami pilersuinermi iluarsiinissamut ajornartorsiortitsippata.
2) Nukissiuutinik ataavartunik attaviliinissaq suliffeqarfiup pilersuisuusup nuussinissamut pisinnaasaq pisariaqartinneqartoq naammassiniarlugu ataatsimoortumik pilersuinermut aqqusersuutinik alliliinissaanik sakkortunerulersitsinissaanilluunniit pisariaqartitsiviuppat.
3) Qinnuteqartoq suliffeqarfimmut pilersuisuusumut akilerneqanngitsunik akiitsoqarpat.
4) Nukissiuutit ataavartut najukkami pilersuinermi aningaasaqarnermut annertuumik sunniuteqarnerlussappata, soorlu nukissiuutit najukkami maannakkut innaallagissamut tunisisarnermut aammalu suliffeqarfiup pilersuisuusup tunisassiorsinnaaneranut naleqqiullugu illoqarfimmi nunaqarfimmiluunniit pilersuinermut aningaasaqarnermut annertuumik ajorseriartitsissappata.
Imm. 2.  Imm. 1, nr. 1-4-mi eqqarsaatigisassat annertuut saniatigut pissutissaqartoqarpat, suliffeqarfik pilersuisuusoq itigartitsisinnaavoq.
Imm. 3.  § 6-imi pissutsit nassuiarneqartut arlaat qinnuteqaammik itigartitsinermut tunngaviusimanersoq pillugu suliffeqarfiup pilersuisuusup qinnuteqartoq nalunaarfigissavaa.

§ 7.  Nukissiuutinut ataavartunut, nalinginnaasumik 6kW-t sinnerlugit inoqutigiinnut ataatsinut imaluunniit suliffeqarfimmut pilersuisinnaasunut, imaluunniit 6 kW-t sinnerlugit inissiamut suliffeqarfimmulluunniit 100 m²-nik angissusilimmut pilersuisinnaasunut suliffeqarfiup pilersuisuusup nammineerluni tunisassiortoq suliffeqarfimmut pilersuisuusumut innaallagissamik pilersuinissamut tunisinissamullu akuersissuteqarfigisinnaavaa, tamatumani eqqarsaatigisassat annertuut, matuma kinguliani taaneqartut peqqutaallutik itigartitsinissaq tunngavissaqanngippat:
1) Nukissiuutit ataavartut pilersuinerup isumannaassusissaanut sunniuteqarnerluppata, soorlu nukissiuutit najukkami pilersuinermi iluarsiinissamut ajornartorsiortitsippata.
2) Nukissiuutinik ataavartunik attaviliinissaq suliffeqarfiup pilersuisuusup nuussinissamut pisinnaasaq pisariaqartinneqartoq naammassiniarlugu ataatsimoortumik pilersuinermut aqqusersuutinik alliliinissaanik sakkortunerulersitsinissaanilluunniit pisariaqartitsiviuppat.
3) Qinnuteqartoq suliffeqarfimmut pilersuisuusumut akilerneqanngitsunik akiitsoqarpat.
4) Nukissiuutit ataavartut najukkami pilersuinermi aningaasaqarnermut annertuumik sunniuteqarnerlussappata, soorlu nukissiuutit najukkami maanna atuinerusumut aammalu suliffeqarfiup pilersuisuusup tunisassiorsinnaaneranut naleqqiullugu illoqarfimmi nunaqarfimmiluunniit pilersuinermut aningaasaqarnermut annertuumik ajorseriartitsissappata.
  Imm. 2.  Imm. 1, nr. 1-4-mi eqqarsaatigisassat annertuut saniatigut pissutissaqartoqarpat, suliffeqarfik pilersuisuusoq itigartitsisinnaavoq.
Imm. 3.  § 7-imi pissutsit nassuiarneqartut arlaat qinnuteqaammik itigartitsinermut tunngaviusimanersoq pillugu suliffeqarfiup pilersuisuusup qinnuteqartoq nalunaarfigissavaa.

§ 8.  Nukissiuutip ataavartup nalinginnaasumik piginnaaneqartup innaallagissiaanik sinneruttumik suliffeqarfimmut pilersuisuusumut pilersuinissamut tunisinissamullu Naalakkersuisut akuersissuteqarsinnaapput, uku qaangerneqarpata:
1) Seqernup qinngornerinik innaallagissiuutini aamma erngup nukinganik innaallagissiuutini 50 kW.
2) Anorisaatini 25 kW.
3) Nukissiuutini ataavartuni nr. 1-imi imaluunniit 2-mi taaneqanngitsuni 11 kW.

§ 9.  Akuersissummut atuuttumut, §§ 4-7 naapertorlugit suliarineqarsimasumut naleqqiullugu annertuunik allannguuteqartoqarsimappat, suliffeqarfik pilersuisuusoq akuersissummik allanngortitsinissamut atorunnaarsitsinissamulluunniit periarfissaqarpoq. Allannguutit annertuut tassaasinnaapput, najukkami innallagissamik pilersuinerup uulia atorlugu innaallagissiornermiit erngup nukinga atorlugu innaallagissiornermut allanngortitsineq imaluunniit najukkami pilersuinermut aningaasaqarnerup annertuumik allannguuteqarnera.
Imm. 2.  Suliffeqarfiup pilersuisuusup allannguutit imaluunniit akuersissutip atorunnaarsinneqarnissaa pillugu atuutsitsisoqalernissaa sioqqullugu sivikinnerpaamik qaammatinik arfinilinnik sioqqutsilluni nammineerluni tunisassiortoq nalunaarfigissavaa.

Kapitali 3
Akuersissutit akuersissuteqarnermullu piumasaqaatit

§ 10.  Suliffeqarfik pilersuisuusoq nukissiuutit ataavartut pilersuinermut aqqusersuutinut ataatsimoorussanut attavilerneqarnissaanut akuersissuteqarnissamut piumasaqaatinik aalajangersaasinnaavoq. Piumasaqaatit tassaasinnaapput:
1) Nukissiuutinut ataavartunut attaviliineq qanoq suliarineqassanersoq.
2) Nukissiuutinut ataavartunut atasumik innaallagissamut uuttuummik ikkussisoqartussaasoq.
3) Innaallagissap qamittoornerani, innaallagissap sakkortussusissaata ajoquteqarnerani il.il. suliffeqarfiup pilersuisuusup sulisuisa tikissinnaasaanik qamittaasiisoqassasoq.
Imm. 2.  Innaallagissamut pilersuissutaasumut akiliisoqassanngitsoq suliffeqarfik pilersuisuusoq aalajangiisinnaavoq, matumani uku atorneqarpata:
1) Atortoq misileraataasoq imaluunniit takusassiaasoq.
2) Nukissiuutit ataavartut sumiiffimmi pingaartumik nukissiuutit ataavartut atorlugit, soorlu erngup nukinga atorlugu, pilersuiffiusumut inissinneqarsimappata.

Kapitali 4
Innaallagissamut suliffeqarfimmut pilersuisuusumut tunineqartumut akiligassat naatsorsorneqartarneri naatsorsuinermullu akit

§ 11.  Innaallagissamut tunineqartumut akiligassanik naatsorsuisoqartassappat, § 10, imm. 2 naapertorlugu innaallagissamut uuttuusiisoqassaaq, innaallagissamik innaallagissamut aqqusersuutinut ataatsimoorussanut tunineqartumik uuttuinermut atorneqartussamik. Innaallagissamut akiligassat akiligassanik naatsorsuisarnermut akit, § 12 naapertorlugu aalajangersarneqartut malillugit naatsorsorneqassapput.
Imm. 2. Suliffeqarfiup pilersuisuusoq tuniniaanermut pilersuinermullu piumasaqaatini akiligassat qanoq iliorluni naatsorsorneqartarnissaannut aalajangersakkanik sukumiisunik aalajangersaasinnaavoq, tassungalu ilaavoq innaallagissamut tunineqartumut akiligassanut naatsorsukkat atuisup innaallagissamut akiligassaanut, aammalu qanoq akulikitsigisumik naatsorsorneqartarneranut naleqqiullugu naatsorsorneqartarnera.

§ 12.  Suliffeqarfiup pilersuisuusup VE atorlugu innaallagissiamut akit, suliffeqarfiup akinut allattuiffianut assigisaanulluunniit aalajangersassavai. Suliffeqarfiup akit pilersuisuusup periaatsit marluusut, nalunaarummut ilanngussaq 1-imi aalajangersarneqarsimasut aappaa malillugu aalajangersartussaavai.

Kapitali 5
Akuersissutinik atuutsitsineq

§ 13.  Nammineerluni tunisassiornermi §§ 5-8 naapertorlugu akuersissummik, aammalu piumasaqaatinik akuersissummi aalajangersarneqarsimasunik sumiginnaasoqarnerani, suliffeqarfik pilersuisuusoq pissutsinik aaqqiinissamik nammineerluni tunisassiortumut peqqusisinnaavoq. Suliffeqarfik pilersuisuusoq nammineerluni tunisassiortup pissutsinik aaqqiisinnaanissaanut piffissamik naammaginartumik sivisussusilimmik aalajangersaassaaq. Piffissaliussatut aalajangersarneqartup iluani nammineerluni tunisassiortup pissutsit iluarsisimanngippagit, suliffeqarfiup pilersuisuusup akuersissut utertissinnaavaa atortullu attaveersinnaallugit.
Imm. 2.  Suliffeqarfiup pilersuisuusup sumiginnaasoqarnerani peqqussutai, suliffeqarfiup pilersuisuusup tuniniaanermut pilersuinermullu piumasaqaataani sukkulluunniit atuuttuni aalajangersarneqartut aamma atorneqassapput.
Imm. 3.  Pilersuinerup isumannaassusiani eqqarsaatigisassani pingaarutilinni pisariaqartinneqarpat, imaluunniit akuersissummi piumasaqaatinik annertuumik unioqqutitsisoqarpat, suliffeqarfiup pilersuisuusup nammineerluni nukissiuutit ataavartut attaveersinnaavai, erniinnaartumillu akuersissut utertissinnaallugu.

Kapitali 6
Suliffeqarfiit pilersuisuusut akigititaat

§ 14.  Suliffeqarfiit pilersuisuusut qinnuteqaammik suliaqarnermut akinik aalajangersaasinnaapput. Suliffeqarfiit pilersuisuusut akigititaanni suliffeqarfiup pilersuisuusup tuniniaanermut pilersuinermullu piumasaqaatai allassimassapput.
Imm. 2.  Suliffeqarfik pilersuisuusoq innaallagissamut uuttuummik, nammineerluni tunisassiornermi innaallagissiamik sinneruttumik uuttuinermut atorneqartussamik ikkussinermut akinik aalajangersaassanngilaq.

Kapitali 7
Maalaaruteqarnissamut aalajangersakkat

§ 15.  Nalunaarut manna naapertorlugu suliffeqarfiit pilersuisuusut aalajangiineri peqqussutaallu pillugit maalaarutit Naalakkersuisunut tunniunneqarsinnaapput.
Imm. 2.  Naalakkersuisunut maalaarut atuuttussanngortitsinermik kinguneqassanngilaq.
Imm. 3.  Maalaarutit tunngavilersugaassapput, aammalu aalajangiinerup maalaarutigineqartup assilineranik ilallugit Attaveqarnermut Pinngortitamullu Naalakkersuisoqarfimmut nassiunneqassallutik.

Kapitali 8
Atuutsitsilernermut aalajangersakkat

§ 16.  Nalunaarut 1. januar 2014-imi atuutilerpoq.

Namminersorlutik Oqartussat, ulloq  9. december 2013

Kim Kielsen

/

Søren Stach Nielsen